Qaraqalpaqstan Respublikasın kompleksli sociallıq-ekonomikalıq rawajlandırıw hám xalıqtıń bántligin támiyinlewdiń qosımsha ilajları haqqında Ózbekstan Respublikası Prezidentiniń qararı

Qaraqalpaqstan Respublikasınıń tábiyǵıy shiyki zat resurslarınan nátiyjeli paydalanıw arqalı sanaat, awıl xojalıǵı tarawların jedel rawajlandırıw, sociallıq hám óndiris infrastrukturaların jaqsılaw, isbilermenlik hám xızmetler tarawın qollap-quwatlaw, usı tiykarda xalıqtıń bántligin támiyinlew hám turmıs dárejesin arttırıw maqsetinde: 1. Tómendegiler: Qaraqalpaqstan Respublikasında 2024-jılı xalıqtıń turaqlı, máwsimlik hám waqıtsha jumıslarda bántligin támiyinlew maqsetli 1-1.4-qosımshalarǵa muwapıq; Qaraqalpaqstan Respublikası qala hám rayonlarında 2024-jılı ámelge asırılatuǵın investiciyalıq joybarlardıń jıyındı kestesi hám mánzili dizimi 2 hám 2.1-qosımshalarǵa muwapıq; Qaraqalpaqstan Respublikasında 2024-jılı jańadan shólkemlestiriletuǵın xızmet kórsetiw obektleri maqsetli kórsetkishleri 4-qosımshaǵa muwapıq; Qaraqalpaqstan Respublikasında 2024-jılı jol boyı infrastrukturasın rawajlandırıw maqsetinde aukcion sawdalarına shıǵarılatuǵın jer uchastkaları 5-qosımshaǵa muwapıq; Qaraqalpaqstan Respublikasında xalıqtıń kásipke tayarlaw, qayta tayarlaw hám qánigelik arttırıwǵa baylanıslı 2024-jıl ushın belgilengen maqsetli kórsetkishler 6-qosımshaǵa muwapıq; Qaraqalpaqstan Respublikasında 2024-2025-jılları arnawlı sanaat (erkin ekonomikalıq), kishi sanaat, jaslar hám isbilermenlik sanaat zonalarında joybarlardı jaylastırıw ushın aukcion sawdalarına shıǵarılatuǵın bos jep maydanshalarınıń dizimi 7-qosımshaǵa muwapıq; Qaraqalpaqstan Respublikasındaǵı 2024-jılı rudalıq emes paydalı qazılma kánleri hám uchastkalarınan paydalanıw huqıqın aukcion sawdalarına shıǵarıw grafigi 8-qosımshaǵa muwapıq; Qaraqalpaqstan Respublikasında xalıqtıń bántligin támiyinlew maqsetinde 2024-jılı ajıratılatuǵın subsidiya qarjılarınıń bólistiriliwi 9-qosımshaǵa muwapıq; Qaraqalpaqstan Respublikasın 2024-jılı jumıssızlıqtan awlaq aymaqqa aylandırıw, jańa jumıs orınların shólkemlestiriw hám xalıqtıń bántligine járdemlesiw baǵdarlamasın ámelge asırıw boyıvnsha «jol kartası» 10-qosımshaǵa muwapıq tastıyıqlansın. 2. Qaraqalpaqstan Respublikasında: a) 2024-jılı: kishi biznesti qollap-quwatlaw kompleksli baǵdarlamasın ámelge asırıw ushın Biznesti rawajlandırıw banki kredit resursları esabınan 11-qosımshaǵa muwapıq 320 mlrd sum qarjı qaratılatuǵını; «Isbilermenlikti rawajlandırıw kompaniyası» AJ tárepinen Ózbekstan Respublikası Prezidentiniń 2023-jıl 10-noyabrdegi PP-193-sanlı Pármanınıń 2-bánti «a» kishi bánti hám «b» kishi bántiniń ekinshi abzacında názerde tutılǵan tártip boyınsha subektlerin qollap-quwatlawǵa 50 mlrd sum qarjı qaratılatuǵını; sociallıq salıq tólep atırǵan ózin-ózi bánt etken shaxslarǵa «Bizneske birinshi qádem» bank plastik kartaları arqalı 5 mln sumǵa shekemgi muǵdarda bir jıl múddetke shekemgi mikroqarızlar usınıs etiw ushın kommerciyalıq bankler tárepinen 12-qosımshaǵa muwapıq 60 mlrd sum qarjı qaratılatuǵını; b) 2024-jıldan baslap hár jılı «Keleshek kásipleri» joybarı sheńberinde 1,5 mıń jaslar, atap aytqanda, 900ı sandı texnologiyalarǵa hám 600i shet tillerge oqıtılatuǵını. Onda sanlı texnologiyalardı úyreniw ushın «Jaslar dápteri» qorınıń esabınan jaslarǵa