«VETERINARIYA HAQQÍNDA»

QARAQALPAQSTAN RESPUBLIKASÍNÍŃ NÍZAMÍ VETERINARIYa HAQQÍNDA (jańa redekciyada) 10.06.2016 j.  № 90/IX

Usı Nızamǵa tómendegilerge muwapıq ózgerisler kirgizilgen: 30.11.2021-j. 180/XXIII-sanlı QR Nızamı

 I bap. Ulıwma rejeler

 1-statya. Usı Nızamnıń maqseti Usı Nızamnıń maqseti veterinariya salasındaǵı qatnasıqlardı tártipke salıwdan ibarat. 2-statya.  Veterinariya haqqındaǵı nızamshılıq Veterinariya haqqındaǵı nızamshılıq usı Nızam hám basqa da nızam aktlerinen ibarat. Eger Ózbekistan Respublikasınıń xalıqaralıq shártnamasında Qaraqalpaqstan Respublikasınıń veterinariya haqqındaǵı nızam aktlerinde názerde tutılǵanınan basqasha qaǵıydalar belgilengen bolsa, xalıqaralıq shártnama qaǵıydaları qollanıladı.  3-statya. Tiykarǵı túsinikler Usı Nızamda tómendegi tiykarǵı túsinikler qollanıladı: biologiyalıq shıǵındılar - haywanlardıń óli deneleri, veterinariyalıq-sanitariyalıq jaqtan qáwipli dep tabılǵan, kelip shıǵıwı haywanatqa tiyisli ónim hám shiyki zat, veterinariyaǵa tiyisli biologiyalıq sanaat shıǵındıları; veterinariya - haywanlardıń ómiri hám densawlıǵı qorǵalıwın támiyinlewge, haywanlar kesellikleri payda bolıwınıń, tarqalıwınıń aldın alıwǵa hám olardı toqtatıwǵa, xalıqtı haywanlar hám adamlar ushın ortalıq bolǵan keselliklerden qorǵawǵa, Qaraqalpaqstan Respublikası aymaǵın haywanlardıń juqpalı kesellikleriniń alıp kiriliwinen qorǵawǵa, haywanlarǵa veterinariyalıq xızmet kórsetiliwin ámelge asırıwǵa, sonday-aq  Qaraqalpaqstan Respublikası aymaǵınıń veterinariyalıq tınıshlıǵın, mámleketlik veterinariya xızmeti qadaǵalawı astındaǵı tovarlardıń veterinariyalıq, veterinariyalıq-sanitariyalıq qáwipsizligin támiyinlewge baǵdarlanǵan ilimiy hám ámeliy jumıs salası; veterinariyalıq, veterinariyalıq-sanitariyalıq qaǵıydalar hám normalar - veterinariya salasındaǵı talaplardı belgilewshi, mámleketlik uyımlar hám basqa da uyımlar, yuridikalıq hám fizikalıq shaxslar tárepinen boysınılıwı ushın shárt bolǵan hújjetler; veterinariyalıq dárilik zatlar - kelip shıǵıwı tábiyiy hám sintetikalıq bolǵan dárilik zatlarınan (substanciyalarınan) yamasa dárilik zatlarınıń (substanciyalarınıń) aralaspasınan alınǵan, haywanlar kesellikleri, profilaktikası, olarǵa diagnoz qoyıw hám olardı emlew, sonday-aq haywanlar organizminiń jaǵdayı hám funkciyaların ózgerttiriw ushın baǵdarlanǵan zatlar; veterinariyalıq tınıshlıq - haywanlardıń densawlıǵına keri tásir etiwshi zatlardıń tásirleri, epizootiya bar bolmaǵan, sonday-aq haywanlardıń jasawı ushın qolaylı sharayatlar támiyinlenetuǵın jaǵday; mámleketlik veterinariya xızmeti qadaǵalawındaǵı tovarlar - haywanlar, kelip shıǵıwı haywanatqa tiyisli ónim hám shiyki zat, veterinariyalıq dárilik zatlar, mikroorganizmler shtammları, azıqlıq jem hám azıqlıq jem qosımshaları, veterinariyalıq texnika quralları, sonday-aq bazarlarda realizaciya etiletuǵın ósimlik azıq-awqat ónimleri; kelip shıǵıwı haywanatqa tiyisli ónim – gósh hám gósh ónimleri, sút hám sút ónimleri, balıq hám balıq ónimleri, máyek hám máyek ónimleri, sonday-aq pal hárreshilik ónimleri; kelip shıǵıwı haywanatqa tiyisli shiyki zat - haywanlardan alınatuǵın, qayta islewge arnalǵan ónimler; jaramsız punkt - haywanlardıń juqpalı kesellikleriniń oshaǵı anıqlanǵan aymaq; ot-jem - haywanlardı azıqlandırıw ushın paydalanılatuǵın, kelip shıǵıwı ósimlik hám haywanatqa tiyisli ónimler; ot-jem qosımshaları - haywanlar racionında jetispeytuǵın azıqlıq hám mineral zatlarınıń tiykarı sıpatında paydalınatuǵın, kelip shıǵıwı organikalıq, mineral hám sintetikalıq zatlar; sheklewshi ilajlar (karantin) - haywanlardıń juqpalı kesellikleri oshaqlarınıń sheńberi keńeyip ketiwine jol qoymawǵa hám olardı toqtatıwǵa, olardıń taralıwınıń aldın alıwǵa qaratılǵan, xojalıq jumısları hám basqa jumıstıń ayrıqsha tártibin, xalıq, transport quralları, júkler hám (yamasa) tovarlar háreketi shekleniwin názerde tutıwshı hákimshilik, epizootiyalarǵa qarsı is-ilajlar hám basqa da is-ilajlar; epizootiya - tiyisli aymaqta haywanlardıń oǵada qáwipli hám basqa juqpalı kesellikleriniń tarqalıwı; epizootiyaǵa qarsı ilajlar – epizootiyanıń aldın alıwǵa, olardı anıqlawǵa yamasa toqtatıwǵa baylanıslı shólkemlestiriw hám arnawlı veterinariyalıq ilajlar sisteması; haywanlardıń juqpalı kesellikleri - payda bolıwına haywanlarǵa keselliklerdiń qozǵatıwshıları tásiri sebep bolatuǵın, tarqalıwı hám de basqa haywanlarǵa, adamǵa juǵıw itimalı bar bolǵan kesellikler.

