Mobiuz Qoraqalpog‘iston va Xorazmdagi tarmoqlarni rivojlantirishga 30 mln dollardan ortiq sarmoya kiritmoqda

Nukusda Qoraqalpog‘iston Respublikasi va Xorazm viloyatida Mobiuz tarmoqlarini modernizatsiya qilishning birinchi bosqichi natijalariga bag‘ishlangan rasmiy tadbir o‘tkazildi.

Unda Qoraqalpog‘iston Respublikasi Jo‘qorg‘i Kengesi, Raqamli texnologiyalar vazirligi va «O‘zkomnazorat» inspeksiyasining hududiy boshqarmalari vakillari, Mobiuz va ZTE Uzbekistan rahbariyati va vakillari ishtirok etdi.

Tadbirda Mobiuz mobil operatori investitsiya strategiyasini faol amalga oshirayotgani ta’kidlandi. Shuningdek, tadbir ishtirokchilariga SWAP loyihasining birinchi bosqichi natijalari haqida batafsil ma’lumot berildi.

So‘nggi yillari barcha hududlarda raqamli infratuzilmani rivojlantirish, aholi va biznes uchun raqamli xizmatlarni joriy etish bo‘yicha davlatimiz tomonidan belgilangan yo‘nalish doirasidagi vazifalar muvaffaqiyatli amalga oshirilmoqda. Qoraqalpog‘iston Respublikasi va Xorazm viloyatida Mobiuz tarmoqlari va uskunalarini modernizatsiya qilish (SWAP loyihasi) — buning yaqqol misoli. Loyihani amalga oshirish uchun telekommunikatsiya texnologiyalari sohasidagi jahon yetakchilaridan biri — ZTE Corporation kompaniyasi jalb qilindi.

Qoraqalpog‘iston Respublikasi va Xorazm viloyatidagi tarmoqlarni texnik qayta jihozlash loyihasining umumiy qiymati 30 million dollardan ortiq bo‘lib, hozirga qadar 13 million dollardan ko‘proq mablag‘ o‘zlashtirildi. SWAP loyihasi doirasida Qoraqalpog‘istonda 314 ta radioreley oralig‘i va 268 ta tayanch stansiya almashtirildi. 637 ta yangi tayanch stansiya ishga tushirildi.

Tadbir doirasida mobil internet tezligining jonli o‘lchovlari o‘tkazildi. Kelgusida Qoraqalpog‘iston va Xorazm viloyatida SWAP loyihasi davom ettirilishi va kengaytirilishi ta’kidlandi.