QARAQALPAQSTAN RESPUBLIKASÍNÍŃ NÍZAMÍ

28.11.1998-j. №408/I

MÁDENIY BAYLÍQLARDÍ ALÍP ShÍǴÍW HÁM ALÍP KIRIW HAQQÍNDA

Usı Nızamǵa tómendegilerge muwapıq ózgerisler kirgizilgen: 05.10.2007-j. 165/III-sanlı QR Nızamı 02.03.2015-j. 28/III-sanlı QR Nızamı 18.08.2018-j. 200/XXII-sanlı QR Nızamı 26.12.2018-j. 225/XXIV-sanlı QR Nızamı 30.11.2021-j. 180/XXIII-sanlı QR Nızamı 1-statya. Nızamnıń maqseti Bul Nızamnıń maqseti Qaraqalpaqstan xalqınıń mádeniy miyrasın saqlaw, mádeniy baylıqlardı nızamsız túrde alıp shıǵıw hám alıp kiriwden qorǵaw menen baylanıslı bolǵan qatnasıqlardı tártiplestiriwden, olardı Qaraqalpaqstan Respublikasınan alıp shıǵıw hám Qaraqalpaqstan Respublikasına alıp kiriwdiń birden-bir tártibin belgilewden, sonday-aq xalıqaralıq mádeniy birge islesiwdi rawajlandırıwǵa járdemlesiwden ibarat. 2-statya. Mádeniy baylıqlardı alıp shıǵıw hám alıp kiriw haqqındaǵı nızam aktleri Mádeniy baylıqlardı alıp shıǵıw hám alıp kiriw haqqındaǵı Qaraqalpaqstan Respublikasınıń nızam aktleri usı Nızamnan hám basqa da nızam aktlerinen ibarat boladı. Eger Ózbekstan Respublikasınıń xalıqaralıq shártnamalarında mádeniy baylıqlardı alıp shıǵıw hám alıp kiriw haqqındaǵı Qaraqalpaqstan Respublikasınıń nızam aktlerindegiden basqa qádeler belgilengen bolsa, onda xalıqaralıq shártnama rejeleri qollanıladı. 3-statya. Tiykarǵı túsinikler Bul Nızamda tómendegi tiykarǵı túsinikler qollanıladı: mádeniy baylıqlar - materiallıq dúnyanıń milliy, tariyxıy, kórkem, ilimiy-aǵartıwshılıq, ruwxıy hám ádep-ikramlılıq jáne basqa da mádeniy áhmiyetke iye bolǵan kóshpeli buyımları; mádeniy baylıqlardı alıp shıǵıw - mádeniy baylıqlardı Qaraqalpaqstan Respublikası aymaǵınan tısqarıǵa olardı qaytıp alıp kiriw minnetlemesi bolmaǵan jaǵdayda bajıxana shegarası arqalı alıp ótiw; mádeniy baylıqlardı alıp kiriw - mádeniy baylıqlardı Qaraqalpaqstan Respublikası aymaǵına olardı qaytıp alıp shıǵıw minnetlemesi bolmaǵan jaǵdayda bajıxana shegarası arqalı alıp kiriw; mádeniy baylıqlardı waqıtsha alıp shıǵıw - mádeniy baylıqlardı Qaraqalpaqstan Respublikası aymaǵınan tısqarıǵa olardı shártlesip qoyılǵan múddette qaytıp alıp kiriw minnetlemesi menen bajıxana shegarası arqalı alıp ótiw; mádeniy baylıqlardı waqıtsha alıp kiriw - mádeniy baylıqlardı Qaraqalpaqstan Respublikası aymaǵına olardı shártlesip qoyılǵan múddette qaytıp alıp shıǵıw minnetlemesi menen bajıxana shegarası arqalı alıp kiriw. 