Qaraqalpaqstan Respublikasında isbilermenlik, innovaciyalıq texnologiyalar hám infrastrukturanı jedel pátlerde rawajlandırıw arqalı xalıqtıń abadanlıǵın arttırıwdıń qosımsha ilajları haqqında Ózbekstan Respublikası Prezidentiniń pármanı

Qaraqalpaqstan Respublikasınıń sociallıq, ekonomikalıq, sonıń ishinde, óndiris hám investiciya potencialınan nátiyjeli paydalanıw, isbilermenlik jumısın rawajlandırıw hám joqarı qosımsha qunǵa iye básekiles ónimler islep shıǵarıwdı xoshametlew, isbilermenlerge kórsetiletuǵın finanslıq xızmetler kólemin keńeytiw, infrastrukturalıq sharayatlardı jaratıp beriw arqalı xalıqtıń bántligin támiyinlew hám aymaqtıń ekonomikalıq hám sociallıq rawajlanıwın jańa basqıshqa alıp shıǵıw maqsetinde: 1. Qaraqalpaqstan Respublikasınıń ekonomika tarmaqlarında innovaciyalıq processlerdiń jedellesiwine erisiw, resurslardan paydalanıw nátiyjeliligin arttırıw hám aymaqtı jedel pátlerde rawajlandırıwdıń tiykarǵı baǵdarları etip tómendegiler belgilensin: aymaqtıń investiciyalıq hám isbilermenlik ortalıǵın jaqsılaw, jaslardıń bántligin támiyinlew; jer hám suw resurslarınan nátiyjeli paydalanıw arqalı awıl xojalıǵı ónimlerin jetistiriwdi kóbeytiw hám qolaylı agrobiznes ortalıǵın jaratıw; bilimlendiriw tarawında qosımsha imkaniyatlar hám insan kapitalınıń rawajlanıwın jańa basqıshqa kóteriwge sharayat jaratıw; sociallıq qorǵaw baǵdarlamalarınıń qamtıp alıwın keńeytiw. 2. Qaraqalpaqstan Respublikasında aymaqtıń investiciyalıq hám isbilermenlik ortalıǵın jaqsılaw, jaslar bántligin támiyinlew baǵdarı sheńberinde: a) Qaraqalpaqstan Respublikasınıń barlıq rayonlarında jaylasqan hám usı aymaqta jumıs alıp barıp atırǵan isbilermenlik subektleri ushın 2023-jıl 1-yanvardan 2028-jıl 1-yanvarǵa shekemgi dáwirde: payda salıǵı, aylanıstan alınatuǵın salıq, yuridikalıq táreplerdiń múlkine salınatuǵın salıq hám yuridikalıq táreplerden alınatuǵın jer salıǵı boyınsha salıq stavkaları 50 procentke azaytılǵan halda; sociallıq salıq azaytılıp, 1 procent muǵdarındaǵı salıq stavkasında; jeke tártiptegi isbilermenler tárepinen tólenip atırǵan sociallıq salıq qalalar aymaǵında jumıs alıp barıp atırǵanlar ushın 12 esege, rayonlar aymaǵında jumıs alıp barıp atırǵanlar ushın 6 esege azaytılıp, jılına bazalıq esaplaw muǵdarınıń bir esesi muǵdarında belgilensin. Onda, iri salıq tólewshiler, turaqlı mákemeler, byudjet shólkemleri hám mámleketlik kárxanalar, ustav qorı (kapitalı)nda mámleketlik úlesi 50 procent hám onnan kóbirek muǵdarda bolǵan yuridikalıq táreplerge usı bántte belgilenip atırǵan jeńillikler engizilmeydi; b) 2022-jıl 1-oktyabrden 2028-jıl 1-yanvarǵa shekemgi dáwirde: Qaraqalpaqstan Respublikasında islep shıǵarılǵan ónimlerdi sırt mámleketlerge eksport etiwde, sonıń ishinde, eksport etiletuǵın ónimlerdi islep shıǵarıw ushın satıp alınǵan shiyki zattı respublika boylap tasıwda transport qárejetleriniń 70 procenti Sırtqı sawda, investiciyalar, jergilikli sanaattı rawajlandırıw hám texnikalıq jaqtan tártipke salıw máseleleri boyınsha Húkimet komissiyası (keyingi orınlarda - Húkimet komissiyası) tárepinen belgilengen dizimge tiykarlanıp Eksporttı xoshametlew agentligi tárepinen qaplap berilsin; ajıratılatuǵın kredit