Qorao‘zak tumanida aholining turmush sharoitini yaxshilash bo‘yicha amalga oshirilayotgan ishlar o‘rganildi

Qoraqalpog‘iston Respublikasi Jo‘qorg‘i Kengesining Raisi Amanbay Orinbayev Qorao‘zak tumanida aholining turmush sharoitini yaxshilash, fuqarolarning bandligini ta’minlash va tadbirkorlikni rivojlantirish bo‘yicha amalga oshirilayotgan ishlar bilan yaqindan tanishdi.

Dastlab, O‘rmon xo‘jaligining 7 gektar yer maydonida grant mablag‘lari asosida o‘rnatilgan yomg‘irlatib sug‘orish texnologiyasi ko‘zdan kechirildi. Tashqi beg‘araz ko‘maklar va grant mablag‘larini jalb qilish orqali bunday loyihalarni ko‘paytirish kerakligi ta’kidlandi.

Bundan so‘ng, Jo‘qorg‘i Kenges Raisi «Berdaq» OFYdagi «Aytbay Jeri» MCHJ korxonasining bog‘dorchilik va poliz mahsulotlarini yetishtirish loyihasi, hurmatli Prezidentimizning 153-sonli qarori asosida yoshlarga ajratilgan yer maydonlarida yetishtirilgan mahsulotlar, «Ata mәkan» MFYdagi Xojamuratov Shamuratning dehqon xo‘jaligi, Seydabullayev Paraxatning uzumchilikni rivojlantirish bo‘yicha ishlarini borib ko‘rdi. Yer bilan tillashib, uni daromad manbaiga aylantirish orqali oilasiga qo‘shimcha daromad kirituvchi oilalar sonini yanada ko‘paytirish kerakligi, buning uchun barcha imkoniyatlar yaratib berilgani alohida ta’kidlandi.


Yoshlar markazi binosida xorijiy tillarga o‘qitish bo‘yicha tashkil etilgan ishlar, masofaviy xizmat ko‘rsatuvchi BPO markazida yoshlarni axborot texnologiyalariga o‘qitish jarayonlari ham ko‘zdan kechirildi.


«Yesim» MFYdagi Jumanazarov Polatning uy sharoitida qurilish mahsulotlarini ishlab chiqarish loyihasi, Dao‘letyar Yerimbetovning uy sharoitida mebel ishlab chiqarish, Jүginis Palo‘aniyazovning oyna mahsulotlarini ishlab chiqarish loyihalari ko‘rib chiqildi. Tadbirkorlikni rivojlantirish bo‘yicha barcha yordamlarni ko‘rsatish, ularni qo‘llab-quvvatlash bo‘yicha mutasaddilarga aniq topshiriqlar berildi.