GEOGRAFIYALÍQ OBEKTLERDIŃ ATAMALARÍ HAQQÍNDA

QARAQALPAQSTAN RESPUBLIKASÍNÍŃ NÍZAMÍ 28.12.2013-j. № 185/XIV

 GEOGRAFIYaLÍQ OBEKTLERDIŃ ATAMALARÍ HAQQÍNDA

Usı Nızamǵa tómendegilerge muwapıq ózgerisler kirgizilgen: 30.11.2021-j. 180/XXIII-sanlı QR Nızamı

 I BAP. TIYKARǴÍ REJELER

 1-statya. Usı Nızamnıń maqseti hám qollanılıw salası  Usı Nızamnıń maqseti geografiyalıq obektlerdiń atamaları salasındaǵı qatnasıqlardı tártipke salıwdan ibarat. Usı Nızamnıń háreket etiwi Qaraqalpaqstan Respublikası aymaǵınan sırtta jaylasqan geografiyalıq obektlerdiń atamalarınıń olardan Qaraqalpaqstan Respublikasında paydalanıwǵa tiyisli bólegine de taraladı.  2-statya. Geografiyalıq obektlerdiń atamaları tuwralı nızamshılıq Geografiyalıq obektlerdiń atamaları tuwralı nızamshılıq usı Nızam hám basqa da nızam aktlerinen ibarat. Eger Ózbekstan Respublikasınıń xalıqaralıq shártnamasında Qaraqalpaqstan Respublikasınıń geografiyalıq obektleriniń atamaları haqqındaǵı nızamında názerde tutılǵanınan basqasha qaǵıydalar belgilengen bolsa, xalıqaralıq shártnama qaǵıydaları qollanıladı.  3-statya. Tiykarǵı túsinikler Usı Nızamda tómendegi tiykarǵı túsinikler qollanıladı: geografiyalıq obektler - Jerdiń házirgi waqıttaǵı yaki ótmishte bar bolǵan hám anıq ornalasqan ornı menen belgilenetuǵın, kelip shıǵıwı tábiyiy, yamasa jasalma bolǵan pútin bir tutas hám salıstırmalı turaqlı dúzilmeleri. Olardıń qatarına: hákimshilik - aymaqlıq birlikler (rayonlar, qalalar, posyolkalar, awıllar); elatlı punktler hám olardıń quram bólekleri (mákan-keńesler, gúzarlar, kósheler, maydanlar, baǵlar, qıyabanlar); transport hám injenerlik-texnikalıq infrastruktura obektleri (temir jol stanciyaları, avtostanciyalar, vokzallar, aeroportlar, portlar, pristanlar, kópirler, razezdler, jollar, kanallar, suw saqlaǵıshlar, plotinalar, dambalar); tábiyiy obektler (dáryalar, kóller, tegislikler, tawlar, taw dizbekleri, shóller, oypatlıqlar, bálentlikler, taw jıraları, qorǵalatuǵın tábiyiy aymaqlar, taw janbawırları, paydalı qazılma kánleri) hám basqa usıǵan uqsas obektler kiredi; geografiyalıq obektlerdiń atamaları - geografiyalıq obektlerdiń olardı ajıratıp parıqlaw hám anıqlaw ushın paydalanılatuǵın óz atamaları; geografiyalıq obekttiń atamasın belgilew – jánede normallastırıw maqsetinde geografiyalıq obekttiń atamasın anıqlaw; geografiyalıq obekttiń atamasın normallastırıw - geografiyalıq obekttiń eń kóp paydalanılatuǵın hám eń muwapıq atamasın tańlaw, usı atama jazılatuǵın formanı belgilew hám tastıyıqlaw; geografiyalıq obekttiń atamasın ózgertiw - geografiyalıq obekttiń házirgi atamasın usı Nızamda belgilengen jaǵdaylarda hám tártipte ózgertiw;  4-statya. Geografiyalıq obektlerdiń atamalarına tiyisli talaplar Geografiyalıq obektke berilip atırǵan atama: geografiyalıq obektke tán bolǵan belgilerdi sáwlelendiriwi; usı geografiyalıq obekt jaylasqan jerdegi geografiyalıq obektler atamalarınıń bar bolǵan sistemasına sáykes keliwi; jergilikli xalıqtıń pikirin esapqa alıwı; ádette, kóbi menen úsh sózden ibarat bolıwı; usı Nızamnıń 6-statyası ekinshi bóliminiń talaplarına muwapıq bolıwı kerek. Rayonlarǵa, qalalarǵa, posyolkalarǵa, awıllarǵa, elatlarǵa, elatlı punktlerge adamlardıń atı-familiyasın beriwge, sonday-aq, olardı tariyxıy waqıyalar húrmetine baylanıslı