QARAQALPAQSTAN RESPUBLIKASÍNÍŃ NÍZAMÍ
Qaraqalpaqstan Respublikası Ministrler Keńesi haqqında
(jańa redakciya)

1-bap. Ulıwma qaǵıydalar

1-statya. Usı Nızamnıń maqseti
Usı Nızamnıń maqseti Qaraqalpaqstan Respublikası Ministrler Keńesiniń (bunnan bılay tekstte Ministrler Keńesi dep júrgiziledi) jumısın tártipke salıwdan ibarat.

2-statya. Ministrler Keńesi haqqındaǵı nızamshılıq
Ministrler Keńesi haqqındaǵı nızamshılıq Qaraqalpaqstan Respublikasınıń Konstituciyası, usı Nızam hám basqa nızamshılıq aktlerinen ibarat bolıp esaplanadı.

3-statya. Ministrler Keńesiniń huqıqıy statusı
Ministrler Keńesi — Qaraqalpaqstan Respublikası Húkimeti — ekonomikanıń, sociallıq hám ruwxıy salanıń nátiyjeli jumıs islewine basshılıq etiwshi, Ózbekstan Respublikası hám Qaraqalpaqstan Respublikası nızamlarınıń, Ózbekstan Respublikası Oliy Majlisi (bunnan bılay tekstte Oliy Majlis dep júrgiziledi) qararlarınıń, Ózbekstan Respublikası Prezidenti pármanlarınıń, qararlarınıń hám biylikleriniń, Ózbekstan Respublikası Ministrler Kabineti (bunnan bılay tekstte Ministrler Kabineti dep júrgiziledi) qararlarınıń hám biylikleriniń, Qaraqalpaqstan Respublikası Joqarǵı Keńesi (bunnan bılay tekstte Joqarǵı Keńes dep júrgiziledi) hám onıń Prezidiumınıń qararlarınıń orınlanıwın támiyinleytuǵın Qaraqalpaqstan Respublikasınıń mámleketlik hákimiyatınıń joqarı atqarıwshı uyımı bolıp tabıladı.
Ministrler Keńesi Qaraqalpaqstan Respublikasında atqarıwshı hákimiyattıń birden-bir sistemasına basshılıq etetuǵın kollegial uyım bolıp tabıladı.

4-statya. Ministrler Keńesi jumısınıń tiykarǵı principleri
Ózbekstan Respublikası hám Qaraqalpaqstan Respublikası Konstituciyaları hám nızamlarınıń ústinligi, insan hám de puqaranıń huqıqları hám erkinliklerin támiyinlew, kollegiallıq, hákimiyat tarmaqlarınıń bóliniwi hám birge islesiwi, sonday-aq, ashıqlıq hám járiyalılıq Ministrler Keńesi jumısınıń tiykarǵı principleri bolıp tabıladı.

2-bap. Ministrler Keńesiniń quramı hám onı dúziw tártibi

5-statya. Ministrler Keńesiniń quramı
Ministrler Keńesi Qaraqalpaqstan Respublikası Húkimetiniń aǵzaları — Ministrler Keńesiniń Baslıǵı, onıń orınbasarları, Qaraqalpaqstan Respublikası ministrleri (bunnan bılay tekstte ministrler dep júrgiziledi), mámleketlik komitetlerdiń baslıqlarınan ibarat boladı. Ministrler Keńesiniń Baslıǵı lawazımı boyınsha Ózbekstan Respublikası Ministrler Kabinetiniń quramına kiredi.

6-statya. Ministrler Keńesin dúziw tártibi
Ministrler Keńesi Qaraqalpaqstan Respublikası Joqarǵı Keńesi tárepinen dúziledi.
Ministrler Keńesiniń Baslıǵı Joqarǵı Keńesi Baslıǵınıń usınıwı boyınsha Ózbekstan Respublikası Prezidentiniń kelisimi menen Joqarǵı Keńes tárepinen tayınlanadı hám lawazımnan bosatıladı.
Ministrler Keńesi Baslıǵı lawazımına talaban Joqarǵı Keńeste onıń talabanlıǵı qarap shıǵılıp atırǵanda, Ministrler Keńesiniń jaqın múddetke hám uzaq keleshekke mólsherlengen háreketler baǵdarlamasın usınadı.
Ministrler Keńesi Baslıǵınıń orınbasarları, Ministrler Keńesiniń aǵzaları Ministrler Keńesi Baslıǵınıń usınıwı boyınsha Joqarǵı Keńes tárepinen, al sessiyalar aralıǵında Joqarǵı Keńes Prezidiumı tárepinen, keyin ala Joqarǵı Keńestiń tastıyıqlawı menen tayınlanadı hám lawazımnan bosatıladı.
Ministrler Keńesiniń aǵzası Joqarǵı Keńes tárepinen tastıyıqlanǵanınan keyin óz wazıypaların atqarıwǵa kirisedi.
Hárekettegi Ministrler Keńesi jańa saylanǵan Joqarǵı Keńes aldında óz wákilliklerin toqtatadı, biraq Ministrler Keńesiniń jańa quramı dúzilgenge shekem  Joqarǵı Keńes qararına muwapıq óz jumısın dawam ettirip turadı.
Ministrler Keńesiniń strukturası, onıń hızmetkerleriniń shtatları hám miynetke haqı tólew fondı Joqarǵı Keńes tárepinen tastıyıqlanadı.
Ministrler Keńesiniń wákilliklerin toqtatıw jańa qáliplestirilgen Joqarǵı Keńestiń birinshi sessiyası ótkerilgen kúni Ministrler Keńesi Baslıǵı tárepinen jazba múrájat beriw arqalı ámelge asırıladı.
Joqarǵı Keńestiń sessiyasında Ministrler Keńesiniń óz wákilliklerin toqtatıw haqqındaǵı tiyisli qarar qabıl etiledi.

7-statya. Ministrler Keńesi Baslıǵın lawazımınan bosatıw
Ministrler Keńesiniń Baslıǵı Joqarǵı Keńes tárepinen tómendegi jaǵdaylarda lawazımınan bosatıladı:
Ministrler Keńesi Baslıǵınıń jumıstan bosatıw haqqındaǵı óz arzasına muwapıq;
Ministrler Keńesiniń Baslıǵı óz wákilliklerin atqarıwı múmkin bolmay qalǵan jaǵdayda;
Ministrler Keńesiniń quramında onıń normal jumıs islewine qáwip salıwshı, saplastırıp bolmaytuǵın kelispewshilikler júzege kelgende, sonday-aq Ministrler Keńesi tárepinen bir neshe márte Ózbekstan Respublikası hám Qaraqalpaqstan Respublikası  nızamshılıq aktlerine qayshı qararlar qabıl etilgen jaǵdayda.

3-bap. Ministrler Keńesiniń wákillikleri

8-statya. Ministrler Keńesiniń ulıwma wákillikleri
Ministrler Keńesi:
nátiyjeli ekonomikalıq, sociallıq, finanslıq, pul-kredit siyasatı júrgiziliwi, ilim, mádeniyat, bilimlendiriw, densawlıqtı saqlawdı hám de ekonomikanıń hám sociallıq tarawdıń basqa tarmaqların rawajlandırıw boyınsha baǵdarlamalardıń islep shıǵılıwı hám de ámelge asırılıwı ushın juwapker boladı;
puqaralardıń ekonomikalıq, sociallıq hám basqa da huqıqların, sonday-aq nızamlı máplerin qorǵawǵa tiyisli ilajlardı ámelge asıradı;
ministrlikler, mámleketlik komitetler hám basqa da mámleketlik basqarıw uyımlarınıń jumısların muwapıqlastıradı hám de baǵdarlaydı, olardıń jumısı ústinen qadaǵalawdı támiyinleydi;
Ózbekstan Respublikası hám Qaraqalpaqstan Respublikası nızamları, Oliy Majlistiń  qararları, Ózbekstan Respublikası Prezidentiniń pármanları, qararları hám biylikleri, Ministrler Kabinetiniń qararları hám biylikleri, Joqarǵı Keńes hám onıń Prezidiumı qararlarınıń orınlanıwın támiyinleydi;
Joqarǵı Keńeske respublikanıń sociallıq-ekonomikalıq turmısınıń eń zárúrli máseleleri boyınsha hár jılǵı bayanatlardı usınadı;
jańadan dúzilgen ministrlikler, mámleketlik komitetler, vedomstvolar hám basqa da mámleketlik basqarıw uyımlarınıń jumısların muwapıqlastıradı;
strategiyalıq jobalastırıwdıń zamanagóy formaların mámleketlik basqarıw sistemasına engiziliwin támiyinleydi;
respublikanı ekonomikalıq hám sociallıq rawajlandırıwdıń eń áhmiyetli hám de baslı baǵdarları boyınsha jaqın, orta hám uzaq múddetke mólsherlengen strategiyalar, koncepciyalar, baǵdarlamalar hám de «Jol karta»ların ámelge asırıw boyınsha ilajlar kóredi.
Ministrler Keńesi mámleketlik basqarıw uyımları hám ózi dúzgen xojalıq basqarıw uyımları sistemasın, sonday-aq respublikanıń aymaǵında jaylasqan Ózbekstan Respublikasına baǵınıwshı shólkemlerdi basqaradı hám olardıń óz-ara baylanıslı jumısların támiyinleydi.
Ministrler Keńesi Qaraqalpaqstan Respublikasınıń Konstituciyasında, usı Nızamda hám basqa nızamlarda názerde tutılǵan basqa da wákilliklerdi ámelge asırıwı múmkin.

