Жўқорғи Кенгес Раиси Тахтакўпир туманидаги янги лойиҳалар ва фуқароларнинг қўшимча даромад олишига кўмаклашиш ишларини бориб кўрди.
Дастлаб, Жўқорғи Кенгес Раиси "Қараой" ОФЙ ҳудудида жойлашган "KAUSAR TEGIRMON" МЧЖ корхонасининг Чорвачилик лойиҳаси бўйича амалга оширган ишлари билан танишди. Таъкидлаш жоизки, 2025 йил давомида корхона томонидан умумий қиймати 32,0 млрд. сўмлик чорвачиликни ривожлантириш ва сутни қайта ишлаш лойиҳаларини амалга ошириш белгиланган. Бугунги кунда чорвачилик комплексига 120 бош наслли қорамоллар олиб келиниб, парваришланмоқда.
Бундан сўнг "KAUSAR TEGIRMON" МЧЖнинг қиймати 878,0 минг долларлик "Жунни қайта ишлаш" лойиҳаси доирасида йўлга қўйилган ишлаб чиқариш жараёнлари, технологик ускуналар ва маҳсулот тайёрлаш босқичлари кўздан кечирилди.
Жўқорғи Кенгес Раиси ушбу ҳудудда жойлашган, Германияга экспортини амалга ошираётган "Good Salt production" МЧЖ томонидан ташкил этилган "Ош тузини ишлаб чиқариш" корхонасида бўлиб, ушбу лойиҳанинг амалга оширилиши, ишлаб чиқариш қувватлари ва яратилган иш ўринлари билан яқиндан танишди.
Жўқорғи Кенгес Раиси "Тахтакўпир" ШФЙ ҳудудида ташкил этилган кичик саноат зонасида бўлиб, шу ҳудудда фаолият юритаётган "Фром Мебель" хусусий корхонаси томонидан ташкил этилган "Мебель ишлаб чиқариш" цехининг фаолияти билан яқиндан танишди.
Бундан сўнг, Жўқорғи Кенгес Раиси тумандаги "Даўқара" ОФЙ ҳудудида "Тахтакўпир Голд Текстиль Маҳсулотлари" МЧЖ томонидан ташкил этилаётган тўқимачилик лойиҳаси билан яқиндан танишди.
Президентимизнинг 129-сонли фармонига асосан ушбу инвестиция лойиҳаси учун 4,5 гектар ер майдони ажратилди. Умумий қиймати 25,4 млн АҚШ доллари бўлган лойиҳага мувофиқ йилига 5 минг тонна ип ишлаб чиқарилиб, йилига 11,1 млрд. сўмлик тайёр маҳсулот ишлаб чиқариш режалаштирилган. Тўлиқ ишга тушиши натижасида 257 та янги иш ўринлари яратилади.
Туманга ташриф давомида Жўқорғи Кенгес Раиси тумандаги "Ўзбекистон" МФЙ ҳудудида яшовчи Н.Файзуллаев, Н.Аметов, Ө.Темирбеков ва "Айдын жол" МФЙда яшовчи М.Даўлетяровларнинг хонадонида бўлиб, томорқа ер эгалари билан яқиндан суҳбатлашди. Уларнинг озгина ердан мўл даромад олаётгани юқори баҳоланди.
Ўрмон хўжалиги ер майдонлари ҳам кўздан кечирилди. Кузги дарахт экишга ерларни ва кўчатларни тайёрлаш, ишларни уюшқоқлик билан олиб бориш бўйича мутасаддиларга топшириқлар берилди.
Тумандаги "А.Адилов" ОФЙ ҳудудидаги "Тораңғыл-сай" ва "Атакөл" ОФЙ ҳудудида жойлашган "Тайимбет" фермер хўжаликларидаги ишлар ҳам кўздан кечирилди. Қишлоқ хўжалиги соҳасида сув ортиқча сарфланишининг олдини олиш, ҳосилдорликни ошириш ва замонавий технологияларни кенг жорий этиш бўйича бу ишларни тизимли равишда давом эттириш лозимлиги таъкидланди.