summasınıń 75 procentine shekem (75 procenti de kiredi), biraq ulıwma bahası 2,5 milliard sumnan artpaǵan muǵdarda Isbilermenlik jumısın qollap-quwatlaw mámleketlik qorı esabınan kepillikler usınılsın; v) Qaraqalpaqstan Respublikasındaǵı jas isbilermenlerge óndiris hám xızmet kórsetiw ushın zárúr ásbap-úskeneler satıp alıw maqsetinde Húkimet komissiyasınıń qararına tiykarlanıp tikkeley, Investiciyalar hám sırtqı sawda ministrligi janındaǵı Jas isbilermenlerdi qollap-quwatlaw qorı arqalı 7 jıl múddetke qarız qarjıları usınılsın. Onda, ajıratılǵan bul kredit qarjıları Qaraqalpaqstan Respublikası Ministrler Keńesiniń usınısları tiykarında Húkimet komissiyası (J.Xodjaev) tárepinen bólistiriledi; g) Shańaraqlıq isbilermenlikti rawajlandırıw baǵdarlamasınıń koordinatorları (M.Ubaydullaev, A.Kamalov, D.Sultanov) Qaraqalpaqstan Respublikasında shańaraqlıq isbilermenlikti rawajlandırıw baǵdarlamaları sheńberindegi joybarlardı qarjılandırıw ushın 2022-jıldıń aqırına shekem baǵdarlama ushın ajıratılǵan resurslar esabınan qosımsha túrde 200 milliard sum kredit ajıratılıwın támiyinlesin. Nızamshılıqta usı bánttegiden artıq salıq jeńillikleri názerde tutılǵan bolsa, isbilermenlik subektleri ushın qolaylı salıq jeńillikleriniń engiziletuǵını belgilensin. Moynaq rayonındaǵı isbilermenlik subektleri ushın nızamshılıqta salıq jeńillikleriniń keńeytilgen dizimi bar ekeni maǵlıwmat ushın qabıl etilsin. 3. Investiciyalar hám sırtqı sawda ministrliginiń Qaraqalpaqstan Respublikasında isbilermenlik jumısın rawajlandırıw ushın kommerciyalıq banklerge hám «Ámiwdárya deltasında kishi suw basseynlerin qurıw. Faza II» joybarı sheńberinde qarjılandırıw jumısların shólkemlestiriw ushın Tikleniw hám rawajlanıw qorınıń (keyingi orınlarda - Qor) qarjıları esabınan 100 million AQSh dolları ekvivalentinde tómendegi shártler hám baǵdarlardaǵı kredit liniyasın ajıratıw haqqındaǵı usınısı maqullansın: a) 95 million AQSh dolları muǵdarındaǵı kredit liniyası kommerciyalıq banklerge 7 jıl múddetke, sonıń ishinde, 3 jıllıq jeńilletilgen dáwir menen jıllıq 10 procent stavkada milliy valyutada ajıratıladı. Onda: kommerciyalıq bankler tárepinen kreditler islep shıǵarıw hám xızmet kórsetiw tarawındaǵı joybarlardı ámelge asırıw (buǵan turaq jay qurılısı, sawda, dáldalshılıq tarawındaǵı joybarlar, sonday-aq, akcizastı tovarlar islep shıǵarıwshılar, mámleketlik kárxanalar hám ustav qorında (ustav kapitalında) mámleketlik úlesi bolǵan yuridikalıq tárepler hám aylanıs qarjıların tolıqtırıw jaǵdayları kirmeydi) ushın jıllıq 14 procentlik stavkada, 7 jılǵa shekemgi múddetke, sonıń ishinde, 2 jılǵa shekemgi jeńilletilgen dáwir menen 10 milliard sumǵa shekemgi muǵdarda ajıratıladı; ajıratılǵan bul kredit liniyasınan qarjılandırılatuǵın joybarlar dizimi Qaraqalpaqstan Respublikası Ministrler Keńesiniń usınısına tiykarlanıp Húkimet komissiyası (J.Xodjaev) tárepinen qáliplestiriledi; b) «Ámiwdárya deltasında kishi suw basseynlerin qurıw. Faza II» joybarı sheńberinde qarjılandırıw jumısların shólkemlestiriw ushın 5 million AQSh dolları ekvivalentinde kredit liniyasınıń qarjıları ajıratıladı. Onda, Qor Suw xojalıǵı ministrligine 2023-jıl 31-dekabrge shekemgi múddetke