9-statya. Ministrler Keńesiniń ekonomika salasındaǵı wákillikleri
Ministrler Keńesi:
ekonomika salasında birden-bir mámleketlik siyasattıń ámelge asırılıwın hám industrial siyasattıń alıp barılıwın támiyinleydi;
turaqlı ekonomikalıq ósiwdi, makroekonomikalıq teń salmaqlıqtı támiyinlew, ekonomikanı reformalaw hám strukturalıq ózgertiw, milliy ekonomikanı diversifikaciyalaw hám de onıń básekige shıdamlılıǵın asırıw boyınsha ilajlar kóredi;
ekonomikanı basqarıwda bazar mexanizmleriniń engiziliwin hám onıń tiykarǵı tarmaqların rawajlandırıw strategiyalarınıń qáliplesiwin támiyinleydi;
sanaattı modernizaciyalaw hám diversifikaciyalawda, joqarı texnologiyalıq qayta islew tarmaqların jedel rawajlandırıwdı, innovaciyalıq islenbelerdi hám energiya únemlewshi texnologiyalardı óndiriske keń engiziwdi, qayta tikleniwshi energiya dereklerinen paydalanıwdı keńeytiwdi támiyinleydi;
ekonomika tarmaqların strategiyalıq jaqtan rawajlandırıw boyınsha respublikalıq baǵdarlamalardı, respublikanı rawajlandırıw boyınsha baǵdarlamalardı islep shıǵadı hám olardıń ámelge asırılıwın támiyinleydi;
turizm industriyasın rawajlandırıw hám turizm infrastrukturasın keńeytiw ushın sharayatlar jaratadı;
erkin ekonomikalıq zonalar, texnoparkler, kishi sanaat zonaları jumısın muwapıqlastırıwdı hám monitoring júrgiziwdi ámelge asıradı, olardıń jumısı nátiyjeliligin asırıw ilajların kóredi;
mámleketlik basqarıw usılların, sonıń ishinde elektron húkimet principleri tiykarında da jetilistiredi, bazar principlerine tiykarlanǵan xojalıq basqarıw hám korporativ basqarıwdıń zamanagóy principleri hám usılları engiziliwin xoshametleydi;
awıl xojalıǵın basqarıw sistemasın jetilistiriw, agrar sektordı modernizaciyalaw hám de jedel rawajlandırıw, azıq-awqat qáwipsizligin támiyinlew, resurslardı únemlewshi hám intensiv zamanagóy agrotexnologiyalardı engiziw, jer resursları sapasın jaqsılaw hám de suw resurslarınan aqılǵa muwapıq paydalanıw ilajların kóredi;
urbanizaciya processleriniń mámleket tárepinen tártipke salınıwın hám mámlekettiń turaq-jay siyasatınıń ámelge asırılıwın, jer uchastkalarına baylanıslı zamanagóy bazar mexanizmleriniń engiziliwin támiyinleydi;
erkin isbilermenlikti rawajlandırıwǵa, isbilermenlik ortalıǵın jaqsılaw, jasırın ekonomika úlesin kemeytiw, ekonomikalıq processlerde mámlekettiń qatnasıwın optimallastırıw hám de mámleketlik-jeke sheriklikti rawajlandırıw arqalı sharayatlar jaratadı;
isbilermenler, sonday-aq sırt el investorlarınıń múrájatları menen islesiw, olar menen ashıq hám tuwrıdan-tuwrı baylanıstı támiyinlew boyınsha nátiyjeli sistemanı engiziw ilajların kóredi.

10-statya. Ministrler Keńesiniń byudjet hám finans siyasatın ámelge asırıw salasındaǵı wákillikleri
Ministrler Keńesi:
byudjet, finans, pul-kredit siyasatı salasında birden-bir mámleketlik siyasattıń ámelge asırılıwın támiyinleydi;
Qaraqalpaqstan Respublikasınıń respublikabyudjeti hám maqsetli mámleketlik fondları byudjetleri, onıń ekonomikalıq hám sociallıq rawajlandırıw prognozların esapqa alǵan halda eń áhmiyetli baǵdarlamalardıń islep shıǵılıwın hám orınlanıwın shólkemlestiredi;
qárejetlerdiń sociallıq baǵdarlanǵanlıǵın saqlap qalǵan halda Qaraqalpaqstan Respublikası byudjetiniń barlıq dárejelerinde támiyinlew, jergilikli byudjetlerdiń dáramat bólegin bekkemlew ilajların ámelge asıradı;
Joqarǵı Keńes Prezidiumınıń qararı menen nátiyjeli fiskal siyasat alıp baradı, salıq salıw sistemasın ápiwayılastırıw, salıq hákimshiligi sistemasınıń sapası hám nátiyjeliligin asırıw ilajların kóredi;
pul hám kredit sistemasın bekkemlew, bank hám basqa finans institutlarınıń turaqlılıǵın támiyinlew boyınsha is-ilajlardı ámelge asırıwǵa kómeklesedi.

11-statya. Ministrler Keńesiniń sociallıq salasındaǵı wákillikleri
Ministrler Keńesi:
sociallıq tarawda birden-bir mámleketlik siyasattıń ámelge asırılıwın támiyinleydi;
bilimlendiriw sistemasın rawajlandırıwdı, onıń sapası hám nátiyjeli ámelge asırılıwın, úzliksiz bilimlendiriwden paydalanıw ushın sharayatlar jaratılıwın támiyinleydi;
mektepke shekemgi bilimlendiriw sistemasın jetilistiriw, mektepke shekemgi bilimlendiriw shólkemleri tarmaǵın keńeytiw hám olardıń materiallıq-texnikalıq bazasın bekkemlew ilajlar kóredi;
ilimiy-izertlew hám innovciyalıq xızmetti rawajlandırıwdıń baslı baǵdarların orınlaw boyınsha is-ilajlardı ámelge asıradı;
densawlıqtı saqlaw sistemasın rawajlandırıw, medicinalıq xızmet kórsetiw dárejesin hám ashıq-aydınlıǵın asırıw, xalıqtıń densawlıǵın saqlaw hám bekkemlew, salamat turmıs tárizi principlerin engiziw, sonday-aq sanitariya-epidemiologiyalıq tazalıqtı támiyinlew boyınsha ilajlardı ámelge asıradı;
dene tárbiyası hám sporttı rawajlandırıw, sport mákemeleriniń materiallıq-texnikalıq bazasın bekkemlew hám de sport infrastrukturasın jetilistiriwde kómeklesedi;
jumıs orınların shólkemlestiriw hám xalıqtıń bántligin támiyinlew baǵdarlamaların islep shıǵadı hám de ámelge asıradı, miynet bazarı infrastrukturasınıń rawajlandırılıwın, puqaralardı sociallıq qorǵaw, olardıń sociallıq hám pensiya támiynatı sistemalarınıń jumıs alıp barıwın támiyinleydi;
shańaraq, analıq hám balalıqtı qorǵawǵa kómeklesedi, jaslarǵa tiyisli mámleketlik siyasattı ámelge asırıw boyınsha is-ilajlar kóredi;
sociallıq járdem kórsetiw boyınsha respublikalıq baǵdarlamalardıń islep shıǵılıwı hám orınlanıwın támiyinleydi, puqaralardıń haqıyqıy dáramatların asırıw, xalıqtıń turaq-jay sharayatların jaqsılaw hám de xalıqtıń sociallıq mútáj qatlamların, sonday-aq mayıplıǵı bolǵan shaxslardı mámleket tárepinen qollap-quwatlaw ilajların kóredi.

12-statya. Ministrler Keńesiniń mádeniy-gumanitar salasındaǵı wákillikleri
Ministrler Keńesi:
mádeniy-gumanitar salada birden-bir mámleketlik siyasattıń ámelge asırılıwına kómeklesedi;
ilimiy-texnikalıq hám mádeniy birge islesiw salasında basshılıqtı ámelge asıradı;
mádeniyat hám kórkem ónerdi rawajlandırıwǵa, mádeniy qádiriyatlardan keń kólemde paydalanıwdı támiyinlewge, puqaralardıń sociallıq hám mádeniy turmısta tolıq huqıqlı túrde qatnasıwına kómeklesedi;
teatr-tamashalıq, mádeniy-aǵartıwshılıq shólkemler hám de muzeyler jumısın rawajlandırıw hám jetilistiriw, olardıń materiallıq-texnikalıq bazasın bekkemlew ilajların kóredi;
tariyxıy hám mádeniy miyraslardıń qorǵalıwın, respublikanıń pútkil aymaǵında sociallıq turmıstıń barlıq tarawlarında mámleketlik tildiń hár tárepleme rawajlandırılıwın hám de ámel etiwin támiyinleydi;
sırt eller hám xalıqaralıq shólkemler menen mádeniy-gumanitar baylanıslardı keńeytiw hám de rawajlandırıw ilajların kóredi.

