QARAQALPAQSTAN RESPUBLIKASÍNÍŃ MÁMLEKETLIK BAYRAǴÍ HAQQÍNDA
QARAQALPAQSTAN RESPUBLIKASÍNÍŃ NÍZAMÍ
14.12.1992-j. №229/XII
QARAQALPAQSTAN RESPUBLIKASÍNÍŃ MÁMLEKETLIK BAYRAǴÍ HAQQÍNDA
Usı Nızamǵa tómendegilerge muwapıq ózgerisler kirgizilgen:
09.04.1993-j. 229/XII-sanlı QR Nızamı
29.08.2005-j. 49/III-sanlı QR Nızamı
21.10.2011-j. 99/VII-sanlı QR Nızamı
28.12.2020-j. 88/XII-sanlı QR Nızamı
30.12.2022-j. 299/XL-sanlı QR Nızamı
26.12.2023-j 363/XLVII-sanlı QR Nızamı
14.05.2024-j. 378/XLIX-sanlı QR Nızamı
1-statya. Qaraqalpaqstan Respublikası Mámleketlik bayraǵınıń sxematikalıq hám reńli táriyplemesi (qosa tigiledi) tastıyıqlansın.
2-statya. Qaraqalpaqstan Respublikasınıń Mámleketlik bayraǵı Qaraqalpaqstan Respublikasınıń mámleketlik suverenliginiń simvolı bolıp tabıladı. (21.10.2011-j. 99/VII-sanlı QR Nızamı tiykarında ózgerisler kirgizilgen)
3-statya. Qaraqalpaqstan Respublikasınıń Mámleketlik bayraǵı: Qaraqalpaqstan Respublikası aymaǵında ótkeriletuǵın xalıqaralıq konferenciyalarda, kórgizbelerde, sport jarıslarında Qaraqalpaqstan Respublikasın tanıtadı.
4-statya. Qaraqalpaqstan Respublikasınıń mámleketlik bayraǵı tuwrı múyeshli borlat bolıp, ol aspan kók, toyǵın Sarı hám jasıl reńlerdiń úsh gorizontal jolaqlarınan ibarat. Toyǵın Sarı reńiniń jolaǵın aq hám qızıl jiyekler menen ajıratıp turadı.
Qaraqalpaqstan Respublikasınıń Mámleketlik bayraǵınıń uzınlıǵı – 250 sm, eni – 125 sm. Aspan kók hám jasıl jolaqlardıń óz-ara teń hám 42 sm di quraydı. Bayraqtıń ortasına jaylasqan toyǵın Sarı reńdegi jolaqtıń eni 34 sm. Aq jiyeklerdiń eni – 1,0 sm., qızıl jiyeklerdiń eni – 2,5 sm den ibarat.
Joqarǵı aspan kók jolaqta aq reńli yarım ay súwretlengen (onıń dóńes jaǵı bayraqtıń tayaqshasına qaratılǵan) hám onıń oń tárepinde (eger bayraqtıń bet jaǵınan qaraǵanda) óz-ara teń, aq reńli bes qırlı juldız bar.
Aq reńli yarım ay, diametrleri sáykes 22 sm hám 19 sm bolǵan eki sheńberdiń kesisiwinen payda bolıp, ol sheńberlerdiń orayları aspan kók túsindegi jolaqtı teńdey ekige bólip turǵan tuwrı sızıqta jatadı. Usı sheńberlerdiń orayları arasındaǵı aralıq – 4 sm. Qaraqalpaqstan Respublikasınıń Mámleketlik bayraǵınıń tayaqshasınan yarım ayǵa deyingi aralıq – 20 sm.
Aq reńli bes qırlı juldızlar 34 sm x 18 sm muǵdarındaǵı tuwrı múyeshlikke úylesip tur. Qaraqalpaqstan Respublikasınıń Mámleketlik bayraǵınıń tayaqshasınan tuwrı múyeshlikke deyingi aralıq – 42 sm.