jıllıq procent stavkası Oraylıq banktiń tiykarǵı stavkasında 5 million AQSh dolları muǵdarında qısqa múddetli kredit ajıratsın hám bul kredit keyin ala joybar buyırtpashısı – Araldı qutqarıw xalıqaralıq qorı atqarıw komitetiniń Nókis filialına ótkerilsin. Suw xojalıǵı ministrligi Qordıń tartılatuǵın kreditin alatuǵın, Araldı qutqarıw xalıqaralıq fondı atqarıw komitetiniń Nókis filialı usı kreditlerdiń maqsetli hám nátiyjeli paydalanıwına juwapker atqarıwshı uyım esaplanadı. Qarjı ministrligi Qordan tartılǵan kreditti azaytıw hám oǵan esaplanǵan procentlerdi tólewge baylanıslı qárejetlerdi, 2023-jıl 31-dekabrge shekemgi múddette Oraylıq bank tárepinen ornatılǵan tólem kúnindegi valyuta kursları boyınsha ayırmashılıqtı AQSh dolları ekvivalentinde Qorǵa mámleketlik byudjetten qaytaradı. 4. Investiciyalar hám sırtqı sawda ministrligi (J.Xodjaev) juwapker ministrlikler hám uyımlar menen birgelikte: eki ay múddette Qaraqalpaqstan Respublikasında jaylasqan hám usı aymaqta jumıs alıp barıp atırǵan isbilermenlik subektlerine biypul tiykarda jármdemlesiwshi «Investorlarǵa járdem orayı»n; «Investorlarǵa járdem orayı» janında awıl xojalıǵına mólsherlengen bos turǵan uchastkalardan maydanı keminde 10 gektar bolǵan óndirislik texnoparkin shólkemlestirsin. 5. Qaraqalpaqstan Respublikası aymaǵında 2022-jıl 15-sentyabrden baslap 2025-jıl 1-yanvarǵa shekem, burınǵısınan basqasha tárizde, jer uchastkaların tikkeley ijaraǵa beriw maqsetinde iri investiciyalıq joybardı ámelge asırıw ushın eń jaqsı usınıstı tańlap alıwdı: a) eń jaqsı usınıslar 5 million AQSh dolları ekvivalentinen baslap kórip shıǵıladı; b) jumısshı uyım Qaraqalpaqstan Respublikası Investiciyalar hám sırtqı sawda ministrligi esaplanadı; v) tómendegiler: iri investiciyalıq joybardı ámelge asırıw ushın eń jaqsı usınıstı tańlap alıw; eń jaqsı usınıs dep tańlap alınǵan iri investiciyalıq joybardı ámelge asıratuǵın investorlarǵa jer uchastkaların tikkeley ijaraǵa beriw Qaraqalpaqstan Respublikası Ministrler Keńesi tárepinen ámelge asırıladı. Investiciyalar hám sırtqı sawda ministrligi Ádillik ministrligi menen birgelikte eki ay múddette nızamshılıq hújjetlerine usı bántten kelip shıǵatuǵuǵın tiyisli ózgerisler hám qosımshalar haqqında Ministrler Kabinetine usınıslar kirgizsin. 6. Tómendegiler maǵlıwmat ushın qabıl etilsin: Qaraqalpaqstan Respublikasında dizimnen ótken barlıq salıq tólewshilerden óndirilgen salıqlar 2022-jıl ushın Mámleketlik byudjettiń dáramatların qáliplestiriwdiń tastıyıqlanǵan muǵdarlarınan az bolmaǵan muǵdarda Qaraqalpaqstan Respublikası byudjetine ótkeriledi; mektepke shekemgi bilimlendiriw shólkemleri hám ulıwma bilimlendiriw mektepleri xızmetkerleriniń, sonıń ishinde, tárbiyashı hám muǵallimlerdiń miynet haqısı sonday-aq, oǵan salıstırmalı esaplanǵan sociallıq salıq tólemlerin Ózbekstan Respublikası respublikalıq byudjetten ámelge asırıw tártibi saqlap qalınadı. Onda, salıq jeńillikleriniń engiziliwi sebepli payda bolatuǵın Qaraqalpaqstan Respublikası byudjeti dáramatlarındaǵı shıǵınlar Ózbekstan Respublikası respublikalıq byudjetten ajıratılatuǵın byudjetleraralıq tártipke salıwshı transfertler esabınan tolıq qaplanadı. 