atawǵa, ádette, jol qoyılmaydı. Kóshelerge, gúzarlarǵa, elatlarǵa, maydanlarǵa, baǵlarǵa hám elatlı punktlerdiń basqa da quram bóleklerine ayırım adamlar, jámiyetlik-siyasiy ǵayratkerlerdiń atı-familiyasın beriwge, ádette, jol qoyılmaydı, Ózbekstan hám Qaraqalpaqstan tariyxındaǵı tereń iz qaldırǵan shaxslar buǵan kirmeydi. Wákillikli mámleketlik hákimiyat hám basqarıw uyımları tárepinen shólkemlestirilip atırǵan geografiyalıq obektlerge olardı shólkemlestiriw tuwralı tiyisli hújjetler menen usı Nızam talaplarına muwapıq atama beriledi. Hákimshilik - aymaqlıq birliklerdiń atamaları, ádette, olardıń hákimshilik orayları atamasınan, usı hákimshilik - aymaqlıq birlikler jaylasqan aymaq bóleginiń geografiyalıq yaki tariyxıy atamasınan kelip shıǵıwı kerek. Transportlıq hám injenerlik-texnikalıq infrastruktura obektleriniń, sonıń ishinde, aeroportlar, vokzallar, portlar, pristanlar, razezdler, temir jol stanciyalarınıń hám basqa da obektlerdiń atamaları, ádette, olardıń qasında jaylasqan elatlı punktlerdiń yaki olardıń quram bólekleriniń, basqa da geografiyalıq obektlerdiń atamalarınan kelip shıǵıwı kerek. Tómendegilerge anıq birdey atama beriliwine jol qoyılmaydı: Qaraqalpaqstan Respublikası kólemindegi rayonlarǵa, qalalarǵa; Qaraqalpaqstan Respublikası kólemindegi posyolkalarǵa, awıllarǵa; bir rayon, qala yaki elatlı punkt kólemindegi bir neshe túrles geografiyalıq obektlerge. 5-statya. Geografiyalıq obektlerdiń atamaların ózgertiwge baylanıslı talaplar Geografiyalıq obektlerdiń atamaların ózgertiwge tómendegi jaǵdaylarda jol qoyıladı: geografiyalıq obekttiń  belgilengen maqseti anıq ózgergende; ayırım geografiyalıq obektlerdiń tariyxıy atamaların tiklew zárúr bolǵanda; eger geografiyalıq obekt geografiyalıq obektlerdiń atamaları haqqındaǵı nızam aktleriniń talaplarına muwapıq kelmeytuǵın qısqarǵan sóz, san yaki sóz dizbegi menen belgilengen bolsa; geografiyalıq obektlerge usı Nızamnıń 4-statyasınıń úshinshi bóliminde názerde tutılǵan shaxslardıń atı-familiyasın beriw zárúr bolǵanda; geografiyalıq obektlerdiń usı Nızamnıń 4-statyasınıń jetinshi bóliminde názerde tutılǵan bir qıylı atamaları bar bolǵanda.  6-statya. Geografiyalıq obektlerdiń atamaların belgilew Geografiyalıq obektlerdiń atamaları aymaqtı kartografiyalaw, toponimikalıq izertlewler ótkeriw waqtında, sonday-aq, geografiyalıq obektlerge atama beriw hám olardıń atamaların ózgertiw tuwralı usınıslar tayarlanıp atırǵanda: tiyisli mámleketlik hákimiyat hám basqarıw uyımlarınıń, puqaralardıń ózin-ózi basqarıw uyımları, kárxanalar, mákemeler hám shólkemlerdiń hújjetleri; rásmiy kartografiyalıq hámde maǵlıwmatnama basılımalarınıń, statistikalıq, arxivke tiyisli, tariyxıy hám basqa dereklerdiń maǵlıwmatları; jergilikli xalıq, sonday-aq úlketanıwshılar, geograflar, tariyxshılar hám basqa da qánigeler arasında sorawlar ótkeriw tiykarında belgilenedi. Geografiyalıq obektlerdiń atamaların belgilewde: jergilikli xalıqtıń turmısınıń geografiyalıq, tariyxıy, milliy, etnikalıq, tilge baylanıslı hám basqa da ózgeshelikleri esapqa alınadı; geografiyalıq obektlerdiń atamalarınıń jańılısıwına alıp keliwshi uqsaslıǵı, usı atamalardıń húrmetsizlik mazmunda bolıwına, Ózbekstan hám Qaraqalpaqstan xalıqlarınıń tariyxı, dástúrleri hám mádeniyatına jat bolıwına jol qoyılmaydı.

