QARAQALPAQSTAN RESPUBLIKASÍNÍŃ NÍZAMÍ

25.06.1997-j. №265/I

MÁLIMLEME ALÍW KEPILLIKLERI HÁM ERKINLIGI HAQQÍNDA

Usı Nızamǵa tómendegilerge muwapıq ózgerisler kirgizilgen: 18.08.2018-j. 200/XXII-sanlı QR Nızamı 1-statya. Nızamınıń maqseti Bul nızam hár bir adamnıń málimlemeni erkin hám tosqınlıqsız alıwǵa yaki beriwge, izlewge hám izertlewge yamasa tarqatıwǵa baylanıslı konstituciyalıq huqıqın ámelge asırıwdıń barısında júzege keletuǵın qatnasıqların tártiplestiredi. 2-statya. Málimleme alıw kepillikleri hám erkinligi haqqında nızam hújjetleri Málimleme alıw kepillikleri hám erkinligi haqqındaǵı nızam hújjetleri Qaraqalpaqstan Respublikasınıń Konstituciyasınan, usı Nızamnan hám basqa da nızam aktlerinen ibarat boladı. 3-statya. Málimleme alıw kepillikleri Hár bir puqaranıń málimleme alıw huqıqına kepillik beriledi. Málimlemeni izlew, onı alıw hám izertlew yaki beriw yamasa tarqatıw huqıqı mámleket tárepinen qorǵaladı. 4-statya. Málimleme alıw erkinliginiń tiykarǵı principleri Málimleme alıw erkinliginiń tiykarǵı principleri málimlemeniń járiyalılıǵınan, hámmeniń alıw múmkinshiliginen, ashıq-aydınlıǵınan hám durıslıǵınan ibarat boladı. 5-statya. Málimleme alıwǵa baylanıslı soraw Hár bir adam málimleme sorap tikkeley ózi yamasa nızamlı wákiller arqalı múrájat etiw huqıqına iye. 6-statya. Soraw túrleri hám onı qarap shıǵıw múddetleri Málimleme alıwǵa baylanıslı soraw awızeki, jazba formada, sonday-aq málimleme sisteması arqalı elektron formada bolıwı múmkin. (18.08.2018-j. 200/XXII-sanlı QR Nızamı tiykarında ózgeris kirgizilgen) Jazba sorawda múrájat etiwshiniń ismi, ákesiniń ismi, familiyası, mákan jayı, soralatuǵın málimlemeniń ataması yamasa sıpatı kórsetiledi. Jazba sorawda múrájat etiwshiniń elektron mánzili kórsetiliw múmkin. Jazba sorawda elektron mánziliniń kórsetilgenligi múrájat etiwshiniń sorawǵa málimleme sisteması arqalı elektron formada juwap alıwǵa kelisimi bolıp esaplanadı. (18.08.2018-j. 200/XXII-sanlı QR Nızamı tiykarında ózgerisler kirgizilgen) Jazba sorawlar, sonıń ishinde elektron hújjet tárizinde jiberiletuǵın sorawlar dizimnen ótkeriliw shárt. (18.08.2018-j. 200/XXII-sanlı QR Nızamı tiykarında ózgerisler kirgizilgen) Sorawǵa múmkinshiligi bolǵanınsha qısqa múddette, eger nızam hújjetlerde basqa jaǵday názerde tutılǵan bolmasa, soraw alınǵan sáneden baslap on bes kúnnen keshiktirilmey juwap qaytarılıw kerek. (18.08.2018-j. 200/XXII-sanlı QR Nızamı tiykarında ózgeris kirgizilgen) Awızeki sorawǵa imkaniyatına qarap dárhal juwap beriliwi tiyis. Eger soraw túsken uyım yamasa lawazımlı shahs soralıp atırǵan málimlemege iye bolmasa, múrájat etiwshige bul haqqında soraw alınǵan sáneden baslap jeti kúnnen keshiktirilmey málim etiwge, sonday-aq imkaniyatına qarap oǵan bunday málimlemege iye bolǵan uyımnıń atamasın yamasa lawazımlı adamnıń ismin xabar etiwge minnetli. (18.08.2018-j. 200/XXII-sanlı QR Nızamı tiykarında ózgerisler kirgizilgen) 7-statya. Málimleme alıwdı támiyinlew Mámleketlik uyımlar, puqaralardıń ózin-ózi basqarıw uyımları, jámiyetlik birlespeler, kárxanalar, mákemeler, shólkemler hám lawazımlı adamlar hár kimge óziniń huqıqlarına, nızamlı máplerine qatnası bolǵan hújjetler, qararlar hám basqa da materiallar menen tanısıp shıǵıw imkaniyatın jaratıp beriwge minnetli. Málimleme alıw imkaniyatı tiyisli materiallardı járiyalaw hám tarqatıw jolı menen támiyinlenedi. 8-statya. Málimleme beriw hám oǵan haqı tólew Múrájat etiwshiniń huqıqlarına hám nızamlı máplerine qatnası bar málimleme onıń sorawı boyınsha biypul beriledi. Basqa málimlemeni bergeni ushın táreplerdiń kelisimi menen haqı alınıwı múmkin. 9-statya. Beriliwi múmkin bolmaǵan málimleme Mámleketlik uyımlar, puqaralardıń ózin-ózi basqarıw uyımları, jámiyetlik birlespeler, kárxanalar, mákemeler, shólkemler hám lawazımlı shaxslar mámleket sırı yamasa nızam menen qorǵalatuǵın basqa sırdan ibarat málimlemeni beriwi múmkin emes. (18.08.2018-j. 200/XXII-sanlı QR Nızamı tiykarında ózgerisler kirgizilgen) 10-statya. Málimleme deregin járiya etpew Ǵalaba xabar quralları málimleme deregin hám laqabın qoyǵan avtordıń kimligin onıń kelisimisiz járiya etiwge haqılı emes. Málimleme deregi yamasa avtordıń kimligi tek ǵana sudtıń sheshimi menen járiya etiledi. 11-statya. Málimlemeniń durıslıǵı ushın juwapkershilik Ǵalaba xabar quralları járiyalanatuǵın málimlemeniń durıslıǵın tekserip kóriwge minnetli hám olar málimleme beriwshi menen birlikte onıń durıslıǵı ushın nızamda belgilengen tártipte juwapker boladı. 12-statya. Shaǵım etiw huqıqı Mámleketlik uyımlardıń, puqaralardıń ózin-ózi basqarıw uyımlarınıń, jámiyetlik birlespelerdiń, kárxanalardıń, mákemelerdiń, shólkemlerdiń hár lawazımlı adamlardıń puqaralardıń málimleme alıw huqıqın kemsitetuǵın háreketleri yamasa háreketsizligi ústinen sudqa shaǵım etiliwi múmkin. 13-statya. Málimleme alıw huqıqın buzǵanı ushın juwapkershilik Málimleme alıw huqıqınıń buzılıwında ayıplı bolǵan adamlar nızamǵa muwapıq juwapkershilikke tartıladı. 14-statya. Málimleme alıw kepillikleri hám erkinligi salasındaǵı xalıq aralıq shártnamalar Eger Qaraqalpaqstan Respublikasınıń aymaǵındaǵı hárekettegi xalıq aralıq shártnamada bul nızamda názerde tutılǵannan basqa rejeler belgilengen bolsa, xalıq aralıq shártnama qádeleri qollanıladı.