7. Qaraqalpaqstan Respublikasında xalıqtıń turmıs sharayatın jáne de jaqsılaw hám respublikadaǵı sociallıq-ekonomikalıq mashqalalardı sheshiw jáne awır sharayatlı aymaqlardı qollap-quwatlawǵa baǵdarlaw maqsetinde 2022-jıl 3-sherekten baslap 2024-jıldıń aqırına shekem hár sherektiń juwmaǵında qosımsha qun salıǵı boyınsha dáramatlar prognozınıń arttırıp orınlanǵan bólegi, burınǵısınan basqasha tárizde, tolıq Qaraqalpaqstan Respublikasında qaldırılsın. 8. Qaraqalpaqstan Respublikasında jer hám suw resurslarınan nátiyjeli paydalanıw baǵdarı sheńberinde: a) 2022-2023-jılları Qaraqalpaqstan Respublikasında aukcion sawdalarına jaylastırılatuǵın paydalı qazılma kánleri hám perspektivalı uchastkalar dizimi 1-qosımshaǵa muwapıq tastıyıqlansın; b) Qaraqalpaqstan Respublikası aymaǵındaǵı awıl xojalıǵına mólsherlenbegen jer uchastkaları: múlk huqıqı tiykarında elektron onlayn-aukcion sawdalarına baslanǵısh bahası 50 procentke azaytılǵan halda shıǵarılsın; múlk huqıqı hám ijara huqıqı tiykarında elektron onlayn-aukcion sawdaları arqalı realizaciyalanıwınan túsetuǵın qarjılardan Qaraqalpaqstan Respublikasınıń respublikalıq byudjetine qaratılatuǵın bóleginiń 50 procenti usı jer uchastkaları jaylasqan rayon (qala)lar byudjetine olardıń qosımsha dárekleri sıpatında ótkerilsin; v) menshiklestiriw baǵdarlamalarına muwapıq, Qaraqalpaqstan Respublikasında jaylasqan mámleketlik aktivlerdi (buǵan aymaǵı 10 000 kvadrat metrge shekemgi mámleketlik kóshpes múlk obektleri kirmeydi) satıwdan túsken qarjılar, olardı bahalaw hám satıw qárejetleri shegirilgen halda, Qaraqalpaqstan Respublikası Qarjı ministrligi janındaǵı suw támiynatı hám kanalizaciya sistemaların rawajlandırıw aymaqlıq qorına maqsetli qaratılsın; g) Ózbekstan Respublikası Prezidentiniń 2022-jıl 30-maydaǵı «Qaraqalpaqstan Respublikasınıń arqa rayonlarında isbilermenlikti rawajlandırıwdıń qosımsha ilajları haqqında»ǵı PQ-264-sanlı qararınıń 1-bántinde názerde tutılǵan mámleketlik aktivlerdi jáne isbilermenlik hám qala qurılısı jumısın ámelge asırıw ushın awıl xojalıǵına mólsherlenbegen bos turǵan jer uchastkaların elektron onlayn-aukcion sawdalarında satıp alıwda qollanılatuǵın qaǵıydalar Qaraqalpaqstan Respublikasınıń barlıq aymaqlarında engizilsin; d) Bas ministrdiń orınbasarları Sh.Ǵaniev hám J.Xodjaev Awıl xojalıǵı ministrligi (A.Voitov), Suw xojalıǵı ministrligi (Sh.Xamroev), Mámleketlik salıq komiteti (Sh.Kudbiev) hám Kadastr agentligi (F.Pulatov) menen birgelikte 2023-jıl 1-yanvarǵa shekem sırt el ekspertlerin tartıp, Qaraqalpaqstan Respublikasında suw esabın júrgiziw, shıǵınlardı azaytıw hám suw támiynatın turaqlılastırıw baǵdarlamasın názerde tutatuǵın normativlik-huqıqıy hújjet joybarın islep shıqsın. Onda, suw támiynatın jaqsılaw qorın shólkemlestiriw hám oǵan suw salıǵı, irrigaciya hám melioraciya obektlerin rekonstrukciyalaw ushın názerde tutılǵan byudjet qarjıların qaratıw názerde tutılsın. 