QARAQALPAQSTAN RESPUBLIKASÍNÍŃ MÁMLEKETLIK SÍYLÍQLARÍ HAQQÍNDA

QARAQALPAQSTAN RESPUBLIKASÍNÍŃ NÍZAMÍ 28.06.1996-j. №187/1

Usı Nızamǵa tómendegilerge muwapıq ózgerisler kirgizilgen 09.06.1998-j. 368/I–sanlı QR Nızamı 11.08.2017-j. 153/XVII-sanlı QR Nızamı 27.03.2019-j.  250 /XXV-sanlı QR Nızamı

 QARAQALPAQSTAN RESPUBLIKASÍNÍŃ MÁMLEKETLIK SÍYLÍQLARÍ HAQQÍNDA (jańa redakciyada 16.12.2019-j. 280 / XXIX-sanlı QR Nızamı)

Qaraqalpaqstan Respublikasınıń Nızamı

 1-BAP. ULÍWMA REJELER

1-statya. Usı Nızamnıń maqseti Usı Nızamnıń maqseti mámleketlik sıylıqlardı shólkemlestiriw, olar menen sıylıqlaw hám olardan paydalanıw salasındaǵı qatnasıqlardı tártipke salıwdan ibarat. 2-statya. Mámleketlik sıylıqlar haqqındaǵı nızam hújjetleri Mámleketlik sıylıqlar haqqındaǵı nızam hújjetleri usı Nızam hám basqa da nızam hújjetlerinen ibarat. 3-statya. Mámleketlik sıylıqlar Mámleketlik sıylıqlar puqaralardı olardıń ǵárezsizlikti bekkemlewge, tınıshlıq hám turaqlılıqtı saqlawǵa, mámlekettiń ekonomikalıq, siyasiy, sociallıq, ilimiy, intellektual, ruwxıy potencialın hámde qorǵanıw qúdiretin asırıwǵa qosqan úlesi, mámleket hám xalıq aldındaǵı jámiyetlik, qayırqomlıq, gumanitar hámde basqa da salalardaǵı xızmetleri ushın xoshametlewdiń eń joqarı túri bolıp tabıladı. Qaraqalpaqstan Respublikasınıń mámleketlik sıylıqları menen respublika puqaraları, sırt el puqaraları hám puqaralıǵı bolmaǵan shaxslar sıylıqlanıwı múmkin. 4-statya.  Qaraqalpaqstan Respublikasınıń mámleketlik sıylıqların shólkemlestiriw Qaraqalpaqstan Respublikasınıń mámleketlik sıylıqları Qaraqalpaqstan Respublikasınıń nızamları menen shólkemlestiriledi. Mámleketlik sıylıqlar haqqındaǵı rejeler hám mámleketlik sıylıqlardıń táriyplemeleri Qaraqalpaqstan Respublikasınıń  nızamları menen tastıyıqlanadı. Qaraqalpaqstan Respublikası mámleketlik sıylıqlarınıń rásmiy atamaları mámleketlik tilde belgilenedi.

