O‘zbekistonda, shu jumladan Qoraqalpog‘istonda yirik energetika quvvatlari ishga tushirildi va navbatdagilarining qurilishi boshlandi
Bugun hurmatli Prezidentimiz Shavkat Mirziyoyev raisligida yangi energetika quvvatlari va infratuzilma obyektlarini ishga tushirish hamda navbatdagilarining qurilishini boshlashga bag‘ishlangan tantanali marosim o‘tkazildi.
Unda Qorao‘zak tumanidan Qoraqalpog‘iston Respublikasi Jo‘qorg‘i Kengesining Raisi Amanbay Orinbaev, Qo‘ng‘irot tumanidan Vazirlar Kengashining Raisi F.Ermanov, keng jamoatchilik vakillari videoaloqa orqali ishtirok etdi.
Yangi obyektlar - qariyb 11 milliard dollarlik 42 ta energiya ishlab chiqarish, saqlash quvvatlari va boshqa infratuzilma obyektlari - mamlakatimizda amalga oshirilayotgan milliy energetika tarmog‘i salohiyatini mustahkamlashga qaratilgan keng ko‘lamli strategiyaning bir qismidir.
Ta’kidlash joizki, bugun ishga tushirilgan obyektlar qatorida Saudiya Arabistonining "ACWA Power" kompaniyasi tomonidan mamlakatimizda amalga oshirilayotgan "Shamol elektr stansiyasini tashkil etish" loyihasining "Qo‘yboq" mahallasida "Nukus-1" loyihasi ishga tushirildi.
Umumiy qiymati 107 mln. dollar, quvvati 100 Megavatt bo‘lgan loyiha doirasida har birining quvvati 6,5 Megavatt bo‘lgan 16 ta shamol turbina generatorlari qurilgani natijasida har yili 350 mln. kilovatt/soat elektr energiyasi ishlab chiqarilishiga imkoniyat yaratildi, o‘rtacha 100 mln. kub tabiiy gaz sarfi tejalishiga, havoga 180 ming tonna karbonat angidrid gazi chiqindilarining tarqalishi kamaytirilishiga erishildi.
Shuni alohida ta’kidlash kerakki, "ACWA Power" kompaniyasi tomonidan Qoraqalpog‘istonda umumiy qiymati qariyb 8,6 mlrd. dollar bo‘lgan investitsiya mablag‘lari hisobidan yangi loyihalar amalga oshirilishi belgilangan.
Shuningdek, Qo‘ng‘irot tumani studiyasidan umumiy qiymati 99,5 mln. dollar bo‘lgan 2 loyiha ishga tushirildi.
Xususan, "O‘zbekneftgaz" AJ mablag‘lari hisobidan loyiha qiymati 55,2 mln. dollar bo‘lgan "Neft va gaz qazib chiqarish va quduqlarni burg‘ilash jarayonlarini raqamlashtirish E-kan loyihasi," shuningdek, Buxoro, Qashqadaryo viloyatlari va Qoraqalpog‘iston Respublikasida "O‘zbekneftgaz" AJ mablag‘lari hisobidan loyiha qiymati 44,3 mln. dollar bo‘lgan "Akkumulyatorli energiyani saqlash tizimi"ni o‘rnatish loyihasi ishga tushirildi.
Bundan tashqari, "O‘zbekneftgaz" AJ mablag‘lari hisobidan umumiy qiymati 100 mln. dollar bo‘lgan 2 loyihaning ya’ni, "Ustyurt hududidagi Terenquduq, Bayterek, Birqari, Xaray, Qulboy va Qoraqalpoq bloklarida geologiya qidiruv ishlarini amalga oshirish" loyihasi va "Mo‘ynoq maydoni 2-sonli qidiruv qudug‘ini va yangidan quriladigan 10 km gaz tarmog‘ini ishga tushirish" loyihalarining qurilish ishlariga start berildi.