9. Qaraqalpaqstan Respublikasında awıl xojalıǵı ónimlerin jetistiriwdi kóbeytiw, xalıqtıń bántligin támiyinlew hám dáramatın arttırıw jáne qolaylı agrobiznes ortalıǵın jaratıw baǵdarı sheńberinde: a) fermer xojalıqları hám klasterlerdiń paydalanıwındaǵı paxta hám ǵálleden qısqartılatuǵın, elatlı punktke jaqın hám suw támiynatı jaqsı bolǵan aymaqlardan rezervke qaytarılǵan jer maydanları 2-qosımshaǵa muwapıq diyqan xojalıǵı shólkemlestirgen halda ovoщ, palız, sobıqlı, maylı eginler, kartoshka jetistiriw sıyaqlı joybarlardı ámelge asırıw ushın puqaralarǵa, burınǵısınan ózgeshe tárizde, 2 gektarǵa shekemgi ólshemlerde ashıq elektron tańlaw arqalı 30 jılǵa ijaraǵa berilsin; b) Ózbekstan Respublikası Prezidentiniń 2021-jıl 15-dekabrdegi «Miywe-ovoщ jetistiriw tarawın mámleket tárepinen qollap-quwatlaw, tarmaqta klaster hám kooperaciya sistemasın jáne de rawajlandırıw ilajları haqqında»ǵı PQ-52-sanlı qararınıń talaplarına tiykarlanıp miywe, júzim, ovoщ, kartoshka, palız eginleri, gúl, kók shópler hám dárilik ósimlikler, mákke dáni, sobıqlı hám maylı eginlerdi jetistiriw ushın ónim bahasınıń 50 procentine shekem, biraq gektarına 7 million sumnan artpaǵan muǵdarda jıllıq 14 procent (sonnan 2 procenti bank marjası) stavkada, 6 aylıq jeńilletilgen dáwir menen 12 ay múddetke kreditler ajıratılatuǵını maǵlıwmat ushın qabıl etilsin. Onda Oraylıq bank (B.Zaxidov) Qarjı ministrligi (T.Ishmetov) menen birgelikte 2023-jılı Qaraqalpaqstan Respublikası aymaǵındaǵı fermer xojalıqlarına 200 milliard sum hám usı Pármannıń 9-bánti «a» kishi bántine tiykarlanıp ashıq elektron tańlaw arqalı egislik maydanlardı ijaraǵa alǵan diyqan xojalıqları ushın 50 milliard sum muǵdarındaǵı kreditler ajıratılıwın támiyinlesin; Ministrler Kabineti (Sh.Ǵaniev, J.Qwchqorov) bir ay múddette Qaraqalpaqstan Respublikasında awıl xojalıǵı egislik maydanlarınıń tegis emesligin hám suw resurslarınıń normadan artıq jumsalıwın saplastırıw maqsetinde 2022-2024-jılları awıl xojalıǵı jer maydanların lazerli qurılmaǵa iye jer tegislegish agregatları járdeminde tegislew ushın hár bir gektarına subsidiya ajıratıw boyınsha Ózbekstan Respublikası Prezidenti Administraciyasına usınıs kirgizsin; g) Ózbekstan Respublikası Prezidentiniń 2020-jıl 29-yanvardaǵı «Sharwashılıq tarmaǵın mámleket tárepinen qollap-quwatlawdıń qosımsha ilajları haqqında»ǵı PQ-4576-sanlı qararınıń 3-bántinde belgilengen subsidiya ajıratıw tártibi Qaraqalpaqstan Respublikası ushın 2 jıl múddetke sozdırılsın; d) Qarjı ministrligi hám Ózbekstan fermer, diyqan xojalıqları hám qıytaq jer iyeleri keńesi Qaraqalpaqstandaǵı diyqan xojalıqları hám qıytaq jer iyeleriniń jer maydanların suwǵarıw ushın tereńligi 5 metrden artıq bolǵan hár bir vertikal suwǵarıw qudıǵın burǵılaw hám iske qosıwǵa baylanıslı qárejetlerin qaplawǵa qudıqtıń hár bir metr tereńligi ushın 100 mıń sumnan, bazalıq esaplaw muǵdarınıń 50 esesinen aspaǵan muǵdarda Fermer, diyqan xojalıǵı hám qıytaq jer iyelerin qollap-quwatlaw qorınıń qarjıları esabınan subsidiyalar ajıratılıwın támiyinlesin; e) Ministrler Kabineti (Sh.Ǵaniev, J.Qwchqorov) Qaraqalpaqstan Respublikası Ministrler Keńesi menen birgelikte Ózbekstan Respublikası Prezidentiniń 2021-jıl 11-noyabrdegi «Shırshıq qalasında awıl xojalıǵı mashina qurılısı klasterin shólkemlestiriw ilajları haqqında»ǵı PQ-7-sanlı qararınıń talaplarına muwapıq, 2023-jıldıń aqırına shekem Qaraqalpaqstan Respublikasındaǵı fermer xojalıqları tárepinen keminde 200 jańa joqarı ónimli kombinaciyalıq texnikalardı satıp alıw ushın subsidiyalar ajıratılıwın támiyinlesin. 