 2-BAP. MÁMLEKETLIK SÍYLÍQLAR SISTEMASÍ

 5-statya. Qaraqalpaqstan Respublikasınıń húrmetli ataqları Qaraqalpaqstan Respublikasınıń húrmetli ataqları tómendegilerden ibarat: «Qaraqalpaqstan Respublikasına miyneti sińgen kórkem óner ǵayratkeri»; «Qaraqalpaqstan Respublikasına miyneti sińgen ilim ǵayratkeri»; «Qaraqalpaqstan Respublikası xalıq artisti»; «Qaraqalpaqstan Respublikası xalıq baqsısı»; «Qaraqalpaqstan Respublikası xalıq jazıwshısı»; «Qaraqalpaqstan Respublikası xalıq shayırı»; «Qaraqalpaqstan Respublikası xalıq xudojnigi»; «Qaraqalpaqstan Respublikası xalıq muǵallimi»; «Qaraqalpaqstan Respublikası xalıq jırawı»; «Qaraqalpaqstan Respublikasına miyneti sińgen mádeniyat xızmetkeri»; «Qaraqalpaqstan Respublikasına xızmet kórsetken artist»; «Qaraqalpaqstan Respublikasına miyneti sińgen jaslar ustazı»; «Qaraqalpaqstan Respublikasına miyneti sińgen xalıq bilimlendiriwi xızmetkeri»; «Qaraqalpaqstan Respublikasına miyneti sińgen trener»; «Qaraqalpaqstan Respublikasına miyneti sińgen sportshı»; «Qaraqalpaqstan Respublikasına miyneti sińgen densawlıqtı saqlaw xızmetkeri»; «Qaraqalpaqstan Respublikasına miyneti sińgen jurnalist»; «Qaraqalpaqstan Respublikasına miyneti sińgen ekonomist»; «Qaraqalpaqstan Respublikasına miyneti sińgen yurist»; «Qaraqalpaqstan Respublikasına miyneti sińgen sanaat xızmetkeri»; «Qaraqalpaqstan Respublikasına miyneti sińgen transport xızmetkeri»; «Qaraqalpaqstan Respublikasına miyneti sińgen baylanıs xızmetkeri»; «Qaraqalpaqstan Respublikasına miyneti sińgen qurılısshı»; «Qaraqalpaqstan Respublikasına miyneti sińgen arxitektor»; «Qaraqalpaqstan Respublikasına miyneti sińgen kommunallıq, turmıs hám sawda salası xızmetkeri»; «Qaraqalpaqstan Respublikasına miyneti sińgen awıl xojalıǵı xızmetkeri»; «Qaraqalpaqstan Respublikasına miyneti sińgen irrigator»; «Qaraqalpaqstan Respublikasına miyneti sińgen paxtakesh»; «Qaraqalpaqstan Respublikasına miyneti sińgen salıkesh»; «Qaraqalpaqstan Respublikasına miyneti sińgen pillekesh»; «Qaraqalpaqstan Respublikasına miyneti sińgen sharwa»; «Qaraqalpaqstan Respublikasına miyneti sińgen oylap tabıwshı hám racionalizator». Qaraqalpaqstan Respublikasınıń húrmetli ataqları berilgen shaxslarǵa belgilengen úlgidegi óńir belgisi hám húrmetli ataq berilgenligi haqqında  gúwalıq tapsırıladı. 6-statya. Qaraqalpaqstan Respublikası Joqarǵı Keńesi janındaǵı Mámleketlik sıylıqlar boyınsha komissiya Qaraqalpaqstan Respublikası Joqarǵı Keńesi janındaǵı Mámleketlik sıylıqlar boyınsha komissiya Qaraqalpaqstan Respublikası Joqarǵı Keńesi janında turaqlı isleytuǵın másláhát uyımı bolıp, Qaraqalpaqstan Respublikası Joqarǵı Keńesi Baslıǵınıń mámleketlik sıylıqlardı beriw máselelerin sheshiw boyınsha konstituciyalıq wákillikleri ámelge asırılıwın támiyinleydi. Qaraqalpaqstan Respublikası Joqarǵı Keńesi janındaǵı Mámleketlik sıylıqlar boyınsha komissiyası quramı, wákillikleri hám jumısın shólkemlestiriw tártibi Qaraqalpaqstan Respublikası Joqarǵı Keńesi Prezidiumı tárepinen tastıyıqlanadı.