 II bap. Veterinariya hám veterinariyalıq tınıshlıqtı támiyinlew salasın mámleket tárepinen tártipke salıw

 4-statya. Veterinariya salasındaǵı mámleketlik siyasattıń tiykarǵı baǵdarları Veterinariya salasındaǵı mámleketlik siyasattıń tiykarǵı baǵdarları tómendegilerden ibarat: veterinariya salasındaǵı ilajlardı islep shıǵıw hám ámelge asırıw; mámleket tárepinen veterinariya salasındaǵı normalardı belgilew; mámleketlik veterinariyalıq qadaǵalawdı ámelge asırıw; veterinariya salasındaǵı xalıqaralıq birge islesiwdi rawajlandırıw.  5-staya. Qaraqalpaqstan Respublikası Ministrler Keńesiniń veterinariya salasındaǵı wákillikleri Qaraqalpaqstan Respublikası Ministrler Keńesi: veterinariya salasında birden-bir mámleketlik siyasattıń ámelge asırılıwın támiyinleydi; veterinariya salasındaǵı mámleketlik baǵdarlamalardı ámelge asırıwda qatnasadı; veterinariya salasındaǵı aymaqlıq baǵdarlamalardı tastıyıqlaydı hám olardıń orınlanıwı boyınsha qadaǵalawdı ámelge asıradı; mámleketlik hám xojalıq basqarıwı uyımlarınıń veterinariya calasındaǵı jumısın muwapıqlastırıp baradı. Qaraqalpaqstan Respublikası Ministrler Keńesi nızamshılıqqa muwapıq basqa da wákilliklerdi ámelge asırıwı múmkin.  6-statya. Jergilikli mámleketlik hákimiyat uyımlarınıń veterinariya salasındaǵı wákillikleri Jergilikli mámleketlik hákimiyat uyımları: veterinariya salasındaǵı mámleketlik baǵdarlamalardı hámde aymaqlıq baǵdarlamalardı ámelge asırıwda qatnasadı; tiyisli aymaqta veterinariyalıq tınıshlıqtı támiyinlewge qaratılǵan is-ilajlardı kóredi; epizootiyaǵa qarsı ilajlardı ótkeriwde tiyisli aymaqlıq mámleketlik hám xojalıq basqarıwı uyımlarınıń jumısların muwapıqlastırıp baradı. Jergilikli mámleketlik hákimiyat uyımları nızamshılıqqa muwapıq basqa da wákilliklerdi ámelge asırıwı múmkin.  7-statya. Qaraqalpaqstan Respublikası veterinariya komitetiniń wákillikleri Qaraqalpaqstan Respublikası veterinariya komiteti (bunnan bılay tekste Veterinariya komiteti dep qollanıladı): veterinariya salasındaǵı aymaqlıq baǵdarlamaların islep shıǵadı hámde olardıń ámelge asırılıwında qatnasadı; veterinariya salasında normativ-huqıqıy aktlerdi islep shıǵıwda qatnasadı; veterinariya, veterinariya-sanitariyalıq qaǵıydalar hám normaların islep shıǵıwda qatnasadı; mámleketliklik veterinariyalıq qadaǵalawdı ámelge asıradı; veterinariya salasındaǵı jumıslardı tikkeley ámelge asırıwshı hám de ilajlar menen baǵdarlamalardı júzege shıǵarıwda qatnasıwshı uyımlar hám mákemelerdiń, sonday-aq mámleketlik hám xojalıq basqarıwı uyımları hámde jergilikli  mámleketlik hákimiyat uyımlarınıń usı saladaǵı óz-ara birge islesiwin muwapıqlastırıp baradı; tiyisli mámleketlik hám xojalıq basqarıwı uyımları menen birgelikte epizootiyaǵa qarsı ilajlar ótkeriliwin támiyinleydi; veterinariyalıq tınıshlıqtı saqlaw, haywanlardıń juqpalı keselliklerin erte anıqlaw, olarǵa diagnoz qoyıw hám olardıń tarqalıwınıń aldın alıwǵa baylanıslı profilaktikalıq jumıslardıń nátiyjeligi boyınsha monitoringti ámelge asıradı; respublika aymaǵın haywanlardıń juqpalı keselliklerin alıp kiriliwinen qorǵawdı, haywanlardıń den sawlıǵı profilaktikası hám emlewdiń zamanagóy usılları keń qollanılıwın támiyinleydi; veterinariya jumısın ámelge asırıwda licenziya alıw ushın usınılǵan hújjetlerge juwmaq beredi, Ózbekstan Respublikası Veterinariya hám sharwashılıqtı rawajlandırıw mámleketlik komitetine licenziya beriwge usınadı; (30.11.2021-j. 180/XXIII-sanlı QR Nızamı tiykarında ózgerisler kirgizilgen) vedomstvolıq hám óndirislik veterinariya xızmetiniń haywanlardı keselliklerden qorǵaw, haywanatqa tiyisli ónim hám shiyki zat qáwipsizligin  támiyinlewge baylanıslı jumıstı muwapıqlastıradı. Veterinariya hám sharwashılıqtı rawajlandırıw mámleketlik komitetinızamshılıqqa muwapıq basqa da wákilliklerdi ámelge asırıwı múmkin. (30.11.2021-j. 180/XXIII-sanlı QR Nızamı tiykarında ózgerisler kirgizilgen)  8-statya. Veterinariya ilajların ótkeriwde puqaralardıń ózin-ózi basqarıw uyımlarınıń, mámleketlik emes kommerciyalıq emes shólkemlerdiń hám puqaralardıń qatnasıwı Puqaralardıń ózin-ózi basqarıw uyımları: veterinariya salasındaǵı mámleketlik baǵdarlamalardı, aymaqlıq baǵdarlamalardı hám basqa da baǵdarlamalardı ámelge asırıwda qatnasadı; tiyisli aymaqta veterinariya salasında jámiyetshilik qadaǵalawdı ámelge asıradı; tiyisli aymaq xalqına epizootiya hám jaramsız punkt haqqında xabar beredi. Puqaralardıń ózin-ózi basqarıw uyımları nızamshılıqqa muwapıq basqa da ilajlarda qatnasıwı múmkin. Mámleketlik emes kommerciyalıq emes shólkemler hám puqaralar veterinariyalıq tınıshlıqtı támiyinlewde qatnasıwshı mámleketlik uyımlarǵa hám basqa da uyımlarǵa kómeklesiwi hámde zárúr járdem kórsetiwi múmkin.