10. Qaraqalpaqstan Respublikasında bilimlendiriw tarawında qosımsha imkaniyatlar hám insan kapitalı rawajlanıwın jańa basqıshqa kóteriwge sharayat jaratıw baǵdarı sheńberinde; a) Mámleketlik joqarı bilimlendiriw mákemelerine oqıwǵa qabıllaw processlerin muwapıqlastırıw boyınsha mámleketlik komissiyası (A.Aripov) Jaslar isleri agentligi (A.Sadullaev) hám Qaraqalpaqstan Respublikası Ministrler Keńesiniń zárúr bilimlendiriw baǵdarları hám qánigelikleri boyınsha qáliplestirilgen buyırtpasına muwapıq, on kún múddette 2022-2023-oqıw jılı ushın Qaraqalpaqstan Respublikasında ulıwma orta, orta-arnawlı hám professional bilimlendiriw mákemelerin tamamlaǵan 500, keyingi jılları ushın bolsa hár jılı 1-sentyabrge shekem 6 500 jaslardıń wálayatlardaǵı mámleketlik joqarı bilimlendiriw mákemelerine qosımsha qabıllaw parametrleri tiykarında oqıwǵa qabıl etiliwin támiyinlesin. Onda bul qabıllaw kórsetkishleri boyınsha oqıwǵa qabıllanǵan studentlerge ajıratılǵan tálim kreditleri boyınsha procent tólemlerin Qarjı ministrligi janındaǵı Tálim kreditin qarjılandırıw qorınıń esabınan qaplap beriw imkaniyatı jaratılsın; b) Qaraqalpaqstan Respublikasındaǵı mámleketlik joqarı bilimlendiriw mákemelerin kúshli professor-oqıtıwshılar menen támiyinlew maqsetinde mámleketimizdiń jetekshi joqarı oqıw orınlarında ekologiya, awıl xojalıǵı, irrigaciya hám qurılıs baǵdarları boyınsha 2023-jıldan baslap, tayanısh doktoranturada kadrlardı maqsetli tayarlaw jolǵa qoyılsın; v) 2022-jıl 1-oktyabrden baslap Qaraqalapqstan Respublikası aymaǵında mektepke shekemgi bilimlendiriw tarawında mámleketlik-jeke menshik sheriklik boyınsha kelisimlerge qol qoyıw, burınǵısınan basqasha tárizde, Qaraqalpaqstan Respublikası Mektepke shekemgi bilimlendiriw ministrligi tárepinen ámelge asırılsın; g) 2022-jıl 1-oktyabrden baslap 5 jıl múddetke Qaraqalpaqstan Respublikası aymaǵındaǵı mámleketlik emes bilimlendiriw shólkemleriniń oqıw procesine tartılǵan sırt elli qánigeler (oqıtıwshılar) Ózbekstan Respublikası aymaǵında jumıs islew huqıqın beretuǵın tastıyıqnamalardı rásmiylestiriw hám beriw (sozdırıw) ushın óndiriletuǵın tólem, Ózbekstan Respublikasına kiriw vizasın alıw ushın konsullıq jıyımlar hám jasaw ornına dizimge alıw ushın óndiriletuǵın mámleketlik bajı tólewden azat etlsin; 11. Qaraqalpaqstan Respublikasında sociallıq qorǵaw baǵdarlamaları menen qamtıw kólemin keńeytiw sheńberinde 2022-jıl 15-sentyabrden baslap Qaraqalpaqstan Respublikası hám Xorezm wálayatlarında jasaytuǵın jasına baylanıslı pensiya hám napaqa alatuǵınlar, mayıplıǵı bolǵan adamlar ushın temir jol hám aviajolawshılar ushın biletlerdi satıw 50 procentlik jeńillikli tarifler boyınsha ámelge asırılsın jáne jolawshı tasıwshı kompaniyalardıń usı jeńillikti beriwge baylanıslı qárejetleri Ózbekstan Respublikası respublikalıq byudjeti qarjılarınıń esabınan qaplap berilsin. Transport ministrligi Qarjı ministrligi, «Ózbekstan temir jolları» AJ hám rezident aviakompaniyalar menen birgelikte bir ay múddette jolawshılardıń tiyisli kategoriyaları ushın arnawlı tariflerdi tastıyıqlasın. 