subsidiya ajıratıw múddeti Qaraqalpaqstan Respublikası ushın bir jılǵa shekem sozdırılatuǵını; v) 2024-jılı kishi sanaat zonaları, jaslar, isbilermenlik hám sanaat zonalarınıń infrastruktura obektleri ushın Qaraqalpaqstan Respublikası Ministrler Keńesi janındaǵı Isbilermenlik infrastrukturasın rawajlandırıw qorınıń qarjıları esabınan 5 mlrd sum ajıratılatuǵını belgilensin. Ekonomika hám qarjı ministrligi (J.A.Qwchqorov) Oraylıq bank pene birgelikte usı bántte kórsetilgen qarjılar óz waqtında hám tolıq kólemde ajıratılıwın támiyinlesin. 3. Qaraqalpaqstan Respublikası Ministrler Keńesi, Investiciyalar, sanaat hám sawda ministrligi hám Sawda-sanaat palatasınıń tómendegi usınısarına kelisim berilsin: Qaraqalpaqstan Respublikasınıń aymaqlıq shegaraları ishinde innovaciyalıq, joqarı texnologiyalarǵa tiykarlanǵan, eksportqa baǵdarlanǵan hám import ornın basatuǵın óndirislerdi shólkemlestiriw boyınsha investiciyalıq joybarlardı ámelge asırıp atırǵan kárxanalarǵa «Nókis» erkin ekonomikalıq zonası qatnasıwshısı statusın beriw; investiciya minnetlemelerin orınlamaǵan «Nókis» erkin ekonomikalıq zonasınıń qatnasıwshıları menen investiciyalıq kelisimlerin biykar etiw, toqtatıp turıw hám olardı «Nókis» erkin ekonomikalıq zonası qatnasıwshısı statusınan ayırıwdı tek ǵana sud tártibinde ámelge asırıw. 4. Awıl xojalıǵı ministrligi Máhálle kesiminde islew hám isbilermenlikti rawajlandırıw agentligi, Qaraqalpaqstan Ministrler Keńesi hám kommerciyalıq bankler menen birgelikte 2024-jılı: Qaraqalpaqstan Respublikasında diyqan xojalıqların shólkemlestiriw ushın 13-qosımshaǵa muwapıq awıl xojalıǵına mólsherlengen jer maydanları aukcion sawdalarına shıǵarılıwın; usı jer maydanlarında «kooperativ» hám «agregator» sistemasına tiykarlanǵan joybarlar ámelge asırılıwın; hár bir rayonda joybarlardı ámelge asırıw ushın maydanı 5 gektarǵa shekemgi bir pútin konturlar tańlap alınıwı hám olarda eksportqa qolaylı joqarı dáramatlı eginler egiliwin támiyinlesin. 5. Qaraqalpaqstan Respublikası Ministrler Keńesi, Awıl xojalıǵı ministrligi hám Ekonomika hám qarjı ministrliginiń Qaraqalpaqstan Respublikasında, burınǵısınan basqasha túrde, 2024-jılı paxta shiyki zatın jetistiriw ushın jeńilletilgen kreditlerdi topıraqtıń bir bonitet balına normativlik ónimdarlıǵın (centner/gektar) 1,25 koefficientke arttırǵan halda ajıratıw haqqındaǵı usınısı maqullansın. 6. Bas ministrdiń orınbasarı J.A.Qwchqorov Oraylıq bank, Awıl xojalıǵı ministrligi menen birgelikte Awıl xojalıǵın mámleket tárepinen qollap-quwatlaw qorı tárepinen 2024-jılı kommerciyalıq banklerge jaylastırılatuǵın depozit qarjıları esabınan sharwashılıq tarawına azıq-awqatlıq eginlerdi jetistiriw ushın altı ay múddette qaytarıw shárti menen 150 mln.sumǵa shekem Oraylıq banktiń tiykarǵı stavkasınan joqarı bolmaǵan stavkada (sonnan 1 procenti bank marjası) jeńilletilgen kredit qarjıları ajıratılıwın támiyinlesin. 7. Qaraqalpaqstan Respublikası Ministrler Keńesi awıl xojalıǵı ministrligi menen birgelikte 2024-2025-jılları Qaraqalpaqstan Respublikasındaǵı suwǵarılatuǵın 112 mıń gektar jer maydanları 14-qosımshaǵa muwapıq lazerli tegisleniwdi shólkemlestiriw arqalı awıl xojalıǵı ónimleriniń zúráátliligi 5-10 procentke arttırılıwın támiyinlesin. Onda, Qaraqalpaqstan Respublikasında jumıs alıp barıp atırǵan awıl xojalıǵı kárxanalarına awıl xojalıǵı ónimlerin jetistiriw ushın hár bir gektar lazerli tegislengen maydanǵa jumsalǵan janılǵı-maylaw materiallarınıń qárejetlerin 100 procentke shekem, biraq ulıwmalıq qárejet muǵdarınıń 1 mln sumnan artıq bolmaǵan bólegin qaplaw ushın Mámleketlik byudjetten subsidiyalar beriletuǵını belgilensin. 