Аёллар тадбиркорлигини қўллаб-қувватловчи "Ҳамроҳ" компаниясининг Қорақалпоғистон филиали очилди

Бугун Нукус шаҳрида хотин-қизлар тадбиркорлигини қўллаб-қувватлаш борасида муҳим ҳисобланган "Ҳамроҳ" компанияси Қорақалпоғистон филиалининг очилишига бағишланган тадбир ўтказилди.

Унда Қорақалпоғистон Республикаси Жўқорғи Кенгесининг Раиси Аманбай Орынбаев, Ўзбекистон Республикаси Президенти Администрацияси раҳбарининг маслаҳатчиси Н.Давлетова иштирок этди.

Таъкидланганидек, сўнгги йилларда ҳурматли Президентимиз раҳбарлигида хотин-қизларни қўллаб-қувватлаш давлат сиёсатининг устувор йўналишларидан бирига айланди. Юртимизда уларга тадбиркорлик йўналишида кўплаб имтиёзлар берилмоқда.

Шу қаторда, Президентимизнинг 240-сонли фармони билан "Ҳамроҳ" компанияси томонидан 2026-2027 йилларда 6 минг нафар хотин-қизларнинг тадбиркорлик лойиҳаларини молиявий қўллаб-қувватлаш учун 2 триллион сўм йўналтириш, 3 мингга яқин хотин-қизларни тадбиркорликка ўқитиш ҳамда 2 минг нафар хотин-қизнинг тадбиркорлик фаолиятига кўмаклашиш белгиланган.

Ана шундай эзгу ишлар қаторида компания филиалининг очилиши хотин-қизларимизни тадбиркорликка кенг жалб этишга, уларнинг ўз бизнесини янада ривожлантиришига кўмаклашишга асос бўлиб хизмат қилади.