Beruniy tumanida aholining farovon turmushini ta’minlash borasidagi ishlar borib ko‘rildi
Qoraqalpog‘iston Respublikasi Jo‘qorg‘i Kengesining Raisi Amanbay Orinbayev Beruniy tumanida bo‘lib, aholining turmush sharoitini yaxshilash va qo‘shimcha daromad olishiga ko‘maklashish, yangi ish o‘rinlarini yaratish borasida amalga oshirilayotgan ishlar bilan tanishdi.
Dastlab, Jo‘qorg‘i Kenges Raisi «To‘qimachi» MFY hududida yangi qurilayotgan ko‘p qavatli turar joylar qurilishi bilan tanishdi. Ta’kidlash joizki, joriy yilda 7 va 5 qavatli jami 24 ta ko‘p qavatli uy qurilishi belgilangan bo‘lib, qurilish ishlari yakunlangandan so‘ng 812 ta xonadon foydalanishga topshiriladi.
Bundan so‘ng, Prezidentimizning Qoraqalpog‘iston uchun alohida qabul qilingan 129-sonli farmoni bilan bevosita yer olib, xalqqa xizmat ko‘rsatish maskanini qurayotgan "Shox Abbos Mirzo" MCHJ ishlari, shuningdek, tuman markazidagi To‘rtko‘l ko‘chasida amalga oshirilayotgan rekonstruksiya ishlari borib ko‘rildi. Mutasaddilarga qurilish ishlarini sifatli va o‘z vaqtida amalga oshirish bo‘yicha aniq topshiriqlar berildi.
Beruniy tumanlararo Perinatal markazida raqamlashtirish bo‘yicha olib borilgan ishlar ko‘zdan kechirildi. Aholiga sifatli xizmat ko‘rsatish borasidagi ishlar o‘rganildi.
"To‘qimachi" mahallasidagi "Oltin saodat asri" MCHJ korxonasida qurilish va maishiy mahsulotlar ishlab chiqarish ishlari ko‘zdan kechirildi. Prezidentimiz tomonidan berilgan imtiyozlar asosida tadbirkor xizmat turlarini kengaytirib, isitish qozonlari, qurilish-pardozlash mahsulotlari, zamonaviy eshiklar ishlab chiqarish kabi yangi yo‘nalishlar bo‘yicha aholiga xizmat qilmoqda. O‘z navbatida, mutasaddilarga tadbirkorning o‘z faoliyatini yanada kengaytirishi uchun barcha ko‘maklarni berish bo‘yicha topshiriqlar berildi.
Tumanda amalga oshirilayotgan ishlar bilan tanishish jarayonida Jo‘qorg‘i Kenges Raisi uy oldidagi tomorqasida yiliga bir necha yuz million so‘m daromad olishni yo‘lga qo‘ygan Umar Masharipov, uzumchilik, kartoshka yetishtirish va bog‘dorchilikning sirlarini chuqur egallagan Masharib Aitovning xonadonida bo‘ldi. "Bo‘ston" mahallasi tajribasi Qoraqalpog‘iston bo‘yicha ommalashtirilgani, bu tajribani yana ko‘plab xonadon va mahallalarga yetkazish kerakligi ta’kidlandi.
O‘rmon xo‘jaligi yer maydonlari ko‘zdan kechirildi. Kuzgi daraxt ekishga yerlarni va ko‘chatlarni tayyorlash, ishlarni uyushqoqlik bilan olib borish bo‘yicha mutasaddilarga topshiriqlar berildi.
Prezidentimiz qarori bilan yoshlarga 30-yilga berilgan yer maydonlari, xususan, "Saroyko‘l" va "Turon" mahallalari hududidagi "Bir kontur - bir mahsulot" mezoni asosida ekilgan yerlar borib ko‘rildi. Ayni paytda qovun-tarvuz va boshqa poliz mahsulotlari ekilib, tez orada mo‘l hosil olinishi kutilmoqda.
Shuningdek, Jo‘qorg‘i Kenges Raisi "Ozod intensiv bog‘" fermer xo‘jaligida tashkil etilgan ishlar bilan ham tanishdi. Eksportbop mevalar, xususan, olma, o‘rik, uzum kabi mevali daraxtlar ekilgan maydonlar bugun hosilga kirgan. Issiqxonasida ham mo‘l hosil olinmoqda.
Beruniy tumanidagi dehqonchilik, bog‘dorchilik, tomorqadan mo‘l daromad olish bo‘yicha boy tajriba barcha shahar va tumanlarimizda shunday namuna asosida tashkil etilsa, ko‘pchilikning yuqori daromad olishiga, ish o‘rinlari yaratilib, aholi farovon turmushi yuksalishiga erishilishi alohida ta’kidlandi.
