«Арал» клубини тақдирлаш маросими 1-ноябрь куни ўтказилади

Суперлига йўлланмаси ва бир вақтнинг ўзида Пролига ғолиблигини қўлга киритган «Арал» футбол клубига кубокни топшириш маросими 1-ноябрь куни бўлиб ўтади.

Пролиганинг навбатдаги 24-турида «Арал» жамоамиз Ғузорда «Шўртан»нинг меҳмони бўлади. 25-турда эса «Арал» «Ғазалкент» футбол клубини уйда қабул қилади.

1-ноябрь кунги беллашув 18:00 да старт олиши режалаштирилган.

Шуни алоҳида таъкидлаш керакки, «Арал» 25 йилдан кейин Ўзбекистоннинг энг юқори лигасига қайтмоқда. Албатта, бу республикамиз аҳолиси ва футбол мухлислари учун қувончли воқеа бўлди.

Жамоамизнинг «Ғазалкент» билан ўйини якшанба - дам олиш кунига тўғри келаётгани Қорақалпоғистонлик футбол мухлисларига узоқ кутилган Суперлига йўлланмасини кенг турда нишонлаш учун имконият.

Айни пайтда ғазалкентликлар pley-off йўлланмаси учун курашни давом эттираётганидан келиб чиқсак, беллашувнинг ўзи ҳам қизиқарли ўтишига шубҳа йўқ.

Барча футбол мухлисларини 1-ноябрь куни Турон стадионида жамоамизни қўллаб-қувватлашга, Пролига кубогини топшириш маросимини ва Суперлига йўлланмасини кенг нишонлашга чақириб қоламиз.