Жўқорғи Кенгес Раисининг ўринбосари Р.Нуразизов Беруний туманида турли соҳаларда фаолият юритаётган ва таълим олаётган ёшлар билан учрашиб, уларнинг мурожаатларини жойида тинглади

Дастлаб Хоразм маҳалласи ҳудудида жойлашган цехда ёшларга аргон пайвандлашнинг сир-синоатини ўргатиб келаётган Ислом Худайбергенов фаолияти кўздан кечирилди.

Таъкидлаш жоизки, ушбу ўқув цехида ўқув курсларини тугатган ёшлар чет давлатларга қонуний равишда меҳнат миграциясига “профессионал уста” ҳисобида йўл олмоқда.

Автомобилларга замонавий детейлинг хизмат кўрсатиш соҳасида 100 млн сўм имтиёзли кредит эвазига фаолиятини бошлаган 24 ёшли тадбиркор Акмал Эргашев 3 нафар ёшларни иш билан таъминлаган. У бугунги кунда фаолиятини кенгайтиришни режа қилган.

Бундан кейин, “Эризон савдо мажмуаси”ни ташкил этиш ишлари ўрганилди. Мазкур савдо полигонида кўнгилочар болалар ўйингоҳи, шунингдек, умумий овқатланиш жойлари, қурилиш моллари дўконлари ўрин олган. Умумий қиймати 1 млн АҚШ доллар бўлган замонавий савдо иншоотида 100 нафардан ортиқ ёшлар доимий иш билан таъминланади. Ўрганишлар давомида мутасаддиларга ёшларнинг тадбиркорлигини қўллаб-қувватлаш бўйича аниқ топшириқлар берилди.

Ёшлар билан учрашувнинг кейинги манзили тумандаги 6-сонли болалар мусиқа ва санъат мактаби бўлди. Жўқорғи Кенгес Раисининг ўринбосари тўгараклар фаолияти билан танишди ҳамда ёшларнинг таклифларини тинглади.

Спорт мактабида “Президент олимпия чўққилари” спорт мусобақасига тайёргарлик кўраётган волейбол терма жамоасининг ўйинлари ҳамда уларга яратилган шарт-шароитлар кўздан кечирилди. Зиёкор маҳалласида уй таълимида таҳсил олаётган 65-сонли умумий ўрта таълим мактаб ўқувчиси Сурайё Султонназаровага ноутбук совға қилинди.

Албатта, ёшларнинг муаммоларини ўрганиш, уларга ҳар томонлама ёрдам бериш бугунги куннинг асосий тамойилларидан бирига айланган ва бундай эзгу ишлар тизимли равишда давом эттирилади.