QARAQALPAQSTAN RESPUBLIKASÍNÍŃ NÍZAMÍ 30.06.2011-j. №84/VI

ARXIV ISI HAQQÍNDA

Usı Nızamǵa tómendegilerge muwapıq ózgerisler kirgizilgen: 18.08.2018-j. 200/XXII-sanlı QR Nızamı 26.12.2018-j. 225/XXIV-sanlı QR Nızamı 30.06.2021-j. 152/XX-sanlı QR Nızamı

I BAP. ULÍWMA REJELER

1-statya. Usı Nızamnıń maqseti Usı Nızamnıń maqseti arxiv isi salasındaǵı qatnasıqlardı tártiplestiriwden ibarat. 2-statya. Arxiv isi haqqındaǵı nızamshılıq Arxiv isi haqqındaǵı nızamshılıq usı Nızam hám basqa da nızam aktlerinen ibarat. Eger Ózbekstan Respublikasınıń xalıqaralıq shártnamasında Qaraqalpaqstan Respublikasınıń arxiv isi haqqındaǵı Nızam aktlerinde názerde tutılǵanınan basqasha qaǵıydalar belgilengen bolsa, xalıqaralıq shártnamanıń qaǵıydaları qollanıladı. 3-statya. Tiykarǵı túsinikler Usı Nızamda tómendegi tiykarǵı túsinikler qollanıladı: ayrıqsha bahalı hújjet – óshpes tariyxıy-mádeniy hám ilimiy qunlılıqqa, jámiyet hám mámleket ushın ayrıqsha áhmiyetke iye bolǵan, esapqa alıw, saqlaw hám paydalanıwdıń ayrıqsha tártibi belgilengen arxiv hújjeti; arxiv – arxiv hújjetlerin jámlew, esapqa alıw, saqlaw hám olardan paydalanıwdı ámelge asırıwshı mákeme; arxiv isi – arxiv hújjetlerin jámlew, esapqa alıw, saqlaw hám olardan paydalanıwdı shólkemlestiriw boyınsha jumıs; arxiv qorı – yuridikalıq yamasa fizikalıq shaxslardıń jumısı nátiyjesinde payda bolǵan, tariyxıy yamasa logikalıq jaqtan óz-ara baylanıslı arxiv hújjetleriniń jıynaǵı; arxiv hújjetleri – puqaralar, jámiyet hám mámleket ushın áhmiyetli bolǵanlıǵı sebepli saqlanıwı tiyis bolǵan tekstli, qoljazba hám mashina menen oqılatuǵın hújjetler, sesli jazıwlar, videojazıwlar, kinolentalar, fotosuwretler, fotografiya plenkaları, sızılmalar, sxemalar, kartalar, sonday-aq basqa da materiallıq zatlardaǵı jazıwlar; arxiv hújjetlerin depozitar saqlaw – arxiv hújjetlerin olardıń múlk iyesi (iyelik etiwshi) menen arxiv, muzey, málimleme-kitapxana mákemesi arasındaǵı kelisimde (shártnamada) belgilenetuǵın múddetler hám shártler tiykarında múlk iyesiniń (iyelik etiwshiniń) arxiv hújjetlerine bolǵan múlk huqıqın (iyelik etiw huqıqın) saqlap qalǵan halda saqlaw; (26.12.2018-j. 225/XXIV-sanlı QR Nızamı tiykarında ózgeris kirgizilgen) mákeme arxivi – yuridikalıq shaxstıń arxiv hújjetlerin jámlew, esapqa alıw, saqlaw hám olardan paydalanıwdı ámelge asırıwshı strukturalıq bólimshesi; is júrgiziw – yuridikalıq shaxstıń hújjetlestiriw hám rásmiy hújjetler menen islewdi shólkemlestiriw boyınsha jumısın támiyinlewshi process; Milliy arxiv qorı - Qaraqalpaqstan xalqınıń materiallıq hám ruwxıy turmısın sáwlelendiretuǵın, tariyxıy, ilimiy, sociallıq, ekonomikalıq, siyasiy hám mádeniy áhmiyetke iye bolǵan tariyxıy qáliplesken hám turaqlı bayıtıp barılatuǵın arxiv hújjetleriniń jıynaǵı; Milliy arxiv qorınıń mámleketlik katalogı – arxiv hújjetleri Milliy arxiv qorınıń quramına kirgizilgen arxiv qorlarınıń kólemi hám