Қишлоқ хўжалиги соҳаси учун берилган имтиёз асосида қисқа вақт ичида республикамизга янгидан 377 техника ва агрегатлар олиб келинди

Ҳурматли Президентимизнинг қарори асосида қишлоқ хўжалиги соҳасини ҳар томонлама ривожлантириш ва механизациялаштириш бўйича қатор имкониятлар яратиб берилган эди. Қарор билан Қорақалпоғистонга 67 млрд. 873 млн. сўм маблағ асосида жами 783 техника олиб келиниши белгиланган бўлиб, режа бўйича ортиғи билан 962 техника учун шартномалар тузилди. Шундан, жами 377 техника учун аванс тўловлари тўлаб берилди. Натижада, ушбу техникалардан 272 таси лизинг асосида республикамизга кириб келиши таъминланди. Бундан ташқари, хўжаликларнинг ўз маблағлари ва банк кредитлари ҳисобидан 105 техника олиб келинишига эришилди ва бугунги кунда дала майдонларида хизмат қилмоқда. Жами олиб келинган 377 техникадан 102 таси юқори сермаҳсул тракторлар бўлса, қолганлари бошқа турдаги техникалар (комбайн, пахта машинаси, мото техникалар ва бошқалар) ва ҳар хил турдаги агрегатлар ҳисобланади. Айтиш жоизки, янги техникаларнинг олиб келиниши билан қишлоқ хўжалиги соҳасида сермаҳсуллик оширилиб, экишдан бошлаб ҳосилни йиғиб олишгача бўлган жараёнлар жадаллашади. Албатта, ҳурматли Президентимиз томонидан яратиб берилган имкониятлар натижасида қишлоқ хўжалиги соҳасидаги муаммолар енгиллашиб, юқори ҳосилдорликка мустаҳкам асос яратилади.