III bap. Veterinariya sisteması hám onı basqarıw

 9-statya. Veterinariya xızmeti sisteması Veterinariya xızmeti sisteması mámleketlik, vedomstvolıq hám óndirislik veterinariya xızmetlerinen ibarat. 10-statya. Mámleketlik veterinariya xızmetin basqarıw Mámleketlik veterinariya xızmeti Veterinariya hám sharwashılıqtı rawajlandırıw  komiteti, rayonlardıń (qalalardıń) veterinariya hám sharwashılıqtı rawajlandırıw  bólimleri, Respublikalıq xaywanlar kesellikleri hám azıq-awqat ónimleri qáwipsizligi boyınsha diagnostikalıq orayı, sonday-aq, veterinariya uchastkaları, bazarlardaǵı veterinariyalıq-sanitariyalıq ekspertiza laboratoriyalarınan, shegara hám transport veterinariya puktlerinen (uchastkalarınan) hám basqa da mákemelerden ibarat. Qaraqalpaqstan Respublikası Veterinariya hám sharwashılıqtı rawajlandırıw komitetiniń baslıǵı Ózbekstan Respubliksı Mámleketlik Veterinariya hám sharawashılıqtı rawajlandırıw mámleketlik komiteti baslıǵı menen kelisilgen halda Qaraqalpaqstan Respublikası Joqarǵı Keńesi Prezidiumı tárepinen lawazımǵa tayınlanadı hám lawazımnan bosatıladı. Rayonlardıń (qalalardıń) veterinariya hám sharwashılıqtı rawajlandırıw bólimleri baslıqları rayon (qala) hákimleriniń usınısına muwapıq Qaraqalpaqstan Respublikası Veterinariya hám sharwashılıqtı rawajlandırıw komitetiniń baslıǵı tárepinen lawazımǵa tayınlanadı hám bosatıladı. Mámleketlik shegara hám transport veterinariya punktleriniń (uchastkalarınıń) basshıları Ózbekstan Respubliksı Veterinariya hám sharwashılıqtı rawajlandırıw mámleketlik komitetiniń baslıǵı tárepinen lawazımǵa tayınlanadı hám bosatıladı. Mámleketlik veterinariya xızmetiniń basqa mákemeleri basshıların lawazımıǵa tayınlaw hám bosatıw tártibi nızamshılıq aktlerinde belgilenedi. Qaraqalpaqstan Respublikası Veterinariya hám sharwashılıqtı rawajlandırıw komiteti Ózbekstan Respubliksı Veterinariya hám sharwashılıqtı rawajlandırıw mámleketlik komitetine hám Qaraqalpaqstan Respublikası Ministrler Keńesine esabat beredi. (30.11.2021-j. 180/XXIII-sanlı QR Nızamı tiykarında ózgerisler kirgizilgen)  11-statya. Mámleketlik veterinariya xızmetiniń wazıypaları Mámleketlik veterinariya xızmeti: a) epizootiyalıq monitoringti ámelge asıradı; b) haywan kesellikleriniń payda bolıwı hám olardıń nabıt bolıwı sebeplerine tallaw isleydi, usı keselliklerdiń profilaktikası hám de olardı emlew boyınsha usınıslar islep shıǵadı; v) tómendegi baǵdarlar boyınsha mámleketlik veterinariya qadaǵalawın ámelge asıradı: Qaraqalpaqstan Respublikası aymaǵın haywanlardıń juqpalı keselliklerin qozǵatıwshılardıń alıp kiriliwinen qorǵaw, sonday-aq haywanlar, kelip shıǵıwı haywanatqa tiyisli ónim hám shiyki zatlar, veterinariyalıq dárilik zatlar, ot-jem hám azıqlıq qocımshalardı tayarlaw, alıp ótiw (tasıw), eksport hám import qılıw; haywanatqa tiyisli ónim hám shiyki zattı veterinariya, veterinariyalıq-sanitariyalıq qaǵıydaları hám normalarına muwapıq islep shıǵarıw; g) haywanlardıń juqpalı kesellikleriniń aldın alıw hám olardı toqtatıwǵa baylanıslı is-ilajlardı ámelge asıradı; d) densawlıqtı saqlaw uyımları hám basqa uyımlar menen birgelikte haywanlar hám adam ushın qáwipli bolǵan juqpalı keselliklerdiń oshaqların saplastıradı, sonday-aq óz-ara maǵlıwmat almasıwdı ámelge asıradı; e) barlıq sharwashılıq obektleriniń, sallaqxanalardıń, kelip shıǵıwı haywanatqa tiyisli ónim hám shiyki zattı qayta islewshi kárxanalardıń, kelip shıǵıwı haywanatqa tiyisli ónim hám shiyki zattı realizaciya etetuǵın hám saqlaytuǵın sawda shaqapshalarınıń, shiyki zat saqlawshı orınlardıń veterinariyalıq-sanitariyalıq jaǵdayın qadaǵalaydı, bul obektlerdi qurıw hám rekonstrukciyalawdıń, sonday-aq jer qazıw jumıslarınıń veterinariyalıq ekspertizasın ámelge asıradı; j) haywanlardıń keselliklerine diagnoz qoyıw, ot-jemlerdiń, sonday-aq sharwashılıq obektlerinde ishimlik suwınıń sapasın bahalaw maqsetinde laboratoriya tekseriwlerin hám de basqa da tekseriwlerdi ótkeredi; z) yuridikalıq hám fizikalıq shaxslardan haywanlardıń juqpalı kesellikleri tarqalıwınıń aldın-alıw hám de olardıń saplastırıwın támiyinlewshi is-ilajlar ótkeriliwin, sonday-aq epizootiyalıq jaǵdaydı anıqlaw ushın zárúr bolǵan maǵlıwmatlar beriliwin talap etedi; i) haywanlardıń hám adamnıń densawlıǵı ushın qáwip tuwdıratuǵın haywanlardıń juqpalı keselligi anıqlanǵan jaǵdayda, haywanlardı soyıwǵa yamasa joq etip taslawǵa, kelip shıǵıwı haywanatqa tiyisli ónim hám shiyki zatlardı zıyansızlandırıwǵa (juǵımsızlandırıwǵa), qayta islewge yamasa utilizaciya etiwge baylanıslı, yuridikalıq hám fizikalıq shaxslar tárepinen orınlanıwı májbúriy bolǵan talaplardı belgileydi; k) mámleketlik hám vedomstvolıq veterinariya xızmetleri veterinariya qánigeleriniń jumısların qadaǵalaydı hám de muwapıqlastırıp baradı, sonday-aq belgilengen talaplar hám shártlerde jeke veterinariya jumısın ámelge asırıwshı isbilermenlik subektleri, fizikalıq shaxslar tárepinen ámel etiwi ústinen qadaǵalawdı belgilengen tártipte ámelge asıradı; (30.11.2021-j. 180/XXIII-sanlı QR Nızamı tiykarında ózgerisler kirgizilgen) l) veterinariya tarawındaǵı ilimiy izertlewlerdi rawajlandırıwǵa kómeklesedi.  