quramı haqqındaǵı tiykarǵı maǵlıwmatlarǵa iye bolǵan esapqa alıw hújjeti; teńi joq hújjet – ózinde saqlanǵan maǵlıwmat hám (yamasa) sırtqı belgileri boyınsha uqsası joq, joytılǵan jaǵdayda óziniń áhmiyeti hám (yamasa) túp nusqa qoljazbalıǵı kóz-qarasınan ornın toltırıp bolmaytuǵın ayrıqsha bahalı hújjet; qamsızlandırıw nusqası – ayrıqsha bahalı hújjet yamasa teńi joq hújjettiń basqa materiallıq zattaǵı, túp nusqada bar bolǵan maǵlıwmattı oqıw yamasa kóriw (esitiw) imkaniyatın beriwshi kóshirme nusqası; jeke quram boyınsha hújjetler – xızmetkerdiń jumıs beriwshi menen miynet qatnasıqların sáwlelendiriwshi arxiv hújjetleri. 4-statya. Arxiv hújjetlerine bolǵan menshik túrleri Arxiv hújjetleri jeke hám ǵalaba múlkshilik túrlerinde bolıwı múmkin. Mámleketlik hákimiyat hám basqarıw uyımlarında, mámleketlik kárxanalar, mákemeler hám shólkemlerde turǵan arxiv hújjetleri, sonday-aq olar tárepinen mámleketlik arxivler, muzeyler hám málimleme-kitapxana mákemelerine tapsırılǵan arxiv hújjetleri mámleket múlki bolıp esaplanadı hám usı hújjetler mámleket iyeliginen shıǵarıw hám menshiklestiriw, alıw-satıw yamasa múlk huqıqın basqa shaxsqa ótkeriw menen baylanıslı basqa da kelisimler obekti bolıwı múmkin emes; (26.12.2018-j. 225/XXIV-sanlı QR Nızamı tiykarında ózgeris kirgizilgen) Mámleketlik kárxanalar, mákemeler hám shólkemler mámleket iyeliginen shıǵarılǵan, menshiklestirilgen jaǵdayda olardıń arxiv hújjetleri, sonıń ishinde jeke quram boyınsha hújjetleri mámleket múlki bolıp qaladı hám belgilengen tártipte mámleketlik arxivlerge tapsırıladı. Mámleketlik emes kárxanalar, mákemeler hám shólkemlerdiń arxiv hújjetleri, sonday-aq fizikalıq shaxslardıń jeke arxiv hújjetleri olardıń jeke múlki bolıp tabıladı. Qaytıs bolǵan puqaralardıń Milliy arxiv qorınıń mámleketke tiyisli bolmaǵan bólegi quramına kirgizilgen jeke arxiv hújjetleri, wásiyatnama yamasa nızam boyınsha miyrasxorları bolmaǵan jaǵdayda, sonday-aq, arxiv hújjetleriniń múlk iyelerin anıqlaw imkaniyatı bolmaǵan jaǵdayda mámleket múlkine ótedi. 5-statya. Qayta shólkemlestirilip atırǵan hám saplastırılıp atırǵan kárxanalar, mákemeler hám shólkemlerdiń arxiv hújjetleri Kárxanalar, mákemeler hám shólkemler qayta shólkemlestirilip atırǵanda olardıń arxiv hújjetleri tiyisli mámleketlik arxivler menen kelisilgen halda usı kárxanalar, mákemeler hám shólkemlerdiń huqıqıy miyrasxorlarına tapsırıladı. Kárxanalar, mákemeler hám shólkemler saplastırılıp atırǵanda, olardıń arxiv hújjetleri nızamshılıqta belgilengen tártipte tiyisli mámleketlik yaki mámleketlik emes arxivlerine tapsırılıwı kerek. (30.06.2021-j. 152/XX-sanlı QR Nızamı tiykarında ózgeris kirgizilgen)

II BAP. ARXIV ISI SALASÍNDAǴÍ MÁMLEKETLIK BASQARÍW