Aq reńli bes qırlı juldız eki qatarǵa tómendegishe jaylasqan: joqarǵı qatar eki juldızdan, tómengi qatar – úsh juldızdan ibarat; hár bir juldız diametri 10 sm bolǵan sheńberge úylesedi. Aq reńli yarım aydıń tómengi noqatı hám tómengi qatardaǵı juldızlar nurlarınıń shıńları joqarǵı aq jiyekten 10 sm aralıqta jaylasqan gorizontal sızıq penen baylanısadı. Qaraqalpaqstan Respublikasınıń Mámleketlik bayraǵınıń betki hám sırtqı tárepleri bayraqtıń tayaqshası simmetriyalı keledi. (21.10.2011-j. 99/VII-sanlı QR Nızamı tiykarında ózgerisler kirgizilgen)
5-statya. Qaraqalpaqstan Respublikası Mámleketlik bayraǵı:
1) turaqlı túrde:
Qaraqalpaqstan Respublikası Joqarǵı Keńesiniń;
Qaraqalpaqstan Respublikası Ministrler Keńesiniń;
Qaraqalpaqstan Respublikası Konstituciyalıq baqlaw komitetiniń;
respublika aymaǵındaǵı atqarıwshı hákimiyat uyımlarınıń;
Ózbekstan Respublikası Mámleketlik qáwipsizlik xızmeti Qaraqalpaqstan Respublikası boyınsha basqarmasınıń;
Ózbekstan Respublikası Milliy gvardiyası Qaraqalpaqstan Respublikası boyınsha basqarmasınıń;
Ózbekstan Respublikası Oraylıq banki Qaraqalpaqstan Respublikası Bas basqarmasınıń;
Qaraqalpaqstan Respublikası Oraylıq saylaw komissiyasınıń; jergilikli mámleketlik hákimiyat uyımlarınıń; sudlardıń;
prokuratura uyımlarınıń imaratlarında; (5-statyanıń birinshi bólimine Qaraqalpaqstan Respublikasınıń 2023-jıl 26-dekabrdegi 363/XLVII-sanlı Nızamı tiykarında ózgerisler kirgizilgen)
2) turaqlı túrde:
Qaraqalpaqstan Respublikası Joqarǵı Keńesiniń;
Qaraqalpaqstan Respublikası Ministrler Keńesiniń;
Qaraqalpaqstan Respublikası Konstituciyalıq baqlaw komitetiniń;
Qaraqalpaqstan Respublikası sudınıń;
Qaraqalpaqstan Respublikası hákimshilik sudınıń;
respublika aymaǵındaǵı atqarıwshı hákimiyat uyımlarınıń;
Qaraqalpaqstan Respublikası prokuraturasınıń;
Ózbekstan Respublikası Mámleketlik qáwipsizlik xızmeti Qaraqalpaqstan Respublikası boyınsha basqarmasınıń;
Ózbekstan Respublikası Milliy gvardiyası Qaraqalpaqstan Respublikası boyınsha basqarmasınıń;
Ózbekstan Respublikası Oraylıq banki Qaraqalpaqstan Respublikası Bas basqarmasınıń;
Qaraqalpaqstan Respublikası Oraylıq saylaw komissiyasınıń;
jergilikli mámleketlik hákimiyat uyımlarınıń májilisler zallarında; (5-statyanıń birinshi bólimine Qaraqalpaqstan Respublikasınıń 2023-jıl 26-dekabrdegi 363/XLVII-sanlı Nızamı tiykarında ózgerisler kirgizilgen)
3) turaqlı túrde:
Qaraqalpaqstan Respublikası Joqarǵı Keńesi Baslıǵınıń;
Qaraqalpaqstan Respublikası Ministrler Keńesi Baslıǵınıń;
Qaraqalpaqstan Respublikası Konstituciyalıq baqlaw komiteti baslıǵınıń;
Qaraqalpaqstan Respublikası sudı, Qaraqalpaqstan Respublikası hákimshilik sudı baslıqlarınıń;
respublika aymaǵındaǵı atqarıwshı hákimiyat uyımları basshılarınıń;
Qaraqalpaqstan Respublikası prokurorınıń;
