To‘rtko‘l tumanida aholi farovonligini orttirish borasida amalga oshirilayotgan ishlar o‘rganildi

Qoraqalpog‘iston Respublikasi Jo‘qorg‘i Kengesining Raisi Amanbay Orinbayev To‘rtko‘l tumanidagi bir qator ijtimoiy obyektlar, shuningdek, tadbirkorlar faoliyati bilan yaqindan tanishdi.

Dastlab, «Yangihayot» MFYdagi «Lochin chorva kompleksi» fermer xo‘jaligining uzumchilikni rivojlantirish, «Bahor» MFYdagi issiqxonasida banan yetishtirishni yo‘lga qo‘ygan tomorqa egasi Atajan O‘razimbetovning ishlari ko‘zdan kechirildi. Ekin maydonini mo‘l daromad manbaiga aylantirib, yaxshi natija ko‘rsatayotgan bunday zahmatkash insonlarning ishlari ko‘pchilikka namuna bo‘lishi kerakligi ta’kidlandi.

Bundan so‘ng, «Yashnaobod» MFYdagi 44-sonli maktabda o‘quvchilarning darsdan tashqari vaqtlarini samarali tashkil etish bo‘yicha yo‘lga qo‘yilgan ishlar o‘rganildi. Kelajak egalari bo‘lgan bolalarga ta’lim-tarbiya berish bilan birga kasb-hunarga yo‘naltirish ham har bir maktabda bo‘lishi kerakligi alohida ta’kidlandi.

«Ziyokor» MFY hududidagi Prezidentimiz topshirig‘i bilan homiylik hisobidan yangidan qurilayotgan, 660 o‘ringa mo‘ljallangan yangi maktab, «Shodlik» MFYda yangidan qurilayotgan «Otajon Xudayshukurov» nomidagi amfiteatr, «EVRO-AZIA» MCHJ tomonidan yangidan qurilayotgan 119 xonadonli ko‘p qavatli uylarning qurilish jarayoni ham ko‘zdan kechirildi. Mutasaddilarga tegishli topshiriqlar berildi.

Shundan so‘ng, «To‘rtko‘l shisha idishlari» MCHJ va «Nurota» OFYdagi «Dunyo med stroy» MCHJga qarashli yangidan ishga tushirilish arafasida turgan klinika ko‘zdan kechirildi. Tadbirkorlar faoliyatini qo‘llab-quvvatlash, ularning o‘z biznesini rivojlantirishi uchun yaqindan ko‘maklashish bo‘yicha mutasaddilarga aniq topshiriqlar berildi.