12-statya. Mámleketlik veterinariya inspektorları Qaraqalpaqstan Respublikası Veterinariya hám sharwashılıqtı rawajlandırıw komitetiniń baslıǵı Qaraqalpaqstan Respublikasınıń bas mámleketlik veterinariya inspektorı bolıp, onıń orınbasarı Qaraqalpaqstan Respublikası bas mámleketlik veterinariya inspektorınıń orınbasarı bolıp esaplanadı. (30.11.2021-j. 180/XXIII-sanlı QR Nızamı tiykarında ózgerisler kirgizilgen) Rayonlarlardıń (qalalardıń) veterinariya hám sharwashılıqtı rawajlandırıw bólimleriniń baslıqları tiyisli rayonlarlardıń (qalalardıń) bas mámleketlik veterinariya inspektorları bolıp esaplanadı. (30.11.2021-j. 180/XXIII-sanlı QR Nızamı tiykarında ózgerisler kirgizilgen) Veterinariya uchastkalarınıń hám bazarlardaǵı veterinariyalıq-sanitariyalıq ekspertiza laboratoriyalarınıń mengeriwshileri tiyisli uchastkalardaǵı hám bazarlardaǵı mámleketlik veterinariya inspektorları bolıp esaplanadı. Shegara hám transporttaǵı veterinariya punktleriniń (uchastkalarınıń) baslıqları hámde veterinar vrachları tiyisli shegara hám transporttaǵı veterinariya punktleriniń (uchastkalarınıń) mámleketlik veterinariya inspektorları bolıp esaplanadı.  13-statya. Mámleketlik veterinariya inspektorlarınıń wákillikleri Bas mámleketlik veterinariya inspektorları, olardıń orınbasarları hám mámleketlik veterinariya inspektorları óz wákillikleri sheńberinde: mámleketlik hám xojalıq basqarıwı uyımlarına, yuridikalıq hám fizikalıq shaxslarǵa zárúr veterinariya, veterinariyalıq-sanitariyalıq ilajları hám epizootiyaǵa qarsı ilajlar ótkeriw haqqında orınlanıwı májbúriy bolǵan kórsetpeler beredi; haywanlardıń hám adamnıń densawlıǵı ushın oǵada qáwipli juqpalı kesellikler menen awırǵan haywanlar anıqlanǵan jaǵdaylarda, usı haywanlardı soyıw yamasa joq etip taslaw haqqında, sonday-aq jewge jaramsız dep tabılǵan, kelip shıǵıwı haywanatqa tiyisli ónim hám shiyki zattı joq etip taslaw, qayta islew yamasa usı ónim hám shiyki zattan basqa tárizde paydalanıw haqqında yuridikalıq hám fizikalıq shaxslar tárepinen orınlanıwı májbúriy bolǵan kórsetpeler beredi; mámleketlik veterinariya xızmeti qadaǵalawındaǵı obektlerge tosqınlıqsız kiredi hám anıqlanǵan veterinariya haqqındaǵı nızamshılıq hújjetleriniń buzılıwların saplastırıw tuwralı orınlanıwı májbúriy bolǵan kórsetpeler beredi; temir jol vagonlarınıń, kemelerdiń, samolyotlardıń hám basqa transport qurallarınıń jaǵdayı veterinariya, veterinariyalıq-sanitariyalıq qaǵıydaları hám normalarına muwapıq emesligi anıqlanǵan jaǵdayda olardan paydalanıwdı qadaǵan etedi; veterinariyalıq, veterinariyalıq-sanitariyalıq qaǵıydaları hám normalarınıń buzılıwı anıqlanǵan jaǵdayda sharwashılıq obektlerinen, gósh hám sút sanaatı kárxanalarınan, kelip shıǵıwı haywanatqa tiyisli ónim hám shiyki zattı qayta islewshi hám de saqlawshı kárxanalardan paydalanıwdı qadaǵan etedi; veterinariyalıq, veterinariyalıq-sanitariyalıq qaǵıydaları hám normalarınıń buzılıwı anıqlanǵan jaǵdayda sharwashılıq fermalarında, kelip shıǵıwı haywanatqa tiyisli ónim hám shiyki zattı qayta islewshi hámde saqlawshı kárxanalarda jańadan qurılǵan, tiklengen hám rekonstrukciya islengen obektlerdi iske túsiriwdi toqtatıp turadı; haywanlardıń iyeleri tárepinen, sonday-aq kelip shıǵıwı haywanatqa tiyisli ónim hám shiyki zattı qayta islew, saqlaw hám de olardıń sawdası menen shuǵıllanıwshı shólkemler tárepinen veterinariya haqqındaǵı nızamshılıqtıń orınlanıwı ústinen qadaǵalawdı ámelge asıradı; shegaralas rayonlarda, qońsı mámleketlerde júzege kelgen epizootiyalıq jaǵday tuwralı tiyisli uyımlar hám shólkemlerge xabar beredi, tiyisli veterinariya ilajların ámelge asıradı hám de zárúr usınıslar beredi; veterinariyalıq dárilik zatlar, ot-jem qosımshaları islep shıǵarılıwın hámde olardan sharwashılıqta hám veterinariyada paydalanıwdı qadaǵalaydı, olardıń haywanlar densawlıǵına hám kelip shıǵıwı haywanatqa tiyisli ónim jáne shiyki zat sapasına tásirin bahalaydı; haywanlardıń juqpalı kesellikleri oshaqları anıqlanǵan jaǵdayda tiyisli aymaqlardı jaramsız punktler dep járiyalaw hám olardı sheklewshi ilajlar (karantin) belgilew tuwralı, sonday-aq haywanlardıń juqpalı kesellikleri oshaqları saplastırılǵannan keyin sheklewshi ilajlardı (karantindi) biykarlaw haqqında jergilikli mámleketlik hákimiyat uyımlarına usınıslar kiritedi; veterinariya haqqındaǵı nızamshılıq talapların buzǵanlıǵı ushın lawazımlı shaxslarǵa hám basqa da shaxslarǵa belgilengen tártipte hákimshilik jaza sharaların kóredi. Usı statyanıń birinshi bóliminde názerde tutılǵan tiykarlarǵa muwapıq isbilermenlik subektleriniń jumısın on jumıs kúninen kóp bolǵan múddetke sheklew, toqtatıp turıw hám qadaǵan etiw sud tártibinde ámelge asırıladı. Bas mámleketlik inspektorlar, olardıń orınbasarları hám mámleketlik veterinariya inspektorları nızam hújjetlerine muwapıq basqa wákilliklerdi de ámelge asırıwı múmkin.  