6-statya. Qaraqalpaqstan Respublikası Ministrler Keńesiniń arxiv isi salasındaǵı wákillikleri Qaraqalpaqstan Respublikası Ministrler Keńesi: arxiv isin rawajlandırıw hám arxivler jumısın qollap-quwatlaw boyınsha mámleketlik baǵdarlamalardı islep shıǵıwda hám ámelge asırıwda qatnasadı; arxiv isin rawajlandırıw hám arxivler jumısın qollap-quwatlaw boyınsha aymaqlıq baǵdarlamalardıń islep shıǵılıwın, tastıyıqlanıwın hám ámelge asırılıwın támiyinleydi; arxiv isi hám is júrgiziwdiń jaǵdayı ústinen mámleketlik qadaǵalawdı belgilengen tártipte ámelge asıradı; arxiv hújjetlerin jámlew, mámleket esabına alıw, saqlaw hám olardan paydalanıw tártibin belgilewde qatnasadı; arxiv hújjetlerin Milliy arxiv qorı quramına kirgiziw hám onıń quramınan shıǵarıw tártibin belgilewde qatnasadı; Milliy arxiv qorınıń mámleketke tiyisli bólegi quramına kirgizilgen arxiv hújjetlerin turaqlı (múddetsiz) saqlawdı ámelge asıratuǵın ministrlikler, mámleketlik komitetler hám mákemelerdiń dizimin qáliplestiriwde qatnasadı; arxiv hújjetleriniń qupıyalılıq kategoriyaların, sonday-aq, mámleketlik sır hám nızam menen qorǵalatuǵın basqa da sırlardı óz ishine alǵan arxiv hújjetlerin kórip shıǵıwǵa sheklewlerdi belgilewde qatnasadı. (18.08.2018-j. 200/XXII-sanlı QR Nızamı tiykarında ózgeris kirgizilgen) Qaraqalpaqstan Respublikası Ministrler Keńesi Nızamshılıqqa muwapıq basqa da wákilliklerdi ámelge asırıwı múmkin. 7-statya. Qaraqalpaqstan Respublikası Arxiv isi basqarmasınıń arxiv isi salasındaǵı wákillikleri Qaraqalpaqstan Respublikası Arxiv isi basqarması (bunnan bılay tekstte «Basqarma» dep alınadı): arxiv isi hám is júrgiziw salasında birden-bir mámleketlik siyasattı ámelge asıradı; Milliy arxiv qorınıń mámleketlik katalogın júrgizedi; arxiv hújjetlerin belgilengen tártipte Milliy arxiv qorı quramına kirgiziw hám onıń quramınan shıǵarıw boyınsha joqarı uyımlarǵa usınıs beredi; arxiv hújjetlerin kórip shıǵıw tártibin hám shártlerin belgilewge qatnasadı; (18.08.2018-j. 200/XXII-sanlı QR Nızamı tiykarında ózgerisler kirgizilgen) arxiv hújjetleri mámleketlik arxivlerge tapsırılıwı tiyis bolǵan kárxanalar, mákemeler hám shólkemlerdiń dizimin dúziw tártibin belgilewge qatnasadı. (18.08.2018-j. 200/XXII-sanlı QR Nızamı tiykarında ózgerisler kirgizilgen) Basqarma nızamshılıqqa muwapıq basqa da wákilliklerdi ámelge asırıwı múmkin. 8-statya. Jergilikli mámleketlik hákimiyat uyımlarınıń arxiv isi salasındaǵı wákillikleri Jergilikli mámleketlik hákimiyat uyımları: Milliy arxiv qorı quramına kirgizilgen, tiyisli aymaqta jaylasqan mámleketlik arxivler hám mákeme arxivlerinde turǵan arxiv hújjetleriniń saqlanıwı ushın tiyisli dárejede sharayatlardı támiyinleydi; Milliy arxiv qorı quramına kirgizilgen, tiyisli aymaqta jaylasqan arxivler hám mákeme arxivlerinde turǵan arxiv hújjetleriniń jaǵdayı ústinen mámleketlik qadaǵalawdı ámelge asıradı; tiyisli aymaqtaǵı mámleketlik arxivlerdi qarjılandırıw muǵdarın óz wákillikleri sheńberinde belgileydi. Jergilikli mámleketlik hákimiyat wyımları nızamshılıqqa muwapıq basqa da wákilliklerdi ámelge asırıwı múmkin.

