Хитой компанияси билан қурилиш соҳасида ҳамкорликни мустаҳкамлаш бўйича муҳим келишув имзоланди

Яқинда қурилиш соҳасидаги инвестиция лойиҳаларини муҳокама қилиш ва ҳамкорликни мустаҳкамлаш бўйича Қорақалпоғистон Республикаси Жўқорғи Кенгесининг қўмита раиси И.Сдиқов бошчилигидаги республикамиз делегацияси Хитой Халқ Республикасига хизмат сафари билан борди.

Ташриф доирасида «METALLURGICAL CORPARATION OF CHINA LIMITED» (China MCC17 Group Ltd…) компанияси биносида Қорақалпоғистон делегацияси ва ушбу компания раиси, Партия котиби Лю Ани билан учрашув ўтказилди. Унда икки томонлама ҳамкорликни йўлга қўйиш, қурилиш соҳасида қўшма лойиҳаларни амалга ошириш, ўзаро тажриба алмашиш ва истиқболли лойиҳалар устида ҳамкорлик қилиш бўйича музокаралар олиб борилди.

Ўтказилган учрашувда икки томонлама ҳамкорликни йўлга қўйиш ва кенгайтириш давлатлар раҳбарларининг алоҳида қўллаб-қувватлаши билан янги босқичларга кўтарилаётганлиги, республикамизнинг инвестиция ва қурилиш соҳасида Хитой компанияларининг ўрни алоҳида эканлиги кенг тарзда таъкидланди.

Музокаралар давомида компания раиси Лю Ани ва Қорақалпоғистон Республикаси Қурилиш ва уй-жой коммунал хўжалиги вазири Қ.Айтбаев ўртасида стратегик ҳамкорлик бўйича шартнома имзоланди.

Шундан сўнг, делегация аъзолари "China MCC17 Group Ltd..." компаниясининг корпоратив кўргазмалар зали, рақамли бошқарув маркази, технология маркази ва "Four Harmonies" кўргазма залида бўлиб, компания фаолияти билан яқиндан танишди.