To‘rtko‘l - Ellikqal’a - Beruniy aylanma yo‘lini rekonstruksiya qilish masalalari muhokama qilindi
Qoraqalpog‘iston Respublikasi Vazirlar Kengashining Raisi F.Ermanov Osiyo taraqqiyot bankining janubiy, markaziy va g‘arbiy Osiyo hududlari bo‘yicha vitse-prezidenti Inmin Yang boshchiligidagi delegatsiya bilan uchrashdi.
Unda dastlab, so‘nggi yillarda yurtimizda xalqimizning farovon turmushini ta’minlash borasida hurmatli Prezidentimiz tashabbuslari bilan amalga oshirilayotgan ishlar, shuningdek, bu borada Osiyo taraqqiyot banki bilan hamkorlikda amalga oshirilayotgan loyihalar keng ta’kidlab o‘tildi.
Bundan so‘ng, bank ishtirokida amalga oshirilishi ko‘zda tutilgan xalqaro ahamiyatdagi A-380 «G‘uzor-Buxoro-Nukus-Beyneu» avtomobil yo‘lining Amudaryo, Beruniy, Ellikqal’a va To‘rtko‘l tumanlari hududidan o‘tgan qismini rekonstruksiya qilish loyihasi ko‘rib chiqildi.
Ta’kidlash joizki, Osiyo taraqqiyot bankining 233,1 mln. dollar qarz mablag‘lari asosida A380 avtomobil yo‘lining Qoraqalpog‘iston Respublikasidan o‘tgan qariyb 87 km qismini rekonstruksiya qilish belgilangan edi. Loyiha doirasida 75 km uzunlikdagi yangi aylanma yo‘li («To‘rtko‘l - Ellikqal’a – Beruniy») qurilishi va mavjud A380 avtomobil yo‘lining 12 km qismini qayta qurish rejalashtirilgan.
Uchrashuv davomida Osiyo Taraqqiyot banki ishtirokidagi loyihalar infratuzilma bilan bog‘liq muammolarni hal etish, yurtimiz iqtisodiyotini mustahkamlash, xalqimiz turmush farovonligini oshirishga xizmat qilishi alohida ta’kidlanib, hamkorlik ishlari bundan buyon ham davom ettirilishi qayd etildi.