III BAP. MILLIY ARXIV QORÍ

9-statya. Milliy arxiv qorınıń quramı Milliy arxiv qorı quramına kirgizilgen arxiv hújjetleri Qaraqalpaqstan xalqı mádeniy miyrasınıń ajıralmas bólegi bolıp tabıladı. Milliy arxiv qorı Milliy arxiv qorınıń mámleketke tiyisli bóleginen hám mámleketke tiyisli bolmaǵan bóleginen ibarat. Milliy arxiv qorı quramına kirgizilgen arxiv hújjetleriniń puqaralıq aylanısına usı Nızamda belgilengen sheklewlerge ámel qılǵan halda ǵana jol qoyıladı. 10-statya. Arxiv hújjetlerin Milliy arxiv qorı quramına kirgiziw Arxiv hújjetlerin Milliy arxiv qorı quramınan shıǵarıw tiyisli wákillikli uyım tárepinen belgilengen tártipte ámelge asırıladı. (18.08.2018-j. 200/XXII-sanlı QR Nızamı tiykarında ózgeris kirgizilgen) Milliy arxiv qorı quramına kirgizilgen arxiv hújjetleriniń múlk iyesine usı hújjetler dizimnen ótkerilgenligi haqqında gúwalıq belgilengen tártipte beriledi. 11-statya. Arxiv hújjetlerin Milliy arxiv qorı quramınan shıǵarıw Arxiv hújjetlerin Milliy arxiv qorı quramınan shıǵarıw tiyisli wákillikli uyım tárepinen belgilengen tártipte ámelge asırıladı. (18.08.2018-j. 200/XXII-sanlı QR Nızamı tiykarında ózgeris kirgizilgen) 12-statya. Milliy arxiv qorınıń mámleketlik katalogın júrgiziw Milliy arxiv qorınıń mámleketlik katalogın júrgiziw Basqarma tárepinen ámelge asırıladı. 13-statya. Milliy arxiv qorınıń mámleketke tiyisli bóleginiń quramı Milliy arxiv qorınıń mámleketke tiyisli bóleginiń quramına, kimniń iyeliginde bolıwına qaramastan, turaqlı (múddetsiz) saqlanıwı tiyis bolǵan, mámleket múlki bolǵan arxiv hújjetleri kiredi. 14-statya. Milliy arxiv qorınıń mámleketke tiyisli bolmaǵan bóleginiń quramı Milliy arxiv qorınıń mámleketke tiyisli bolmaǵan bóleginiń quramına turaqlı (múddetsiz) saqlanıwı tiyis bolǵan, mámleketlik emes kárxanalar, mákemeler hám shólkemler jumısı nátiyjesinde payda bolǵan arxiv hújjetleri, sonday-aq fizikalıq shaxslardıń jeke arxiv hújjetleri kiredi. 15-statya. Milliy arxiv qorı quramına kirgizilgen arxiv hújjetleriniń puqaralıq aylanısı ózgeshelikleri Milliy arxiv qorınıń mámleketke tiyisli bólegi quramına kirgizilgen arxiv hújjetlerin iyelikten shıǵarıw múmkin emes. Usı hújjetler joytılǵan yamasa unıraǵan jaǵdayda olar Milliy arxiv qorınıń mámleketke tiyisli bólegi quramınan shıǵarıladı. Milliy arxiv qorınıń mámleketke tiyisli bolmaǵan bólegi quramına kirgizilgen arxiv hújjetleri tek ǵana tiyisli wákillikli uyımlardıń ruxsatı boyınsha iyelikten shıǵarılıwı yamasa universal huqıqıy miyrasxorlıq tártibinde yamasa basqa usılda bir shaxstan ekinshi shaxsqa ótiwi múmkin.

IV BAP. ARXIVLERDI ShÓLKEMLESTIRIW

16-statya. Arxivlerdi shólkemlestiriw shártleri Arxivlerdi shólkemlestiriw ushın arxiv hújjetlerin saqlaw hám olardan paydalanıw talaplarına juwap beretuǵın materiallıq-texnikalıq baza, sonıń ishinde imarat (bólmeler), zárúrli úskeneler, qorǵanıw quralları hám órtke qarsı qurallar bolıwı shárt. Arxivlerdiń tiykarǵı jumıs túrleri boyınsha waqıt hám óndirislik úlgi normaları Ózbekstan Respublikası Ministrler Kabineti tárepinen belgilenedi. Qupıya arxivler shólkemlestiriliwine jol qoyılmaydı. 17-statya. Arxivlerdiń túrleri hám kategoriyaları Arxivler mámleketlik hám mámleketlik emes arxivler túrlerinen dúziliwi múmkin. Mámleketlik arxivler tómendegi kategoriyalarǵa bólinedi: milliy arxivler; oraylıq mámleketlik arxivleri; Qaraqalpaqstan Respublikası hám rayonlıq (qalalıq) mámleketlik arxivleri; tarmaqlıq mámleketlik arxivleri. (30.06.2021-j. 152/XX-sanlı QR Nızamı tiykarında ózgeris kirgizilgen) 18-statya. Arxivlerdi shólkemlestiriw, qayta shólkemlestiriw hám saplastırıw tártibi Arxivlerdi shólkemlestiriw, qayta shólkemlestiriw hám saplastırıw nızamshılıqta belgilengen tártipte ámelge asırıladı. 19-statya. Vedomostvolıq arxivlerdi shólkemlestiriw Kárxanalar, mákemeler hám shólkemler arxiv hújjetlerin jámlew, esapqa alıw, saqlaw hám olardan paydalanıw ushın nızamshılıqta belgilengen tártipte vedomostvolıq arxivlerdi shólkemlestiriwi múmkin.

