QARAQALPAQSTAN RESPUBLIKASÍNÍŃ NÍZAMÍ 12.11.2003-jıl №217/II

BASPA JUMÍSÍ HAQQÍNDA

Usı Nızamǵa tómendegilerge muwapıq ózgerisler kirgizilgen: 27.06.2014-j. 209/XV-sanlı QR Nızamı 1-statya. Baspa jumısı haqqında nızam Qaraqalpaqstan Respublikasında baspa jumısı tarawındaǵı qatnasıqlar usı Nızam hám basqa da nızam aktleri menen retlestiriledi. Eger Ózbekstan Respublikasınıń xalıqaralıq shártnamalarında baspa jumısı haqqında Qaraqalpaqstan Respublikası Nızam aktlerindegiden basqa rejeler belgilengen bolsa, onda xalıqaralıq shártnamalarda názerde tutılǵan rejeler qollanıladı. 2-statya. Baspa jumısınıń erkinligi Basıp shıǵarıwshılar óz jumısında, sonıń ishinde baspa baǵdarın, tematikasın, qánigelesiwin, shıǵarılatuǵın ónimniń tirajın belgilewde, avtor tańlawda ǵárezsiz boladı. Basıp shıǵarıwshı hám buyırtpashı arasındaǵı qatnasıqlar shártnama tiykarında tártiplestiriledi. 3-statya. Cenzuraǵa jol qoyılmaslıq Basıp shıǵarıwǵa tayarlanǵan qoljazbalar hám materiallardı cenzuradan ótkeriwge jol qoyılmaydı. 4-statya. Baspa jumısınıń erkinliginen ǵárezli maqsetlerde paydalanıwǵa jol qoyılmaslıq Baspa óniminde konstituciyalıq dúzimdi zorlıq penen ózgertiwge shaqırıw, mámleketlik qupıyalardı járiya etiw, urıstı, zorlıq-zombılıqtı hám pornografiyanı úgit-násiyatlaw, diniy hám milliy kelispewshilikti keltirip shıǵarıw, adamnıń ar-namısın, qádir-qımbatın kemsitiw, jala jabıw qadaǵan etiledi. Baspa jumısında monopoliyaǵa, sonday-aq baspa jumısınıń erkinligin nızam aktleri talaplarına qarama-qarsı keletuǵın maqsetlerde paydalanıwǵa jol qoyılmaydı. 5-statya. Baspa jumısınıń monitoringi hám qadaǵalanıwı Baspalardıń baspa jumısı haqqındaǵı nızam hújjetlerine boysınıw monitoringi, sonday-aq licenziya talapları hám shártlerine boysınıwı ústinen qadaǵalaw wákillikke iye mámleketlik uyım tárepinen belgilengen tártipte ámelge asırıladı. 6-statya. Baspa jumısın licenziyalaw Yuridikalıq hám fizikalıq tárepler baspa jumısın licenziya alǵannan keyin ámelge asırıwǵa haqılı. Baspa jumısın licenziyalaw nızam hújjetlerinde belgilengen tártipte ámelge asırıladı. 7-statya. Licenziyalar beriwde hám olardan paydalanıw múddetin sozıwda mámleketlik tólemlerdiń jeńilletilgen muǵdarları (27.06.2014-j. 209/XV-sanlı QR Nızamı tiykarında ózgerisler kirzizilgen) Balalar ádebiyatı, oqıw, normativlik-maǵlıwmatlıq, ilimiy-texnikalıq ádebiyatlardı baspaǵa tayarlaw hám olardı basıw ushın licenziya beriw jáne de licenziyadan paydalanıw múddetin sozǵanı ushın mámleketlik tólemlerdiń jeńilletilgen muǵdarları belgileniwi múmkin. (27.06.2014-j. 209/XV-sanlı QR Nızamı tiykarında ózgerisler kirzizilgen) 8-statya. Shólkemlestiriwshi Yuridikalıq hám fizikalıq tárepler baspa menen poligrafiyalıq kárxanalardıń shólkemlestiriwshileri (birlikte shólkemlestiriwshileri) bolıwı múmkin. Shólkemlestiriwshi (birlikte shólkemlestiriwshi) basıp shıǵarıwshınıń qánigelesiwin belgileydi hám onıń ustavın tastıyıqlaydı. 