 

13-statya. Ministrler Keńesiniń Qaraqalpaqstan Respublikası aymaqların rawajlandırıw salasındaǵı wákillikleri
Ministrler Keńesi:
aymaqlardıń ekonomikasın modernizaciyalaw hám diversifikaciyalaw, olardıń sanaat hám de eksport potencialın asırıw arqalı aymaqlardı sociallıq-ekonomikalıq tárepten kompleks hám proporcional túrde rawajlandırıwdı támiyinleydi;
ekonomika tarmaqların hám sociallıq tarawdı strategiyalıq tárepten rawajlandırıwdıń baǵdarlamaların,sonday-aq  aymaqlarda ekonomikalıq, sociallıq hám basqarıw reformaların ámelge asırıw ilajların kóredi;
Qaraqalpaqstan Respublikası respublikabyudjetiniń, jergilikli byudjetleriniń maqsetli orınlanıwın támiyinleydi;
aymaqlardı, birinshi gezekte ekonomikalıq hám sociallıq rawajlanıwda artta qalıp atırǵan awıl, qala hám rayonlardı rawajlandırıwdıń keleshek wazıypaların nátiyjeli sheshiw boyınsha mámleketlik basqarıw hám jergilikli atqarıwshı hákimiyat uyımlarınıń muwapıqlastırılǵan jumısın támiyinlew ilajların kóredi;
aymaqlardı kompleksli rawajlandırıwǵa, sonday-aq ekonomika tarmaqları hám tarawlarında bazar reformaların tereńlestiriwge, aymaqlarda xalıqtıń bántligin hám turmıs dárejesin úzliksiz asırıp barılıwın támiyinlewge baylanıslı reformalardıń ámelge asırılıw barısın monitoring tiykarında aymaqlardı sociallıq-ekonomikalıq rawajlandırıw principleriniń kompleksli analizin ótkeredi;
sırt el investiciyaların tartıw hám aymaqlardıń eksport potencialın asırıw ilajların kóredi, respublikanı rawajlandırıwdıń strategiyalıq maqsetlerinen hám onıń ekonomikalıq qáwipsizliginen kelip shıqqan halda, aymaqlardıń investiciyalıq tartımlılıǵın ele de jaqsılaw boyınsha usınıslar islep shıǵadı;
aymaqlardı sociallıq-ekonomikalıq rawajlandırıw máseleleri boyınsha Ózbekstan Respublikası Prezidenti pármanları, qararları, biylikleri hám tapsırmalarınıń, Ministrler Kabinetiniń qararları, biylikleri, bayanlama sheshimlerin hám tapsırmaların, Joqarǵı Keńes hám onıń Prezidiumı qararların, Joqarǵı Keńes Baslıǵınıń biyliklerin hám tapsırmalarınıń orınlanıwı barısın maqsetli úyreniwdi ámelge asıradı;
aymaqlardıń ekonomikalıq turaqlılıǵın támiyinlewshi eń áhmiyetli baslı baǵdarlar, ekonomikanıń anıq tarmaqları hám tarawındaǵı reformalardı ele de tereńlestiriw, aymaqlardıń ekonomikalıq potencialın asırıw boyınsha usınıslar islep shıǵadı.

14-statya. Ministrler Keńesiniń ekologiya hám qorshaǵan ortalıqtı qorǵaw salasındaǵı wákillikleri
Ministrler Keńesi:
ekologiya hám qorshaǵan ortalıqtı qorǵaw hám de ekologiyalıq qáwipsizlikti támiyinlew salasında birden-bir mámleketlik siyasattıń ámelge asırılıwında kómeklesedi;
puqaralardıń qolaylı qorshaǵan ortalıqqa bolǵan huqıqların ámelge asırıw, ekologiyalıq tazalıqtı támiyinlew ilajların kóredi;
tábiiy resurslardı qorǵaw, olardan aqılǵa muwapıq paydalanıw hám de tábiyattan paydalanıwdı tártipke salıw boyınsha is-ilajlardı kóredi;
tábiyattı qorǵaw ilajların ótkeriw, respublikalıq hám xalıqaralıq áhmiyetke iye iri ekologiyalıq baǵdarlamalardı júzege shıǵarıwda boyınsha is-ilajlar ámelge asıradı;
iri avariyalar hám apatshılıqlardıń aldın alıw hám olardıń aqıbetlerin saplastırıw boyınsha ilajların kóredi.

15-statya. Ministrler Keńesiniń investiciyalar hám sırtqı ekonomikalıq jumıs tarawındaǵı wákillikleri
Ministrler Keńesi:
investiciyalar hám sırtqı ekonomikalıq qatnasıqlarda birden-bir mámleketlik siyasattıń ámelge asırılıwına kómeklesedi;
qolaylı investiciya ortalıǵın jaratıw hám sırt el investiciyaların tartıw boyınsha is-ilajlardı ámelge asırıwda kómeklesedi;
eksport etiwshilerdi hár tárepleme qollap-quwatlaydı, jergilikli tovarlar hám xızmetlerdiń sırtqı bazarlarǵa shıǵıwı ushın qolay sharayatlar jaratadı, zamanagóy logistika infrastrukturasın rawajlandırıw boyınsha ilajlar kóredi;
Qaraqalpaqstannıń sawda, ekonomikalıq, texnologiyalıq, transport hám basqa da baylanısların keńeytiw, ekonomikanıń turaqlılıǵın bekkemlew hám ekonomikalıq qáwipsizlikti támiyinlew ilajların kóredi.

16-statya. Ministrler Keńesiniń málimleme texnologiyaların hám kommunikaciyaların rawajlandırıw tarawındaǵı wákillikleri
Ministrler Keńesi:
málimleme texnologiyaların hám kommunikaciyaların rawajlandırıw tarawında birden-bir mámleketlik siyasattıń ámelge asırılıwına kómeklesedi;
málimleme-xabar jámiyetin qáliplestiriw, sanlı ekonomikanı rawajlandırıw, «Elektron húkimet» sistemasınıń engiziliwin támiyinlew, xalıq, biznes hám mámleket arasında birge islesiwdi nátiyjeli tártipke salıw ushın zárúr shárt-sharayatlar jaratadı.

17-statya. Ministrler Keńesiniń jámiyetlik tártipti saqlaw, mámleketlik qáwipsizlikti hám qorǵanıw qábiletin támiyinlew salasındaǵı wákillikleri
Ministrler Keńesi:
mámleket qáwipsizligi hám qorǵanıw qábiletin támiyinlew, mámleket máplerin qorǵaw, jámiyetlik tártipti saqlaw boyınsha is-ilajlardı ámelge asırıwǵa kómeklesedi;
huqıqbuzarlıqlar profilaktikasına tiyisli mámleketlik baǵdarlamalardıń islep shıǵılıwın, tastıyıqlanıwın hám ámelge asırılıwın támiyinleydi;
huqıqbuzarlıqlar profilaktikasın tikkeley ámelge asırıwshı hám onda qatnasıwshı mámleketlik uyımlar hám basqa shólkemlerdiń birge islesiwin támiyinleydi.