V BAP. ARXIV HÚJJETLERIN JÁMLEW, ESAPQA ALÍW, SAQLAW HÁM OLARDAN PAYDALANÍW

20-statya. Arxiv hújjetlerin jámlew Arxiv hújjetlerin jámlew arxivler, vedomostvolıq arxivler hám fizikalıq shaxslardıń jeke arxiv hújjetlerin arxiv hújjetleri menen toltırıwdı óz ishine aladı. Milliy arxivler, oraylıq, Qaraqalpaqstan Respublikası, rayonlıq (qalalıq) mámleketlik arxivleri mámleketlik hákimiyat hám basqarıw uyımları, mámleketlik kárxanalar, mákemeler hám shólkemlerdiń jumısı nátiyjesinde payda bolǵan arxiv hújjetleri, sonday-aq olar tárepinen alınǵan yamasa olarǵa mámleketlik emes kárxanalar, mákemeler hám shólkemler jáne fizikalıq shaxslar tapsırǵan arxiv hújjetleri menen jámlenedi. (30.06.2021-j. 152/XX-sanlı QR Nızamı tiykarında ózgeris kirgizilgen) Tarmaqlıq mámleketlik arxivleri tiyisli ministrliktiń, mámleketlik komitettiń yaki mákemeniń jumısı nátiyjesinde jaratılǵan arxiv hújjetleri menen jámlenedi. Mámleketlik emes arxivler nızamshılıqta belgilengen tártipte jámlenedi. (30.06.2021-j. 152/XX-sanlı QR Nızamı tiykarında ózgeris kirgizilgen) Arxiv hújjetleri mámleketlik arxivlerge tapsırılıwı tiyis bolǵan kárxanalar, mákemeler hám shólkemlerdiń dizimin dúziw tártibi Basqarma tárepinen ámelge asırıladı. (18.08.2018-j. 299/XXII-sanlı QR Nızamı tiykarında ózgerisler kirgizilgen) Mámleketlik emes hám fizikalıq shaxslardıń jeke arxiv hújjetleri mámleketlik múlk bolǵan arxiv hújjetleri menen jámleniwine jol qoyılmaydı. Fizikalıq shaxslardıń jeke arxiv hújjetleri satılǵanda mámleketlik arxivler jeńillikli satıp alıw huqıqına iye boladı. Kárxanalar, mákemeler hám shólkemler jeke quram boyınsha hújjetlerdi jámlewi shárt. Arxiv hújjetlerin jámlew tártibi tiyisli wákillikli uyım tárepinen belgilenedi. (18.08.2018-j. 200/XXII-sanlı QR Nızamı tiykarında ózgerisler kirgizilgen) 21-statya. Hújjetlerdiń qunlılıǵın anıqlaw ekspertizası Hújjetlerdiń qunlılıǵın anıqlaw ekspertizası hújjetler yamasa arxiv hújjetlerin saqlaw ushın tańlap alıw maqsetinde olardıń qunlılıǵın anıqlaw boyınsha ilajlar kompleksin óz ishine aladı. Hújjetlerdiń qunlılıǵın anıqlaw ekspertizasın ótkeriw tártibi tiyisli wákillikli uyım tárepinen belgilenedi. (18.08.2018-j. 200/XXII-sanlı QR Nızamı tiykarında ózgerisler kirgizilgen) 22-statya. Arxiv hújjetlerin esapqa alıw Arxiv hújjetlerin mámleketlik esapqa alıw tómendegilerdi óz ishine aladı: arxivler hám vedomostvolıq arxivlerde esapqa alıw hújjetlerin dúziw; arxivler hám vedomostvolıq arxivlerde hújjetler toplamın dúziw hám olardı Basqarmaǵa usınıw; Milliy arxiv qorınıń mámleketlik katalogın júrgiziw. Arxivler hám vedomostvolıq arxivlerdegi esapqa alıw hújjetlerine tómendegiler kiredi: hújjetlerdiń kelip túsiw kitabı; arxiv qorlarınıń dizimi; arxiv qorı beti; arxiv dizimi; arxiv qorı is qaǵazı. Arxiv hújjetlerin mámleketlik esapqa alıw tártibi tiyisli wákillikli uyım tárepinen belgilenedi. (18.08.2018-j. 200/XXII-sanlı QR Nızamı tiykarında ózgerisler kirgizilgen) Fizikalıq shaxslardıń jeke arxiv hújjetlerin esapqa alıw olar tárepinen óz betinshe ámelge asırıladı. 