14-statya. Vedomstvolıq veterinariya xızmeti Vedomstvolıq veterinariya xızmeti veterinariya qadaǵalawı hám veterinariya xızmeti talap etiletuǵın ministrlikler, mámleketlik komitetler hám de vedomstvolarǵa qaraslı xızmet bolıp esaplanadı. Vedomstvolıq veterinariya xızmeti óz jumısın nızamshılıqqa muwapıq ámelge asıradı. Vedomstvolıq veterinariya xızmetin metodikalıq jaqtan támiyinlew Veterinariya hám sharwashılıqtı rawajlandırıw mámleketlik komiteti tárepinen ámelge asırıladı. (30.11.2021-j. 180/XXIII-sanlı QR Nızamı tiykarında ózgerisler kirgizilgen)  15-statya. Vedomstvolıq veterinariya xızmeti veterinariya qánigeleriniń huqıqları hám minnetleri Vedomstvolıq veterinariya xızmetiniń veterinariya qánigeleri: vedomstvolıq veterinariyalıq qadaǵalaw obektlerine tosqınlıqsız kiriw hám veterinariya haqqındaǵı nızamshılıqtıń anıqlanǵan buzılılıwların saplastırıw haqqında orınlanıwı májbúriy bolǵan kórsetpeler beriw; vedomstvoǵa qaraslı kárxanalar hám shólkemlerden veterinariya haqqındaǵı nızam hújjetlerinde názerde tutılǵan, juqpalı kesellikler tarqalıwınıń aldın alıw hám olardı saplastırıwdı támiyinleytuǵın is-ilajlar ótkeriliwin, sonday-aq epizootiyalıq jaǵdaydı anıqlaw ushın zárúr bolǵan maǵlıwmatlardıń beriliwin talap etiw; veterinariya haqqındaǵı nızamshılıqtı buzǵanlıqta ayıplı lawazımlı shaxslardı hám de basqa xızmetkerlerdi belgilengen tártipte juwapkershilikke tartıw haqqında vedomstvoǵa qaraslı kárxanalar hám shólkemlerdiń hákimshiligine qarap shıǵıw ushın usınıs kirgiziw huqıqına iye. Vedomstvolıq veterinariya xızmetiniń veterinariya qánigeleri: xızmet kórsetilip atırǵan kárxanalarda, mákemelerde hám shólkemlerde epizootiyaǵa qarsı ilajlardı, emlew, veterinariyalıq-sanitariyalıq ilajların ótkeriwi; vedomstvolıq veterinariyalıq qadaǵalawdı hám de kelip shıǵıwı haywanatqa hám ósimlikke tiyisli ónimniń, shiyki zattıń veterinariyalıq-sanitariyalıq ekspertizası ótkeriliwin ámelge asırıwı; haywanlardıń oǵada qáwipli juqpalı kesellikler menen awırǵanlıǵı haqqında gúman bolǵan jaǵdayda bul haqqında mámleketlik veterinariya xızmetine tezlik penen xabar beriwi hám keselliktiń sheńberi keńeyip ketpewi ushın barlıq zárúrli is-ilajlardı kóriwi; veterinariyaǵa tiyisli statistikalıq esabatlardı júritiw ushın mámleketlik veterinariya xızmetine belgilengen tártipte málimleme beriwi shárt. Vedomstvolıq veterinariya xızmetiniń veterinariya qánigeleri nızam hújjetlerine muwapıq basqa da huqıqlarǵa iye bolıwı hám olardıń juwapkershiliginde basqa minnetler de bolıwı múmkin. 16-statya. Óndiristegi veterinariya xızmetleri Jumısı sharwashılıqtı shólkemlestiriw hám júritiw, haywanlardı saqlaw, kelip shıǵıwı haywanatqa tiyisli ónim hám shiyki zattı, ot-jemdi, azıqlıq ot-jem qosımshaları hám de haywanlardı emlew ushın arnalǵan veterinariyalıq dárilik zatlardı islep shıǵarıw, qayta islew, saqlaw, tasıw hám realizaciyalaw menen baylanıslı bolǵan kárxanalar, mákemeler, shólkemler tárepinen óz qarjıları esabınan óndirislik veterinariya xızmetleri shólkemlestiriliwi múmkin. Óndiristegi veterinariya xızmetleriniń veterinariya qánigeleri: kárxananıń, mákemeniń, shólkemniń basshısınan veterinariya haqqındaǵı nızamshılıqta názerde tutılǵan, juqpalı kesellikler tarqalıwınıń aldın alıw hám olardı saplastırıwdı támiyinleytuǵın is-ilajlar ótkeriliwin, sonday-aq epizootiyalıq jaǵdaydı anıqlaw ushın zárúr bolǵan maǵlıwmatlardıń beriliwin talap etiwi; xızmet kórsetilip atırǵan kárxanalarda, mákemelerde hám shólkemlerde epizootiyaǵa qarsı ilajlardı, emlew, veterinariyalıq-sanitariyalıq ilajların ótkeriwi; haywanlardıń kútá qáwipli juqpalı kesellikler menen awırǵanlıǵı haqqında gúman payda bolǵan jaǵdayda bul tuwralı mámleketlik veterinariya xızmetine tezlik penen xabar beriwi hám keselliktiń sheńberi keńeyip ketpewi ushın barlıq zárúr is-ilajlardı kóriwi; epizootiya payda bolǵan jaǵdayda mámleketlik veterinariya xızmetiniń kórsetpeleri tiykarında veterinariyalıq ilajlardı ótkeriwi shárt. Óndiristegi veterinariya xızmetleriniń veterinariya qánigeleri juwapkershiliginde nızam hújjetlerine muwapıq basqa da minnetler bolıwı múmkin.  17-statya. Jeke veterinariya jumısı Yuridikalıq hám fizikalıq shaxslar nızam hújjetlerine muwapıq jeke veterinariya jumısın ámelge asırıwı múmkin. Jeke veterinariya jumısın ámelge asırıw ushın (veterinariyalıq emlew-profilaktikalıq jumısı bunnan tısqarı) yuridikalıq hám fizikalıq shaxslar – isbilermenlik subektleri Ózbekstan Respubliksı Veterinariya hám sharwashılıqtı rawajlandırıw mámleketlik komiteti tárepinen beriletuǵın licenziyaǵa iye bolıwı shárt. (30.11.2021-j. 180/XXIII-sanlı          QR Nızamı tiykarında ózgerisler kirgizilgen) Jeke veterinariya xızmetin ámelge asırıwshı isbilermenlik subektleri: haywanlardıń keselligin anıqlap diagnoz qoyıw hám olardı emlew menen shuǵıllanıw, buǵan haywanlardıń sheklewshi ilajlar (karantin) yaki nızam hújjetlerinde belgilengen basqa sheklewler qollanılatuǵın kesellikler menen awırıwı jaǵdayları kirmeydi; haywanlardı keselleniwden saqlaw maqsetinde shanshıw ilajların ótkeriw, sonday-aq haywanlardıń iyelerine másláhát beriw; veterinariyalıq dári hám texnikalıq quralların, azıqlıq ot-jem qosımshaların islep shıǵarıw, tayarlaw hám realizaciyalaw menen shuǵıllanıw huqıqına iye. Jeke veterinariya jumısın ámelge asırıwshı isbilermenlik subektleri: haywanlarda juqpalı keselliktiń bar ekenligi haqqında gúman payda bolǵanda bul haqqında mámleketlik veterinariya xızmetine tezlik penen xabar beriwi hám kesellik sheńberiniń keńeyip ketpewi boyınsha barlıq zárúr is-ilajlardı kóriwi; epizootiya payda bolǵan jaǵdayda mámleketlik veterinariya xızmetiniń kórsetpeleri tiykarında veterinariya ilajların ótkeriwi shárt. Jeke veterinariya xızmetin ámelge asırıwshı isbilermenlik subektleri nızam hújjetlerine muwapıq basqa da huqıqlarǵa iye bolıwı hám olardıń juwapkershiliginde basqa minnetler de bolıwı múmkin.

