Qaraqalpaqstan Respublikası Ministrler Keńesi janında mádeniyattı qollap-quwatlaw qorın shólkemlestiriw haqqında Ózbekstan Respublikası Prezidentiniń qararı
Qaraqalpaqstan Respublikasında mádeniyat hám kórkem óner tarawınıń wákilleri hám dóretiwshilerdi materiallıq hám ruwxıy jaqtan qollap-quwatlaw, ózbek hám qaraqalpaq xalıqlarınıń bay hám eski mádeniyatın óz-ara baylanıslı hám únles túrde rawajlandırıw, sonday-aq, kórkem jámáátlerdiń jergilikli hám sırt el gastrol saparların shólkemlestiriw jumısların turaqlı qarjılandırıw sistemasın jaratıw maqsetinde: Qaraqalpaqstan Respublikası Ministrler Keńesi janında yuridikalıq tárep statusına iye bolmaǵan Mádeniyattı qollap-quwatlaw qorı (keyingi orınlarda - Qor) shólkemlestirilsin. Tómendegiler: a) Qordıń qarjıların qáliplestiriw dárekleri etip belgilensin: Qaraqalpaqstan Respublikası respublikalıq byudjettiń qosımsha derekleri hám Qaraqalpaqstan Respublikası rayon (qala)larınıń jergilikli byudjetlerinde qáliplesken qosımsha derekler esabınan hár sherekte ajıratılatuǵın qarjılar; xalıqaralıq qarjı shólkemleri hám sırt ellerdiń grantları hám texnikalıq járdem qarjıları; Qordıń waqtınsha bos turǵan qarjıların kommerciyalıq banklerdegi depozitlerge jaylastırıwdan alınatuǵın dáramatlar; mámleketlik-jeke menshik sheriklik tiykarında alınatuǵın dáramatlardıń bólistiriliwinen túsetuǵın qarjılar; fizikalıq hám yuridikalıq táreplerdiń qayırqomlıq qáwenderlikleri; nızamshılıq hújjetlerinde qadaǵan etilmegen basqa da derekler; b) Qor qarjılarınan paydalanıw baǵdarları etip belgilensin: mádeniyat hám kórkem óner tarawınıń wákilleri, qábiletli dóretiwshilerdi ásirese, jaslardı materiallıq qollap-quwatlaw; awır ekonomikalıq jaǵdayǵa túsip qalǵan, sociallıq qorǵawǵa mútáj mádeniyat hám kórkem óner xızmetkerlerin anıqlaw, olarǵa mánzilli sociallıq hám materiallıq járdem kórsetiw ilajların shólkemlestiriw hám qarjılandırıw; mádeniyat hám kórkem óner shólkemleriniń jumısın materiallıq qollap-quwatlaw; dóretiwshiler, dóretiwshilik hám kórkem óner jámáátleriniń jergilikli hám sırt el gastrol saparların shólkemlestiriw; mádeniyat shólkemleriniń imaratları hám mádeniyat obektlerinde qurılıs-montajlaw jumısların alıp barıw, olardıń jumısına zamanagóy málimleme texnologiyaları hám aldıńǵı innovaciyalardı engiziw; nızamshılıq hújjetlerinde názerde tutılǵan basqa da qárejetlerdi qaplaw. Mádeniyat hám turizm ministrligi Qorǵa Ózbekstan Respublikası respublikalıq byudjetten 2023-jıl ushın Mádeniyat hám turizm ministrligine ajıratılǵan qarjılar esabınan 20 milliard sum ajıratılıwın támiyinlesin. Qaraqalpaqstan Respublikası Ministrler Keńesi Qorǵa Qaraqalpaqstan Respublikası respublikalıq byudjettiń qosımsha derekleri esabınan qarjılar ajıratıw boyınsha Qaraqalpaqstan Respublikası Joqarǵı Keńesine usınıslar kirgizip barsın. Ministrler Kabineti bir hápte múddette Qor haqqındaǵı rejeni hám onıń onıń qayırqomlıq keńesiniń quramın tastıyıqlasın. Usı qarardıń orınlanıwın nátiyjeli shólkemlestiriwge juwapker hám jeke juwapker etip mádeniyat hám turizm ministri O.A.Nazarbekov hám Qaraqalpaqstan Respublikası Ministrler Keńesiniń Baslıǵı F.U.Ermanov belgilensin. Qarardıń orınlanıwın dodalap barıw, juwapker shólkemlerdiń jumısın muwapıqlastırıw hám qadaǵalaw Ózbekstan Respublikasınıń Bas ministri A.N.Aripovqa júklensin.
Ózbekstan Respublikası
Prezidenti Sh.MIRZIYOEV,
Tashkent qalası,
2023-jıl 10-iyul