Aholi turmush farovonligini ta’minlash borasida amalga oshirilayotgan ishlar o‘rganildi
Qoraqalpog‘iston Respublikasi Jo‘qorg‘i Kengesining Raisi Amanbay Orinbayev Mo‘ynoq tumanida aholining turmush sharoitini yaxshilash yo‘nalishida amalga oshirilayotgan ishlar bilan tanishdi.
Dastlab, Jo‘qorg‘i Kenges Raisi hurmatli Prezidentimizning 4271-sonli qaroriga asosan, Osiyo taraqqiyot bankining 8,2 mln. AQSH dollari miqdoridagi mablag‘lari asosida Mo‘ynoq tumanida ichimlik suvi ta’minotini yaxshilashga qaratilgan qurilish ishlari bilan tanishdi.
Bundan so‘ng O‘rmon xo‘jaligi yer maydonlari ham ko‘zdan kechirildi. Kuzgi daraxt ekishga yerlarni va ko‘chatlarni tayyorlash, ishlarni uyushqoqlik bilan olib borish bo‘yicha mutasaddilarga topshiriqlar berildi. «ARAL AGRO KLUSTER» tomonidan issiqxonada kuzgi ekishga tayyorgarlik ishlari ham ko‘rib chiqilib, shunday olis va chekka hududlardan birida yer maydonini daromad manbaiga aylantira olish ko‘pchilikka namuna bo‘lishi kerakligi ta’kidlandi.
Jo‘qorg‘i Kenges Raisi «Uchsoy» OFY hududida joylashgan gaz qudug‘i ishlari bilan ham yaqindan tanishdi. Shuningdek, Favqulodda vaziyatlar vazirligi qurilish bataloni harbiy xizmatchilari bilan uchrashib, ular bilan yaqindan muloqot qildi.
«Do‘stlik» MFY hududida yangidan ishga tushirilgan non sexi ishlari ham o‘rganildi. Tadbirkorlarning o‘z faoliyatini kengaytirishi uchun yaqindan ko‘maklashish, ularni har tomonlama qo‘llab-quvvatlash bo‘yicha mutasaddilarga aniq topshiriqlar berildi.
Bundan so‘ng, fuqarolarning turmush sharoitini yaxshilash borasida hali ham yechimini kutayotgan masalalarni aniqlash va muammolarga yechim topish bo‘yicha tumandagi ko‘cha boshilari, nuroniy-oqsoqollar va keksa ayollar bilan uchrashuv o‘tkazildi.
Uchrashuvdan keyin tuman faollari, mutasaddi rahbarlar bilan birgalikda tumanni ijtimoiy-iqtisodiy rivojlantirish masalalari tanqidiy ko‘rib chiqildi.