 II BAP. MÁMLEKETLIK WYÍMLARDÍŃ GEOGRAFIYaLÍQ OBEKTLERGE ATAMA BERIW HÁM OLARDÍŃ ATAMALARÍN ÓZGERTIWGE BAYLANÍSLÍ WÁKILLIKLERI HÁM WAZÍYPALARÍ

 7-statya. Rayonlarǵa, qalalarǵa, poselkalarǵa, awıllarǵa, elatlı punktlerge atama beriw hám olardıń atamaların ózgertiw Rayonlarǵa, qalalarǵa, poselkalarǵa, awıllarǵa, elatlı punktlerge atama beriw hám olardıń atamaların ózgertiw rayonlardıń, qalalardıń hákimleriniń usınısı boyınsha Qaraqalpaqstan Respublikası Joqarǵı Keńesi tárepinen ámelge asırıladı. Rayonlarǵa, qalalarǵa, poselkalarǵa, awıllarǵa, elatlı punktlerge hám olardıń quram bóleklerine atama beriw hám olardıń atamaların ózgertiw haqqındaǵı usınıslardı qarap shıǵıw ushın Qaraqalpaqstan Respublikası Ministrler Keńesi tárepinen geografiyalıq obektlerge atama beriw hám olardıń atamaların ózgertiw máseleleri boyınsha Qaraqalpaqstan Respublikası komissiyası (bunnan keyingi tekstte respublika komissiyası dep júrgiziledi) dúziledi. Rayon, qala hákimi jergilikli xalıq, kárxanalar, mákemeler, shólkemlerdiń pikirlerin esapqa alǵan halda rayonlarǵa, qalalarǵa, posyolkalarǵa, awıllarǵa, elatlı punktlerge atama beriw hám olardıń atamaların ózgertiw tuwralı usınıs tayarlaydı hám olardı tiyisli hújjetler menen birge juwmaq alıw ushın respublika komissiyasına jiberedi. Respublika komissiyası usınılǵan hújjetlerdiń hár tárepleme úyrenilip shıǵılıwın shólkemlestiredi, geografiyalıq obektlerdiń atamaları tuwralı nızamnıń talaplarına muwapıqlıǵı yaki muwapıq emesligi kóz-qarasınan olardı mámleketlik ekspertizadan ótkeriw ushın Kadastr agentligine bir ay múddet ishinde qarap shıǵıp juwmaq beriwi ushın tapsıradı. Respublika komissiyası ótkerilgen jumıstıń juwmaqları boyınsha hám mámleketlik ekspertiza nátiyjelerin esapqa alǵan halda tiyisli juwmaq beredi, bul juwmaq geografiyalıq obektke atama beriw hám olardıń atamaların ózgertiw tuwralı usınıs kirgizgen rayon, qala hákimine jiberiledi. (30.11.2021-j. 180/XXIII-sanlı QR Nızamı tiykarında ózgerisler kirgizilgen) Rayon, qala hákimi respublika komissiyasınıń juwmaqların esapqa alǵan halda, geografiyalıq obektlerge atama beriw hám olardıń atamaların ózgertiw tuwralı usınıslar tayarlaydı hámde olardı Qaraqalpaqstan Respublikası Joqarǵı Keńesine qarap shıǵıw ushın kiritedi. Qaraqalpaqstan Respublikası Joqarǵı Keńesi rayon, qala hákiminiń usınısın qarap shıǵadı hám tiyisli sheshim qabıl etedi.  8-statya. Elatlı punktlerdiń quram bóleklerine atama beriw hám olardıń atamaların ózgertiw Elatlı punktlerdiń quram bóleklerine (mákan-keńesler, gúzarlar, kósheler, maydanlar, baǵlar, qıyabanlarǵa) atama beriw hám olardıń atamaların ózgertiw puqaralardıń ózin-ózi basqarıw uyımları, kárxanalar, mákemeler, shólkemlerdiń ótinishleri tiykarında rayonlar, qalalardıń hákimleri kirgizgen usınıs boyınsha xalıq deputatları rayonlıq, qalalıq Keńesleri tárepinen ámelge asırıladı. Elatlı punktlerdiń quram bóleklerine