Belgili qaraqalpaq shayırı hám oyshılı Ájiniyaz Qosıbay ulı tuwılǵan kúniniń 200 jıllıǵın keńnen belgilew haqqında
Ózbekstan Respublikası Prezidentiniń qararı
Belgili qaraqalpaq shayırı hám oyshılı Ájiniyaz Qosıbay ulı óziniń biytákirar hám mazmunlı dóretiwshiligi menen xalqımızdıń mádeniyatı hám ádebiyatın rawajlandırıw, jas áwladtı watansúyiwshilik hám iygilikli ideyalar ruwxında tárbiyalaw, ózbek hám qaraqalpaq xalıqları arasında ázeliy doslıq hám awızbirshilikti bekkemlewge múnásip úles qosqan úlken dóretiwshi bolıp esaplanadı. Tereń oyshıl shayırdıń qosıq hám dástanlarında sáwlelengen gumanistlik filosofiyalıq kózqaraslar elimizdiń kewlinen tereń orın iyelegen.
Xiywadaǵı belgili Sherǵazıxan hám Qutlımurat-inaq medreselerinde bilim alǵan bul ullı tulǵa tek ǵana mámleketimizde emes, al pútkil regionımızda xalıqshıl shayır, jetik muǵallim hám ustaz, sheber kalligraf sıpatında tán alınǵanı, oǵada itibarǵa ılayıq bolıp esaplanadı. Onıń gózzal shıǵarmaları túrkmen, qazaq, qırǵız hám basqa da tuwısqan xalıqlar tárepinen de súyip oqılmaqta.
Ájiniyaz Qosıbay ulı tuwılǵan kúniniń 200 jıllıǵın belgilew YuNESKOnıń xalıqaralıq yubileyler rejesine kirgizilgeni de onıń dóretiwshilik miyrası ulıwma insanıylıq áhmiyetke iye ekeninen dárek beredi.
Ájiniyaz Qosıbay ulınıń biytákirar ádebiy miyrasın jáne de keńnen úyreniw hám ǵalaba en jaydırıw hám tuwılǵan kúniniń 200 jıllıǵın múnásip belgilew maqsetinde:
1. Ózbekstan Respublikası Mádeniyat ministrligi, Joqarı bilimlendiriw, ilim hám innovaciyalar ministrligi, Qaraqalpaqstan Respublikası Joqarǵı Keńesi, Ózbekstan hám Qaraqalpaqstan Jazıwshılar awqamları, YuNESKO isleri boyınsha milliy komissiya, Respublikalıq Ruwxıy-aǵartıwshılıq orayı, Kórkem óner akademiyası hám jámiyetshilik wákilleriniń Ájiniyaz Qosıbay ulı tuwılǵan kúniniń 200 jıllıǵın mámleketimizde keńnen belgilew haqqındaǵı usınısları maqullansın.
2. Ájiniyaz Qosıbay ulı tuwılǵan kúniniń 200 jıllıǵın belgilew boyınsha shólkemlestiriw komiteti (keyingi orınlarda – Shólkemlestiriw komiteti) qosımshaǵa muwapıq quramda dúzilsin.