3-BAP. MÁMLEKETLIK SÍYLÍQLARǴA USÍNÍW, OLAR MENEN SÍYLÍQLAW HÁM OLARDÍ TAPSÍRÍW

 7-statya. Mámleketlik sıylıqlarǵa usınıw Mámleketlik sıylıqlar menen sıylıqlaw haqqındaǵı usınıslar Qaraqalpaqstan Respublikası Ministrler Keńesi, Qaraqalpaqstan Respublikası Konstituciyalıq baqlaw komiteti, huqıq qorǵaw uyımları hám áskeriy bólimler, qala hám rayonlar hákimleri, mámleketlik hám xojalıq basqarıw uyımlarınıń, basqa da respublikalıq mákemelerdiń, mámleketlik emes kommerciyalıq emes shólkemleriniń basshıları tárepinen kirgiziledi. Mámleketlik sıylıqlarǵa usınıw baslaması menen shıǵıw hám olardı kórip shıǵıw tártibi, qosımsha usınıs etiletuǵın hújjetlerdiń dizimi, sonday-aq húrmetli ataqlardıń óńir belgileri hám gúwalıqlarınıń úlgileri Qaraqalpaqstan Respublikası Joqarǵı Keńesi Prezidiumı tárepinen tastıyıqlanadı. Qaraqalpaqstan Respublikası Joqarǵı Keńesiniń Baslıǵı Qaraqalpaqstan Respublikasınıń mámleketlik sıylıqları menen sıylıqlaw baslaması menen biyǵárez shıǵıwǵa haqılı. 8-statya. Mámleketlik sıylıqlar menen sıylıqlaw tártibi Mámleketlik sıylıqlar menen sıylıqlaw Qaraqalpaqstan Respublikası Joqarǵı Keńesiniń Baslıǵı tárepinen ámelge asırıladı. Qaraqalpaqstan Respublikası Joqarǵı Keńesiniń Baslıǵın mámleketlik sıylıqlar menen sıylıqlaw baslaması Qaraqalpaqstan Respublikası Joqarǵı Keńesi Prezidiumı tárepinen ámelge asırıladı. Mámleketlik sıylıqlar menen sıylıqlaw haqqındaǵı Qaraqalpaqstan Respublikası Joqarǵı Keńesi Prezidiumınıń qararları, eger nızam hújjetlerinde basqasha qaǵıyda názerde tutılmaǵan bolsa, ǵalaba xabar qurallarında járiyalanadı. Qaraqalpaqstan Respublikasınıń húrmetli ataqları menen tákirarıy sıylıqlaw ámelge asırılmaydı. Puqaralardı gezektegi mámleketlik sıylıqqa usınıw, ádette, aldıńǵı sıylıqlanǵan dáwirinen keminde úsh jıl ótkennen keyin ámelge asırıladı. Ayrıqsha jaǵdaylarda puqaralar gezektegi sıylıqlawǵa aldıńǵı sıylıqlanǵan waqtına qaramastan usınılıwı múmkin. Qaraqalpaqstan Respublikasınıń Mámleketlik sıylıqları menen sıylıqlaw shaxs qaytıs bolǵannan keyin de ámelge asırılıwı múmkin. 9-statya. Mámleketlik sıylıqlardı tapsırıw Mámleketlik sıylıqlardı tapsırıw saltanatlı jaǵdayda ámelge asırıladı. Mámleketlik sıylıqlardı tapsırıw Qaraqalpaqstan Respublikası Joqarǵı Keńesiniń Baslıǵı yamasa onıń atınan Joqarǵı Keńes Baslıǵınıń orınbasarı, Qaraqalpaqstan Respublikası Joqarǵı Keńesi Prezidiumınıń aǵzaları, Qaraqalpaqstan Respublikası Konstituciyalıq baqlaw komiteti baslıǵı, Qaraqalpaqstan Respublikası Ministrler Keńesiniń Baslıǵı hám onıń orınbasarları hámde Qaraqalpaqstan Respublikası Joqarǵı Keńesi Baslıǵı wákillik bergen shaxslar tárepinen ámelge asırıladı. Qaraqalpaqstan Respublikası Joqarǵı Keńesiniń Baslıǵına Mámleketlik sıylıqlardı tapsırıw Qaraqalpaqstan Respublikası Konstituciyalıq baqlaw komiteti baslıǵı tárepinen ámelge asırıladı. Mámleketlik sıylıqlar menen sıylıqlanǵan shaxslarǵa bir waqıttıń ózinde mámleketlik sıylıq berilgenligi haqqında gúwalıq hám óńir belgisi beriledi. Shaxs qaytıs bolǵannan keyin sıylıqlanǵan jaǵdayda mámleketlik sıylıq sıylıqlanǵan shaxstıń jaqın tuwısqanlarınıń birine, onı taǵıp júriw huqıqı berilmegen halda tapsırıladı. Mámleketlik sıylıqlar qaytıs bolǵan sıylıqlanǵan shaxstıń yamasa qaytıs bolǵannan keyin sıylıqlanǵan shaxstıń jaqın tuwısqanlarınıń biriniń kelisimi menen mámleketlik muzeylerge tapsırılıwı múmkin. Eger sıylıqlanǵan shaxstıń jaqın tuwısqanları bolmasa, ol qaytıs bolǵannan keyin mámleketlik sıylıqtıń óńir belgisi hám onıń gúwalıǵı Qaraqalpaqstan Respublikası Joqarǵı Keńesi janındaǵı Mámleketlik sıylıqlar boyınsha komissiyasına tapsırıladı.