 IV bap. Haywanlar, kelip shıǵıwı haywanatqa tiyisli ónim hám shiyki zat iyeleriniń huqıqları hám minnetleri

 18-statya. Haywanlar, kelip shıǵıwı haywanatqa tiyisli ónim hám shiyki zat iyeleriniń huqıqları Haywanlardıń, kelip shıǵıwı haywanatqa tiyisli bolǵan ónim hám shiyki zattıń iyeleri: veterinariyalıq xızmet kórsetiw haqqındaǵı tiyisli veterinariya xızmetleri, sonday-aq jeke veterinariya jumısın ámelge asırıwshı isbilermenlik subektleri menen shártnamalar dúziw; haywanlardıń keselleniw jaǵdayı, epizootiyalıq jaǵday tuwralı, sonday-aq haywanlarda, kelip shıǵıwı haywanatqa tiyisli ónim hám shiyki zatta ótkerilgen arnawlı tekseriwler nátiyjeleri tuwralı veterinariya xızmetinen maǵlıwmat alıw; haywanlardı, kelip shıǵıwı haywanatqa tiyisli ónim hám shiyki zattı, ot-jem, azıqlıq qosımshalar, veterinariyalıq dárilik zatlar hám texnika quralların veterinariyalıq, veterinariyalıq-sanitariyalıq qaǵıydalar hám normalarına muwapıq alıw hám de realizaciyalaw, sonıń ishinde sırt elden alıw hám realizaciyalaw; mámleketlik uyımlar hám basqa da uyımlardıń nızamǵa qayshı qararları, usı uyımlardıń lawazımlı shaxslarınıń nızamǵa qayshı háreketleri (háreketsizligi) ústinen boysınıw tártibinde joqarı turıwshı uyımǵa yaki lawazımlı shaxsqa yamasa tikkeley sudqa shaǵım etiw huqıqına iye. Haywanlardıń, kelip shıǵıwı haywanatqa tiyisli ónim hám shiyki zattıń iyeleri nızam hújjetlerine muwapıq basqa da huqıqlarǵa iye bolıwı múmkin.  19-statya. Haywanlar, kelip shıǵıwı haywanatqa tiyisli ónim hám shiyki zat iyeleriniń minnetleri Haywanlardıń, kelip shıǵıwı haywanatqa tiyisli ónim hám shiyki zattıń iyeleri: veterinariya haqqındaǵı nızam hújjetleri talaplarına boysınıwı; mámleketlik veterinariya xızmetiniń kórsetpelerin orınlawı; ózlerine tiyisli haywanlardıń kesellikleriniń aldın-alıwǵa qaratılǵan shólkemlestiriwshilik-xojalıq hám veterinariyalıq ilajların óz qarjıları esabınan ámelge asırıwı, Qaraqalpaqstan Respublikası byudjetinen qarjılandırılatuǵın ilajlar bunnan tısqarı; kesel haywandı emletiwi, zárúr bolǵan jaǵdaylarda, tiyisli veterinariya inspektorınıń kórsetpesine muwapıq onıń soyılıwın yaki joq etip taslanıwın belgilengen tártipte támiyinlewi; haywanlardıń tosattan nabıt bolǵanlıǵı yamasa ózgeshe háreketleri faktleri tuwralı sol aymaqqa xızmet kórsetiwshi mámleketlik veterinariya xızmetine tezlik penen xabar beriwi; haywanlardı juqpalı keselliklerden qorǵaw boyınsha tiyisli karantin ilajları hám basqa veterinariya ilajları ótkeriliwin, sonday-aq tolıq kólemde emlew-profilaktikalıq ilajları júrgiziliwin támiyinlewi; sharwashılıq imaratların hámde haywanlardı, kelip shıǵıwı haywanatqa tiyisli ónim hám shiyki zattı saqlaw ushın arnalǵan basqa da imaratlardı veterinariya, veterinariyalıq-sanitariyalıq qaǵıydaları normalarına muwapıq saqlawı; sharwashılıq imaratlarında hám basqa da obektlerde dezinfekciya, dezinsekciya, deratizaciyanı óz waqtında ótkeriwi; haywanlardı, kelip shıǵıwı haywanatqa tiyisli ónim hám shiyki zattı veterinariya, veterinariyalıq-sanitariyalıq qaǵıydaları normalarına boysınǵan halda realizaciya etiwdi ámelge asırıwı; tiyisli wákillikli uyım tárepinen tárepinen dizimge alınbaǵan veterinariya dárilik zatların hám azıqlıq ot-jem qosımshaların sharwashılıqta qollanbawı; haywanlardı soyıwǵa baylanıslı veterinariya, veterinariyalıq-sanitariyalıq qaǵıydaları hám normalarına boysınıwı shárt. Haywanlar, kelip shıǵıwı haywanatqa tiyisli ónim hám shiyki zat iyeleriniń juwapkershiliginde nızam hújjetlerine muwapıq basqa da minnetler bolıwı múmkin.

