Barqaror kelajak sari qadam: Qoraqalpog'istonda iqlimga chidamli ishlab chiqarish tizimlari rivojlanmoqda
1381
“Abu Dabi rivojlanish jamg'armasi” (BAA) tomonidan moliyalashtirilayotgan “Qoraqalpog'istonning qiyin hududlarida barqaror qishloq xo‘jaligi ishlab chiqarish tizimlarini rivojlantirish” buyicha 2023-2025 yillarga mo‘ljallangan loyihasi amalga oshirilmoqda.
Ushbu loyihaning maqsadi - Orol dengizi ekologik inqirozining oqibatlarini yumshatish va iqlim o‘zgarishiga moslashish maqsadida Qoraqalpog'istonning qiyin hududlari uchun barqaror, iqlimga chidamli ishlab chiqarish tizimlarini rivojlantirish va joriy etishdan iborat.
Alohida ta'kidlab o‘tish joiz, ushbu loyiha yaqinda xalqaro Energy Globe Award 2024 nufuzli mukofotining milliy g'olibi deb topildi.
Bugungi kunda Orolbo‘yi xalqaro innovatsiya markazining Mo‘ynoq va Nukus tumanlarida jami 2 gektar maydonda o‘t-emlik galofit o‘simliklarning tajriba-sinov maydonlari tashkil qilindi. Bu maydonlarda turli o‘simlik navlarini jumladan, donli jo‘xorining 23 navi, Afrika tarig'i 6 namuna, jumladan Foxtail Millet va Pearl Millet IP 8418, shuningdek, Bufallo grass, Oq hamda qizil amarant, Loviya Cowpea (IP 9643) namunasi, Moshning 4 navi, Kungaboqarning 3 navi, Makkajo‘xori ekinlarini o‘rganish va moslashtirish jarayonlari amalga oshirilmoqda.
Bularning barchasi Orolbo‘yi hududining ekologik xususiyatlariga moslashtirilgan holda ekilib, o‘rganilmoqda. Loyiha natijalari mintaqa qishloq xo‘jaligida barqaror va iqlimga chidamli tizimlarni yaratishga yordam beradi. Eng asosiysi, bu ekinlar iqlim o‘zgarishiga chidamli bo‘lib, hududdagi oziq-ovqat xavfsizligini ta'minlashda muhim o‘rin tutadi va Qoraqalpog'iston qishloq xo‘jaligida yangi imkoniyatlar eshigini ochadi.
Bugungi kunga kelib 500 nafardan ortiq fermerlarga sinovdan o‘tgan ekinlarni ko‘paytirish maqsadida 5248 kg urug' tarqatildi. Bu tashabbus nafaqat mahalliy xo‘jaliklarni rivojlantirish, balki hududning ekologik inqirozini yumshatishda ham muhim o‘rin tutadi. Qolaversa, ushbu urinishlar mintaqa qishloq xo‘jaligi salohiyatini oshirish va aholi turmush darajasini yaxshilashda muhim ahamiyat kasb etadi.
Loyiha doirasida olib borilayotgan ishlar Qoraqalpog'istonning kelajakda barqaror va ekologik jihatdan xavfsiz hududga aylanishiga ishonch bag'ishlaydi. Loyihaning natijalariga ko‘ra, hududda yaratilgan tajribalar boshqa mintaqa va davlatlarga ham tatbiq etilishi mumkin.