4-statya. Usı Nızamnıń tásiri astında bolatuǵın mádeniy baylıqlar Tómendegiler usı Nızamnıń tásiri astında boladı: (18.08.2018-j. 200/XXII-sanlı QR Nızamı tiykarında ózgerisler kirgizilgen) Ózbekstan Respublikası puqaraları tárepinen dóretilgen mádeniy baylıqlar; sırt el puqaraları hám puqaralıqqa iye bolmaǵan adamlar tárepinen Qaraqalpaqstan Respublikası aymaǵında dóretilgen mádeniy baylıqlar; Qaraqalpaqstan Respublikası aymaǵında tabılǵan mádeniy baylıqlar; muzeylerde, málimleme-kitapxana mákemelerinde, vedomstvolıq arxivlerde, kino-, foto-, fonotekalarda, súwretler galereyalarında hám basqa da saqlaw orınlarında toplanǵan mádeniy baylıqlar; (26.12.2018-j. 225/XXIV-sanlı QR Nızamı tiykarında ózgerisler kirgizilgen) qaysı mámleketlerge tiyisli bolsa, sol mámleketlerdiń wákillikli uyımlarınıń kelisimi menen arexologiyalıq, etnologiyalıq tárepinen ilimiy ekspediciyalar tárepinen qolǵa kirgizilgen mádeniy baylıqlar; ıqtıyarlı túrde almastırıw nátiyjesinde alınǵan mádeniy baylıqlar; qaysı mámleketlerge tiyisli bolsa, sol mámleketlerdiń wákillikli uyımlarınıń kelisimi menen miyras, sıylıq sıpatında alınǵan yamasa nızamlı túrde qolǵa kirgizilgen mádeniy baylıqlar; sırt ellerdiń yuridikalıq hám fizikalıq shaxsları tamanınan Qaraqalpaqstan Respublikasınıń aymaǵına alıp kelinip atırǵan mádeniy baylıqlar. (18.08.2018-j. 200/XXII-sanlı QR Nızamı tiykarında ózgerisler kirgizilgen) 5-statya. Mámleketlik uyımlardıń mádeniy baylıqlardı alıp shıǵıw hám alıp kiriw tarawındaǵı wákillikleri Qaraqalpaqstan Respublikasınıń aymaǵınan mádeniy baylıqlardı alıp shıǵıw hám alıp kiriwdi tártiplestiriwdi Qaraqalpaqstan Respublikasınıń Mádeniyat ministrligi hám Qaraqalpaqstan Respublikasınıń Mámleketlik bajıxana basqarması ámelge asıradı. (18.08.2018-j. 200/XXII-sanlı QR Nızamı tiykarında ózgerisler kirgizilgen) Qaraqalpaqstan Respublikasınıń Mádeniyat ministrligi: (05.10.2007-j. 165/III-sanlı QR Nızamı tiykarında ózgerisler kirgizilgen) tiyisli wákillikli uyım tastıyıqlaǵan tártipte mádeniy baylıqlarǵa kiretuǵın zatlardıń kategoriyasın anıqlaydı; (18.08.2018-j. 200/XXII-sanlı QR Nızamı tiykarında ózgerisler kirgizilgen) mádeniy baylıqlardı alıp shıǵıw, waqıtsha alıp shıǵıw múmkinligi haqqında sheshimler qabıl etedi; alıp shıǵılıp atırǵan hám alıp kirilip atırǵan, sonday aq waqıtsha alıp shıǵılıp atırǵan jáne waqıtsha alıp kirilip atırǵan mádeniy baylıqlardı dizimge aladı; alıp shıǵıladı, waqıtsha alıp shıǵıladı dep járiyalanǵan, sonday-aq waqıtsha alıp shıǵılǵannan keyin qaytıp alıp kelingen mádeniy baylıqlardı ekspertizadan ótkeriwdi támiyinleydi; mádeniy baylıqlardı alıp shıǵıw hám waqıtsha alıp shıǵıw huqıqın beriwshi sertifikatlar beredi; (02.03.2015-j. 28/III-sanlı QR Nızamı tiykarında ózgerisler kirgizilgen) uslap qalınǵan yamasa konfiskaciya etilgen (xatlanǵan) mádeniy baylıqlardı tiyisli mámleketlik uyımlardan qabıl etip aladı, olardı ekspertizadan