23-statya. Arxiv hújjetlerin saqlaw Kárxanalar, mákemeler hám shólkemlerdiń arxiv hújjetlerin, sonday-aq fizikalıq shaxslardıń jeke arxiv hújjetlerin saqlaw olar tárepinen óz betinshe ámelge asırıladı. Milliy arxiv qorı quramına kirgizilgen arxiv hújjetleri turaqlı (múddetsiz) saqlanıwı tiyis hám olardı joq qılıw qadaǵan etiledi. Milliy arxiv qorınıń mámleketke tiyisli bólegi quramına kirgizilgen arxiv hújjetlerin turaqlı (múddetsiz) saqlaw mámleketlik arxivler, muzeyler hám málimleme-kitapxana mákemelerinde, sonday-aq dizimi tiyisli wákillikli uyım tárepinen tastıyıqlanatuǵın ministrlikler, mámleketlik komitetler hám mákemelerde ámelge asırıladı. (26.12.2018-j. 225/XXIV-sanlı QR Nızamı tiykarında ózgeris kirgizilgen) Milliy arxiv qorınıń mámleketke tiyisli bólegi quramına kirgizilgen arxiv hújjetlerin ministrlikler, mámleketlik komitetler hám mákemelerde turaqlı (múddetsiz) saqlaw Basqarma menen kelisilgen vedomstvolıq normativlik hújjetler tiykarında ámelge asırıladı. Milliy arxiv qorınıń mámleketke tiyisli bólegi quramına kirgizilgen arxiv hújjetlerin mákeme arxivlerinde waqıtsha saqlaw usı Nızamnıń 24-statyasında belgilengen múddet ishinde ámelge asırıladı. Milliy arxiv qorınıń mámleketke tiyisli bolmaǵan bólegi quramına kirgizilgen arxiv hújjetleri arxivler hám mákeme arxivlerinde, sonday-aq fizikalıq shaxslardıń jeke arxiv hújjetleri quramında saqlanıwı múmkin. Kárxanalar, mákemeler hám shólkemlerdiń arxiv hújjetleri, fizikalıq shaxslardıń jeke arxiv hújjetleri arxivler, muzeyler hám málimleme-kitapxana mákemelerine depozitar saqlaw ushın tapsırılıwı múmkin. Kárxanalar, mákemeler hám shólkemler jeke quram boyınsha hújjetlerdi saqlawı shárt. Arxiv hújjetlerin saqlaw tártibi tiyisli wákillikli uyım tárepinen belgilenedi. (18.08.2018-j. 200/XXII-sanlı QR Nızamı tiykarında ózgerisler kirgizilgen) 24-statya. Arxiv hújjetlerin vedomostvolıq arxivlerde waqıtsha saqlaw múddetleri Milliy arxiv qorınıń mámleketke tiyisli bólegi quramına kirgizilgen arxiv hújjetlerin vedomostvolıq arxivlerde waqıtsha saqlawdıń tómendegi múddetleri belgilenedi: mámleketlik hákimiyat uyımları hám mámleketlik basqarıw uyımlarınıń tiyisli aymaqlıq bólimleri, respublikalıq boysınıwdaǵı mámleketlik kárxanalar, mákemeler hám shólkemlerdiń arxiv hújjetleri – on jıl dawamında; rayonlıq hám qalalıq boysınıwdaǵı mámleketlik kárxanalar, mákemeler hám shólkemlerdiń arxiv hújjetleri – bes jıl dawamında; ustavlıq qorında mámlekettiń úlesi bolǵan, sırt el investiciyaları qatnasıwındaǵı kárxanalar, basqa da shólkemlerdiń arxiv hújjetleri – on jıl dawamında; ilimiy, texnologiyalıq, konstruktorlıq hám patent hújjetleri – jigirma jıl dawamında; iri qurılıs boyınsha joybar hújjetleri – jigirma bes jıl dawamında; telemetrikalıq hújjetler – bes jıl dawamında; sesli jazıwlar, videojazıwlar, kinolentalar, fotosuwretler, fotografiya plyonkaları – tayarlanǵan waqtınan baslap úsh jıldan aspaǵan múddet dawamında; mashinada oqılatuǵın hújjetler – bes jıl dawamında; Milliy arxiv qorınıń mámleketke tiyisli bólegi quramına