3. Shólkemlestiriw komiteti (A.Aripov) bir hápte múddette Ájiniyaz Qosıbay ulı tuwılǵan kúniniń 200 jıllıǵın belgilew hám onıń dóretiwshilik miyrasın keńnen úgit-násiyatlaw boyınsha tómendegi wazıypalardı názerde tutatuǵın ilajlar baǵdarlamasın tastıyıqlasın hám onıń óz waqtında, sapalı orınlanıwın támiyinlesin:
shayırdıń «Tańlamalı shıǵarmalar» toplamın ózbek hám qaraqalpaq tillerinde basıp shıǵarıw, onıń ómiri hám dóretiwshiligine baǵıshlap dóretilgen kórkem, ilimiy-ǵalabalıq shıǵarmalardı qayta basıp shıǵarıw hám prezentaciyaların ótkeriw;
mámleketlik buyırtpaǵa bola Ájiniyaz Qosıbay ulınıń ómiri hám dóretiwshiligine baǵıshlanǵan saxna shıǵarmaları hám «Ájiniyaz» kórkem-publicistikalıq filmin jaratıw hám olardıń prezentaciyaların shólkemlestiriw;
Nókis qalasında shayırdıń dóretiwshiligine baǵıshlanǵan «Ayt, sen Ájiniyazdıń qosıqlarınan» atamasında mámleketimiz jas dóretiwshileriniń tańlawın, dóretiwshilik mektepleriniń oqıwshıları arasında Ájiniyaz Qosıbay ulınıń ómiri hám dóretiwshiligine baǵıshlanǵan shıǵarmalar tańlawın ótkeriw;
2024-jıldıń sentyabr ayında Kórkem óner akademiyasınıń Oraylıq kórgizbeler zalında Ájiniyaz Qosıbay ulınıń ómiri hám dóretiwshiligine baǵıshlanǵan kitaplar, súwretlew kórkem óneri shıǵarmaları hám xalıq ámeliy kórkem óner úlgileri kórgizbesin ótkeriw;
2024-jıldıń oktyabr ayında Qaraqalpaq mámleketlik universiteti hám Áliysher Nawayı atındaǵı Tashkent mámleketlik ózbek tili hám ádebiyatı universitetinde Ájiniyaz Qosıbay ulınıń ádebiy miyrasın úyreniw atamasında xalıqaralıq ilimiy-ámeliy konferenciyalar shólkemlestiriw;
Ájiniyaz atındaǵı Nókis mámleketlik pedagogikalıq institutında shayır muzeyin shólkemlestiriw;
Ájiniyaz Qosıbay ulınıń Moynaq rayonındaǵı qoyımshılıǵın abadanlastırıw hám oǵan estelik ornatıw, bul rayonda Ájiniyaz Qosıbay ulı atındaǵı ekopark jaratıw;
mámleketimizdegi joqarı hám orta arnawlı, professional, ulıwma orta bilim beriw mákemeleri, miynet jámáátleri hám máhállelerde belgili jazıwshı hám shayırlar, ilimpazlardıń qatnasıwında Ájiniyaz Qosıbay ulı tuwılǵan kúniniń 200 jıllıǵına baǵıshlanǵan ushırasıw hám ádebiy kesheler shólkemlestiriw;
2024-jıldıń noyabr ayında Áliysher Nawayı atındaǵı Ózbekstan mámleketlik akademiyalıq úlken teatrı hám Berdaq atındaǵı Qaraqalpaq mámleketlik akademiyalıq teatrında Ájiniyaz Qosıbay ulı tuwılǵan kúniniń 200 jıllıǵına baǵıshlanǵan saltanatlı ádebiy-kórkem eslew keshelerin shólkemlestiriw.
4. Ózbekstan Milliy málimleme agentligi, Ózbekstan Milliy teleradiokompaniyası, «Dunyo» málimleme agentligi hám basqa da ǵalaba xabar qurallarına Ájiniyaz Qosıbay ulı tuwılǵan kúniniń 200 jıllıǵın belgilewge baylanıslı ilajlardı keńnen sáwlelendiriw usınıs etilsin.
5. Usı qararda názerde tutılǵan ilajlardı qarjılandırıw tiyisli ministrlikler, uyım hám shólkemlerge ajıratılǵan byudjet qarjıları, olardıń byudjetten tısqarı qarjıları hám nızamshılıq hújjetleri menen qadaǵan etilmegen basqa da dárekler esabınan ámelge asırılıwı belgilensin.
6. Usı qarardıń orınlanıwın qadaǵalaw Ózbekstan Respublikası Bas ministri A.N.Aripovqa júklensin.
Ózbekstan Respublikası Prezidenti Sh.MIRZIYoEV
Tashkent qalası,
2024-jıl 16-iyul