4-BAP. MÁMLEKETLIK SÍYLÍQLARDAN PAYDALANÍW

 10-statya. Mámleketlik sıylıqlardı taǵıp júriw Mámleketlik sıylıqlar menen sıylıqlanǵan shaxslar ulıwma milliy bayramlar hám saltanatlı máresimler waqtında Qaraqalpaqstan Respublikasınıń húrmetli ataqları óńir belgilerin óńirdiń shep tárepine taǵıp júredi. Sıylıqlanǵanlar mámleketlik sıylıqların basqa jaǵdaylarda da taǵıp júriwi múmkin. Qaraqalpaqstan Respublikası húrmetli ataqlarınıń óńir belgileri usı Nızamnıń 5-statyasında kórsetilgen izbe-izlikte Ózbekstan Respublikasınıń mámleketlik sıylıqlarınıń óńir belgileri, orden hám medallarınan keyin taǵıladı. Shaxsta sırt el mámleketleriniń mámleketlik sıylıqları bar bolǵan jaǵdayda, olar Ózbekstan Respublikası hám Qaraqalpaqstan Respublikasınıń mámleketlik sıylıqlarınan keyin jaylastırıladı. Sıylıqlanǵan shaxslar kúndelikli taǵıp júriw ushın mámleketlik sıylıqlardıń ornına plankalardaǵı lentaların taǵıp júriwi múmkin. Sıylıqlanǵan shaxslarǵa ayırım jaǵdaylarda mámleketlik sıylıqlar moyınǵa ildiriletuǵın lentada tapsırıladı. 11-statya. Mámleketlik sıylıqlardı saqlaw tártibi Sıylıqlanǵan shaxslar mámleketlik sıylıqlardıń óńir belgici hám onıń gúwalıǵın qásterlep saqlawı, olardıń pútin saqlanıwın támiyinlewi shárt. Mámleketlik sıylıqtıń óńir belgisi hám onıń gúwalıǵı joytılǵan jaǵdayda, usı sıylıqqa bolǵan huqıq saqlanıp qalınadı. Mámleketlik sıylıqtıń óńir belgisi hám gúwalıǵı áskeriy jaǵdayda, tábiyiy apatshılıq aqıbetinde yamasa mámleketlik sıylıq joǵalıwınıń aldın alıw imkaniyatı bolmaǵan basqa da sharayatlarda joytılǵan jaǵdayda, tek ǵana gúwalıqtıń dublikatı yaki belgilengen tártipte maǵlıwmatnama beriliwi múmkin. Mámleketlik sıylıqtıń óńir belgisi hám onıń gúwalıǵın joytqan shaxs qaytıs bolǵan jaǵdayda, usı sıylıqtıń gúwalıǵınıń dublikatı hám maǵlıwmatnama berilmeydi.  12-statya. Mámleketlik sıylıqlardı sırt elge alıp shıǵıw Sıylıqlanǵan shaxslar Ózbekstan Respublikasınan shıǵıp baratırıp ózlerine tiyisli bolǵan mámleketlik sıylıqlardıń óńir belgileri hám olardıń gúwalıqların alıp shıǵıw huqıqına iye. Qaytıs bolǵan sıylıqlanǵan shaxstıń turaqlı jasaw ushın Ózbekstan Respublikasınan shıǵıp baratırǵan jaqın tuwısqanları olardıń usı sıylıqlarǵa bolǵan huqıqın tastıyıqlawshı hújjetlerdi kórsetkennen keyin mámleketlik sıylıqlardı alıp shıǵıw huqıqına iye. Mámleketlik sıylıqlarǵa bolǵan huqıq tiyisli hújjetler menen tastıyıqlanbaǵan bolsa, olardı alıp shıǵıw qadaǵan etiledi.  13-statya.  Mámleketlik sıylıqlar menen sıylıqlanǵan shaxslarǵa beriletuǵın jeńillikler hám aqshalay tólemler Mámleketlik sıylıqlar menen sıylıqlanǵan shaxslar ushın nızam hújjetlerine muwapıq hár ayda is haqısı yamasa pensiyasına nızam hújjetlerinde belgilengen tártipte qosımsha tólemler ámelge asırılıp barıladı.

