Қарақалпақстанда дерлик 62 километр жергиликли әҳмийеттеги автомобиль жоллары цемент-бетон қапламалы жолларға айландырылады

Ҳүрметли Президентимиздиң "Азия раўажланыў банки қатнасыўында "Цемент-бетон қапламалы ишки жолларды қурыў" жойбарын әмелге асырыў илажлары ҳаққында"ғы 2024-жыл 15-апрельдеги 157-санлы қарарына тийкар, Қарақалпақстан Республикасында аўыллық автомобиль жолларын тиклеў ҳәмде нәтийжелиликке тийкарланған техникалық хызмет көрсетиў бойынша қурылыс жумыслары әмелге асырылады.

Жойбарды әмелге асырыў ушын тийисли қаржылар ажыратылып, бүгинги күнде 4 лот бойынша тендер саўдалары жәрияланды.

Атап өтиў орынлы, улыўма баҳасы 18,5 миллион АҚШ доллар қаржылар есабынан республикадағы 61,3 км жергиликли әҳмийеттеги автомобиль жолларын цемент-бетон қапламалы жолларға айландырыў нәзерде тутылған.

Соннан, 1-лот бойынша Тахтакөпир, Қараөзек ҳәм Шымбай районларындағы жәми 6 объектте 16,6 км, 2-лот бойынша Кегейли, Бозатаў районлары ҳәм Нөкис қаласындағы жәми 7 объектте 18,2 км, 3-лот бойынша Қоңырат, Шоманай ҳәм Қанлыкөл районларындағы жәми 6 объектте 14,1 км, 4-лот бойынша Әмиўдәрья, Беруний ҳәм Төрткүл районларындағы жәми 8 объектте 12,4 км жергиликли әҳмийеттеги автомобиль жоллары цемент-бетон қапламалы жолларға айландырылады.

Бул жойбар әмелге асырылыўы нәтийжесинде халық ҳәм транспорт қураллары ушын еле де қолайлы ҳәм қәўипсиз ҳәрекет етиў шараятлары жаратылып, жергиликли әҳмийеттеги автомобиль жолларының транспорт-эксплуатациялық жағдайы және де жақсыланады.