18-statya. Ministrlikler, mámleketlik komitetler hám basqa da mámleketlik basqarıw uyımlarına basshılıq etiw
Ministrler Keńesi ministrlikler, mámleketlik komitetler hám basqa da mámleketlik basqarıw uyımları jumısın muwapıqlastıradı hám de baǵdarlaydı.
Ministrlikler, mámleketlik komitetler hám basqa da mámleketlik basqarıw uyımları ózleri alıp barıp atırǵan mámleketlik siyasattıń sapalı hám nátiyjeli ámelge asırılıwı ushın Ministrler Keńesi aldında juwapker bolıp tabıladı.
Ministrlikler, mámleketlik komitetler, basqa da mámleketlik hám basqarıw uyımları haqqındaǵı rejeler hárekettegi nızamshılıqqa muwapıq Ministrler Keńesi tárepinen tastıyıqlanadı.
Ministrler Keńesi zárúrlikten kelip shıǵıp ministrliklerdiń, mámleketlik komitetlerdiń hám basqa da mámleketlik basqarıw uyımlarınıń aymaqlıq apparatı xızmetkerler sanın hám olardı saqlaw ushın qarjılardıń muǵdarın belgileydi.
Ministrler, mámleketlik komitetler baslıqları hám basqa mámleketlik basqarıw uyımları basshıları Ministrler Keńesine kirgizilip atırǵan usınıslar, analitikalıq  hám de taǵı basqa da hújjetlerdiń, sonıń ishinde normativlik huqıqıy aktler joybarlarınıń sapalı hám hár tárepleme islep shıǵılıwı, sonday-aq olardı ámelge asırıwdıń sońǵı nátiyjeleri hám aqıbetleri ushın jeke juwapker boladı.
Ministrler Keńesi Joqarǵı Keńeske, al sessiyalar aralıǵındaǵı dáwirde Joqarǵı Keńes Prezidiumına ministrlikler, mámleketlik komitetler hám basqa da mámleketlik basqarıw uyımların dúziw hám saplastırıw haqqında usınıslar beredi.
Ministrler hám mámleketlik komitetler baslıqlarınıń orınbasarları, bas basqarmalar, basqa da mámleketlik basqarıw uyımlarınıń basshıları hám olardıń orınbasarları, eger nızamshılıqta basqa qaǵıyda názerde tutılmaǵan bolsa, Ministrler Keńesi tárepinen lawazımǵa tayınlanadı hám lawazımnan bosatıladı.
Ministrler Keńesi maqsetli wazıypalardıń orınlanıwın ministrlikler, mámleketlik komitetler hám basqa da mámleketlik basqarıw uyımları jumısınıń nátiyjeliligin hám de maqsetli wazıypalardıń orınlanıwın bahalawdıń tiykarǵı kórsetkishlerin esapqa alǵan halda támiyinleydi.
Ministrler Keńesi ministrlikler, mámleketlik komitetler hám basqa mámleketlik basqarıw uyımları basshılarınıń tiykarǵı kórsetkishlerde belgilengen maqsetli wazıypalardıń orınlanıwı hám de olarǵa erisiliwi haqqındaǵı esabatların sistemalı túrde tıńlaydı.
Ministrler Keńesi zárúr bolǵanda mámleketlik basqarıwdıń óz wákilligine kiretuǵın ayırım máselelerin sheshiwdi, eger bul máselelerdiń sheshiliwi nızamshılıqta Qaraqalpaqstan Respublikası Húkimetiniń ayrıqsha wákilliklerine kirgizilmegen bolsa, ministrliklerge, mámleketlik komitetlerge hám óz boysınıwındaǵı basqa da mámleketlik basqarıw uyımlarına beriwi múmkin.

19-statya. Ministrler Keńesiniń nızamshılıq baslaması huqıqı
Ministrler Keńesi nızamshılıq baslaması huqıqına iye.
Ministrler Keńesi nızamshılıq baslaması huqıqın nızam joybarların Joqarǵı Keńeske kirgiziw arqalı ámelge asıradı.
Ministrler Keńesi ózi kirgizgen nızam joybarın Joqarǵı Keńeste qarap  shıǵıwda qatnasıw ushın óz wákillerin tayınlawı múmkin.

4-bap. Ministrler Keńesiniń jumısın shólkemlestiriw

20-statya. Ministrler Keńesiniń Baslıǵı
Ministrler Keńesiniń Baslıǵı:
Ministrler Keńesiniń jumısın shólkemlestiredi hám oǵan basshılıq etedi, onıń nátiyjeli islewi ushın jeke juwapker boladı;
Qaraqalpaqstan Respublikası Húkimeti aldına qoyılǵan maqsetli wazıypalardıń orınlanıwın támiyinlew maqsetinde ministrlikler, mámleketlik komitetler hám basqa da mámleketlik basqarıw uyımları xızmetin ulıwmalıq tárizde muwapıqlastırıwdı ámelge asıradı, júzege kelgen kelispewshilikler boyınsha qararlar qabıl etedi;
Ministrler Keńesi hám onıń Prezidiumınıń májilislerine basshılıq etedi, onıń qararlarına qol qoyadı;
xalıqaralıq qatnasıqlarda Joqarǵı Keńestiń kelisimi menen Ministrler Keńesi atınan is kóredi, sóylesiwler alıp baradı hám Qaraqalpaqstan Respublikası Húkimeti atınan xalıqaralıq shártnamalarǵa qol qoyadı;
Ministrler Keńesi Baslıǵınıń orınbasarları arasında wazıypalardı bólistiredi hám keyin ala onı Ministrler Keńesiniń Prezidiumında tastıyıqlaydı;
Ministrler Keńesi hám onıń Prezidiumınıń májilisinde qarap shıǵıwdı talap etpeytuǵın mámleketlik hám xojalıq basqarıwınıń ayırım máseleleri boyınsha qararlar qabıl etedi;
Joqarǵı Keńes Baslıǵına rayon, qala hákimlerin hám olardıń orınbasarların tayınlaw hám lawazımınan bosatıw haqqında usınıslar beredi;
Ministrler Keńesiniń ótken jıldaǵı sociallıq-ekonomikalıq rawajlanıw juwmaqları hám kelesi jıl ushın tiykarǵı baslı baǵdarlar haqqındaǵı hár jılǵı bayanatın Joqarǵı Keńeske usınadı;
Qaraqalpaqstan Respublikası Húkimeti aǵzaları menen birgelikte hár yarım jılda Joqarǵı Keńeske Ózbekstan Respublikası Prezidentiniń Oliy Majliske jollaǵan Múrájatınan kelip shıqqan halda, tiyisli jılǵa belgilengen mámleketlik baǵdarlamanıń Qaraqalpaqstan Respublikası boyınsha orınlanıwı haqqında esabatın usınadı;
Qaraqalpaqstan Respublikası nızamlarında názerde tutılǵan basqa da wákilliklerdi ámelge asıradı.
Ministrler Keńesi Baslıǵı atqarıw tártibiniń ulıwmalastırılǵan analizi tiykarında:
óz wákillikleri sheńberinde intizamiy jaza sharasın qollaw haqqında qarar qabıl etedi;
Joqarǵı Keńes tárepinen lawazımǵa tayınlanatuǵın lawazımlı shaxsqa jol qoyılǵan ayıplı háreketleri (háreketsizligi) ushın intizamiy jaza sharaların qollaw haqqında Joqarǵı Keńes Baslıǵına usınıs kirgizedi.
Ministrler Keńesi Baslıǵı óz wákilliklerine kiretuǵın máseleler boyınsha biylikler shıǵaradı.
Ministrler Keńesi Baslıǵı Qaraqalpaqstan Respublikası Puqaralıq qorǵanıw baslıǵı sıpatında ózine tiyisli wákilliklerdi ámelge asıradı.
Ministrler Keńesi Baslıǵı Ministrler Keńesiniń jumısı haqqında Joqarǵı Keńes Baslıǵına turaqlı ráwishte málimleme beredi.
Ministrler Keńesi Baslıǵı joqlıǵında onıń wazıypasın onıń birinshi orınbasarı yamasa orınbasarlarınan biri atqarıp turadı.

21-statya. Ministrler Keńesi Baslıǵınıń orınbasarları
Ministrler Keńesi Baslıǵınıń orınbasarları wazıypalarınıń bólistiriliwine muwapıq:
ministrlikler, mámleketlik komitetler hám basqa da mámleketlik basqarıw uyımları tárepinen Ózbekstan Respublikası hám Qaraqalpaqstan Respublikası nızamları, Oliy Majlis palataları qararları, Nızamshılıq palatası deputatınıń hám Senat aǵzasınıń sorawı, Ózbekstan Respublikası Prezidentiniń aktleri hám tapsırmalarınıń, Ministrler Kabinetiniń aktleri, Joqarǵı Keńes hám onıń Prezidiumınıń aktleri, parlament sorawı, Joqarǵı Keńes deputatınıń sorawı, Joqarǵı Keńes Baslıǵınıń tapsırmaları, Ministrler Keńesi Baslıǵınıń tapsırmalarınıń orınlanıwı boyınsha monitoringin ámelge asıradı;
orınlarda jumıslardıń haqıyqıy jaǵdayın úyrenedi, sonday-aq ekonomikadaǵı hám sociallıq tarawdaǵı mashqalalardı hár tárepleme analizleydi;
strategiyalıq hám baslı wazıypalardı ámelge asırıw boyınsha kompleksli usınıslar islep shıǵadı;
Qaraqalpaqstan Respublikası Húkimeti hám mámleketlik basqarıw uyımları jumısınıń nátiyjeliligin jetilistiriw tarawındaǵı kompleksli is-ilajlardıń ámelge asırılıwın támiyinleydi;
atqarıwshı hákimiyat uyımları hám olardıń basshılarınıń jumısın bahalaw sistemasın muwapıqlastıradı;
Ózbekstan Respublikası hám Qaraqalpaqstan Respublikası nızamları, Oliy Majlis palataları qararları, Ózbekstan Respublikası Prezidentin aktleri hám tapsırmaları, Ministrler Kabineti aktleri, Joqarǵı Keńes hám onıń Prezidiumı qararları, Ministrler Keńesi aktleriniń sapalı hám óz waqtında orınlanıwı boyınsha óz wákillikleri sheńberinde ilajlar kóredi;
nızamshılıqta názerde tutılǵan basqa da wákilliklerdi atqaradı.
Ministrler Keńesi Baslıǵınıń orınbasarları ózine júkletilgen wazıypalardıń nátiyjeleri boyınsha jeke juwapker bolıp esaplanadı.

