Тадбиркорларнинг мурожаатлари ҳал қилинмоқда
1124
Қорақалпоғистон Республикаси Жўқорғи Кенгеси Раиси М.Ерниязов шу йилнинг 30 май – 1 июнь кунлари шаҳар ва туманларнинг тадбиркорлари билан видеоконференцалоқа орқали учрашувлар ўтказган эди.
Тадбиркорликни ривожлантириш, тадбиркорларни ҳар томонлама қўллаб-қувватлаш, ўйлантираётган муаммоларини бартараф этиш, мурожаатларини ижобий ҳал қилиб бериш, уларга қулай шароитлар яратиш мақсадида ташкил этилган учрашувларда тадбиркорларнинг мурожаатлари тингланиб, уларнинг маълум қисми жойида ўз ечимини топган бўлса, қўшимча ўрганиш ва вақт талаб қиладиган мурожаатлар бўйича масъул раҳбарларга аниқ топшириқлар белгилаб берилган эди.
Биз бугунги кунда мурожаатлари ечимини топган тадбиркорларнинг айримлари билан суҳбатлашдик:
– Жўқорғи Кенгес Раисининг тадбиркорлар билан учрашиб, муаммоларимиз ва ишимизга салбий таъсирини кўрсатаётган айрим камчиликлар ҳақида мурожаатларимизни тинглагани бизни қувонтирди, – дейди Кегейли тумани «Баймақли Есемурат» МЧЖ раҳбари Есемурат Алжанов. – Видеоконференцияда мен ўз тадбиркорлик фаолиятимни янада такомиллаштириш, нақд пул айланмаси билан бирга пластик карта орқали пул айланмаларини йўлга қўйиш учун Халқ банки томонидан терминал олишда ёрдам сўрагандим. Ушбу мурожаатим кўп вақтга чўзилмасдан ўз ечимини топди. Бугун Президентимиз, шунингдек, юртимиз учун аянмасдан меҳнат қилаётган барча раҳбарларнинг тадбиркорликни ривожлантиришни мақсад қилган юртдошларимизга бўлган эътибори учун миннатдорчилик билдирамиз.
– Бўзотов тумани қайта ташкиллаштирилгандан кейин туманда чорвачилик соҳасини ривожлантириш бўйича бир қанча ишлар амалга оширилмоқда, – дейди Бўзотов тумани "Абилов Байрамбай" фермер хўжалиги раҳбари Бектилеў Абилов. – Лекин биз кутган натижага эришишимиз учун яйлов ерлар билан экин ерларини тобига келтириб суғориш талаб қилинади. Шу боис, “Кусханатаў” қишлоқ фуқаролар йиғини ҳудудида фермер хўжаликларининг экин ерларини, янгидан очиладиган ерларни ва яйловларни суғоришда муаммолар пайдо бўлмоқда. Учрашувда Амударё дарёсидан Эркиндарё каналига тўғридан-тўғри сув етказиб бериш учун 5 куб қувватлигидаги насос станциясини қуриб беришда амалий ёрдам сўрадик. Шунингдек, туманимиз янгидан ташкил этилганлиги боис фермерларга хизмат кўрсатувчи машина трактор паркини очишга, қишлоқ хўжалиги техникаларини ёқилғи мой билан таъминлаш учун ёқилғи қуйиш шохобчасини ҳамда чорва озуқа экинларини, полиз маҳсулотларини минерал ўғит билан озиқлантириш учун агрокимё шохобчасини очишда амалий ёрдам сўрадик. Мурожаатимиз ўрганилиб, ижобий ечимини топмоқда.
– Мен туман Диагностика марказини кенгайтириш мақсадида қўшимча иморат ва хориждан тиббиёт асбоп-ускуналарини сотиб олиш учун 1 миллиард сўм миқдорида имтиёзли кредит маблағини ажратишда амалий ёрдам сўраб мурожаат қилдим, – дейди Чимбой туманидаги “ПИНТОК” хусусий фирмаси бошлиғи Рустем Даулетмуратов. – Мурожаатим ижобий ҳал қилинди.
Қорақалпоғистон Республикаси Жўқорғи Кенгеси матбуот хизмати