QARAQALPAQSTAN RESPUBLIKASÍNÍŃ NÍZAMÍ

FIRMA ATAMALARÍ HAQQÍNDA

1-statya. Usı Nızamnıń maqseti Usı Nızamnıń maqseti firma atamaların huqıqıy jaqtan qorǵaw hám olardan paydalanıw salasındaǵı qatnasıqlardı tártipke salıwdan ibarat. 2-statya. Firma atamaları haqqındaǵı nızamshılıq aktleri Firma atamaları haqqındaǵı nızamshılıq aktleri usı Nızam hám basqa nızamshılıq aktlerinen ibarat. Eger Ózbekstan yaki Qaraqalpaqstan Respublikalarınıń xalıqaralıq shártnamasında firma atamaları haqqındaǵı Qaraqalpaqstan Respublikası nızamshılıǵında názerde tutılǵanınan basqasha qaǵıydalar belgilengen bolsa, xalıqaralıq shártnama qaǵıydaları qollanıladı. 3-statya. Firma ataması Firma ataması yuridikalıq shaxs bolǵan kommerciyalıq shólkemniń (bunnan keyin tekstte yuridikalıq shaxs dep júritiledi) individual ataması bolıp, oǵan baylanıslı ayrıqsha huqıq yuridikalıq shaxs mámleketlik dizimnen ótkizilgen waqıtta júzege keledi. Yuridikalıq shaxs tolıq firma ataması menen birge qısqartılǵan firma atamasına da iye bolıwı múmkin. Yuridikalıq shaxstıń firma atamasında onıń shólkemlestiriw-huqıqıy forması kórsetiliwi kerek. Nızamda názerde tutılǵan jaǵdaylarda firma atamasında yuridikalıq shaxs jumısınıń ózgesheligi kórsetiliwi kerek. 4-statya. Firma atamasında kórsetiliwi lazım bolmaǵan belgiler Firma atamasında kórsetiliwi múmkin emes: 1) mámlekettiń rásmiy ataması, xalıqaralıq, húkimetleraralıq yaki mámleketlik emes kommerciyalıq emes shólkemlerdiń qısqartılǵan yaki tolıq ataması; 2) belgilengen tártipte beriletuǵın, tariyxıy yamasa Ózbekstan hám Qaraqalpaqstan Respublikalarında ataqlı bolǵan shaxstıń tolıq yamasa qısqartılǵan atı ruxsatsız; 3) firma atamasınıń iyesi, onıń jumıs túri yamasa ol kelip shıqqan mámleket haqqındaǵı jalǵan yaki tutınıwshını shalǵıtıwı múmkin bolǵan belgiler; 4) jámiyet máplerine, adamgershilik hám morallıq principlerge qayshı bolǵan belgiler. Sonday-aq, firma atamasında olardı aljastırıp jiberiw dárejesinde birdey yaki olarǵa uqsas bolǵan belgiler kórsetiliwi múmkin emes: aldın Ózbekstan hám Qaraqalpaqstan Respublikalarında basqa yuridikalıq shaxs atına dizimnen ótkizilgen yamasa dizimnen ótkeriwdi sorap talapnama berilgen, aldınıraq ústinlikke iye bolǵan firma atamaları; aldın Ózbekstan hám Qaraqalpaqstan Respublikalarında basqa shaxs atına dizimnen ótkizilgen yaki dizimnen ótkiziwdi sorap talapnama berilgen, sonday-aq, Ózbekstan hám Qaraqalpaqstan Respublikalarınıń xalıqaralıq shártnamalarına muwapıq dizimnen ótkizilmey qorǵalatuǵın tovar belgileri (xızmet kórsetiw belgileri); belgilengen tártipte hámmege málim dep tabılǵan tovar belgileri (xızmet kórsetiw belgileri); belgilengen tártipte nızamshılıq akti menen qorǵalatuǵın tovarlar kelip shıqqan orınlarınıń atamaları, bunday atamadan paydalanıw huqıqına iye bolǵan shaxs atına dizimnen ótkeriw jaǵdaylarınan tısqarı. Usı statyanıń birinshi bólimi 1-bántinde kórsetip ótilgen belgiler, eger oǵan tiyisli mámleketlik uyımnıń yaki shólkemniń ruxsatı bolsa, firma atamasına kirgiziliwi múmkin. 