Yangilangan «Turon» stadioni mustaqillik bayrami arafasida xalqimizga va futbol muxlislariga munosib sovg‘a bo‘ldi

So‘nggi yillarda hurmatli Prezidentimiz rahbarligida xalq xo‘jaligining barcha sohasida keng ko‘lamli islohotlar amalga oshirilmoqda. Bunday islohotlarning amaliy natijalari asosida yangi ish o‘rinlari, ishlab chiqarish quvvatlari yaratilib, infratuzilma bilan bog‘liq yirik loyihalar amalga oshirilmoqda.

Ana shunday amaliy ishlar qatorida kuni kecha hurmatli Prezidentimiz rahbarligida mamlakatimiz bo‘yicha yirik obyektlar, shu jumladan, Qoraqalpog‘istonda ham 12 yirik obyekt foydalanishga topshirilgan edi.

Bu obyektlar qatorida jami 117 mlrd. so‘m mablag‘ hisobidan rekonstruksiya qilingan Turon futbol stadioni ham ishga tushirildi.

Rekonstruksiya ishlari doirasida asosiy futbol maydoniga qo‘shimcha 2 ta futbol maydonchasi, futbolchilar uchun yotoqxona, o‘quv xonalari, oshxona, kutubxona, fitnes va sport zallari, aholiga xizmat ko‘rsatish joylari, avtoturargoh barpo etildi. Buning natijasida stadion futbolga ixtisoslashgan sport majmuasiga aylantirildi.

Shuningdek, futbol o‘yinlarini zamonaviy talablar asosida o‘tkazish maqsadida VAR - hakamlar qarorlarini videoyozuv orqali qayta ko‘rib chiqish tizimi o‘rnatildi.

Albatta, ushbu obyektning Mustaqillik bayrami arafasida foydalanishga topshirilishi xalqimiz va futbol muxlislari uchun haqiqiy bayram sovg‘asi bo‘ldi.

Mehmonlar stadionda yaratilgan sharoitlar bilan yaqindan tanishdi.