atama beriw hám olardıń atamaların ózgertiw tuwralı usınıslardı qarap shıǵıw hám tayarlaw ushın rayonlar, qalalardıń hákimleri tárepinen geografiyalıq obektlerge atama beriw hám olardıń atamaların ózgertiw máseleleri boyınsha rayonlıq, qalalıq komissiyalar (bunnan keyingi tekstte rayonlıq, qalalıq komissiyası dep júrgiziledi) dúziledi. Rayon, qala hákimi puqaralardıń ózin-ózi basqarıw uyımları, kárxanalar, mákemeler, shólkemlerdiń elatlı punktleriniń quram bóleklerine (mákan-keńesler, gúzarlar, kósheler, maydanlar, baǵlar, qıyabanlarǵa) atama beriw hám olardıń atamaların ózgertiw máseleleri boyınsha ótinishlerin qarap shıǵadı hám olardı zárúr hújjetleri menen birge usınıslar tayarlaw ushın rayonlıq, qalalıq komissiyasına jiberedi. Rayonlıq, qalalıq komissiya usınılǵan hújjetlerdi geografiyalıq obektlerdiń atamaları tuwralı nızamshılıq talaplarına muwapıqlıǵı yaki muwapıq emesligi kóz-qarasınan qarap shıǵadı, keyin respublika komissiyasına kirgiziw ushın usınıslar tayarlaydı hám olardı rayon, qala hákimine jiberedi. Rayon, qala hákimi elatlı punktlerdiń quram bóleklerine (mákan-keńesler, gúzarlar, kósheler, maydanlar, baǵlar, qıyabanlarǵa) atama beriw hám olardıń atamaların ózgertiw máseleleri boyınsha rayonlıq, qalalıq komissiyası tárepinen qarap shıǵılǵan usınıslardı, tiyislisinshe, respublika komissiyasına kirgizedi, komissiya tayarlanǵan materiallardıń geografiyalıq obektlerdiń atamaları tuwralı nızamshılıq talaplarına muwapıqlıǵı yaki muwapıq emesligi kóz-qarasınan hár tárepleme úyrenip shıǵılıwın shólkemlestiredi hám tiyisli juwmaq beredi. Rayon, qala hákimi tiyislisinshe respublika komissiyasınıń juwmaǵına muwapıq elatlı punktlerdiń quram bóleklerine (mákan-keńesler, gúzarlar, kósheler, maydanlar, baǵlar, qıyabanlarǵa) atama beriw hám olardıń atamaların ózgertiw máseleleri boyınsha usınıslar tayarlaydı hám onı xalıq deputatları rayonlıq, qalalıq Keńesi qarap shıǵıwı ushın kirgizedi. Xalıq deputatları rayonlıq, qalalıq Keńesi rayon, qala hákiminiń  usınısın qarap shıǵadı hám tiyisli sheshim qabıl etedi.  9-statya. Tábiyiy obektlerge, transportlıq hám injenerlik-texnikalıq infrastruktura obektlerine atama beriw hám olardıń atamaların ózgertiw Tábiyiy obektlerge, transportlıq hám injenerlik-texnikalıq infrastruktura obektlerine atama beriw hám olardıń atamaların ózgertiw mámleketlik hám xojalıq basqarıw uyımlarınıń, orınlardaǵı mámleketlik hákimiyat uyımlarınıń usınısı menen Qaraqalpaqstan Respublikası Ministrler Keńesi tárepinen ámelge asırıladı. Tábiyiy obektlerge, transport hám injenerlik-texnikalıq infrastruktura obektlerine atama beriw hám olardıń atamaların ózgertiw tuwralı usınıslardı qarap shıǵıw respublika komissiyası tárepinen ámelge asırıladı. Qaraqalpaqstan Respublikası Ministrler Keńesi mámleketlik hám xojalıq basqarıw uyımlarınıń, jergilikli mámleketlik hákimiyat uyımlarınıń usınısların qarap shıǵıw