Элликқалъа туманида янги иш ўринлари яратиш бўйича амалга оширилаётган ишлар кўздан кечирилди

Қорақалпоғистон Республикаси Жўқорғи Кенгесининг Раиси Аманбай Орынбаев Элликқалъа туманида халқнинг турмуш шароитини яхшилаш, янги иш ўринларини яратиш борасида амалга оширилаётган ишларни ўрганиш мақсадида ушбу туманда бўлди.

Дастлаб, туманда фаолият юритаётган тадбиркорлик субъектлари бориб кўрилди. Жумладан, "SALIM KURAMBOY" фермер хўжалигида амалга оширилган балиқчилик лойиҳаси ҳамда "UMIDBEK ODILBEK" МЧЖнинг иссиқхонада лимон етиштириш лойиҳаси ўрганилди. Жўқорғи Кенгес Раиси ердан самарали фойдаланиш бўйича бундай лойиҳалар янада кенг оммалаштирилиши кераклигини таъкидлади.

Бундан сўнг, "Элликқалъа" овулидаги "SHOX MEGA STROY BIZNES" МЧЖнинг бетон маҳсулотлари ишлаб чиқариш лойиҳаси, "Амиробод" қишлоғидаги "ULLI MIRSAID OTA FIRMASI" корхонасининг қуруқ бетон қоришмалари ишлаб чиқариш лойиҳаси, "AMIROBOD JEYRON" инновацион пахта-ғалла кластери ишлари кўздан кечирилди. Тадбиркорларнинг ўз фаолиятини янада кенгайтириши учун яқиндан кўмаклашиш, бунинг учун барча чораларни кўриш бўйича мутасаддиларга аниқ топшириқлар берилди.

"INNOGRAPX" МЧЖ томонидан ташкил этилган IТ экспорти хизматларини тақдим этиш, ҳусусий кадастр ва ўқув курслари фаолияти кўриб чиқилди. Тадбиркорларнинг бундай ташаббуслари кўпчиликка намуна сифатида кўрсатилиб, бундай лойиҳалар сонини янада кўпайтириш бўйича топшириқлар берилди. Ўрганишлар давомида 60-сонли оилавий поликлиникада амалга оширилган рақамлаштириш ишлари ҳам кўриб чиқилди.

Жўқорғи Кенгес Раиси бундан кейин Элликқалъа туманида амалга оширилиши керак бўлган вазифаларни белгилаб олиш мақсадида кўча бошилари ва нуронийлар билан учрашди. Муаммолар тингланиб, режалар белгиланди.