5-BAP. JUWMAQLAWShÍ QAǴÍYDALAR

 14-statya.  Qaraqalpaqstan Respublikasınıń sıylıqların (premiyaların), estelik hám óńir belgilerin, vedomstvolıq sıylıqların shólkemlestiriw Qaraqalpaqstan Respublikası Joqarǵı Keńesi tárepinen mámleketlik sıylıqlar bolmaǵan Qaraqalpaqstan Respublikası sıylıqları (premiyaları), mámleket hám jámiyet tariyxındaǵı belgili sánelerge arnalǵan estelik hám óńir belgileri shólkemlestiriliwi múmkin. Qaraqalpaqstan Respublikası Joqarǵı Keńesiniń kelisimi tiykarında mákemeler hám shólkemlerdiń sıylıqları (premiyaları, estelik hám óńir belgileri, vedomstvolıq sıylıqları) shólkemlestiriliwi múmkin. 15-statya.  Mámleketlik sıylıqlardan ayırıw Mámleketlik sıylıqlar menen sıylıqlanǵan shaxslar tómendegi jaǵdaylarda olardan ayırılıwı múmkin: shaxs awır yaki júdá awır jınayat islegeni ushın húkim etilgende – sudtıń usınısına muwapıq; shaxs óziniń abıroyın tógiwshi is-háreketler islegende – sıylıqlaw haqqında usınıs kirgiziw huqıqına iye uyımnıń usınısına muwapıq. Mámleketlik sıylıqlardan ayırıw Qaraqalpaqstan Respublikası Joqarǵı Keńesi Prezidiumı tárepinen ámelge asırıladı. Mámleketlik sıylıqlardan ayırılıw belgilengen tólemlerdiń biykar etiliwine sebep boladı. Mámleketlik sıylıqtan ayırılǵan shaxsqa tiyisli mámleketlik sıylıqtıń óńir belgisi hám onıń gúwalıǵı Qaraqalpaqstan Respublikası Joqarǵı Keńesi janındaǵı Mámleketlik sıylıqlar boyınsha komissiyasına qaytarılıwı zárúr. Nızamsız húkim etilgen hám tolıq aqlanǵan shaxslardıń mámleketlik sıylıqlarǵa bolǵan huqıqları nızam hújjetlerine muwapıq tiklenedi. 16-statya. Mámleketlik sıylıqlar haqqındaǵı nızam hújjetlerin buzǵanlıǵı ushın juwapkershilik Húrmetli ataqlardıń óńir belgilerin nızamsız ráwishte taǵıp júriw, satıp alıw, satıw, almasıw yamasa basqasha tárizde haqı esabınan birewge beriw nızam hújjetlerine muwapıq juwapkershilikke sebep boladı. Sırtqı kórinisi mámleketlik sıylıqlarǵa uqsas bolǵan estelik hám óńir belgilerin, vedomstvolıq hám basqa da sıylıqlardı shólkemlestiriw hám tayarlaw qadaǵan etiledi. Huqıq qorǵaw uyımları tárepinen nızam hújjetlerinde belgilengen tártipte alıp qoyılǵan Qaraqalpaqstan Respublikasınıń mámleketlik sıylıqları, sonday-aq iyesi anıqlanbaǵan mámleketlik sıylıqlar Qaraqalpaqstan Respublikası Joqarǵı Keńesi janındaǵı Mámleketlik sıylıqlar boyınsha komissiyasına tapsırıladı.

Qaraqalpaqstan Respublikası Joqarǵı Keńesiniń Baslıǵı M.Erniyazov

Nókis qalası, 16-dekabr 2019-jıl № 280 / XXIX