Ózbekstan Respublikası Mámleketlik qáwipsizlik xızmeti Qaraqalpaqstan Respublikası boyınsha basqarması baslıǵınıń;
Ózbekstan Respublikası Milliy gvardiyası Qaraqalpaqstan Respublikası boyınsha basqarması baslıǵınıń;
Ózbekstan Respublikası Oraylıq banki Qaraqalpaqstan Respublikası Bas basqarması baslıǵınıń;
Qaraqalpaqstan Respublikası Oraylıq saylaw komissiyası baslıǵınıń; rayon hám qala hákimleriniń xızmet xanalarında kóteriledi;
(5-statyanıń birinshi bólimine Qaraqalpaqstan Respublikasınıń 2023-jıl 26-dekabrdegi 363/XLVII-sanlı Nızamı tiykarında ózgerisler kirgizilgen)
4) Ózbekstan Respublikasınıń hám Qaraqalpaqstan Respublikasınıń nızamları menen belgilengen bayram kúnlerinde - Qaraqalpaqstan Respublikası Ministrler Keńesiniń, rayon hám qala hákimleriniń qararları menen belgilengen oraylıq kóshelerde, maydanlarda, basqa da jámiyetlik orınlarda hám obektlerinde;
5) Ózbekstan Respublikasınıń Prezidenti saylawı, Ózbekstan Respublikası Oliy Majlisiniń Nızamshılıq palatası deputatların, Senat aǵzaların, Qaraqalpaqstan Respublikası Joqarǵı Keńesi deputatlarınıń, xalıq deputatları rayonlıq, qalalıq Keńesleriniń deputatların saylaw yamasa referendum kúnleri dawıs beriw imaratları hám xanalarda kóteriledi;
6) Qaraqalpaqstan Respublikası húkimetiniń buyrıǵı boyınsha;
7) sport maydanlarında - Qaraqalpaqstan Respublikasınıń chempionatları hám birinshilikleri, milliy saylandı komandalardıń qatnasıwında Qaraqalpaqstan Respublikası aymaǵında xalıq aralıq sport jarısların ótkeriw waqtında hám milliy saylandı komandalarınıń wákilleri bolǵan jarıs jeńimpazların sıylıqlaw máresimleri waqtında Ózbekstan Respublikası Mámleketlik bayraǵı kóterilgennen keyin.
Qaraqalpaqstan Respublikasınıń Mámleketlik bayraǵı oǵan bolǵan tiyisli dárejedegi húrmet támiyinlengen halda, onnan usı statyanıń birinshi bóliminde kórsetilmegen obektlerde, sonday-aq ulıwmalıq bayramlarda, sport jarıslarında, ǵalabalıq fizikalıq tárbiya ilajlarında, mádeniy hám basqa ǵalabalıq ilajlarda, rásmiy xalıqaralıq ilajlarda, saltanatlı ilajlarda, shańaraqlıq bayramlarda, eslew sánelerin belgilewde, jámiyetlik hám mámleketlik ǵayratkerlerdiń, áskeriy xızmetkerlerdiń jerlew ilajlarında hámde basqa jaǵdaylarda, sonıń menen birge aǵash sabın (bayraq sabın) qollanbastan paydalanılıwı múmkin. (5-statyanıń ekinshi bólimine Qaraqalpaqstan Respublikasınıń 2023-jıl 26-dekabrdegi 363/XLVII-sanlı Nızamı tiykarında ózgerisler kirgizilgen)
Ózbekstan Respublikası hám Qaraqalpaqstan Respublikasınıń Mámleketlik bayraǵına bolǵan húrmetti támiyinlegen halda, onnan jámiyetlik orınlarda, imaratlar hám basqa obektlerde, jasaw yamasa jumıs orınlarında, sonday-aq olarǵa tutas bolǵan aymaqlarda, transport quralınıń salonında paydalanılıwı múmkin.