ótkeredi hám de olardan paydalanıw tártibin belgileydi. Qaraqalpaqstan Respublikası Mámleketlik bajıxana basqarması nızam aktlerine muwapıq mádeniy baylıqlardı alıp shıǵıw hám alıp kiriw tártibi ústinen qadaǵalawdı ámelge asıradı. Mádeniy baylıqlardı ekspertizadan ótkeriw hám de olardı alıp shıǵıw jáne alıp kiriwdi qadaǵalaw tártibi tiyisli wákillikli uyım tárepinen belgilenedi. (18.08.2018-j. 200/XXII-sanlı QR Nızamı tiykarında ózgerisler kirgizilgen) 6-statya. Alıp shıǵılıp atırǵan hám alıp kirilip atırǵan mádeniy baylıqlarǵa bolǵan menshik huqıqı Alıp shıǵılıp atırǵan hám alıp kirilip atırǵan mádeniy baylıqlarǵa mámleket múlki huqıqı jáne yuridikalıq hám fizikalıq shaxslardıń múlik huqıqı júzege keliwine tómendegiler tiykar boladı: (18.08.2018-j. 200/XXII-sanlı QR Nızamı tiykarında ózgerisler kirgizilgen) mádeniy baylıqlardıń mámleket byudjeti esabınan dóretiliwi; mádeniy baylıqlardıń yuridikalıq hám fizikalıq shaxslardıń óz jumısı esabınan dóretiliwi; (18.08.2018-j. 200/XXII-sanlı QR Nızamı tiykarında ózgerisler kirgizilgen) mádeniy baylıqlar dóretiliwi yamasa qolǵa kirgiziliwine tiykar bolǵan kelisimler; miyrasqa alıw. Bir waqıttıń ózinde intellektual menshik obektinde bolǵan mádeniy baylıqlarǵa menshik huqıqı nızam aktleri menen tártiplestiriledi. 7-statya. Menshik iyesiniń mádeniy baylıqlardı alıp shıǵıwǵa bolǵan huqıqı Mádeniy baylıqlardıń óz menshik iyesi yamasa ol wákillik bergen adam tárepinen alıp shıǵılıwı nızam aktlerinde belgilengen tártipte beriletuǵın alıp shıǵıw huqıqın beriwshi sertifikat tiykarında ámelge asırıladı. (05.10.2007-j. 165/III-sanlı hám 02.03.2015-j. 28/III-sanlı QR Nızamları tiykarında ózgerisler kirgizilgen) Avtor ózi dóretken, óz menshigi bolǵan mádeniy baylıqlardı alıp shıǵıwǵa haqılı boladı. 8-statya. Qaraqalpaqstan Respublikasınan alıp shıǵıw múmkin bolmaǵan mádeniy baylıqlar. Tómendegi mádeniy baylıqlardıń Qaraqalpaqstan Respublikasınan alıp shıǵılıwı múmkin emes: eliw jıl hám onnan da burın dóretilgen mádeniy baylıqlar; mámleket tárepinen qorǵalıw dizimlerine hám reestrlerine kirgizilgen mádeniy baylıqlar; muzeyler, málimleme-kitapxana mákemeleri, arxivler, vedomstvolıq arxivler hám basqa da saqlaw orınlarında turaqlı saqlanıp atırǵan mádeniy baylıqlar. (26.12.2018-j. 225/XXIV-sanlı QR Nızamı tiykarında ózgerisler kiritilgen) 9-statya. Mádeniy baylıqlardı waqıtsha alıp shıǵıw Mádeniy baylıqlardı waqıtsha alıp shıǵıw yuridikalıq hám fizikalıq shaxslar tárepinen tómendegi jaǵdaylarda ámelge asırılıwı múmkin: (18.08.2018-j. 200/XXII-sanlı QR Nızamı tiykarında ózgerisler kirgizilgen) kórgizbeler shólkemlestiriw ushın; qayta tiklew, ońlaw-jónlew