8. Qaraqalpaqstan Respublikası Ministrler Keńesi, Awıl xojalıǵı ministrligi, «Ózagrolizing» AJ, Ekonomika hám qardı ministrligi hám Mámleketlik aktivlerdi basqarıw agentliginiń Beruniy, Ámiwdárya, Shımbay hám Qanlıkól rayonlarında 2024-jıl 1-aprelge shekem awıl xojalıǵı texnikaları menen kompleksli xızmet-kórsetiwshi texnika-servis orayların (keyingi orınlarda – texnika-servis orayları) mámleketlik-jeke menshik sheriklik tiykarında shólkemlestiriw haqqındaǵı usınısı maqullansın. Onda: a) Ekonomika hám qarjı ministrligi tárepinen bir ay múddette Ózbekstan Respublikası respublikalıq byudjet esabınan AKB «Agrobank»ke 10 jıl múddetke jıllıq 7 procentlik stavkada 193 mlrd sum qarjılar depozitke jaylastırıladı; b) AKB «Agrobank» depozitke jaylastırılǵan qarjılar esabınan: 38,6 mlrd sum qarjılardı jıllıq 10 procentlik stavkada texnika-servis oraylarına texnikalar satıp alıw maqsetinde avans tólemlerin ámelge asırıw ushın; 154,4 mlrd sum qarjılardı 10 jıl múddetke jıllıq 10 procentlik stavkada «Ózagrolizing» AJǵa kredit ajıratıw ushın baǵdarlanadı; v) «Ózagrolizing» AJ tárepinen: 160 awıl xojalıǵı texnikası 15-qosımshaǵa muwapıq 10 jıl múddetke jıllıq 14 procentlik stavkada texnika-servis oraylarına lizing tiykarında beriledi; eki ay múddette awıl xojalıǵı texnikaları lizing múddetleri traktor hám kombaynlar ushın 10 jılǵa shekem, agregatlar ushın 5 jılǵa shekem sozdırıladı; g) 160 awıl xojalıǵı texnikası texnika-servis oraylarına rásmiylestirilgennen soń, Ózbekstan Respublikası Prezidentiniń 2021-jıl 11-noyabrdegi PQ-7-sanlı qararına muwapıq ajıratılatuǵın subsidiya qarjıları usı awıl xojalıǵı texnikalarınıń avans tólemi ushın tartılǵan kreditler boyınsha qarızdarlıqlardı sóndiriw ushın qaratıwǵa ruqsat beriledi. 9. Esap palatası Ekonomikalıq jınayatlarǵa qarsı gúresiw departamenti, Agrosanaat kompleksi ústinen qadaǵalaw inspekciyası hám Qaraqalpaqstan Respublikası Ministrler Keńesi menen birgelikte usı qarardıń 7-bántine muwapıq lazerli tegislewge ajıratılatuǵın subsidiyadan hám 8-bántine tiykarlanıp satıp alınǵan awıl xojalıǵı texnikalarınan maqsetli paydalanılıwı ústinen turaqlı qadaǵalaw alıp barsın. 10. Qaraqalpaqstan Respublikasında awıl xojalıǵı kárxanaları hám isbilermenlik subektleri tárepinen óz mútájlikleri ushın belgilengen tártipte qáliplsetiriletuǵın dizim boyınsha sırt elden alıp kelinetuǵın islep shıǵarılǵanına 5 jıldan aspaǵan 200 at kúshinen joqarı aydaw traktorları hám paxta teriw mashinaları (TIF TN boyınsha 8432-8437, 8701 kodları) 2026-jıl 1-yanvarǵa shekem bajıxana bajısınan hám utilizaciya jiyiımınan azat etiledi hám isbilermenlik subektlerine erkin aylanısqa shıǵarıw (import) bajıxana rejimine jaylastırılǵan sáneden baslap qosımsha qun salıǵın 120 kúnge shekemgi múddetke keshiktirip tólewge ruqsat beriledi. (10-bánt Ózbekstan Respublikası Prezidentiniń 2024-jıl 14-oktyabrdegi PP-156-sanlı Pármanı redaktorlanıwında – Nızamshılıq maǵlıwmatları milliy bazası, 15.10.2024-j., 