ushın qabıl etedi hám olardı tiyisli hújjetler menen juwmaq alıw ushın respublika komissiyasına jiberedi. Respublikalıq komissiya usınılǵan hújjetlerdiń hár tárepleme úyreniliwin shólkemlestiredi, geografiyalıq obektlerdiń atamaları tuwralı nızamshılıq talaplarına muwapıqlıǵı yaki muwapıq emesligi kóz-qarasınan olardı mámleketlik ekspertizadan ótkeriw ushın Kadastr agentligine bir ay múddet ishinde qarap shıǵıp, juwmaq beriwi ushın tapsıradı. Respublika komissiyası ótkerilgen jumıstıń juwmaqları boyınsha hámde mámleketlik ekspertiza nátiyjelerin esapqa alǵan halda tiyisli juwmaq beredi, bul juwmaq Qaraqalpaqstan Respublikası Ministrler Keńesine usınıladı. (30.11.2021-j. 180/XXIII-sanlı QR Nızamı tiykarında ózgerisler kirgizilgen) Qaraqalpaqstan Respublikası Ministrler Keńesi respublika komissiyasınıń juwmaǵın esapqa alǵan halda, geografiyalıq obektlerge atama beriw hám olardıń atamaların ózgertiw máselesi boyınsha tiyisli sheshim qabıl etedi.  10-statya. Geografiyalıq obektlerge atama beriw hám olardıń atamaların ózgertiw máseleleri boyınsha komissiyalardıń tiykarǵı wazıypaları Geografiyalıq obektlerge atama beriw hám olardıń atamaların ózgertiw máseleleri boyınsha komissiyalardıń tiykarǵı wazıypaları tómendegilerden ibarat: Ózbekstan hám Qaraqalpaqstan xalıqlarınıń tariyxıy-mádeniy qádiriyatları hám miyrası menen baylanıslı geografiyalıq obektlerdiń atamaların qorǵawdı támiyinlew, tiykarsız ózgertiliwiniń aldın alıw; geografiyalıq obektlerge Ózbekstan hám Qaraqalpaqstan xalıqlarınıń milliy salt-dástúrleri hám mentalitetine jat bolǵan atamalardıń beriliwine hám olardıń atamaları usınday ruwxta ózgertiliwine jol qoymaw; geografiyalıq obektlerge atama beriw hám olardıń atamaların ózgertiw waqtında jerleslik, aǵayinshilik, xızmet dárejesinen paydalanıw halların boldırmaw. Usı Nızamnıń 4-statyası talaplarınıń hám geografiyalıq obektlerdiń atamaları tuwralı nızam hújjetleriniń basqa qaǵıydalarınıń rayonlıq, qalalıq komissiyaları tárepinen orınlanıwı ústinen qadaǵalawdı respublika komissiyası ámelge asıradı. Komissiyalardıń quramı mámleketlik hám xojalıq basqarıw uyımlarınıń, orınlardaǵı mámleketlik hákimiyat uyımlarınıń basshıları hám xızmetkerleri, puqaralıq jámiyet institutlarınıń, puqaralardıń ózin-ózi basqarıw uyımlarınıń wákilleri, sonday-aq, ilim hám mádeniyat ǵayratkerleri, ekspertler, qánigeler hám tiyisli jumıs salalarında arnawlı bilimlerge iye bolǵan basqada shaxslar arasınan shólkemlestiriledi. Respublikalıq komissiya, rayonlıq, qalalıq komissiyaları tiyislisinshe Qaraqalpaqstan Respublikası Ministrler Keńesi, rayonlar, qalalar hákimlikleriniń basshıları tárepinen basqarıladı. Respublika komissiyasınıń, rayonlıq, qalalıq komissiyalarınıń jumısın shólkemlestiriw tártibi Qaraqalpaqstan Respublikası Ministrler Keńesi tárepinen tastıyıqlanadı.  