22-statya. Ministrler Keńesi Baslıǵınıń másláhátshileri
Ministrler Keńesi Baslıǵınıń másláhátshileri wazıypalar bólistiriliwine muwapıq:
óz wákilligine kirgizilgen tiyisli baǵdarlar hám máseleler boyınsha Ministrler Keńesi Baslıǵına usınıslar islep shıǵılıwın, olardıń ekspertizadan ótkeriliwin hám tayarlanıwın támiyinleydi, sonday-aq onıń ushın jeke juwapker boladı;
Ózbekstan Respublikası hám Qaraqalpaqstan Respublikasınıń nızamları, Oliy Majlis palatalarınıń qararları, Ózbekstan Respublikası Prezidentiniń aktleri hám tapsırmaları, Ministrler Kabinetiniń aktleri, Joqarǵı Keńes hám onıń Prezidiumınıń qararları, Joqarǵı Keńes Baslıǵınıń tapsırmaları, Ministrler Keńesi Baslıǵınıń tapsırmaları, Ministrler Keńesiniń aktleri sapalı hám óz waqtında orınlanıwı boyınsha óz wákillikleri sheńberinde ilajlar kóredi;
óz wákillikleri sheńberinde ministrlikler, mámleketlik komitetler hám basqa da shólkemler jumısın ulıwma tárizde muwapıqlastırıwdı ámelge asıradı;
nızamshılıqta názerde tutılǵan basqa da wazıypalardı atqaradı.
Ministrler Keńesi Baslıǵınıń másláhátshileri tiyisli tártipte joqarı turıwshı uyımlar menen kelisilgen halda Ministrler Keńesi Baslıǵı tárepinen lawazımǵa tayınlanadı hám bosatıladı.

23-statya. Ministrler Keńesi aǵzaları
Ministrler Keńesi aǵzaları:
Ministrler Keńesi hám onıń Prezidiumı májilislerinde máselelerdi qarap shıǵıwda qatnasadı, sonday-aq Ministrler Keńesi májilisleriniń kún tártibi boyınsha usınıslar kirgizedi;
Ministrler Keńesi qarap  shıǵıwı ushın máseleler tayarlawdı ámelge asıradı;
Ministrler Keńesiniń wákilligine kiretuǵın máselelerdi qarap  shıǵıw boyınsha Ministrler Keńesine usınıslar kirgizedi;
normativlik huqıqıy aktler joybarların islep shıǵıw baslaması menen shıǵadı;
tiyisli ministrliklerdiń, mámleketlik komitetlerdiń yamasa basqa da mámleketlik basqarıw uyımlarınıń jumısın shólkemlestiredi hám muwapıqlastıradı;
Ministrler Keńesi tárepinen shólkemlestiriletuǵın Ministrler Keńesiniń komissiyaları hám basqa isshi uyımlarına Ministrler Keńesiniń qararına muwapıq basshılıqtı ámelge asıradı.
Ministrler Keńesi aǵzaları ózi basshılıq etip atırǵan ministrliktiń, mámleketlik komitettiń yamasa basqa da mámleketlik basqarıw uyımınıń jumısı nátiyjeliligi ushın jeke juwapker boladı.
Ministrler Keńesi aǵzaları ilimiy hám pedagogikalıq jumıstan tısqarı is haqı tólenetuǵın basqa túrdegi jumıs penen shuǵıllanıwı múmkin emes.

24-statya. Ministrler Keńesiniń kollegial uyımları
Ministrler Keńesi belgilengen tártipte turaqlı komissiyalar dúzedi hám olardıń wazıypaların, funkciyaların hám de jumısın shólkemlestiriw tártibin belgileydi.
Mámleketlik hám xojalıq basqarıwınıń ayırım máseleleri boyınsha usınıslar tayarlaw, Ministrler Keńesiniń qararları joybarların islep shıǵıw, sonday-aq Ministrler Keńesiniń ayırım tapsırmaların orınlaw ushın Ministrler Keńesiniń waqıtsha komissiyaları hám basqa isshi uyımları dúziliwi múmkin.

25-statya. Ministrler Keńesine máselelerdi kirgiziw hám qarap shıǵıw
Ministrler Keńesine qarap  shıǵıw ushın:
Qaraqalpaqstan Respublikası nızamlarınıń joybarların nızamshılıq baslaması tártibinde Joqarǵı Keńeske kirgiziw ushın;
Joqarǵı Keńes hám onıń Prezidiumınıń qararları joybarların Joqarǵı Keńeske kirgiziw ushın;
Ministrler Keńesiniń qararları hám biylikleri joybarların qabıllaw ushın;
lawazımlı shaxslardıń ayırım kategoriyalarınıń sırt el mámleketlerine xızmet saparlarına shıǵıwı haqqındaǵı, Ministrler Keńesi menen belgilengen tártipte arnawlı kelisiwdi talap etetuǵın usınıslar kirgiziledi.
Ministrler Keńesinde onıń wákilliklerine kiretuǵın máselelerdi qarap  shıǵıw Ministrler Keńesi hám onıń Prezidiumı májilislerinde, Ministrler Keńesi Baslıǵı, onıń orınbasarları hám másláhátshileri tárepinen Ministrler Keńesi shólkemlestiretuǵın komissiyalardıń hám basqa da vedomstvolararalıq kollegial uyımlardıń májilislerinde mápdar mámleketlik uyımlardıń hám basqa da shólkemlerdiń wákilleri qatnasında ámelge asırıladı.
Ministrler Keńesine qarap shıǵıw ushın Karaqalpaqstan Respublikası Konstituciyası, usı Nızam hám basqa da nızamlarda belgilengen máselelerde kirgiziledi.
Respublikada áhmiyetli ekonomikalıq, sociallıq hám mádeniy máselelerdi sheshiw ushın Ministrler Keńesiniń kompleksli yamasa maqsetli baǵdarlamaları hám ilajları islep shıǵılıp, olar Ministrler Keńesi Baslıǵınıń orınbasarları hám másláhátshileri tárepinen Ministrler Keńesine qarap  shıǵıw ushın kirgiziledi.
Ministrler Keńesine qarap  shıǵıw ushın máseleler Ministrler Keńesi aǵzaları, mámleketlik basqarıw uyımları basshıları, rayon, qala hákimleri, ayırım jaǵdaylarda bolsa olardıń birinshi orınbasarları tárepinen kirgiziliwi múmkin.

26-statya. Ministrler Keńesiniń Apparatı
Ministrler Keńesiniń hám onıń Prezidiumınıń májilislerin, tiyisli sheshimleriniń joybarların, málimleme-analitikalıq hám basqa da materiallardı tayarlawda, sonday-aq Ministrler Keńesi Baslıǵınıń Sekretariatı, Ministrler Keńesi Baslıǵı orınbasarlarınıń Sekretariatları hám funkcional bólimlerdiń jumısların muwapıqlastırıp barıwdı támiyinlew, olardıń jumıslarınıń nátiyjeliligin arttırıw hám atqarıw tártibin bekkemlew ushın Ministrler Keńesiniń apparatı dúziledi.
Ministrler Keńesiniń apparatına apparat basqarıwshısı basshılıq etedi.
Ministrler Keńesi apparatınıń jumıs tártibi Ministrler Keńesi tárepinen tastıyıqlanatuǵın Rejege muwapıq belgilenedi.

27-statya. Ministrler Keńesiniń májilisleri
Mámleketlik basqarıw, xojalıq, sociallıq hám mádeniy rawajlandırıwdıń eń áhmiyetli máseleleri Ministrler Keńesiniń májilislerinde qarap  shıǵıladı.
Ministrler Keńesiniń májilisleri hár sherekte keminde bir márte ótkeriledi.
Ministrler Keńesi májilislerin Ministrler Keńesi Baslıǵı ótkeredi.
Joqarǵı Keńes Baslıǵı Ministrler Keńesiniń májilislerinde basshılıq etiwge haqılı.
Ministrler Keńesiniń májilislerinde Ministrler Keńesi Baslıǵınıń orınbasarları hám másláhátshileri, ministrler, mámleketlik komitetlerdiń basshıları, zárúrligi bolǵanda rayon, qala hákimleri hám basqa da mámleketlik basqarıw uyımları basshıları qatnasadı.
Ministrler Keńesiniń májilislerine zárúr bolǵanda Joqarǵı Keńes Baslıǵınıń orınbasarı, Joqarǵı Keńes komitetleriniń baslıqları, Qaraqalpaqstan Respublikası Konstituciyalıq baqlaw komitetiniń baslıǵı hám huqıq qorǵaw uyımları basshıları mirát etiliwi múmkin.
Ministrler Keńesiniń májilislerin ǵalaba xabar qurallarında járiyalaw maqsetinde ǵalaba xabar quralları hám puqaralıq jámiyetiniń basqa institutları wákilleri de mirát etiliwi múmkin.

