Жаңа студентлер турақ жайы - жаслар ушын жаратылып атырған имканиятлардың және бир көриниси

Бүгин Бердақ атындағы Қарақалпақ мәмлекетлик университетинде Өзбекстан Республикасы Ғәрезсизлигиниң 35 жыллығы алдынан жаңа, заманагөй типтеги студентлер турақ жайының пайдаланыўға тапсырылыўына бағышланған салтанатлы илаж болып өтти.

Онда университет профессор-оқытыўшылары, хызметкерлер, ғалаба хабар қуралларының ўәкиллери ҳәм кең жәмийетшилик ўәкиллери қатнасты.

Илажда атап өтилгениндей, соңғы жыллары Президентимиздиң басшылығында барлық тараўлар қатарында билимлендириў системасын раўажландырыў, жаслардың заманагөй билим ҳәм кәсип-өнер ийелеўи ушын мүнәсип шараятлар жаратыўға айрықша итибар қаратылмақта.

Бердақ атындағы Қарақалпақ мәмлекетлик университетинде пайдаланыўға тапсырылған жаңа студентлер турақ жайы да мине усындай ийгиликли ҳәм дөретиўшилик жумыслардың әмелий көриниси болып табылады. Заманагөй архитектура ҳәм қурылыс стандартлары тийкарында қурылған бул комплекс жәми 500 студентти жайластырыў имканиятына ийе.

Турақ жайда студентлердиң қолайлы ҳәм қәўипсиз жасаўы, билим алыўы ҳәм бос ўақытларын мазмунлы өткериўи ушын барлық зәрүр шараятлар жаратылған. Ханалар, турмыслық ҳәм санитариялық шараятлар менен бир қатарда, жаслардың дем алыўы, еркин шуғылланыўы ҳәм бос ўақтын нәтийжели шөлкемлестириўге хызмет ететуғын қолайлықлар да нәзерде тутылған.

Илаж соңында қатнасыўшылар жаңадан қурылған студентлер турақ жайын көзден өткерип, онда жаратылған шараятлар менен жақыннан танысты.