(5-statyanıń úshinshi bólimi Qaraqalpaqstan Respublikasınıń 2023-jıl 26-dekabrdegi 363/XLVII-sanlı Nızamına tiykar tolıqtırılǵan)
52 -statya. Qaraqalpaqstan Respublikasınıń Mámleketlik bayraǵı:
Usı Nızamnıń 5-statyasınıń 4-bántinde názerde tutılǵan jaǵdaylarda saat 6 da kóteriledi hám saat 22 de túsirip qoyıladı;
Usı Nızamnıń 5-statyasınıń 5-bántinde názerde tutılǵan jaǵdaylarda dawıs beriw yamasa referendum ótkiziw dáwirinde kóterilip qoyıladı.
52 -statya. Qaraqalpaqstan Respublikası Mámleketlik bayraǵınıń táriyiplemesi túsirilgen belgiler:
Qaraqalpaqstan Respublikasına tiyislilikti belgilew maqsetinde mámleketlik uyımlarınıń simvolikalıq nıshanlarında (bayram, emblemageraldikalıq belgi, vımpel hám basqa nıshanlar) hám olardıń Internet jáhán málimleme tarmaǵındaǵı rásmiy veb-saytlarında, Qaraqalpaqstan Respublikasınıń mámleketlik sıylıqlarınıń tiykarı yamasa elementi sıpatında, sonday-aq Qaraqalpaqstan Respublikasına tiyislilikti belgilew maqsetinde predmetlerde, oqıw-tárbiya processinde Qaraqalpaqstan Respublikası Mámleketlik bayraǵınıń súwreti túsirilgen belgilerden paydalanılıwı múmkin.
Ózbekstan Respublikası hám Qaraqalpaqstan Respublikasınıń Mámleketlik bayraǵına bolǵan húrmetti támiyinlegen halda, onıń súwreti túsirilgen belgilerden jámiyetlik orınlarda, imaratlar hám basqa obektlerde, jasaw yamasa jumıs orınlarında, sonday-aq olarǵa tutas bolǵan aymaqlarda, transport quralınıń salonında paydalanılıwı múmkin.
52-statyasına Qaraqalpaqstan Respublikasınıń 2023-jıl 26-dekabrdegi 363/XLVII-sanlı Nızamı tiykarında ózgerisler kirgizilgen)
53-statya. Qaraqalpaqstan Respublikası Mámleketlik bayraǵınıń elementlerin mámleketlik emes shólkemler hújjetleriniń rekvizitleri yamasa reklama materiallarına kirgiziliwine jol qoyılmaydı.
Qaraqalpaqstan Respublikasınıń Mámleketlik bayraǵınıń súwreti túsirilgen belgilerden islep shıǵarıp atırǵan yamasa realizaciya etilip atırǵan tovarlardı (jumıslardı, xızmetlerdi) ótkiziw ushın kommerciyalıq maqsetlerde paydalanıw múmkin emes, Qaraqalpaqstan Respublikasınıń Mámleketlik bayraǵına bolǵan húrmetti támiyinlegen halda onıń súwreti túsirilgen belgilerden ústki kiyimdi bezetiw yamasa Qaraqalpaqstan Respublikasına tiyislilikti belgilew maqsetinde paydalanıw bunnan tısqarı.