28-statya. Ministrler Keńesiniń májilislerinde qarap shıǵılatuǵın máseleler
Tómendegi máseleler Ministrler Keńesiniń májilislerinde qarap  shıǵıladı:
Qaraqalpaqstan Respublikası respublika byudjeti joybarın islep shıǵıw, byudjetti orınlaw, sonday-aq Qaraqalpaqstan Respublikası Húkimetiniń biyligindegi byudjetten tıs mámleketlik qorlardı dúziw hám paydalanıw máseleleri;
basqarıw strukturasın jetilistiriw máseleleri, Qaraqalpaqstan Respublikasın hám onıń ayırım aymaqlarınıń ekonomikalıq, sociallıq hám mádeniy rawajlandırıw baǵdarlamalarınıń joybarları;
mámleketlik bahalı qaǵazlar menen baylanıslı bolǵan usınıslar;
Qaraqalpaqstan Respublikasında salıqlar hám basqa májbúriy tólemlerdiń stavkaların nızamshılıq aktlerinde belgilengen muǵdarlar sheńberinde belgilew hám de ózgertiw haqqındaǵı usınıslar;
qatań belgilengen mámleketlik bahalar qollanılatuǵın ónimlerdiń, tovarlardıń hám xızmetlerdiń nomenklaturası;
Ministrler Keńesiniń májilislerinde Joqarǵı Keńes Baslıǵınıń tapsırmalarına hám Ministrler Keńesi Prezidiumınıń qararlarına muwapıq basqa da máselelerdi qarap  shıǵıladı.

29-statya. Ministrler Keńesiniń májilislerine tayarlıq kóriw hám olardı ótkeriw
Ministrler Keńesiniń májilislerinde qarap shıǵıw ushın máselelerdi tayarlawdı Ministrler Keńesiniń apparatı ámelge asıradı.
Zárúrli jaǵdayda máselelerdi tayarlawdı Ministrler Keńesi yamasa onıń Prezidiumı tárepinen shólkemlestiriletuǵın komissiyalar ámelge asıradı.
Ministrler Keńesiniń májilisinde qarap shıǵıw ushın kirgiziletuǵın aktlerdiń joybarları Ministrler Keńesiniń Reglamenti talaplarına muwapıq tayarlanadı.
Zárúrli jaǵdayda anıq tarawlar hám baǵdarlarda ámelge asırılıp atırǵan reformalardıń barısın úyreniw maqsetinde Ministrler Keńesiniń Baslıǵı tárepinen mámleketlik basqarıw uyımları basshıları,  jergilikli atqarıwshı hákimiyat uyımları, mámleketlik emes kommerciyalıq emes shólkemlerdiń wákilleri qatnasında aymaqlarda Qaraqalpaqstan Respublikası Húkimetiniń kóshpeli májilisleri ótkeriliwi múmkin.
Qaraqalpaqstan Respublikası Húkimetiniń kóshpeli májilislerin ótkeriw tártibi Ministrler Keńesi tárepinen belgilenedi.

30-statya. Ministrler Keńesiniń májilislerinde qararlar qabıl etiw
Ministrler Keńesiniń májilisinde qarap  shıǵılatuǵın máseleler boyınsha qararlar Qaraqalpaqstan Respublikası Húkimeti aǵzalarınıń kópshilik dawısı menen qabıl etiledi.
Ministrler Keńesiniń májilisinde qabıl etilgen qararlar bayanlama túrinde rásmiylestiriledi.
Ministrler Keńesi májilisiniń bayanlaması Ministrler Keńesiniń Reglamentinde belgilengen tártipte Ministrler Keńesi apparatı tárepinen rásmiylestiriledi hám tarqatıladı.
Qaraqalpaqstan Respublikası Húkimetiniń bayanlama qararları joybarların ekspertizadan ótkeriw hám esapqa alıw Ministrler Keńesiniń Reglamentine muwapıq ámelge asırıladı.

5-bap. Ministrler Keńesiniń Prezidiumı

31-statya. Ministrler Keńesiniń Prezidiumı hám quramı
Ministrler Keńesiniń Prezidiumı Ministrler Keńesiniń turaqlı jumıs islewshi uyımı bolıp tabıladı.
Ministrler Keńesiniń Prezidiumı quramına Ministrler Keńesi Baslıǵı, onıń orınbasarları hám másláhátshileri, ministrler, mámleketlik komitetlerdiń basshıları kiredi.

32-statya. Ministrler Keńesi Prezidiumınıń májilislerinde qarap shıǵılatuǵın máseleler
Ministrler Keńesi Prezidiumınıń májilislerinde:
Ózbekstan Respublikası Prezidentiniń tapsırmaları, Joqarǵı Keńes Baslıǵınıń tapsırmaları orınlanıwın shólkemlestiriw máseleleri;
Joqarǵı Keńeske nızamshılıq baslaması tártibinde kirgiziletuǵın nızamlardıń joybarları;
Ministrler Keńesiniń wákilligine kiretuǵın máseleler qarap shıǵıladı, usı Nızamǵa muwapıq tek ǵana Ministrler Keńesiniń májilislerinde qarap shıǵılatuǵın máseleler bunnan tısqarı.

33-statya. Ministrler Keńesi Prezidiumınıń májilislerin tayarlaw hám ótkeriw
Ministrler Keńesi Prezidiumınıń májilisin shólkemlestiriwdi hám tayarlawdı Ministrler Keńesiniń apparatı ámelge asıradı.
Ministrler Keńesi Prezidiumınıń májilisleri hár háptede Ministrler Keńesi Baslıǵı tárepinen, onıń joqlıǵında bolsa orınbasarlarınan biri tárepinen ótkeriledi.
Ministrler Keńesi Prezidiumınıń májilislerinde qarap shıǵıw ushın máselelerdi tayarlaw tártibi Ministrler Keńesiniń Reglamenti menen belgilenedi.
Ministrler Keńesi Prezidiumınıń májilislerinde qabıl etilgen qararlar bayanlama túrinde rásmiylestiriledi hám olarǵa basshılıq etiwshi tárepinen qol qoyıladı.

6-bap. Ministrler Keńesiniń aktleri

34-statya. Ministrler Keńesi aktleriniń túrleri
Ministrler Keńesi konstituciyalıq normalar sheńberinde hám nızamshılıqqa muwapıq Qaraqalpaqstan Respublikasınıń pútkil aymaǵında barlıq uyımlardıń, kárxanalardıń, mákemelerdiń, shólkemlerdiń, lawazımlı shaxslardıń hám puqaralardıń orınlawı ushın minnetli bolǵan qararlar qabıl etedi hám biylikler shıǵaradı.
Ministrler Keńesiniń qararları hám biyliklerine Ministrler Keńesiniń Baslıǵı tárepinen  qol qoyıladı.
Ministrler Keńesi qabıl etilgen aktlerdiń orınlanıwın qadaǵalawdı tikkeley ózi yamasa ministrlikler, mámleketlik komitetler, basqa da mámleketlik basqarıw uyımları arqalı ámelge asıradı.

35-statya. Ministrler Keńesiniń qararları
Ministrler Keńesiniń normativlik huqıqıy formadaǵı aktleri qararlar túrinde qabıl etiledi.
Ministrler Keńesiniń qararları Ózbekstan Respublikası hám Qaraqalpaqstan Respublikası Konstituciyaları hám nızamları, Oliy Majlis palatalarınıń qararları, Ózbekstan Respublikası Prezidentiniń pármanları, qararları hám biylikleri, Ministrler Kabinetiniń qararları hám biylikleri, Joqarǵı Keńes hám onıń Prezidiumınıń qararları tiykarında hám de olardı orınlaw ushın qabıl etiledi.
Ministrler Keńesiniń qararları, eger bul aktlerdiń ózinde basqa múddet kórsetilmegen bolsa, rásmiy járiyalanǵan kúnnen baslap kúshke kiredi.
Ministrler Keńesiniń normativlik huqıqıy formaǵa iye qararları «Erkin Qaraqalpaqstan», «Vesti Karakalpakstana» hám «Qoraqalpog‘iston tongi» gazetalarında, «Ózbekstan Respublikası nızamshılıq maǵlıwmatlar milliy bazası» hám Qaraqalpaqstan Respublikası Ministrler Keńesiniń rásmiy veb-saytında járiyalanadı, zárúr jaǵdayda basqa da ǵalaba xabar quralları arqalı kópshiliktiń dıqqatına jetkeriledi.

36-statya. Ministrler Keńesiniń biylikleri
Ministrler Keńesiniń tez sheshiliwi zárúr bolǵan hám basqa da kúndelikli máseleler boyınsha aktleri Ministrler Keńesiniń biylikleri túrinde qabıl etiledi.
Ministrler Keńesiniń biylikleri, eger bul aktlerde basqa qaǵıyda názerde tutılmasa, qol qoyılǵan kúnnen baslap kúshke kiredi.