kirgizilgen arxiv hújjetlerin vedomostvolıq arxivlerde waqtınsha saqlaw múddetleri ótkennen keyin olar belgilengen tártipte mámleketlik arxivke elektron kóshirme nusqaları menen birge, ayrıqsha qunlılıqqa iye bolǵan hám unikal hújjetler ushın bolsa qamsızlandırıw nusqaları menen birge tapsırıladı. (30.06.2021-j. 152/XX-sanlı QR Nızamı tiykarında ózgeris kirgizilgen) Eger nızamshılıqta basqasha jaǵday názerde tutılmaǵan bolsa, puqaralıq halatlar aktleri jazıwları, notarial háreketler jazıwları, jeke quram boyınsha hújjetler, sud isleri hám xojalıq kitapları mákeme arxivlerinde jetpis bes jıl dawamında saqlanıwı tiyis. Puqaralıq halatlar aktleri jazıwları, notarial háreketler jazıwları, sud isleri hám xojalıq kitapları mákeme arxivlerinde waqtınsha saqlanıwı múddetleri ótkennen soń olar belgilengen tártipte mámleketlik arxivlerge tapsırıladı. 25-statya. Arxiv hújjetleriniń pútin saqlanıwın támiyinlew Arxivler hám mákeme arxivlerinde arxiv hújjetleriniń pútin saqlanıwın támiyinlew arxivler hám kárxanalar, mákemeler, shólkemler basshılarına júklenedi. Milliy arxiv qorınıń mámleketke tiyisli bolmaǵan bólegi quramına kirgizilgen arxiv hújjetleriniń pútin saqlanıwın támiyinlemey atırǵan menshik iyeleri sud sheshimine muwapıq usı hújjetlerge bolǵan menshik huqıqınan ayırılıwı múmkin, bunnan soń usı hújjetler saqlaw ushın tiyisli mámleketlik arxivke tapsırıladı. Mámleketlik arxivleriniń imáratları usı arxivlerdi arxiv hújjetlerin saqlawdı hám olardan paydalanıwdı shólkemlestiriw talaplarına juwap beretuǵın imáratlar menen támiynlenbesten turıp basqa shaxsqa ótkerilmeydi. (30.06.2021-j. 152/XX-sanlı QR Nızamı tiykarında ózgeris kirgizilgen) Kárxanalar, mákemeler hám shólkemler jeke quram boyınsha hújjetlerdiń pútin saqlanıwın támiyinlewi shárt. Fizikalıq shaxslar óz jeke arxiv hújjetleriniń pútin saqlanıwın óz betinshe támiyinleydi. Ayrıqsha qunlı hújjetler hám teńi joq hújjetlerdiń qamsızlandırıw nusqaları dúziledi. Arxiv hújjetlerin ayrıqsha bahalı hújjetler hám teńi joq hújjetler qatarına kirgiziw tártibi, sonday-aq. qamsızlandırıw nusqaların tayarlaw hám saqlaw tártibi tiyisli wákillikli uyımlar tárepinen belgilenedi. 26-statya. Arxiv hújjetlerinen paydalanıw Arxiv hújjetlerinen paydalanıw xızmet, óndirislik, ilimiy, mádeniy, aǵartıwshılıq, bilimlendiriw maqsetinde hám nızamshılıqta qadaǵan etilmegen basqa da maqsetlerde ámelge asırıladı. Arxiv hújjetlerinen paydalanıwshılar: arxiv hújjetlerinen paydalanıw tártibine boysınıwı; arxiv hújjetleriniń pútin saqlanıwın támiyinlewi; arxiv hújjetlerine keltirilgen zıyan yamasa arxiv hújjetlerindegi anıqlanǵan kemislikler haqqında qıstawlı túrde arxiv hám vedomostvolıq arxiv xızmetkerlerine xabar beriwi; arxiv hújjetlerinen alınǵan maǵlıwmatlardı buzıp kórsetiw yamasa qálbekilestiriwge jol qoymawı shárt. Arxiv hújjetlerinen paydalanıw tártibi tiyisli wákillikli uyım tárepinen belgilenedi. (18.08.2018-j. 200/XXII-sanlı QR Nızamı tiykarında ózgerisler kirgizilgen) 27-statya. Arxiv hújjetlerin kirip kóriw Arxivler hám mákeme arxivlerindegi