5-statya. Firma atamasınıń huqıqıy qorǵalıwı Firma ataması yuridikalıq shaxs mámleketlik dizimnen ótkerilgen waqıttan baslap, al sırt el yuridikalıq shaxsınıń firma ataması bolsa, sırt el yuridikalıq shaxsı Ózbekstan hám Qaraqalpaqstan Respublikaları aymaǵında puqaralıq aylansı qatnasıwshısı sıpatında jumısın ámelge asırıwdı baslaǵan sáneden huqıqıy jaqtan qorǵaladı. 6-statya. Firma atamasına bolǵan huqıq Yuridikalıq shaxs óz firma atamasınan paydalanıwda hám basqa yuridikalıq shaxslarǵa usı firma atamasınan paydalanıw huqıqın beriwde ayrıqsha huqıqqa iye. Sırt el yuridikalıq shaxsınıń firma atamasına bolǵan ayrıqsha huqıqı usı yuridikalıq shaxs shólkemlestirilgen mámlekettiń nızamshılıq aktlerinde belgilengen hújjeti menen tastıyıqlanadı. 7-statya. Firma atamasınan paydalanıw Tómendegiler firma atamasınan paydalanıw bolıp esaplanadı: firma atamasın rásmiy blankalarda, mórlerde, shtamplarda hám yuridikalıq shaxstıń jumısı menen baylanıslı bolǵan basqa hújjetlerde sáwlelendiriw; firma atamasınan tovarlarda, olardıń ıdısı hám oramında, reklamada, qıstırmalarda, baspa maǵlıwmatnamalarda, esap-betlerinde, baspalarda, tovarlardı Ózbekstan hám Qaraqalpaqstan Respublikalarında ótkeriletuǵın kórgizbeler hám yarmarkalarda kórsetiw waqtında paydalanıw. Firma atamasınan tovar belgisiniń (xızmet kórsetiw belgisiniń) elementi sıpatında paydalanılıwı múmkin. 8-statya. Firma atamasınan paydalanıw huqıqın beriw Yuridikalıq shaxs (licenziar) óz firma atamasınan paydalanıw ushın basqa yuridikalıq shaxsqa (licenziatqa) nızamshılıq aktlerine muwapıq olar ortasında dúzilgen licenziya shártnaması yamasa kompleks isbilermenlik licenziyası shártnaması tiykarında ruxsat beriwi múmkin. Licenziya shártnamasında tutınıwshını aljastırıwǵa qoymaytuǵın ilajlar názerde tutılıwı kerek. 9-statya. Firma atamasına bolǵan huqıqtıń basqa shaxsqa ótiwi Firma atamasına bolǵan huqıqtıń basqa shaxsqa ótiwi tek ǵana yuridikalıq shaxs qosıp jiberiliwi, qosıp alınıwı, bóliniwi hám ajıratılıwı jolı menen qayta shólkemlestirilgen yaki pútin kárxana múlkiy kompleks sıpatında satılǵan jaǵdaylarda jol qoyıladı. Yuridikalıq shaxslar qosıp jiberilgende hám yuridikalıq shaxs basqa yuridikalıq shaxsqa qosıp alınǵanda firma atamasına bolǵan huqıqtıń basqa shaxsqa ótiwi tapsırıw aktine muwapıq ámelge asırıladı. Yuridikalıq shaxs bólingende yaki sol yuridikalıq shaxs quramınan ajıralıp shıqqanında firma atamasına bolǵan huqıqtıń basqa shaxsqa ótiwi bólistiriw balansına muwapıq ámelge asırıladı. 10-statya. Firma atamasın huqıqıy jaqtan qorǵawdı toqtatıw Firma atamasın huqıqıy jaqtan qorǵaw yuridikalıq shaxs saplastırılǵanda yaki onıń firma ataması ózgergen jaǵdayda toqtatıladı. 