Тўрткўл туманида аҳоли фаровонлигини орттириш борасида амалга оширилаётган ишлар ўрганилди

Қорақалпоғистон Республикаси Жўқорғи Кенгесининг Раиси Аманбай Орынбаев Тўрткўл туманидаги бир қатор ижтимоий объектлар, шунингдек, тадбиркорлар фаолияти билан яқиндан танишди.

Дастлаб, «Янгиҳаёт» МФЙдаги «Лочин чорва комплекси» фермер хўжалигининг узумчиликни ривожлантириш, «Баҳор» МФЙдаги иссиқхонасида банан етиштиришни йўлга қўйган томорқа эгаси Атажан Ўразимбетовнинг ишлари кўздан кечирилди. Экин майдонини мўл даромад манбаига айлантириб, яхши натижа кўрсатаётган бундай заҳматкаш инсонларнинг ишлари кўпчиликка намуна бўлиши кераклиги таъкидланди.

Бундан сўнг, «Яшнаобод» МФЙдаги 44-сонли мактабда ўқувчиларнинг дарсдан ташқари вақтларини самарали ташкил этиш бўйича йўлга қўйилган ишлар ўрганилди. Келажак эгалари бўлган болаларга таълим-тарбия бериш билан бирга касб-ҳунарга йўналтириш ҳам ҳар бир мактабда бўлиши кераклиги алоҳида таъкидланди.

«Зиёкор» МФЙ ҳудудидаги Президентимиз топшириғи билан ҳомийлик ҳисобидан янгидан қурилаётган, 660 ўринга мўлжалланган янги мактаб, «Шодлик» МФЙда янгидан қурилаётган «Отажон Худайшукуров» номидаги амфитеатр, «EVRO-AZIA» МЧЖ томонидан янгидан қурилаётган 119 хонадонли кўп қаватли уйларнинг қурилиш жараёни ҳам кўздан кечирилди. Мутасаддиларга тегишли топшириқлар берилди.

Шундан сўнг, «Тўрткўл шиша идишлари» МЧЖ ва «Нурота» ОФЙдаги «Дунё мед строй» МЧЖга қарашли янгидан ишга туширилиш арафасида турган клиника кўздан кечирилди. Тадбиркорлар фаолиятини қўллаб-қувватлаш, уларнинг ўз бизнесини ривожлантириши учун яқиндан кўмаклашиш бўйича мутасаддиларга аниқ топшириқлар берилди.