Nukus shahrida Qo‘l jangining R1 yo‘nalishi bo‘yicha Professional sportchilar orasida «Orolbo‘yi kubogi» xalqaro turniri o‘tkazildi

Bugun Nukus shahridagi markaziy amfiteatrda Qo‘l urushining R1 yo‘nalishi bo‘yicha Professional sportchilar o‘rtasida «Orolbo‘yi kubogi» xalqaro turniri musobaqalari bo‘lib o‘tdi.

Unda Qoraqalpog‘iston Respublikasi Jo‘qorg‘i Kengesining Raisi Amanbay Orinbayev so‘zga chiqib, barcha ishtirokchilarga omad tiladi.

Bundan so‘ng turnir bellashuvlariga start berildi. Unda Ozarbayjon, Belarus, Qirg‘iziston, Rossiya, Turkiya va Italiya davlatlaridan professional sportchilar ishtirok etdi.

62 kg yengil vaznda Tosso Petro (Italiya) va Abdumajid Qosimov (O‘zbekiston) bellashuvida Abdumajid Qosimov g‘olib bo‘ldi. 70 kg o‘rta vaznda Medvedeva Aseliya (Belarus) va Nilufar Polvonova (O‘zbekiston) bellashuvida Nilufar Polvonova g‘olib bo‘ldi. 73 kg o‘rta vaznda Abror Hakimov (Qirg‘iziston) va Azizxon Abdullayev (O‘zbekiston) bellashuvida Azizxon Abdullayev raqibidan ustun keldi. 80 kg o‘rta vaznda Nabiyev Gunduz (Ozarbayjon) va Aybek Maxsetov (O‘zbekiston) o‘rtasidagi bellashuvda Nabiyev Gunduz g‘olib chiqdi.

97 kg vazn toifasi bo‘yicha Shaxzade Maxsun (Turkiya) va Begzodbek Maxamatov (O‘zbekiston) o‘rtasidagi bellashuvda Begzodbek Maxamatov g‘alaba qozondi.

Kunning markaziy bellashuvi 97 kg og‘ir vazn toifasida Bolotskix Yevgeniy (Rossiya) va Og‘abek Jumaniyazov (O‘zbekiston) bellashuvida Og‘abek Jumaniyazov raqibiga imkoniyat qoldirmadi.

Keskin kurashlar, ayovsiz zarbalar ostida o‘tgan uchrashuvlar yig‘ilganlarda katta taassurot qoldirdi. G‘oliblar tabriklanib, ularga pul mukofotlari va esdalik sovg‘alari topshirildi.