Қорақалпоғистон делегацияси амалий ташриф билан Хитой давлатига борди

Ҳурматли Президентимизнинг топшириғи асосида Жўқорғи Кенгес Раиси Аманбай Орынбаев раҳбарлигидаги Қорақалпоғистон делегацияси Хитой Халқ Республикасига амалий ташриф билан борди.

Ташрифнинг биринчи кунида Ўзбекистон (Қорақалпоғистон) - Хитой (Шинжон) савдо-иқтисодий ва инвеститсион ҳамкорлик бизнес-форуми ўтказилди.

Унда Шинжон-Уйғур автоном райони халқ ҳукумати раисининг ўринбосари Чжу Лифан билан учрашув ўтказилиб, ҳурматли Президентимизнинг Қорақалпоғистонга алоҳида эътибори билан инвесторлар учун яратилган шароитлар ҳақида маълумот берилди. Мулоқотда табиий ресурсларни қайта ишлаш, транспорт ва логистика, қишлоқ хўжалиги ва чорвачилик йўналишларида лойиҳаларни амалга ошириш бўйича дастлабки келишувларга эришилди.

Бундан сўнг расмий делегациянинг "China railway construction heavy industry Co., Ltd." компанияси бош директори ўринбосари Хиао Эвен билан учрашуви ўтказилиб, унда Нукус шаҳрида қишлоқ хўжалиги техникаларини йиғиш ва сервис хизматларини йўлга қўйиш бўйича меморандум имзоланди.

Шунингдек, "Xinjiang Zhongtai Chemical Co., Ltd." компанияси Бош директори Ма Венюй билан биргаликда Қорақалпоғистонда каустик сода ва поливинилхлорид (ПВХ) маҳсулотларини ишлаб чиқаришни йўлга қўйиш ҳамда "Қуруқ порт" мақомига эга бўлган Орол логистика марказини ташкил этиш масалалари кўриб чиқилди.

"Xinjiang Goldwind Science & Technology Co., Лтд." компанияси Бош директори ўринбосари Чен Жун томонидан амалга оширилаётган шамол электр станциялари учун мачта ишлаб чиқариш лойиҳасини жадаллаштириш масалалари муҳокама қилинди. "Tian feng" корхонаси билан бўлган учрашувда 40 млн. доллар бўлган пахта етиштириш шартномаси имзоланди.

Бундан кейин чорва озуқа базасини яхшилаш, тош кукунидан панель, қурилиш материаллари, кабель, қишлоқ хўжалиги техникалари ишлаб чиқариш ва бошқа лойиҳалар бўйича музокаралар олиб борилди.