To‘rtko‘l tumani 18-sonli maktab jamoasi “Yosh gvardiyachilar” harbiy-sport musobaqasining respublika bosqichi g‘olibi bo‘ldi

Milliy gvardiya Toshkent “Temurbeklar maktabi”da umumta’lim maktablari o‘quvchilari o‘rtasida o‘tkazilayotgan “Yosh gvardiyachilar” harbiy-sport musobaqasining respublika bosqichi bo‘lib o‘tdi.

Mazkur musobaqada respublikaning turli hududlaridan tashrif buyurgan 14 ta jamoa ishtirok etdi. Jamoalar umumta’lim maktablarining 9–11-sinf o‘quvchilari orasidan jismonan chiniqqan, intellektual salohiyati yuqori hamda intizomli yoshlar tarkibidan shakllantirildi.

Musobaqa davomida ishtirokchilar 10 ta shart bo‘yicha o‘zaro bellashib, harbiy-sport sinovlari orqali o‘quvchilar o‘zlarining jismoniy tayyorgarligi, chaqqonligi, tezkor fikrlashi va jamoaviy hamjihatligini namoyon etdi. Bellashuvlar saf tayyorgarligi, estafeta, harbiy ko‘nikmalar, sport mashqlari hamda intellektual bahslarni o‘z ichiga oldi.

Unda Qoraqalpog‘iston Respublikasidan ishtirok etgan To‘rtko‘l tumani 18-sonli maktab jamoasi tengdoshlari orasida alohida tayyorgarligi bilan ajralib turdi va yakunda faxrli 1-o‘rinni egalladi.

Shuni alohida ta’kidlash joizki, mazkur tadbir yoshlarni vatanparvarlik ruhida tarbiyalash, ularda harbiy sohaga bo‘lgan qiziqishni oshirish va sog‘lom turmush tarzini targ‘ib qilishga xizmat qilmoqda.