Yangi zamonaviy tipdagi 400 o‘rinli talabalar turar joyi foydalanishga topshirildi
Joriy yilning 5-dekabr kuni Berdaq nomidagi Qoraqalpoq davlat universitetida yangi qurilgan talabalar turar joyining foydalanishga topshirilishi munosabati bilan ochilish marosimi o‘tkazildi.
Unda Qoraqalpog‘iston Respublikasi Jo‘qorg‘i Kengesi Raisining o‘rinbosari R.Nurazizov so‘zga chiqib, so‘nggi yillarda mamlakatimizda yoshlarga qaratilayotgan alohida e’tibor davlat siyosatining ustuvor yo‘nalishlaridan biriga aylanganini keng tarzda ta’kidladi va yangi obyekt foydalanishga topshirilishi munosabati bilan yig‘ilganlarni tabrikladi.
Ta’kidlanganidek, so‘nggi yillarda hurmatli Prezidentimiz rahbarligida mamlakatimizda ta’lim sohasiga, jumladan, yoshlarni oliy ta’limga qamrab olishga alohida e’tibor qaratilib, bu borada keng ko‘lamli chora-tadbirlar amalga oshirilmoqda. Mana shunday ezgu ishlar qatorida oliy o‘quv yurtlari soni ortib, har yili Qoraqalpog‘istonlik yoshlarga qo‘shimcha kvotalar ajratib berilmoqda. Bu o‘z navbatida, yoshlarimiz orasidan ilg‘or fikrli, yurtimiz taraqqiyotiga o‘zining munosib hissasini qo‘shadigan yoshlarning yetishib chiqishiga mustahkam zamin bo‘lib xizmat qilmoqda.
Umumiy 30,5 mlrd. so‘m mablag‘ bilan davlat-xususiy sheriklik asosida qurilgan yangi, barcha qulayliklarga ega 400 o‘ringa mo‘ljallangan talabalar turar joyining foydalanishga topshirilishi ana shu yo‘nalishdagi chora-tadbirlarning amaliy ifodasidir.
Albatta, foydalanishga topshirilgan yangi obyekt talaba-yoshlar uchun uzoq yillar davomida xizmat qiladi.