11-statya. Firma atamasına bolǵan huqıqtıń buzılıwı Firma atamasınan nızamsız paydalanıw firma atamasına bolǵan ayrıqsha huqıqtıń buzılıwı dep esaplanadı. Eger tovar belgisine (xızmet kórsetiw belgisine), domen atamasına bolǵan huqıq firma atamasına bolǵan huqıqtan ilgeri alınǵan bolsa, tovar belgisinde (xızmet kórsetiw belgisinde), domen atamasında sol firmanıń atamasınan paydalanıw firma atamasına bolǵan ayrıqsha huqıqtıń buzılıwı dep esaplanbaydı. 12-statya. Firma atamasına bolǵan huqıqtı qorǵaw usılları Firma atamasına bolǵan ayrıqsha huqıqtı nızamsız paydalanıwdan qorǵaw: yuridikalıq shaxstıń jumısına baylanıslı abırayın qorǵaw maqsetinde sud qararı haqqında ǵalaba xabar qurallarında járiyalaw; nızamsız paydalanılǵan firma atamasın kontrafakt tovarlar, etiketkalar, ıdıslar hám oramlardan huqıqbuzar esabınan alıp taslaw; nızamsız paydalanılǵan firma atamasın kontrafakt tovarlar, etiketkalar, ıdıslar hám oramlardan alıp taslaw múmkin bolmaǵan jaǵdayda, olardı huqıqbuzar esabınan joq etiw; kontrafakt tovarlar, etiketkalar, ıdıslar hám oramlardı firma atamasına bolǵan huqıqqa iyelik etiwshi yuridikalıq shaxsqa beriw arqalı ámelge asırıladı. Firma atamasına bolǵan ayrıqsha huqıqtı nızamsız paydalanıwdan qorǵaw nızamshılıq aktlerine muwapıq basqasha usıllar menen de ámelge asırılıwı múmkin. 13-statya. Sırt el yuridikalıq shaxslarınıń huqıqları Sırt el yuridikalıq shaxsları usı Nızamda názerde tutılǵan firma atamalarına bolǵan huqıqlardan Ózbekstan hám Qaraqalpaqstan Respublikalarınıń xalıqaralıq shártnamalarına muwapıq yaki óz-ara kelisim principleri tiykarında Ózbekstan hám Qaraqalpaqstan Respublikalarınıń yuridikalıq shaxsları menen teńdey paydalanadı. 14-statya. Tartıslardı sheshiw Firma atamaların huqıqıy jaqtan qorǵaw hám olardan paydalanıw tarawındaǵı tartıslar nızamshılıq aktlerinde belgilengen tártipte sheshiledi. 15-statya. Firma atamaları haqqındaǵı nızamshılıq aktlerin buzǵanlıq ushın juwapkershilik Firma atamaları haqqındaǵı nızamshılıq aktlerin buzǵanlıqta ayıplı shaxslar belgilengen tártipte juwapker boladı. 16-statya. Usı Nızamnıń orınlanıwın, jetkeriliwin, mazmunı hám áhmiyetiniń túsindiriliwin támiyinlew Qaraqalpaqstan Respublikası Ádillik ministrligi usı Nızamnıń mazmunı hám áhmiyetin halıqtıń arasında túsindiriliwin, Ózbekstan Respublikası Ádillik ministrligi janındaǵı Mámleketlik xızmetler agentligi Qaraqalpaqstan Respublikası basqarması usı Nızamnıń orınlanıwın, orınlawshılarǵa jetkeriliwin támiyinlesin. 17-statya. Nızamshılıq aktlerin usı Nızamǵa muwapıqlastırıw Qaraqalpaqstan Respublikası Ministrler Keńesi: húkimet qararların usı Nızamǵa muwapıqlastırsın; mámleketlik basqarıw uyımları usı Nızamǵa qayshı bolǵan óz normativ-huqıqıy aktlerin qayta kórip shıǵıwı hám biykar etiliwin támiyinlesin. 18-statya. Usı Nızamnıń kúshke kiriwi Usı Nızam rásmiy járiyalanǵan kúnnen baslap kúshke kiredi.

Qaraqalpaqstan Respublikası Joqarǵı Keńesiniń Baslıǵı M.Kamalov

Nókis qalası, 6-oktyabr 2021-jıl № 166/XXII