“Besqala Mining Valley” maxsus mayning zonasi rezidentlari faoliyatini amalga oshirish tartibi belgilandi
O‘zbekiston Respublikasi Istiqbolli loyihalar milliy agentligi tomonidan O‘zbekiston Respublikasi Prezidentining 2026-yil 17-apreldagi “Qoraqalpog‘iston Respublikasida maxsus mayning zonasini tashkil etish va uning faoliyatini yo‘lga qo‘yish chora-tadbirlari to‘g‘risida”gi 143-son qarori ijrosini ta’minlash maqsadida “Besqala Mining Valley” maxsus mayning zonasi rezidentlarini ro‘yxatdan o‘tkazish va faoliyatini amalga oshirish tartibi to‘g‘risidagi nizom qabul qilindi.
Nizom “Besqala Mining Valley” maxsus mayning zonasi faoliyatini amalga oshirish, yuridik shaxslarni maxsus zona rezidentlari sifatida ro‘yxatdan o‘tkazish va ularning faoliyatini amalga oshirish tartibini belgilaydi.
Xususan, Nizom bilan quyidagilar nazarda tutilgan:
rezident sifatida ro‘yxatdan o‘tkazish hamda mayningni amalga oshirish uchun talablar va shartlar;
rezident sifatida ro‘yxatdan o‘tkazish uchun taqdim etiladigan hujjatlar ro‘yxati;
arizalarni topshirish, ko‘rib chiqish va ular bo‘yicha qaror qabul qilish tartibi;
ruxsat berish tartib-taomillari, shu jumladan rezident sifatida ro‘yxatdan o‘tganlik to‘g‘risidagi guvohnoma va mayningni amalga oshirish uchun ruxsatnomani qayta rasmiylashtirish, ularga o‘zgartirishlar kiritish, amal qilish muddatini uzaytirish, shuningdek, ularning amal qilishini to‘xtatib turish, tugatish va bekor qilish;
rezidentlar tomonidan ruxsat etish xususiyatiga ega talablar va shartlarga rioya etilishini nazorat qilish chora-tadbirlari;
topilgan kripto-aktivlarni realizatsiya qilish tartibi.
Ta’kidlash joizki, maxsus zona rezidentlariga mayningni amalga oshirish uchun qayta tiklanuvchi energiya manbalarining barcha turlari, vodorod elektr stansiyasi tomonidan ishlab chiqarilgan, shuningdek, maxsus zona hududida joylashgan rentabelligi past, kam debitli, tugab borayotgan konlarni, shuningdek uglevodorodlarni yetkazib berishning transport tizimi mavjud bo‘lmagan yoki eskirgan konlarni kelgusida o‘zlashtirish, saqlash va jihozlash orqali ishlab chiqarilgan elektr energiyasidan foydalanishga ruxsat beriladi.
Mazkur Nizomning qabul qilinishi yangi ish o‘rinlarini yaratish orqali Qoraqalpog‘iston Respublikasining investitsiyaviy jozibadorligini oshirish va aholi daromadlarini ko‘paytirishga, shuningdek, qayta tiklanuvchi energiya manbalarining barcha turlaridan foydalangan holda mayning faoliyatini amalga oshirish uchun qulay shart-sharoitlar yaratishga qaratilgan.