 V bap. Veterinariyalıq tınıshlıqtı hám mámleketlik veterinariyalıq qadaǵalawdı támiyinlew

 20-statya. Profilaktikalıq, diagnoz qoyıw hám emlew ilajları Profilaktikalıq ilajlar haywanlardıń juqpalı kesellikleriniń payda bolıwı hám tarqalıwınıń aldın alıwǵa qaratılǵan. Diagnoz qoyıw ilajları haywanlardıń keselliklerin qozǵatıwshılardıń dereklerin, olardıń haywanlarǵa hám adamǵa ótiw faktorların anıqlaw, sonday-aq profilaktika hám de emlew ilajları nátiyjeliligin bahalaw maqsetinde ótkeriledi. Emlew ilajları haywanlardıń ómiri hám densawlıǵın saqlap qalıwǵa, emlew-profilaktikalıq tásirine iye bolǵan veterinariyalıq dárilik zatlar hám de azıqlıq ot-jem qosımshalar qollanılıwı názerde tutılǵan emlewlerden paydalanǵan halda haywanlardıń ónimdarlıǵın saqlaw hám asırıwǵa qaratılǵan.  21-statya. Laboratoriyalıq tekseriwler Laboratoriyalıq tekseriwler: veterinariya hám veterinariyalıq-sanitariyalıq ekspertizanıń juwmaqların tayarlaw maqsetinde; mámleketlik veterinariyalıq qadaǵalawdı ámelge asırıwda; haywannıń densawlıǵınıń jaǵdayın anıqlaw, mámleketlik veterinariya xızmeti qadaǵalawı astındaǵı tovarlar hám biologiyalıq shıǵındılardıń veterinariya, veterinariyalıq-sanitariyalıq qaǵıydalar hám de normalarında belgilengen talaplarına muwapıqlılıǵın bahalaw maqsetinde; ilimiy-izertlew maqsetlerinde ótkeriledi. Veterinariya tarawındaǵı laboratoriyalıq tekseriwler belgilengen tártipte mámleketlik veterinariyalıq laboratoriyalar hám basqa da veterinariyalıq laboratoriyaları tárepinen ótkeriledi. Veterinariyalıq laboratoriyalıq-diagnoz qoyıw jumısları yuridikalıq hám fizikalıq shaxslar tárepinen licenziya tiykarında ámelge asırıladı.  22-statya. Mámleketlik veterinariyalıq xızmet qadaǵalawı astındaǵı tovarlardı islep shıǵarıw hám olardıń qollanılıwı dáwirindegi veterinariya talapları Mámleketlik veterinariyalıq xızmet qadaǵalawı astındaǵı tovarlardı islep shıǵarıw veterinariya, veterinariyalıq-sanitariyalıq qaǵıydaları hám normalarına muwapıq óndirislik obektlerde ámelge asırılıwı kerek. Bazarlarda, sawda orınlarında hám basqa da sawda obektlerinde kelip shıǵıwı haywanatqa tiyisli ónim hám shiyki zattı, sonday-aq bazarlarda realizaciya etiletuǵın ósimlik azıq-awqat ónimlerin qabıllaw, saqlaw hám de realizaciya etiw ótkerilgen veterinariyalıq-sanitariyalıq ekspertiza juwmaǵı tiykarında támiyinlenedi. Qaraqalpaqstan Respublikası aymaǵında qollanılatuǵın veterinariyalıq dárilik zatlar hám azıqlıq ot-jem qosımshaları veterinariya, veterinariyalıq-sanitariyalıq qaǵıydalar hám de normalarına muwapıq bolıwı kerek. Veterinariyalıq dárilik zatlar hám azıqlıq ot-jem qosımshaların mámleketlik dizimnen ótkeriw nızam hújjetlerinde belgilengen tártipte, olardıń veterinariyalıq ekspertizası hám sınawı nátiyjelerine muwapıq ámelge asırıladı. Veterinariyalıq dárilik zatlar hám azıqlıq ot-jem qosımshaların islep shıǵarıw, realizaciya etiw, olardan paydalanıw hám de olardı Qaraqalpaqstan Respublikasına alıp kiriw tek ǵana tiyisli wákillikli uyım tárepinen mámleketlik dizimnen ótkerilgennen keyin ámelge asırıladı.  23-statya. Biologiyalıq shıǵındılardıń aylanısı hám joq etip taslanıwındaǵı veterinariyalıq talaplar Biologiyalıq shıǵındılardan tek olardıń veterinariyalıq qáwipsizligin tastıyıqlawshı veterinariyalıq-sanitariyalıq ekspertizası nátiyjelerine muwapıq paydalanıwǵa jol qoyıladı yamasa joq etip taslanadı, sharwashılıq shıǵındıları buǵan kirmeydi. 24-statya. Qaraqalpaqstan Respublikası aymaǵın haywanlardıń juqpalı kesellikleriniń alıp kiriliwinen qorǵaw Qaraqalpaqstan Respublikasınıń shegaralas rayonları arqalı alıp ótilip atırǵan mámleketlik veterinariya xızmeti qadaǵalawı astındaǵı tovarlar mámleketlik veterinariya qadaǵalawınan ótkeriliwi shárt. Epizootiyalıq jaǵınan tınısh bolǵan basqa mámleketlerden mámleketlik veterinariya xızmeti qadaǵalawı astındaǵı tovarlardıń Qaraqalpaqstan Respublikası aymaǵına alıp kiriliwine hám Qaraqalpaqstan Respublikası aymaǵınan alıp shıǵılıwına, sonday-aq Qaraqalpaqstan Respublikası aymaǵı arqalı tranzitine veterinariya, veterinariyalıq-sanitariyalıq qaǵıydaları hám normalarına boysınılǵan halda jol qoyıladı. Mámleketlik veterinariya xızmeti qadaǵalawı astındaǵı tovarlar Qaraqalpaqstan Respublikası aymaǵında jaylasqan shegara veterinariya punktleri (uchastkaları) arqalı alıp ótiledi. Mámleketlik veterinariya xızmeti qadaǵalawı astındaǵı tovarlardı alıp kiriwden aldın yuridikalıq hám fizikalıq shaxslar eksport hám tranzit qılıwshı mámleketlerdegi epizootiyalıq jaǵday haqqında mámleketlik veterinariya xızmetinen biypul maǵlıwmat alıw huqıqına iye.  25-statya. Mámleketlik veterinariyalıq qadaǵalaw obektleri Tómendegiler mámleketlik veterinariyalıq qadaǵalaw obektlerine kiredi: haywanlar, olardıń jınısıy hám somatikalıq kletkaları; haywanlardıń juqpalı kesellikleriniń qozǵatıwshıları; kelip shıǵıwı haywanatqa tiyisli ónim hám shiyki zat, bazarlarda realizaciya etiletuǵın ósimlik azıq-awqat ónimleri, veterinariyalıq dárilik zatlar hám texnika quralları, azıqlıq ot-jem hám azıqlıq qosımshalar, patologiyalıq material, biologiyalıq shıǵındılar, sonday-aq suw, hawa hám topıraq úlgileri; haywanlardıń juqpalı kesellikleriniń qozǵatıwshıların juqtırıw faktorları bolıwı múmkin bolǵan transport quralları, ıdıslar, jaylastırıw-oraw materialları; yuridikalıq hám fizikalıq shaxslardıń veterinariya salasındaǵı jumısı; mámleketlik veterinariya xızmeti qadaǵalawı astındaǵı tovarlardı jetistiretuǵın, tayarlaytuǵın, islep shıǵaratuǵın, saqlaytuǵın, qayta isleytuǵın, tasıytuǵın, realizaciya isleytuǵın yamasa olardan paydalanatuǵın yuridikalıq hám fizikalıq shaxslardıń aymaqları hám de óndirislik imaratları; haywanlar aydap ótiletuǵın jollar, jónelisler, biotermik uralar, haywanat qoyımshılıqları, haywanlar baǵılatuǵın jaylawlardıń hám suwǵarılatuǵın jerlerdiń aymaqları; veterinariyalıq esap hám esabatlar boyınsha hújjetler; veterinariyalıq aktler, licenziyalar, ruxsatnamalar, maǵlıwmatnamalar, gúwalıqlar hám sertifikatlar; mámleketlik veterinariya xızmeti qadaǵalawı astındaǵı tovarlardı islep shıǵarıw, tayarlaw (soyıw), saqlaw hám qayta islewge normativlik-texnikalıq hújjetler.  26-statya. Epizootiyalıq monitoring Epizootiyalıq monitoring haywanlardıń juqpalı keselliklerin qozǵatıwshılardı anıqlaw boyınsha maǵlıwmattı sistemalı ráwishte jıynaw hám islewden ótkeriw bolıp esaplanadı. Epizootiyalıq monitoring mámleketlik veterinariya xızmeti tárepinen tómendegi maqsetlerde ámelge asırıladı: epizootiyalıq jaǵdaydı boljaw, haywanlardıń juqpalı kesellikleri hám usı keselliklerdiń qozǵatıwshıları tarqalıwın sheklew boyınsha ilajlar kompleksin islep shıǵıw; sheklewshi ilajlardı (karantindi) belgilew yamasa biykarlaw tuwralı sheshim qabıl etiw; jumısı haywanlardı saqlaw, soyıw, kelip shıǵıwı haywanatqa tiyisli ónim hám shiyki zattı qayta islew menen baylanıslı bolǵan kárxanalardaǵı, mákemelerdegi hám de shólkemlerdegi epizootiyalıq jaǵdaydı xojalıq jumısı qáwipsiz ámelge asırılıwı ushın anıqlaw; xalıqaralıq sawda hám mámleketlik veterinariya xızmeti qadaǵalawı astındaǵı tovarlardı tasıw ushın mámlekettegi epizootiyalıq jaǵdaydı anıqlaw.  27-statya. Mámleketlik veterinariya xızmetiniń qadaǵalawı astındaǵı tovarlardı alıp qoyıw, joq etip taslaw, zıyansızlandırıw (juǵımsızlandırıw) hám qayta islew Haywanlardıń hám adamnıń densawlıǵı ushın qáwip tuwdıratuǵın haywanlar, kelip shıǵıwı haywanatqa tiyisli ónim hám shiyki zat olardıń qáwiplilik dárejesine qarap veterinariya, veterinariyalıq-sanitariyalıq qaǵıydaları hám normalarına qarap májbúriy ráwishte alıp qoyılıwı hám de joq etip taslanıwı yamasa alıp qoyılmaǵan jaǵdayda májbúriy ráwishte zıyansızlandırılıwı (juǵımsızlandırılıwı) hám qayta isleniwi shárt.  28-statya. Haywanlardıń juqpalı kesellikleriniń oshaqları anıqlanǵan jaǵdayda sheklewshi ilajlar (karantin) Haywanlardıń juqpalı kesellikleriniń oshaqları anıqlanǵan jaǵdayda rayonlardıń, qalalardıń, posyolkalardıń, awıllardıń belgili bir aymaqların jaramsız punktler dep járiyalaw hám olarda sheklewshi ilajlar (karantin) engiziw tiyisli bas mámleketlik veterinariya inspektorlarınıń usınısına muwapıq Qaraqalpaqstan Respublikası Ministrler Keńesiniń, qala hám rayonlar hákimleriniń sheshimleri menen yamasa yamasa Ózbekistan Respublikası Bas Mámleketlik veterinariya inspektorınıń usınısına muwapıq Ózbekistan Respublikası Ministrler Kabinetiniń sheshimi menen ámelge asırıladı. Belgilengen múddetler ótkennen hám haywanlardıń juqpalı kesellikleri oshaqları saplastırılǵannan keyin, sonday-aq zárúrli veterinariya ilajları ótkerilgennen soń rayonlardıń, qalalardıń, posyolkalardıń, awıllardıń belgili bir aymaqlarındaǵı sheklewshi ilajlar (karantin) tiyisli bas mámleketlik veterinariya inspektorlarınıń usınısına muwapıq sheklewshi ilajlardı (karantindi) belgilegen Qaraqalpaqstan Respublikası Ministrler Keńesiniń, qala hám rayonlardıń hákimleriniń sheshimleri menen yamasa Ózbekistan Respublikası Bas Mámleketlik veterinariya inspektorınıń usınısına muwapıq Ózbekistan Respublikası Ministrler Kabinetiniń sheshimi menen biykar etiledi.