islerin hám ilimiy izertlewlerdi ámelge asırıw ushın; teatr, koncert hám basqa da artistlik xızmet múnásibeti menen; mámleket elshixanaların hám wákilxanaların bezew ushın; nızam aktlerinde názerde tutılǵan basqa da jaǵdaylarda. Waqıtsha alıp shıǵılıp atırǵan mádeniy baylıqlar kreditti támiyinlew sıpatında paydalanılıwı yamasa girew wáji sıpatında xızmet etiwi múmkin emes. 10-statya. Mádeniy baylıqlardı waqıtsha alıp shıǵıw shártleri Mádeniy baylıqlardı waqıtsha alıp shıǵıw ushın Qaraqalpaqstan Respublikası Mádeniyat hám sport isleri ministrligi tárepinen beriletuǵın sertifikat tiykar boladı. (05.10.2007-j. 165/III-sanlı, 02.03.2015-j. 28/III-sanlı QR Nızamları tiykarında ózgerisler kirgizilgen) Mádeniy baylıqlardı waqtınsha alıp shıǵıw huqıqın beriwshi sertifikattı beriw tártibi Qaraqalpaqstan Respublikası Ministrler Keńesi tárepinen tastıyıqlanadı. (02.03.2015-j. 28/III-sanlı QR Nızamı tiykarında ózgerisler kirgizilgen) 11-statya. Mádeniy baylıqlardı waqıtsha alıp shıǵıw ushın usınılatuǵın hújjetler Muzeyler, málimleme-kitapxana mákemeleri, vedomstvolıq arxivler hám basqa da saqlaw orınları tárepinen mádeniy baylıqlardı waqıtsha alıp shıǵıw haqqındaǵı sertifikattı alıw ushın arza berilip, oǵan tómendegiler qosa tigiledi. (26.12.2016-j. 225/XXIV-sanlı QR Nızamı tiykarında ózgerisler kirgizilgen) mádeniy baylıqlardı waqıtsha alıp shıǵıwdıń maqsetleri, múddetleri hám shártleri haqqında qabıl etiwshi shártnama; qamsızlandırıw qáwipleriniń barlıq jaǵdayları támiyinlengen túrde waqıtsha alıp shıǵılıp atırǵan mádeniy baylıqlardıń múlklik qamsızlandırıw shártnamasınıń qamsızlandırıw polisi (gúwalıq, sertifikat, kvitanciya); qabıl etiwshi táreptiń mámleketlik uyımlarınıń waqıtsha alıp shıǵılıp atırǵan mádeniy baylıqlardıń saqlanıwı hám óz waqtında qaytarılıwına baylanıslı jazba kepillikleri. Basqa yuridikalıq shaxslar tárepinen (18.08.2018-j. 200/XXII-sanlı QR Nızamı tiykarında ózgerisler kirgizilgen) mádeniy baylıqlardı waqıtsha alıp shıǵıw haqqındaǵı sertifikattı alıw ushın arzaǵa usı statyanıń birinshi bólegindegi ekinshi hám úshinshi abzaclarında kórsetilgen aktler qosa tirkeledi. (02.03.2015-j. 28/III-sanlı QR Nızamı tiykarında ózgerisler kirgizilgen) Fizikalıq shaxslar tárepinen (18.08.2018-j. 200/XXII-sanlı Nızamı tiykarında ózgerisler kirgizilgen) mádeniy baylıqlardı waqıtsha alıp shıǵıw haqqındaǵı sertifikattı alıw ushın arzaǵa usı statyanıń birinshi bólimindegi úshinshi abzacında kórsetilgen aktler qosa tirkeledi. (02.03.2015-j. 28/III-sanlı QR Nızamı tiykarında ózgerisler kirgizilgen) 12-statya. Mádeniy baylıqlardı waqıtsha alıp shıǵıw haqqındaǵı sertifikat beriwden bas tartıw (02.03.2015-j. 28/III-sanlı QR Nızamı tiykarında ózgerisler kirgizilgen) Mádeniy baylıqlardı waqıtsha alıp shıǵıw haqqındaǵı sertifikat tómendegi jaǵdaylarda berilmeydi, eger: (02.03.2015-j. 28/III-sanlı QR Nızamı tiykarında ózgerisler kirgizilgen) usı Nızamnıń 11-statyasında názerde tutılǵan hújjetler usınılmaǵan bolsa; waqıtsha alıp shıǵıladı dep járiyalanǵan mádeniy baylıqlardıń jaǵdayı olardıń saqlanıw sharayatların ózgertiw múmkinshiligin bermese; waqıtsha alıp shıǵıladı dep járiyalanǵan mádeniy baylıqlardıń menshik iyesi anıqlanbaǵan bolsa; mádeniy baylıqlar menshik huqıqı haqqındaǵı daw buyımı bolsa; mádeniy baylıqlardı waqıtsha alıp shıǵıw názerde tutılıp atırǵan mámlekette waqıtsha alıp shıǵılıp atırǵan mádeniy baylıqlardıń saqlanıwın támiyinlewge tosqınlıq etetuǵın tábiyiy apat júz bergende yamasa basqa jaǵdaylar payda bolǵanda. (26.12.2018-j. 225/XXIV-sanlı QR Nızamı tiykarında alıp taslanǵan) 13-statya. Waqıtsha alıp shıǵılǵan mádeniy baylıqlardı qorǵaw Qaraqalpaqstan Respublikasınan waqıtsha alıp shıǵılǵan mádeniy baylıqlardı qorǵaw Ózbekstan Respublikasınıń tiyisli mámleketlerdegi diplomatiya wákilxanaları tárepinen ámelge asırıladı. 14-statya. Waqıtsha alıp kirilgen mádeniy baylıqlardıń saqlanıwınıń kepillikleri Mámleket Qaraqalpaqstanǵa waqıtsha alıp kirilgen mádeniy baylıqlardıń belgilengen tártipte saqlanıwına kepillik beredi. (18.08.2018-j. 200/XXII-sanlı QR Nızamı tiykarında ózgeris kirgizilgen) 15-statya. Hár qıylı zatlardıń mádeniy baylıqlar bánesi menen alıp kiriliwin qadaǵan etiw Konstituciyalıq dúzimdi hám mámleketlik ǵárezsizlikti ıdıratıwǵa, aymaqlıq pútinlikti buzıwǵa qaratılǵan, urıstı, terrorshılıqtı, zorlıq kórsetiwdi, diniy ekstremizmdi, rasa ayırıwshılıqtı úgit-násiyatlawshı hár qıylı zatlardıń, sonday-aq pornografiyalıq mazmundaǵı materiallardıń mádeniy baylıqlar bánesi menen alıp kiriliwi qadaǵan etiledi. 16-statya. Mádeniy baylıqlardı nızamsız túrde alıp kiriwdiń hám qolǵa kirgiziwdiń aldın alıw Mádeniy baylıqlarǵa baylanıslı izlew járiyalanǵan bolsa, olar sońınan nızamlı menshik iyelerine qaytarıw maqsetinde uslap qalınıwı kerek. Basqa mámleketlerden nızamǵa qayshı túrde alıp shıǵılǵan, urlanǵan yamasa nızamǵa qayshı túrde qolǵa kirgizilgen mádeniy baylıqlardı qolǵa kirgiziwdiń aldın alıw maqsetinde muzeyler, málimleme-kitapxana mákemeleri, arxivlar, vedomstvolıq arxivler hám basqa da saqlaw orınları olardıń kelip shıǵıwı haqqında zárúr maǵlıwmatqa iye bolıwı shárt. (26.12.2018-j. 225/XXIV-sanlı QR Nızamı tiykarında ózgeris kirgizilgen) 17-statya. Mádeniy baylıqlardı realizaciya etiw Alıp shıǵılıwı múmkin bolmaǵan mádeniy baylıqlardı realizaciya