06/24/156/0816-sanlı. Kúshke kiriw sánesi - 2025-jıl 16-yanvar) 11. Qaraqalpaqstan Respublikası Ministrler Keńesi, Ekologiya, qorshaǵan ortalıqtı qorǵaw hám klimat ózgeriwi ministrligi, Awıl xojalıǵı ministrligi, Mámleketlik aktivlerdi basqarıw agentligi hám «Ózbekbalıqsanaat» assocaciyasınıń: Qaraqalpaqstan Respublikasında balıqshılıq xojalıqlarınıń jumısın jáne de rawajlandırıw maqsetinde «Qaraqalpaqbalıq» assocaciyasın shólkemlestiriw; Qaraqalpaqstan Respublikasında aymaǵındaǵı «Ózbekbalıqsanaat» assocaciyası hám Ekologiya, qorshaǵan ortalıqtı qorǵaw hám klimat ózgeriwi ministrliginiń balansındaǵı barlıq kóllerdi «Qaraqalpaqbalıq» assocaciyası balansına ótkeriw; «Qaraqalpaqbalıq» assocaciyası janında Balıqshılıqtı rawajlandırıw qorın shólkemlestiriw hám tábiyǵıy suw basseyniniń imaratınan hám jasalma kóllerden paydalanıwshılardıń aǵzalıq tóleminen túsken qarjılardı tolıq muǵdarda usı qorǵa baǵdarlaw haqqındaǵı usınısları maqullansın. 12. Ekonomika hám qarjı ministrligi Awıl xojalıǵı ministrligi hám Suw xojalıǵı ministrligi menen birgelikte 2024-2025-oqıw jılınan baslap, Qaraqalpaqstan awıl xojalıǵı hám agrotexnologiyalar institutında Suw xojalıǵı hám melioraciya tálim baǵdarında 100 qabıllaw kvotasın ajıratsın. 13. Ózbekstan Respublikasınıń Qıtay Xalıq Respublikasındaǵı elshixanasınıń shtat kestesine, miynetke haqı tólew fondı belgilengen tártipte ózgertilgen halda, Ózbekstan Respublikası respublikalıq byudjet qarjıları esabınan Qaraqalpaqstan Respublikasınıń ayrıqsha wákili qosımsha shtat birligi kirgizilsin. Investiciyalar, sanaat hám sawda ministrligi Sırtqı isler ministrligi hám Ekonomika hám qarjı ministrligi menen birgelikte bir ay múddette usı bánttiń orınlanıwı boyınsha tiyisli normativlik-huqıqıy hújjet joybarın Ministrler Kabinetine kirgizsin. 14. Transport ministrligi «Uzbekistan Airways» AJ, Ózbekstan Respublikasında dizimnen ótken barlıq rezident aviakompaniyalar hám Ekologiya, qorshaǵan ortalıqtı qorǵaw hám klimat ózgeriwi ministrligi menen birgelikte Qaraqalpaqstan Respublikasına turistler aǵımın jáne de arttırıw, olarǵa qolaylı sharayatlar jaratıw maqsetinde 2024-jıl 1-aprelden baslap: Stambul-Nókis-Tashkent, Samarqand-Nókis-Stambul jónelisleri boyınsha aviaqatnawlardı jolǵa qoysın; jańadan satıp alınıp atırǵan L-410 markalı samolyotlardan birewi Qaraqalpaqstan Respublikasında ishki reysler ushın dislokaciyalanıwın támiyinlesin. 15. Ózbekstan Respublikası Oliy Majlisi Senatına Qaraqalpaqstan Respublikası Joqarǵı Keńesi menen birgelikte usı qarardıń orınlanıwın qadaǵalap barıw usınıs etilsin. 16. Qaraqalpaqstan Respublikası Ministrler Keńesi Ádillik ministrligi, mápdar ministrlik hám uyımlar menen birgelikte bir ay múddette nızamshılıq hújjetlerine usı qarardan kelip shıǵatuǵın ózgerisler hám qosımshalar haqqında Ministrler Kabinetine usınıslar kirgizsin. 17. Bul qarardıń orınlanıwın nátiyjeli shólkemlestiriwge juwapker etip Bas ministrdiń orınbasarları J.A.Qwchqorov hám J.A.Xodjaev sonıń menen birge Qaraqalpaqstan Respublikası Ministrler Keńesiniń Baslıǵı F.U.Ermanov belgilensin. Qarardıń orınlanıwın dodalap barıw, juwapker shólkemlerdiń jumısın muwapıqlastırıw hám qadaǵalaw Ózbekstan Respublikasınıń Bas ministri A.N.Aripovqa júklensin.

Ózbekstan Respublikası Prezidenti Sh.MIRZIYoEV Tashkent qalası, 2024-jıl 9-fevral