«Women in tourism-2026» III форумининг очилиш маросими ўтказилди

Бугун Нукус шаҳридаги «Оқ қуш» мажмуасида жойлашган, кўп миллатли халқимизнинг дўстлик рамзига айланган «Қора уй»да Марказий Осиё тадбиркорларининг туризм соҳасидаги «Women in tourism-2026» III форумининг очилишига бағишланган тадбир ўтказилди.

Унда Қорақалпоғистон Республикаси Жўқорғи Кенгеси Раисининг ўринбосари Р.Нуразизов сўзга чиқиб, йиғилганларни форум очилиши муносабати билан табриклади.

Таъкидланганидек, бугунги кунда ички ва ташқи туризмни ривожлантириш, юртимизнинг сайёҳлик салоҳиятини ошириш, тадбиркорлар ва бу йўналишда фаолият юритаётган хотин-қизларни ҳар томонлама қўллаб-қувватлаш, соҳага инвестицияларни кенг жалб этиш ва сайёҳлар хавфсизлигини таъминлаш бўйича кенг кўламли чора-тадбирлар амалга оширилмоқда. Бунинг натижасида юртимизга келаётган сайёҳлар сони ортиб бормоқда.

Бу борада асрлар давомида яқин қўшничиликда, бирга яшаб келган Марказий Осиё халқлари ўртасидаги алоқалар янада мустаҳкамланиб бормоқда.

Шуни алоҳида таъкидлаш керакки, бугун Марказий Осиё мамлакатлари қатори минтақамизнинг ҳам туризм салоҳияти ошиб, меҳмонларда катта қизиқиш уйғотмоқда. Бунда, албатта, тадбиркор аёлларнинг ўрни алоҳида ҳисобланади.

Бугунги халқаро форум ҳам ана шундай эзгу ишларни янги босқичга олиб чиқиб, Марказий Осиё мамлакатлари ўртасида туризм соҳасида ҳамкорликни янада ривожлантириш, айниқса, тадбиркор аёллар ўртасида қўшма бизнес лойиҳаларини амалга ошириш ишларида муҳим майдон бўлиб хизмат қилади.

Очилишга бағишланган тадбир форум доирасидаги мулоқотлар билан давом этди.