11-statya. Geografiyalıq obektlerge atama beriw hám olardıń atamaların ózgertiw boyınsha usınıslarǵa qosımsha etiletuǵın hújjetler Geografiyalıq obektlerge atama beriw hám olardıń atamaların ózgertiwdi ámelge asırıwshı uyımlarǵa kiritiletuǵın geografiyalıq obektlerge atama beriw hám olardıń atamaların ózgertiw tuwralı usınıslarǵa tómendegi hújjetler qosımsha etiledi: geografiyalıq obektlerge atama beriw hám olardıń atamaların ózgertiw zárúrliginiń, maqsetke muwapıqlıǵınıń tiykarnaması; geografiyalıq obekttiń usınılıp atırǵan ataması; kartografiya materialları; geografiyalıq obektlerge atama beriw hám olardıń atamaların ózgertiwge baylanıslı tiyisli esap-kitaplar hám qarjılardıń derekleri; tiyislisinshe respublika komissiyası, rayonlıq, qalalıq komissiyalardıń juwmaqları; Ózbekstan Respublikası Jer resursları, geodeziya, kartografiya hám mámleketlik kadastrı mámleketlik komiteti tárepinen ótkerilgen mámleketlik ekspertizanıń juwmaǵı. Geografiyalıq obektlerge atama beriw hám olardıń atamaların ózgertiw tuwralı usınıslarǵa geografiyalıq obektlerdiń ózine say ózgesheligi hám belgilengen maqseti esapqa alınǵan halda basqa hújjetlerde qosımsha etiliwi múmkin.  

III BAP. GEOGRAFIYaLÍQ OBEKTLERDIŃ ATAMALARÍN MÁMLEKETLIK DIZIMNEN ÓTKERIW, OLARDAN PAYDALANÍW HÁM OLARDÍ SAQLAW

 12-statya. Geografiyalıq obektler atamalarınıń mámleketlik reestri Geografiyalıq obektler atamalarınıń mámleketlik reestri geografiyalıq obektlerdiń atamaların mámleketlik dizimnen ótkeriw maqsetinde júrgiziletuǵın, usı obektlerdiń atamalarına baylanıslı bolǵan maǵlıwmatlardıń sistemalastırılǵan toplamınan ibarat. Geografiyalıq obektlerge atama beriw hám olardıń atamaların ózgertiwdi ámelge asırıwshı uyımlar geografiyalıq obektlerge atama berilgenligi hám olardıń atamaları ózgertilgenligi tuwralı tiyisli hújjetlerdi Geografiyalıq obektler atamalarınıń mámleketlik reestrine kirgiziw ushın on kún múddet ishinde Kadastr agentligine usınıwı shárt. (30.11.2021-j. 180/XXIII-sanlı QR Nızamı tiykarında ózgerisler kirgizilgen) Geografiyalıq obektler atamalarınıń mámleketlik reestrine kirgizilgen geografiyalıq obektler atamaları haqqındaǵı maǵlıwmat Kadastr agentligi tárepinen yuridikalıq hám fizikalıq shaxslarǵa belgilengen tártipte beriledi. (30.11.2021-j. 180/XXIII-sanlı QR Nızamı tiykarında ózgerisler kirgizilgen  13-statya. Geografiyalıq obektlerdiń atamalarınan paydalanıw Geografiyalıq obektlerdiń dizimnen ótkerilgen atamaları: óz jumısların ámelge asırıp atırǵanda mámleketlik hákimiyat hám basqarıw uyımları, puqaralardıń ózin-ózi basqarıw uyımları, kárxanalar, mákemeler hám shólkemler tárepinen; oqıw basılmalarında, kartografiyalıq, maǵlıwmatnamalıq, enciklopediyalıq basılmalarda, daǵaza, reklama, jol belgileri, pochta jóneltpelerinde paydalanıw ushın májbúriy esaplanadı. Geografiyalıq obektlerdiń dizimnen ótkerilgen atamalarınan basqa jaǵdaylarda da nızam hújjetlerine muwapıq paydalanıw múmkin. Qaraqalpaqstan Respublikası