7-bap. Ministrler Keńesiniń Joqarǵı Keńes hám onıń Prezidiumı, Konstituciyalıq baqlaw komiteti, huqıq qorǵaw uyımları hám kúsh isletiwge wákillikli bolǵan strukturalar, basqa da mámleketlik uyımlar hám mámleketlik emes shólkemler menen qatnasıqları

37-statya. Ministrler Keńesiniń Joqarǵı Keńes penen qatnasıqları
Jańadan dúzilgen Ministrler Keńesi óz wákillikleri dáwirinde jumıs baǵdarlamasın Joqarǵı Keńestiń qarap shıǵıwına usınadı.
Ministrler Keńesi Qaraqalpaqstan Respublikasınıń ekonomikalıq, sociallıq rawajlanıwınıń tiykarǵı baǵdarların, Qaraqalpaqstan Respublikası byudjetiniń tiykarǵı kórsetkishlerin islep shıǵadı hám oǵan ózgerisler kirgizedi, onı Joqarǵı Keńestiń tastıyıqlawına usınadı.
Ministrler Keńesi Joqarǵı Keńeske hár jılı Qaraqalpaqstan Respublikanıń sociallıq-ekonomikalıq turmıstıń eń áhmiyetli máseleleri boyınsha bayanatlar usınadı.
Ministrler Keńesi Baslıǵı Qaraqalpaqstan Respublikası Húkimeti aǵzaları menen birgelikte hár altı ayda Joqarǵı Keńeske
Ózbekstan Respublikası Prezidentiniń Oliy Majliske jollaǵan Múrájatınan kelip shıǵatuǵın, tiyisli jılǵa mólsherlengen mámleketlik baǵdarlamanıń Qaraqalpaqtan Respublikasında orınlanıwı haqqında esabatın usınadı.
Joqarǵı Keńes zárúr jaǵdaylarda óz sessiyasında Ministrler Keńesi Baslıǵınıń Qaraqalpaqstan Respublikasın sociallıq-ekonomikalıq rawajlandırıwdıń ayırım áhmiyetli máseleleri boyınsha esabatın nızamǵa muwapıq parlament sorawı tártibinde tıńlawı múmkin.
Ministrler Keńesiniń jumısı qanaatlandırarsızlıq dep tabılǵan jaǵdayda Joqarǵı Keńes Ministrler Keńesiniń quramın ózgertiw haqqında másele qoyadı.
Zárúr bolǵan jaǵdayda Ministrler Keńesiniń ayırım aǵzalarınıń esabatı Joqarǵı Keńesi hám onıń Prezidiumı tárepinen tıńlawı múmkin.
Ministrler Keńesiniń aǵzaları Joqarǵı Keńes sessiyası hám onıń Prezidiumınıń májilislerine, sonday-aq onıń komitetleri menen komissiyalarınıń májilislerine qatnasıwǵa hám sózge shıǵıwı múmkin.
Joqarǵı Keńes deputatları tárepinen Ministrler Keńesiniń yamasa onıń ayırım aǵzalarınıń jumısına baylanıslı máseleler qoyılǵan jaǵdayda Ministrler Keńesiniń Baslıǵı usı máseleler boyınsha zárúr túsinikler alıwǵa hám túsinikler beriwge haqılı.
Ministrler Keńesi Joqarǵı Keńes komitetleri hám komissiyalarınıń Qaraqalpaqstan Respublikası Húkimeti jumısına baylanıslı máseleler boyınsha usınısların qarap shıǵadı hám olar boyınsha ilajlar kóredi. Ministrler Keńesi islengen ilajlar haqqında Joqarǵı Keńestiń tiyisli komitetlerine kelisilgen múddette xabarlaydı.
Joqarǵı Keńestiń Qaraqalpaqstan Respublikası Húkimeti yaki oǵan boysınıwshı mámleketlik basqarıw uyımları jumısına tiyisli bolǵan parlament sorawına, Joqarǵı Keńes deputatınıń jiberilgen sorawına Ministrler Keńesi yaki onıńaǵzası nızamda belgilengen tártipte hám múddetlerde juwap beriwi shárt.

38-statya. Ministrler Keńesiniń Konstituciyalıq baqlaw komiteti menen qatnasıqları
Konstituciyalıq baqlaw komiteti Ministrler Keńesi aktleriniń Qaraqalpaqstan Respublikası Konstituciyasına muwapıqlıǵın anıqlaydı.
Konstituciyalıq baqlaw komitetiniń májilisinde Ministrler Keńesi Baslıǵı qatnasıwǵa hám barlıq qaralǵan máseleler boyınsha óz pikirin bildiriwge haqılı.

39-statya. Ministrler Keńesiniń huqıq qorǵaw uyımları hám kúsh isletiw wákilligine iye bolǵan strukturalar menen qatnasıqları
Ministrler Keńesi óz wákilliklerin nátiyjeli ámelge asırıw maqsetinde huqıq qorǵaw uyımları hám kúsh isletiw wákilligine iye bolǵan strukturalar menen birge islesedi.
Huqıq qorǵaw uyımları hám kúsh isletiw wákilligine iye bolǵan strukturalar basshıları usı uyımlar hám de strukturalardıń jumısına tiyisli máseleler boyınsha Ministrler Keńesiniń hám onıń Prezidiumınıń májilislerinde qatnasıwı múmkin.

40-statya. Ministrler Keńesiniń jergilikli atqarıwshı hákimiyat uyımları menen qatnasıqları
Ministrler Keńesi óz wákillikleri sheńberinde:
aymaqlardıń ekonomikalıq, sociallıq hám mádeniy rawajlanıwın támiyinlewge baylanıslı máselelerdi jergilikli atqarıwshı hákimiyat uyımlarınıń jumısına basshılıqtı ámelge asıradı;
Ministrler Keńesiniń sheshimin talap etetuǵın máseleler boyınsha qala hám rayon hákimleriniń usınısların qarap shıǵadı. Ministrler Keńesi aktleriniń orınlanıwın qadaǵalaydı, jergilikli atqarıwshı hákimiyat uyımları basshıların mirát etiwge hám de usı aktlerdiń ámelge asırılıwınıń barısı haqqındaǵı esabatların tıńlaydı;
ministrlikler, mámleketlik komitetler hám basqa da mámleketlik basqarıw uyımlarınıń qala hám rayon hákimleri menen birge islesiwin támiyinleydi, bunda payda bolǵan tartıslı máselelerdi sheshedi;
aymaqlardı ekonomikalıq hám sociallıq jaqtan rawajlandırıwdıń tiykarǵı kórsetkishlerin tastıyıqlaydı, jergilikli atqarıwshı hákimiyat apparatı xızmetkerleriniń sanın hám úlgi dúzilisin belgileydi;
qala hám rayon hákimleriniń nızamshılıqqa qayshı bolǵan qararların  toqtatıp turıwǵa hám biykar etiwge haqılı (fizikalıq hám yuridikalıq shaxslardıń múlkine baylanıslı bolǵan qararları bunnan tısqarı).

41-statya. Ministrler Keńesiniń mámleketlik emes kommerciyalıq emes shólkemler, siyasiy partiyalar hám puqaralıq jámiyetiniń basqa institutları menen qatnasıqları
Ministrler Keńesi óziniń wákilligine kiretuǵın máseleler boyınsha mámleketlik emes kommerciyalıq emes shólkemler, siyasiy partiyalar hám puqaralıq jámiyetiniń basqa da institutları menen birge islesedi, nızamshılıqqa muwapıq zárúr járdem kórsetedi.
Ministrler Keńesi óz wákilligine tiyisli máseleler boyınsha mámleketlik emes kommerciyalıq emes shólkemlerdiń, siyasiy partiyalardıń hám puqaralıq jámiyetiniń basqa da institutlarınıń usınısların qarap  shıǵadı.

8-Bap. Ministrler Keńesiniń Ministrler Kabineti menen qatnasıqları

42-statya. Ministrler Keńesiniń Ministrler Kabineti menen qatnasıqları
Ministrler Keńesiniń Ministrler Kabineti menen qatnasıqları «Ózbekstan Respublikasınıń Ministrler Kabineti haqqında»ǵı Ózbekstan Respublikasınıń nızamı menen tártiplestiriledi.
Ministrler Keńesi ekonomikalıq, sociallıq hám mádeniy rawajlanıw máselelerin sheshkende Ózbekstan Respublikasınıń ministrlikleri, mámleketlik komitetleri hám basqa da mámleketlik basqarıw uyımları menen óz-ara baylanaslı háreket etedi, Qaraqalpaqstan Respublikasınıń aymaǵında jaylasqan olarǵa qaraslı kárxanalardıń, shólkemlerdiń hám mákemelerdiń xızmetin muwapıqlastıradı hám de qadaǵalaydı.
Óz wákillikleri sheńberinde Ministrler Kabineti Ministrler Keńesiniń Ózbekstan Respublikasınıń Konstituciyasına hám nızamlarına, Ózbekstan Respublikası Prezidentiniń pármanları, qararları hám biyliklerine, Ministrler Kabinetiniń aktlerine qayshı bolǵan qararları hám biylikleriniń orınlanıwın toqtatıp turıwǵa haqılı.
Qaraqalpaqstan Respublikasınıń ekonomikalıq, sociallıq hám ruwxıy-mádeniy rawajlandırıwǵa, onıń tábiyiy resurslarınan aqılǵa muwapıq paydalanıwǵa hám olardı qorǵawǵa baylanıslı máseleler Ministrler Kabineti tárepinen qarap shıǵılıp atırǵanda, Ministrler Keńesi óziniń usınıslar kirgizedi.
Ministrler Kabineti, Ózbekstan Respublikasınıń ministrlikleri, mámleketlik komitetler hámbasqa da mámleketlik basqarıw uyımları menen Ministrler Keńesi kúndelikli baylanısların támiyinlew maqsetinde Ministrler Kabineti janında Qaraqalpaqstan Respublikası Ministrler Keńesiniń turaqlı wákilxanası boladı.

