Муҳаммад Алийга Президент совғаси ва миннатдорлик мактуби топширилди

Ҳурматли Президентимизнинг Қорақалпоғистонга ташрифи чоғида ижтимоий тармоқларда Муҳаммад Алий исмли болакайнинг самимий, пок қалби ва Ватанга бўлган меҳри билан Президентимиз билан учрашишга бўлган нияти, билдирган фикрлари кўпчиликнинг меҳри ва эътиборини тортган эди.
 
Бугун Муҳаммад Алийга ҳурматли Президентимиз унинг болаларча пок қалби билан йўллаган видеомурожаатини кўрганини ва бундан жуда мамнун бўлганини айтиб, «Сен ҳам улғайганингда аждодларимизга муносиб, эл-юртига фойдаси тегадиган инсон бўлишингни истайман» деган илиқ сўзлар билан миннатдорчилик хати етиб келди. 
 
Ҳурматли Президентимизнинг миннатдорчилик хати ва совғалари Қорақалпоғистон Республикаси Жўқорғи Кенгесида тантанали равишда топширилди.
 
Унда Жўқорғи Кенгес Раиси Аманбай Орынбаев ҳурматли Президентимизнинг самимий ёзилган миннатдорчилигини ўқиб эшиттирди.
 
Шунингдек, Муҳаммад Алийга алоҳида Президент совғаси ҳамда унинг ота-онаси, тарбия олаётган мактабгача таълим ташкилотига Президент совғалари топширилди. Бундан ташқари, болакайнинг тарбиячиси Гулбаҳар Сапаровага Жўқорғи Кенгес Президиуми қарори билан «Ватан фидойиси» кўкрак нишони топширилди.