12. Qaraqalpaqstan Respublikasın sociallıq-ekonomikalıq rawajlandırıw, mashqalalardı saplastırıw, xalıqtıń bántligin támiyinlew hám isbilermenlikti bunnan bılay da rawajlandırıw boyınsha «Jol kartası» 3-qosımshaǵa muwapıq tastıyıqlansın. 13. Qarjı ministrligi 2022-jıl 1-oktyabrge shekem «Sociallıq qorǵawdıń birden-bir reestri» málimleme sisteması arqalı anıqlanǵan kem támiyinlengen shańaraqlarǵa qıs máwsimin qosımsha shıǵınsız ótkeriw ushın (kómir, suyıltırılǵan gaz, azıq-awqat, basqa da zárúrlikler ushın) hár bir kem támiyinlengen shańaraqqa bazalıq esaplaw muǵdarınıń 2 esesi muǵdarında bir mártelik materiallıq járdem pullar ajıratıw ushın Qaraqalpaqstan Respublikasınıń respublikalıq byudjetine Ózbekstan Respublikasınıń respublikalıq byudjetinen qosımsha 100 milliard sumǵa shekem qarjı ajıratsın. Qaraqalpaqstan Respublikası Ministrler Keńesi 2022-jıl 25-oktyabrge shekem «Sociallıq qorǵawdıń birden-bir reestri» málimleme sisitemasında dizimge alınǵan hár bir shańaraq qısqı máwsimdi qosımsha shıǵınsız ótkeriw ushın ajıratılıp atırǵan bir mártelik materiallıq járdem pullardı tolıq tólep beriwdi támiyinlesin jáne ámelge asırılǵan jumıslar boyınsha Ózbekstan Respublikası Prezidenti Administraciyasına málimleme barsin. 14. A-380 «Ǵuzar –Buxara – Nókis – Beynew» xalıqaralıq áhmiyetke iye avtomobil jolınıń Qaraqalpaqstan Respublikası aymaǵınan ótken bir bólegi boylap jol boyı infrastrukturasın rawajlandırıw, sonıń ishinde, sawda hám servis obektlerin jaylastırıw maqsetinde: Awıl xojalıǵı ministrligi, Suw xojalıǵı ministrligi, Toǵay xojalıǵı mámleketlik komitetiniń 4-qosımshaǵa muwapıq jámi 809 gektar awıl xojalıǵına mólsherlengen jer uchastkaları hám toǵay fondı jerlerin, sonnan 85,6 gektar suwǵarılatuǵın jer uchastkaların (keyingi orınlarda – tańlanǵan jer uchastkaları) elatlı punktlerdiń awıl xojalıǵına mólesherlenbegen jerleri kategoriyasına ótkeriw haqqındaǵı juwmaǵı; Qaraqalpaqstan Respublikası Kegeyli rayonı, Aqtuba MPJ 3718q konturdaǵı 2 gektar hám Xojeli rayonı, Kulab MPJ 59q, 60q, 60aq konturdaǵı 3,7 gektar jer maydanında shólkemlestirilgen Jaslar sanaat hám isbilermenlik zonaları jerleriniń jaylaw jer kategoriyasın sanaat, transport, baylanıs, qorǵanıw hám basqa da maqsetlerge mólsherlengen jerler kategoriyasına ózgertiw haqqındaǵı juwmaǵı; Ekonomikalıq rawajlanıw hám kámbaǵallıqtı qısqartıw ministrligi, Qurılıs ministrligi, Turizm hám mádeniy miyras ministrliginiń tańlanǵan jer uchastkaların master-reje tiykarında jol boyı infrastrukturasın rawajlandırıw, sonıń ishinde, sawda hám servis obektlerin jaylastırıw ushın elektron onlayn-aukcion arqalı realizaciyalaw haqqınddaǵı usınısı maqullansın. Kadastr agentligi usı bántke tiykarlanıp jer resurslarınıń jaǵdayı haqqındaǵı milliy esabatqa ózgerisler kirgiziliwin támiyinlesin. Tańlanǵan jer uchatkaları awıl xojalıǵına mólsherlengen jerler jáne toǵay fondı jerleri kategoriyasınan shıǵarılıwı múnásibeti menen esaplanatuǵın awıl xojalıǵı hám toǵay xojalıǵı óndirisi nabıt bolıwınıń ornın qaplaw boyınsha tólemler, burınǵısınan basqasha tárizde óndirilmeytuǵını belgilensin. 