9-statya. Basıp shıǵarıwshı Basıp shıǵarıwshı: baspanıń, poligrafiyalıq kárxanalardıń, sonday-aq baspa ónimlerin taratatuǵın kárxanalardıń shólkemlestiriwshisi (birlikte shólkemlestiriwshisi) bolıw; baspa ónimin shıǵarıwdıń tematikalıq jobaların óz betinshe dúziw hám tastıyıqlaw; shártnama dúziw, sırt ellerdiń yuridikalıq hám fizikalıq tárepleri menen watandarlıq avtorlardıń shıǵarmaların sırt ellerde yamasa sırt el avtorlarınıń shıǵarmaların Qaraqalpaqstan Respublikasında paydalanıw, basıp shıǵarıw yaki taratıw haqqında shártnama dúzgende olardı óz-ara kelisimge tartıw; baspa ónimin tayarlaw hám basıp shıǵarıwǵa buyırtpalar qabıl etiw; óz ónimlerin satıw hám nızam aktlerine muwapıq basqa da jumıslardı ámelge asırıw huqıqına iye boladı. 10-statya. Baspa ónimin taratıw tártibi Baspa ónimin taratıw - shólkemlestiriwshi, basıp shıǵarıwshı, baspa, olar arasındaǵı kelisim boyınsha avtor tárepinen yamasa basqa yuridikalıq hám fizikalıq tárepler menen shártnama tiykarında ámelge asırıladı. Baspa ónimin taratıw isi shártnama tiykarında ámelge asırıladı. Baspa ónimi tek basıp shıǵarıwshınıń yamasa ol wákillik bergen adamnıń ruxsatı boyınsha jarıqqa shıǵarıladı. 11-statya. Baspa óniminiń shıǵıw maǵlıwmatları Baspa óniminiń shıǵıw maǵlıwmatları nızam aktleri menen belgilenedi. 12-statya. Avtorlıq basılımlar Eger nızam aktleri menen belgilengen talaplarǵa qarama-qarsı kelmese yuridikalıq hám fizikalıq tárepler óz qoljazbaların hám basqa da materialların ózleriniń jeke qarjıları, qáwenderleri esabınan basıp shıǵarıwǵa, taratıwǵa haqılı. 13-statya. Jeńillikler beriletuǵın basılımlar Balalar, oqıw, ilimiy-texnikalıq, normativlik-maǵlıwmatlıq, maǵlıwmatlıq-enciklopediyalıq ádebiyatlar, eksportlıq baspa ónimleri, sonday-aq kózi ázziler menen mayıplar ushın arnalǵan basılımlar jeńillikler berilgen shártlerde basılıwı, qaǵaz hám poligrafiyalıq quwatlılıqlarǵa qosa basqa da resurslar menen támiyinleniwi múmkin. 14-statya. Baspa ónimin alıp shıǵıw hám alıp keliw Qaraqalpaqstan Respublikasınıń tısqarısına alıp shıǵıw, sonday-aq Qaraqalpaqstan Respublikasına sırt el baspa ónimin alıp keliw hám taratıw nızam aktlerine muwapıq ámelge asırıladı. 15-statya. Baspa jumısınıń toqtatılıwı Baspa jumısı licenziya belgilengen tártipte biykar etilgende yaki onıń paydalanıw múddeti toqtatılǵanda, sonday-aq nızam hújjetlerinde názerde tutılǵan basqa da jaǵdaylarda toqtatıladı. 16-statya. Baspa jumısı haqqında Nızam aktleri talapların buzǵanı ushın juwapkershilik Baspa jumısı haqqında Nızam aktleri talapların buzıwda ayıplı shaxslar belgilengen tártipte juwapker boladı.