Qaraqalpaqstan Respublikasınıń Mámleketlik bayraǵına húrmetsiz múnásibette bolıw, sonday-aq:
Qaraqalpaqstan Respublikasınıń Mámleketlik bayraǵınan hám onıń súwreti túsirilgen belgilerden jırtılǵan, pataslanǵan, tesilgen, reńi óshken halda hám basqa orınsız túrde paydalanıwǵa;
Qaraqalpaqstan Respublikasınıń Mámleketlik bayraǵınan qandayda bir zat ushın ústki japqısh retinde paydalanıwǵa;
Qaraqalpaqstan Respublikasınıń Mámleketlik bayraǵın stollarǵa, otırǵıshlarǵa, stullarǵa tósewge yamasa onıń súwretin túsiriwge hám onnan qaplaw retinde paydalanıwǵa, sonday-aq onı otırılatuǵın basqa orınlarǵa yaki ayaq astına tósewge yamasa onıń súwretin túsiriwge;
Qaraqalpaqstan Respublikasınıń Mámleketlik bayraǵınan kiyimkenshek, qol oramal yamasa kórpe-tósek retinde, sonıń menen birge buyımlardı saqlaw hám tasıw ushın paydalanıwǵa;
Qaraqalpaqstan Respublikasınıń Mámleketlik bayraǵınıń súwreti túsirilgen belgilerdi ayaq-kiyimge, qol oramalǵa, kórpe-tósekke, ishki kiyimge, súlgilerge, qutılarǵa (oramlarǵa), bir márte paydalanıw hám taslap jiberiw ushın mólsherlengen buyımlarǵa basıp shıǵarıwǵa yamasa onıń súwretin basqasha tárizde túsiriwge;
Qaraqalpaqstan Respublikasınıń Mámleketlik bayraǵınan hám onıń súwreti túsirilgen belgilerden ádep-ikramlılıq qaǵıydaları hám jámiyette júris-turıs qaǵıydalarına qayshı ráwishte yamasa olardı masqaralaytuǵın basqasha tárizde paydalanıwǵa jol qoyılmaydı.
Mámleketlik emes kommerciyalıq emes shólkemlerdiń simvolikalıq nıshanları Qaraqalpaqstan Respublikasınıń Mámleketlik bayraǵına uqsas bolıwı múmkin emes.
(53-statyası Qaraqalpaqstan Respublikasınıń 2023-jıl 26-dekabrdegi 363/XLVII-sanlı Nızamına tiykar tolıqtırılǵan)
6-statya. Qaraqalpaqstan Respublikasınıń Mámleketlik bayraǵı menen bir waqıtta Ózbekstan Respublikasınıń Mámleketlik bayraǵı kóterilgende Qaraqalpaqstan Respublikasınıń Mámleketlik bayraǵı (imarattıń aldıńǵı jaǵına qarap turǵanda) oń tárepinen kóteriliwi kerek.
Qaraqalpaqstan Respublikasınıń Mámleketlik bayraǵı menen bir waqıtta bir neshe mámleketler hám (yamasa) xalıq aralıq shólkemlerdiń bayraqları kóterilgende Qaraqalpaqstan Respublikasınıń Mámleketlik bayraǵı xalıq aralıq huqıq normalarına muwapıq kóteriledi.
Qaraqalpaqstan Respublikasınıń Mámleketlik bayraǵı basqa mámleketler hám (yamasa) xalıq aralıq shólkemlerdiń bayraqları menen teń dárejede kóteriliwi kerek. (21.10.2011-j. 99/VII-sanlı QR Nızamı tiykarında ózgerisler kirgizilgen)
7-statya. Qaraqalpaqstan Respublikasınıń Mámleketlik bayraǵı jaylarda úlken kirer awızdıń tóbesinde yamasa bunıń ushın qolaylı orında, yamasa kiydiriletuǵın sapta, yamasa flagshtokta kóteriledi, bunda bayraqtıń sabı jaydıń fasadı menen qosa 45 gradustan aspaytuǵın múyeshti payda etedi.
