Nukus tumanida innovatsion yapon oqova suvlarini tozalash tizimini o‘rnatish loyihasi amalga oshirildi

Birlashgan Millatlar Tashkilotining Taraqqiyot dasturi asosida Yaponiya hukumati tomonidan Nukus tumani hududidagi Qoraqalpog‘iston Respublikasi nogironlarni reabilitatsiya qilish va protezlash markaziga «Johkasou» nomli innovatsion yapon oqova suvlarini tozalash tizimi o‘rnatildi. Ushbu texnologiyani o‘rnatishdan maqsad maishiy oqova suvlarni tozalab, texnik va xo‘jalik maqsadlarida qayta foydalanish, ekotizimni mustahkamlashdir. Umumiy qiymati 40 ming dollar bo‘lgan loyiha amalga oshirilishi natijasida suv orqali yuqadigan kasalliklarni kamaytirish, sanitariya holatini yaxshilash va sog‘lom muhitni ta’minlash choralarini kengaytirish imkoniyati yaratildi. Quvvati 20 m3/sutka bo‘lgan yangi «Johkasou» tizimi oqova suvlarni mikroorganizmlar yordamida texnik va xo‘jalik maqsadlarida qayta foydalanish uchun yaroqli bo‘lgan texnik suvga aylantiradi.