 VI bap. Juwmaqlawshı rejeler

 29-statya. Mámleketlik veterinariya xızmetin támiyinlew hám onı qarjılandırıw Mámleketlik veterinariya xızmeti Qaraqalpaqstan Respublikası byudjetiniń qarjıları hám nızam hújjetlerinde qadaǵan etilmegen basqa da derekler esabınan támiyinlenedi. 30-statya. Mámleketlik veterinariyalıq qadaǵalawdı ámelge asırıw boyınsha jumısqa aralasıwǵa jol qoymaw Mámleketlik veterinariyalıq qadaǵalaw uyımlarınıń jumısına aralasıw, mámleketlik veterinariyalıq qadaǵalawdı ámelge asırıwshı lawazımlı shaxslardıń nızamlı jumısına tosqınlıq etiw maqsetinde olarǵa hár qanday túrde tásir ótkeriw qadaǵan etiledi.  31-statya.  Tartıslardı sheshiw Veterinariya salasındaǵı tartıslar nızam aktlerinde belgilengen tártipte sheshiledi.  32-statya. Veterinariya haqqındaǵı nızamshılıqtı buzǵanlıǵı ushın juwapkershilik Veterinariya haqqındaǵı nızamshılıqtı buzǵanlıqta ayıplı shaxslar belgilengen tártipte juwapkershilikke tartıladı.

Qaraqalpaqstan Respublikası Joqarǵı Keńesiniń Baslıǵı M.Erniyazov

Nókis qalası, 10-iyun 2016-jıl № 90/IX