9-bap. Ministrler Keńesi jumısınıń ashıqlıǵı hám járiyalılıǵı

43-statya. Ministrler Keńesi jumısınıń ashıqlıǵın támiyinlew
Ministrler Keńesi «Fizikalıq hám yuridikalıq shaxslardıń múrájatları haqqında»ǵı Qaraqalpaqstan Respublikası Nızamına muwapıq xalıq penen ashıq baylanıstı támiyinleydi, fizikalıq hám yuridikalıq shaxslardıń múrájatların qarap  shıǵadı, fizikalıq hám yuridikalıq shaxslardıń wákillerin qabıllawdı shólkemlestiredi.
Ministrler Keńesiniń apparatı fizikalıq hám yuridikalıq shaxslardıń Ministrler Keńesi apparatına, mámleketlik basqarıw uyımlarına hám de jergilikli atqarıwshı hákimiyat uyımlarına kelip túsken múrájatları menen islew monitoringin hám analizin ámelge asıradı.
Fizikalıq hám yuridikalıq shaxslardıń múrájatların qarap  shıǵıw jaǵdayın úyreniw juwmaqları Ministrler Keńesiniń Prezidiumı májilislerinde yamasa selektor májilislerinde hár sherekte, sonday-aq tiyisli lawazımlı shaxslarǵa juwapkershilik ilajların kóriw haqqında usınıslar kirgizgen halda qarap  shıǵıladı.
Fizikalıq hám yuridikalıq shaxslardıń múrájatları menen islesiw sistemasınıń nátiyjeli jumıs alıp barılıwın támiyinlew maqsetinde Ministrler Keńesi Ózbekstan Respublikası Prezidentiniń Xalıq qabıllawxanası hám Virtual qabıllawxanası menen birge islesedi.

44-statya. Ministrler Keńesi jumısın ǵalaba xabar qurallarında járiyalaw
Fizikalıq hám yuridikalıq shaxslardıń Qaraqalpaqstan Respublikası Húkimetiniń jumısı haqqındaǵı maǵlıwmattan  paydalanıwı, Qaraqalpaqstan Respublikası Konstituciyasınıń 28-statyasına hám «Mámleketlik hákimiyat hám basqarıw uyımları jumısınıń ashıqlıǵı haqqında»ǵı Ózbekstan Respublikası Nızamına muwapıq támiyinlenedi.
Ministrler Keńesi wákillikleri sheńberinde tómendegiler arqalı óz jumısın ǵalaba xabar qurallarında járiyalaw ilajların kóredi:
óz rásmiy veb-saytında Qaraqalpaqstan Respublikası Húkimetiniń jumısı haqqındaǵı maǵlıwmatlardı jaylastırıw hám jańalap turıw;
Ministrler Keńesi hám onıń Prezidiumı májilislerin járiyalaw.
Ministrler Keńesi hám onıń Prezidiumı májilislerin ǵalaba xabar qurallarında járiyalaw, sonday-aq qarap  shıǵılatuǵın máselelerdiń dodalanıwına jámiyetshilikti tartıw tártibi Ministrler Keńesi Baslıǵı tárepinen belgilenedi.
Qaraqalpaqstan Respublikası Húkimetiniń rásmiy veb-saytına maǵlıwmatlardı jaylastırıw hám jańalap turıw Ministrler Keńesiniń baspasóz xızmeti tárepinen ámelge asırıladı.

10-bap. Ministrler Keńesi aǵzaların hám onıń apparatı xızmetkerlerin materiallıq jaqtan xoshametlew hám sociallıq támiyinlew

45-statya. Ministrler Keńesi aǵzaların hám onıń apparatı xızmetkerlerin materiallıq xoshametlew
Ministrler Keńesi aǵzalarınıń hám onıń apparatı xızmetkerleriniń lawazımlıq is haqısınan hám de nızamshılıqta názerde tutılǵan basqa da tólemlerden ibarat.
Ministrler Keńesi aǵzaların hám onıń apparatı xızmetkerlerin materiallıq jaqtan xoshametlew nızamshılıqqa muwapıq ámelge asırıladı.

46-statya. Ministrler Keńesi aǵzaların hám onıń apparatı xızmetkerlerin sociallıq támiyinlew
Ministrler Keńesi aǵzalarına hám onıń apparatı xızmetkerlerine haqı tólenetuǵın demalıslar beriledi.
Ministrler Keńesi aǵzaları hám onıń apparatı xızmetkerleri kepillengen medicinalıq hám de sanatoriyalıq-salamatlastırıw járdeminen paydalanadı.

11-bap. Juwmaqlawshı qaǵıydalar

47-statya. Ministrler Keńesiniń jumısın qarjılandırıw
Ministrler Keńesiniń jumısı Qaraqalpaqstan Respublikasınıńrespublikabyudjet qarjıları, sonday-aq nızamshılıqta qadaǵan etilmegen basqa derekler esabınan qarjılandırıladı.

48-statya. Ministrler Keńesiniń aktleri, Ministrler Keńesi lawazımlı shaxslarınıń háreketleri (háreketsizligi) ústinen shaǵım etiw
Ministrler Keńesiniń aktleri hám onıń lawazımlı shaxslarınıń háreketleri (háreketsizligi) ústinen nızamda belgilengen tártipte shaǵım etiliwi múmkin.

49-statya. Qaraqalpaqstan Respublikası ayırım nızam aktleriniń óz kúshin joyıtqan dep tabıw
Tómendegiler óz kúshin joyıtqan dep tabılsın:
1) «Qaraqalpaqstan Respublikasınıń Ministrler Keńesi haqqında»ǵı Qaraqalpaqstan Respublikasınıń 29.01.1998-jılı qabıl etilgen
328/I-sanlı Nızamı;
2) «Qaraqalpaqstan Respublikasınıń ayırım nızamlarına ózgeris hám qosımshalar kirgiziw haqqında»ǵı Qaraqalpaqstan Respublikasınıń 28.08.1999-jılı qabıl etilgen 473/I-sanlı Nızamı;
3) «Qaraqalpaqstan Respublikasınıń ayırım nızamlarına ózgeris hám qosımshalar kirgiziw haqqında»ǵı Qaraqalpaqstan Respublikasınıń  03.03.2006-jılı qabıl etilgen 78/III-sanlı Nızamı;
4) «Qaraqalpaqstan Respublikasınıń ayırım nızamlarına ózgeris hám qosımshalar kirgiziw haqqında»ǵı Qaraqalpaqstan Respublikasınıń  27.06.2014-jılı qabıl etilgen 209/XV-sanlı Nızamı 25-statyası;
5) «Qaraqalpaqstan Respublikasınıń ayırım nızamlarına ózgeris hám qosımshalar kirgiziw haqqında»ǵı Qaraqalpaqstan Respublikasınıń  2.03.2015-jılı qabıl etilgen 28/III-sanlı Nızamı 15-statyası;
6) «Qaraqalpaqstan Respublikasınıń ayırım nızamlarına ózgeris hám qosımshalar kirgiziw haqqında»ǵı Qaraqalpaqstan Respublikasınıń  28.07.2015-jılı qabıl etilgen 43/IV-sanlı Nızamı 2-statyası;
7) «Qaraqalpaqstan Respublikasınıń ayırım nızamlarına ózgeris hám qosımshalar kirgiziw haqqında»ǵı Qaraqalpaqstan Respublikasınıń  10.06.2016-jılı qabıl etilgen 92/IX-sanlı Nızamı 1-statyası;

50-statya. Usı Nızamnıń orınlanıwın, jetkeriliwin, mazmunı hám áhmiyetiniń túsindiriliwin támiyinlew
Qaraqalpaqstan Respublikası Ministrler Keńesi hám Qaraqalpaqstan Respublikası Ádillik ministrligi usı Nızamnıń orınlanıwın, orınlawshılarǵa jetkeriliwin hám mazmunın hám de áhmiyetin xalıq arasında túsindiriliwin támiyinlesin.

51-statya. Nızam hújjetlerin usı Nızamǵa muwapıqlastırıw
Qaraqalpaqstan Respublikası Ministrler Keńesi:
húkimet qararların usı Nızamǵa muwapıqlastırsın;
mámleketlik basqarıw uyımları usı Nızamǵa qayshı bolǵan óz normativlik huqıqıy aktlerin qayta qarap shıǵıwı hám biykar etiliwin támiyinlesin.

52-statya. Usı Nızamnıń kúshke kiriwi
Usı Nızam rásmiy járiyalanǵan kúnnen baslap kúshke kiredi.

Qaraqalpaqstan Respublikası
Joqarǵı Keńesiniń Baslıǵı
M.Kamalov

Nókis qalası, 2022-jıl 19-mart
№ 199/XXVI