aymaǵında jaylasqan geografiyalıq obektler atamalarınıń jol belgilerindegi, mańlayshadaǵı jazıwlar hám basqada kórsetkishlerdegi jazıwları mámleketlik tillerde jazıladı. Mámleketlik hákimiyat hám basqarıw uyımları, kárxanalar, mákemeler hám shólkemler óz wákillikleri sheńberinde Kadastr agentligi menen kelisilgen halda, geografiyalıq obektler atamalarınıń rásmiy katalogları hám maǵlıwmatnamaların baspadan shıǵaradı. (30.11.2021-j. 180/XXIII-sanlı QR Nızamı tiykarında ózgerisler kirgizilgen)  14-statya. Geografiyalıq obektlerdiń atamaların saqlaw Geografiyalıq obektlerdiń atamaları mámleket tárepinen qorǵaladı. Geografiyalıq obektlerdiń atamaların birewin basqasına ózbildiginshe almastırıwǵa, geografiyalıq obektlerdiń buzılıp kórsetilgen atamalarınan paydalanıwǵa jol qoyılmaydı.  15-statya. Geografiyalıq obektlerdiń atamalarınıń paydalanılıwı hám olardıń saqlanıwı ústinen qadaǵalaw Geografiyalıq obektlerdiń atamalarınan paydalanıw hám olardıń saqlanıwı ústinen qadaǵalaw belgilengen wákillikler sheńberinde: mámleketlik hákimiyat hám basqarıw uyımları; respublikalıq komissiya; puqaralardıń ózin-ózi basqarıw uyımları, kárxanalar, mákemeler hám shólkemler tárepinen ámelge asırıladı.

 IV BAP. JUWMAQLAWShÍ REJELER

 16-statya. Geografiyalıq obektlerdiń atamaları salasındaǵı jumıslardı qarjılandırıw Geografiyalıq obektlerdiń atamaları salasındaǵı jumıslardı qarjılandırıw Qaraqalpaqstan Respublikası Mámleketlik byudjeti qarjıları hám nızam hújjetlerinde qadaǵan etilmegen basqa dárekler esabınan ámelge asırıladı. Qaraqalpaqstan Respublikası Mámleketlik byudjeti qarjıları esabınan tómendegiler qarjılandırıladı: geografiyalıq obektlerdiń atamaların belgilew, normallastırıw hám mámleketlik dizimnen ótkeriw; geografiyalıq obektler atamalarınıń rásmiy katalogları hám maǵlıwmatnamaların tayarlaw hám baspadan shıǵarıw. Elatlı punktlerdiń quram bóleklerine atama beriw hám olardıń atamaların ózgertiw tiyisli jergilikli byudjet qarjıları esabınan ámelge asırıladı. Geografiyalıq obektlerge mámleketlik hákimiyat hám basqarıw uyımlarınıń usınısı boyınsha atama beriw hám olardıń atamaların ózgertiw usı uyımnıń jumısın qarjılandırıw názerde tutılǵan Qaraqalpaqstan Respublikası Mámleketlik byudjeti qarjıları esabınan ámelge asırıladı. Geografiyalıq obektlerge xojalıq basqarıw uyımlarınıń usınısı boyınsha atama beriw hám olardıń atamaların ózgertiw Qaraqalpaqstan Respublikası Mámleketlik byudjeti qarjıları, sonday-aq, usı uyımlardıń qarjıları esabınan ámelge asırılıwı múmkin.  17-statya. Tartıslardı sheshiw Geografiyalıq obektlerdiń atamaları salasındaǵı tartıslar nızam hújjetlerinde belgilengen tártipte sheshiledi.  18-statya. Geografiyalıq obektlerdiń atamaları haqqındaǵı nızam hújjetlerin buzǵanlıǵı ushın juwapkerlik Geografiyalıq obektlerdiń atamaları haqqındaǵı nızam hújjetlerin buzǵanlıqta ayıplı shaxslar belgilengen tártipte juwapker boladı.