arxiv hújjetlerin kirip kóriw paydalanıwshıǵa ilimiy-maǵlıwmatnama apparatın, sonday-aq, tiyisli arxiv hújjetleri yamasa olardıń kóshirme nusqaların usınıw arqalı támiyinlenedi. Arxivler hám vedomostvolıq arxivlerdegi arxiv hújjetlerin, sonday-aq fizikalıq shaxslardıń jeke arxiv hújjetlerin kirip kóriw olardıń pútin saqlanıwın támiyinlew maqsetinde shekleniwi múmkin, nızam hújjetlerinde názerde tutılǵan jaǵdaylar buǵan kirmeydi. Puqaralardıń jeke turmısı haqqındaǵı yamasa olardıń ómiri hám qáwipsizligine qáwip tuwdırıwshı maǵlıwmatlardı óz ishine alǵan arxiv hújjetlerin kirip kóriw boyınsha sheklewler arxiv hújjetleri tayarlanǵan waqıttan baslap jetpis bes jıl múddetke belgilenedi. Usı múddetten aldın bul hújjetlerdi kirip kóriwge puqaranıń ózi tárepinen, ol qaytıs bolǵannan soń bolsa usı puqaranıń miyrasxorları tárepinen ruxsat beriliwi múmkin. Arxiv hújjetlerin kirip kóriw tártibi hám shártleri tiyisli wákillikli uyım tárepinen belgilenedi. (18.08.2018-j. 200/XXII-sanlı QR Nızamı tiykarında ózgerisler kirgizilgen) Arxiv hújjetleriniń qupıyalılıq kategoriyaları, sonday-aq mámleketlik sır hám nızam menen qorǵalatuǵın basqa da sırdı óz ishine alǵan arxiv hújjetlerin kirip kóriw boyınsha sheklewler tiyisli wákillikli uyım tárepinen belgilenedi. (18.08.2018-j. 200/XXII-sanlı QR Nızamı tiykarında ózgerisler kirgizilgen) 28-statya. Arxivler hám vedomostvolıq arxivler tárepinen kórsetiletuǵın xızmetler Arxivler hám vedomostvolıq arxivler tiyisli wákillikli uyım tárepinen belgilengen tártipte xızmet kórsetedi. (18.08.2018-j. 200/XXII-sanlı QR Nızamı tiykarında ózgerisler kirgizilgen) Puqaralardıń huqıqları hám nızamlı máplerin sociallıq qorǵaw ushın zárúr bolǵan arxiv maǵlıwmatnamaların, sonday-aq tiyisli mámleketlik hákimiyat hám basqarıw uyımlarına arxiv maǵlıwmatnamaların hám arxiv hújjetiniń kóshirme nusqasın beriw biypul ámelge asırıladı.

VI BAP. JUWMAQLAWShÍ REJELER

29-statya. Arxivlerdi qarjılandırıw Mámleketlik arxivlerdi qarjılandırıw Qaraqalpaqstan Respublikasınıń Byudjeti qarjıları hám nızam hújjetlerinde qadaǵan etilmegen basqa da derekler esabınan ámelge asırıladı. Mámleketlik arxivlerdiń tólemli xızmetler kórsetiwden hám qarjılandırıwdıń basqa da dereklerinen alınatuǵın qarjıları nızamshılıqta belgilengen tártipte olardıń materiallıq-texnikalıq bazasın rawajlandırıw hám xızmetkerlerdi materiallıq xoshametlewge baǵdarlanadı. Mámleketlik emes arxivlerdi qarjılandırıw olardıń menshik iyeleri qarjıları hám nızamshılıqta qadaǵan etilmegen basqa da derekler esabınan ámelge asırıladı. 30-statya. Arxiv isi salasındaǵı xalıqaralıq birge islesiw Arxiv isi salasındaǵı xalıqaralıq birge islesiw Ózbekstan Respublikasınıń nızamshılıǵına hám xalıqaralıq shártnamalarına muwapıq ámelge asırıladı. 31-statya. Tartıslardı sheshiw Arxiv isi salasındaǵı tartıslar nızamshılıqta belgilengen tártipte sheshiledi. 32-statya. Arxiv isi haqqındaǵı nızamshılıqtı buzǵanlıǵı ushın juwapkershilik Arxiv isi haqqındaǵı nızamshılıqtı buzǵanlıqta ayıplı shaxslar belgilengen tártipte juwapker boladı.