15. Qaraqalpaqstan Respublikası Ministrler Keńesi eki ay múddette: Tańlanǵan jer uchastkalarınıń belgilengen tártipte rezervke qaytarılıwı, mámleketlik múlk sıpatında mámleketlik dizimnen ótkeriliwi jáne elektron onlayn-aukcionǵa shıǵarılıwın; Qaraqalpaqstan Respublikası Ministrler Keńesi janındaǵı isbilermenlik infrastrukturaların rawajlandırıw qorınıń qarjıları esabınan jetekshi joybar shólkemlerin tarta otırıp tańlanǵan jer uchastkalarınıń master-rejeleri islep shıǵılıwın támiyinlesin. 16. Investiciyalar hám sırtqı sawda ministrligi (Sh,Vafoev) jıldıń aqırına shekem A-380 «Ǵuzar –Buxara – Nókis – Beynew» xalıqaralıq áhmiyetke iye avtomobil jolınıń Tórtkúl, Beruniy hám Ellikqala rayonlarınan ótken bólegin rekonstrukciyalawǵa xalıqaralıq finans institutlarınan dáslepki esap-sanaqlarǵa tiykarlanıp 160 millon AQSh dolları muǵdarındaǵı qarjılar tartılıwın támiyinlesin. 17. Ministrler Kabineti (A.Ramatov) Qurılıs ministrligi, Kadastr agentligi hám Qaraqalpaqstan Respublikası Ministrler Keńesi menen birgelikte eki ay múddette Qaraqalpaqstan Respublikasınıń rayonlarında xalıq ushın jeke tártiptegi turaq jaylar qurıw ushın jer uchastkaların beriw hám 2023-2026-jıllarda kóp qabatlı hám jeke tártiptegi turaq jaylardı qurıw parametrlerin tastıyıqlawdı názerde tutatuǵın normativlik-huqıqıy hújjetlerdiń joybarın islep shıqsın. 18. Usı Pármannıń 8-bánti «b» kishi bántiniń úshinshi abzacında hám 10-bántiniń «g» kishi bántinde názerde tutılǵan qaǵıydalar Ózbekstan Respublikasınıń barlıq aymaǵına engiziledi. 19. Qarjı ministrligi Mámleketlik salıq komiteti, Mámleketlik bajıxana komiteti, Qaraqalpaqstan Respublikası Ministrler Keńesi jáne mápdar ministrlik hám uyımlar menen birgelikte eki ay múddette nızam hújjetlerine usı Pármannıń 2-bánti hám 10-bántiniń «g» kishi bántinen kelip shıǵatuǵın ózgerisler hám qosımshalar kirgiziw boyınsha nızam joybarın Ministrler Kabinetine kirgizsin. 20. Málimleme hám ǵalaba kommunikaciyalar agentligi, Ózbekstan Milliy teleradiokompaniyası hám Ózbekstan Milliy málimleme agentligi ǵalaba xabar quralları menen birgelikte turaqlı túrde: usı Pármannıń maqset hám wazıypaların ǵalaba xabar qurallarında, sonıń ishinde, Internet tarmaǵında hám sociallıq tarmaqlarda keńnen sholıp barılıwın jáne onıń mazmun-mánisi jámiyetshilikke túsidiriliwin; usı Pármanǵa tiykarlanıp Qaraqalpaqstan Respublikasında isbilermenlik, innovaciyalıq texnologiyalar hám infrastrukturalardı jedel pátlerde rawajlandırıw boyınsha ámelge asırılıp atırǵan jumıslardıń hár tárepleme sáwlelendirilip barılıwın; ámelge asırılıp atırǵan ilajlardıń barısı hám nátiyjeleri haqqındaǵı qalıs hám tolıq maǵlıwmattıń xalıqqa jetkeriliwin támiyinlesin. 21. Ádillik ministrligi mápdar ministrlik hám uyımlar menen birgelikte bir ay múddette nızamshılıqqa usı Pármannan kelip shıǵatuǵın ózgerisler hám qosımshalar haqqında Ministrler Kabinetine usınıslar kirgizsin. 22. Usı Pármannıń óz waqtında hám sapalı orınlanıwın qadaǵalaw Ózbekstan Respublikasınıń Bas ministri A.N.Aripovqa hám Ózbekstan Respublikası Prezidenti Administraciyasınıń basshısı S.U.Umurzakovqa júklensin. Ámelge asırılıp atırǵan ilajlardıń nátiyjeliligi boyınsha hár sherekte Ózbekstan Respublikası Prezidentine málimleme berip barılsın.

Ózbekstan Respublikası Prezidenti Sh.MIRZIYoEV Tashkent qalası, 2022-jıl 31-avgust