Kóterilgen Qaraqalpaqstan Respublikası Mámleketlik bayraǵınıń borlatı jerden eń keminde 2,5 metr bálentlikte bolıwı kerek. (21.10.2011-j. 99/VII-sanlı QR Nızamı tiykarında ózgerisler kirgizilgen)
8-statya. Aza tutıwǵa baylanıslı Qaraqalpaqstan Respublikası Joqarǵı Keńesi Prezidiumınıń sheshimi boyınsha Qaraqalpaqstan Respublikasınıń mámleketlik bayraǵı azalı bezeliwinde kóteriliwi múmkin. Bul jaǵdayda Qaraqalpaqstan Respublikası Mámleketlik bayraǵınıń sabınan yamasa flagshtoktan joqarǵı ushına eni bayraqtıń eniniń jigirmadan birine (1/20) teń qara lenta bekitiledi, onıń eki ushı bayraqtıń pútkil enine salbırap turadı.
Qaraqalpaqstan Respublikasınıń Mámleketlik bayraǵı aza tutıwǵa baylanıslı flagshtokta kóterilgende ol flagshtok uzınlıǵınıń úshten birine (1/3) túsiriledi. (21.10.2011-j. 99/VII-sanlı QR Nızamı tiykarında ózgerisler kirgizilgen)
9-statya. Qaraqalpaqstan Respublikasınıń Mámleketlik bayraǵı hám onıń táriyplemesi kólemine qaramastan usı Nızamǵa qosa tigilgen reńli hám sxematikalıq táriyplerine bárqulla tuwrı keliwi tiyis.
Qaraqalpaqstan Respublikasınıń Mámleketlik bayraǵın tayarlaw, saqlaw hám joq qılıw tártibi Qaraqalpaqstan Respublikası Ministrler Keńesi tárepinen belgilenedi. (21.10.2011-j. 99/VII-sanlı QR Nızamı tiykarında ózgerisler kirgizilgen)
10-statya. Usı Nızam orınlanıwın támiyinlew tiyisli mámleketlik hákimiyat uyımları hám basqa shólkemler basshılarına júklenedi. (21.10.2011-j. 99/VII-sanlı QR Nızamı tiykarında ózgerisler kirgizilgen)
11-statya. Usı Nızamnıń mámleketlik uyımlar hám shólkemler tárepinen orınlanıwı ústinen baqlaw ishki isler uyımları tárepinen ámelge asırıladı. (21.10.2011-j. 99/VII-sanlı QR Nızamı tiykarında ózgerisler kirgizilgen)
Qaraqalpaqstan Respublikasınıń Mámleketlik bayraǵınan hám onıń súwreti túsirilgen belgilerden pútin (jırtılmaǵan, tesilmegen) taza (pataslanbaǵan), reńi óshpegen halda hám maqul tárizde paydalanıw ushın juwapkershilik usı Nızamǵa muwapıq Qaraqalpaqstan Respublikasınıń Mámleket bayraǵınan hám onıń súwreti túsirilgen belgilerden paydalanatuǵın fizikalıq hám yuridikalıq shaxslarǵa, sonday-aq mámleketlik uyımlarǵa júklenedi. (11-statyanıń ekinshi bólimi Qaraqalpaqstan Respublikasınıń 2023-jıl 26-dekabrdegi 363/XLVII-sanlı Nızamına tiykar tolıqtırılǵan)
12-statya. Qaraqalpaqstan Respublikasınıń puqaraları, sonday-aq Qaraqalpaqstandaǵı basqa da adamlar Qaraqalpaqstan Respublikasınıń Mámleketlik bayraǵın húrmetlewi shárt.
Qaraqalpaqstan Respublikasınıń Mámleketlik bayraǵı haqqındaǵı nızamshılıǵın buzǵanlıqta ayıpker shaxslar belgilengen tártipte juwapker boladı. (14.05.2024-j. 378/XLIX-sanlı QR Nızamına tiykar ózgerisler kirgizilgen)