Birlashgan Arab Amirliklarining “Abu-Dabi taraqqiyot fondi” rahbarlari Qoraqalpog‘istonga keldi
Birlashgan Arab Amirliklarining “Abu-Dabi taraqqiyot fondi” Bosh direktori Mohamed Saif Al Suo‘aidiy boshchiligidagi va Sho‘rlanish sharoitida biodehqonchilik xalqaro markazi bosh direktori Tarifa Al Zahabi ishtirokidagi delegatsiya Qoraqalpog‘istonga keldi va Orolbo‘yi xalqaro innovatsiya markazida tashkil etilgan tadbirda ishtirok etdi.
Tadbirning asosiy maqsadi “Abu-Dabi taraqqiyot fondi”ning moliyaviy ko‘magi bilan IKBA, O‘zbekiston Respublikasi Ekologiya vazirligi, Qoraqalpog‘iston Respublikasi hukumati, Orolbo‘yi xalqaro innovatsiya markazi, Qoraqalpog‘iston dehqonchilik ilmiy-tadqiqot instituti va bir qator manfaatdor tashkilotlar bilan hamkorlikda amalga oshirilayotgan “Qoraqalpog‘istonning degradatsiyaga uchragan hududlarida barqaror qishloq xo‘jaligi ishlab chiqarish tizimlarini rivojlantirish” loyihasi doirasida erishilgan muhim natijalar bilan tanishib, loyiha doirasida barpo etilgan Integratsiyalashgan agro-akvakultura tizimlari pilot loyihasini tantanali ravishda ishga tushirishdan iborat.
Mehmonlar bilan uchrashuvda Qoraqalpog‘iston Respublikasi Vazirlar Kengashining Raisi F.Ermanov, Jo‘qorg‘i Kenges Raisining o‘rinbosari R.Nurazizov ishtirok etdi va mehmonlarni Qoraqalpog‘iston Respublikasida davlatimiz rahbari tashabbuslari bilan amalga oshirilayotgan islohotlar, loyihalar va kelajakdagi rejalar bilan tanishtirib o‘tdi.
Ta’kidlanganidek, bugungi loyiha natijalari va amalga oshirilayotgan ishlar nafaqat Qoraqalpog‘iston uchun, balki butun Orolbo‘yi mintaqasi, shuningdek, global miqyosda iqlim o‘zgarishining salbiy ta’sirlariga moslashish va ularni yumshatish yo‘lida muhim qadamdir. Bu tashabbus barqaror qishloq xo‘jaligi, oziq-ovqat xavfsizligi va aholi turmush sifatiga ijobiy ta’sir ko‘rsatadi. Unda kelgusida bunday hamkorliklar ko‘lamini yanada kengaytirish bo‘yicha qator takliflar ham berildi.
Tadbir davomida loyiha doirasida amalga oshirilgan ishlar natijalari bo‘yicha Orolbo‘yi xalqaro innovatsiya markazi direktori B.Xabibullayev taqdimot qildi.
Mohamed Saif Al Suo‘aidiy ushbu tashabbusni iqlim o‘zgarishi oqibatlariga moslashish va suv resurslaridan samarali foydalanish yo‘lidagi katta qadam sifatida baholab, Qoraqalpog‘istonda amalga oshirilayotgan ishlar mintaqadagi ekologik barqarorlik va aholi farovonligi uchun muhim ahamiyatga ega ekanini ta’kidladi.
Uchrashuvdan so‘ng Integratsiyalashgan agro-akvakultura tizimlari pilot loyihasi tantanali ravishda ishga tushirildi. Bu tizim yordamida sazan baliqlari, sho‘rga chidamli ekinlar va spirulina suv o‘tlari yetishtirish yo‘lga qo‘yiladi. IAAS tizimining asosiy innovatsiyasi - suv resurslaridan oqilona foydalanish, qishloq xo‘jaligi va akvakulturani uyg‘unlashtirgan holda barqaror ishlab chiqarishga erishishdir.