etiw bul baylıqlardı Qaraqalpaqstan Respublikasınıń tısqarısına alıp shıǵılıwı múmkin emesligi haqqında qarıydar jazba túrde eskertilgennen keyin ǵana ámelge asırıladı. Mádeniy baylıqlardı kim zıyat sawdasına (aukcionǵa) qoyıw tiyisli wákilikli uyım menen kelisim tiykarında ámelge asırıladı. Mádeniy baylıqlardı realizaciya etiwde qatnasıwshı yuridikalıq shaxslar belgilengen tártipte tiyisli wákillikli uyımın xabardar etken halda ámelge asıradı. (30.11.2021-j. 180/XXIII-sanlı QR Nızamı tiykarında ózgerisler kirgizilgen) 18-statya. Mádeniy baylıqlar tranziti hám olardı pochta jóneltpelerinde jiberiw Mádeniy baylıqlardı Qaraqalpaqstan Respublikasınıń aymaǵı arqalı tranzit tártibinde alıp ótiw hám pochta jóneltpelerinde jiberiw nızam aktlerinde belgilengen tártipte ámelge asırıladı. (18.08.2018-j. 200/XXII-sanlı QR Nızamı tiykarında ózgerisler kirgizilgen) 19-statya. Mádeniy baylıqlarǵa insap penen iyelik etiwshiniń huqıqları Basqa mámleketlerden nızamsız túrde alıp shıǵılǵan, basqa mámleketlerde urlanǵan yamasa joytılǵan mádeniy baylıqlarǵa insap penen iyelik etiwshi olardı nızamlı menshik iyesine qaytarıp beriwi tiyis. Bunday jaǵdaylarda insap penen iyelik etiwshige belgilengen tártipte kompensaciya tólenedi. Usı statyanıń birinshi bólimine muwapıq qaytarılǵan mádeniy baylıqlar bajıxana tólewleri hám basqa jıyımlardan azat etiledi. Talap etiwshi tárep qaytarıp beriwge baylanıslı basqa qárejetlerdi kóteredi. 20-statya. Mádeniy baylıqlardı qaytarıw Mámleket nızamsız túrde alıp shıǵılǵan hám Qaraqalpaqstan Respublikasına qaytarılıwı tiyis bolǵan mádeniy baylıqlardı talap etip alıw ilajların kóredi. Qaraqalpaqstan Respublikası aymaǵınan onıń suverenligi járiyalanǵanǵa deyin nızamsız túrde alıp shıǵılǵan mádeniy baylıqlardı qaytarıw haqqındaǵı talaplarǵa baylanıslı dawa múddeti belgilenbeydi. Qaytarılǵan mádeniy baylıqlardıń menshik iyeleri olardı qaytarıp alıp kiriwde bajıxana tólemlerinen hám arnawlı jıyım tólewden azat etiledi. 21-statya. Mádeniy baylıqlardı kórkemlik ekspertizadan ótkeriw ushın arnawlı jıyım Mádeniy baylıqlardı kórkemlik ekspertizadan ótkeriw ushın belgilengen tártipte arnawlı jıyım tólenedi. (18.08.2018-j. 200/XXII-sanlı QR Nızamı tiykarında ózgerisler kirgizilgen) 22-statya.Mádeniy baylıqlar ushın bajıxana tólemleri Mádeniy baylıqlardı alıp kiriw hám alıp shıǵıwda nızam aktlerinde belgilengen tártipte bajıxana tólemleri alınadı. 23-statya. Mádeniy baylıqlardı alıp shıǵıw hám alıp kiriw haqqındaǵı nızam aktlerin buzǵanı ushın juwapkershilik Mádeniy baylıqlardı alıp shıǵıw hám alıp kiriw haqqındaǵı nızam aktlerin buzıwda ayıplı adamlar belgilengen tártipte juwapker boladı.