Мүддетли әскерий хызметтеги жаслар ушын кәсипке оқытыў ҳәм жоқары оқыў орнына таярлаў орайлары пайдаланыўға тапсырылды

Бүгин Арқа-Батыс әскерий округинде қайта оңлаўдан шығарылып, заманагөй көриниске келтирилген кәсипке оқытыў ҳәм жоқары оқыў орнына таярлаў орайлары имаратларының ашылыўына арналған илаж өткерилди.

Онда Қарақалпақстан Республикасы Жоқарғы Кеңесиниң Баслығы Аманбай Орынбаев шығып сөйлеп, жыйналғанларды имаратлар ашылыўы мүнәсибети менен қутлықлады.

Атап өтилгениндей, соңғы жыллары ҳүрметли Президентимиздиң басшылығында милий армиямыздың жаўынгерлик потенциалын арттырыў, әскерий хызметкерлердиң хызмет ҳәм турмыс шараятларын жақсылаў, мүддетли әскерий хызметти өтеп атырған жаслардың кәсип үйрениў ҳәм билим алыўға болған қызығыўшылығын қоллап-қуўатлаў бағдарында кең көлемли илажлар әмелге асырылмақта.

Заманагөй көриниске келтирилген Кәсипке оқытыў ҳәм Жоқары оқыў орнына таярлаў орайлары имаратларының пайдаланыўға тапсырылыўы – усындай мақсетлерди өзинде жәмлеген ийгиликли ислерден саналады.

Жәми 5 млрд. сум қаржы есабынан қайта оңлаўдан шығарылған имаратларда барлық қолайлы шараятлар жаратылған. Албетте, бул орайларда мүддетли әскерий хызметти өтеп атырған жаслар билим алып, өзлери қызыққан кәсип сырларын үйренеди.