Qaraqalpaqstan Respublikası Ministrler Keńesi janındaǵı máhállelerdi qollap-quwatlaw qorın shólkemlestiriw haqqında Ózbekstan Respublikası Prezidentiniń qararı
Qaraqalpaqstan Respublikasında máhálleler infrastrukturaların jetilistiriw, xalıqtıń turmıs sharayatların jáne de jaqsılaw, máhállelerdi sociallıq-ekonomikalıq rawajlandırıwǵa qaratılǵan baǵdarlamalardıń orınlanıwın hám mashqalalardıń nátiyjeli hám jedel sheshiliwin qarjılay hám materiallıq jaqtan támiyinlew maqsetinde:
1. Qaraqalpaqstan Respublikası Ministrler Keńesi janında yuridikalıq tárep statusına iye bolmaǵan Máhállelerdi qollap-quwatlaw qorı (keyingi orınlarda – Qor) shólkemlestirilsin. Qordıń Baqlaw keńesi baslıǵı etip Qaraqalpaqstan Respublikası Joqarǵı Keńesi Baslıǵı (A.Orınbaev) belgilensin.
2. Ekonomika hám qarjı ministrligi bir hápte múddette: 2023-jıl dawamında Qaraqalpaqstan Respublikasındaǵı 452 máhálle puqaralar jıyınlarınıń hár birine 500 mln sumnan qarjı qaratıw; máhállede jınayatshılıqtıń aldın alıw hám adabanlastırıw jumısların támiyinlewge óz úlesin qosqan intaker puqaralar, máhállelerdegi kóshebası hám úybasıların xoshametlew maqsetinde respublika aymaqların sociallıq-ekonomikalıq rawajlandırıw ushın názerde tutılǵan qarjılar esabınan Qorǵa jámi 228 mlrd sum muǵdarında qarjı ajıratıw ilajların kórsin.
3. Joybarlar máhálle baslıqları tárepinen hákim járdemshileri menen birgelikte máhállede jasaytuǵın xalıqtıń aymaqtaǵı mashqalalardı saplastırıw boyınsha usınısları ulıwmalastırılǵan halda qáliplestiriletuǵını; Qordıń Baqlaw keńesi (A.Orınbaev) bes kún ishinde joybarlardı kórip shıǵıp, Qordan qarjılar ajıratıw boyınsha qarar qabıl etedi; máhálle baslıqları tárepinen qáliplestirilgen hám basqarılatuǵın joybarlardı qarjılandırıw ushın hár bir máhálle puqaralar jıyınları ushın óz aldına esap betleri ashıladı. Bunda, joybarlardı ámelge asırıw menen baylanıslı barlıq processleri, sonıń ishinde, tovarlar (jumıslar, xızmetler)dı satıp alıw boyınsha tańlaw (tender) sawdaların ótkeriw, ámelge asırılǵan jumıslar ushın tólemlerdi ámelge asırıw, orınlanǵan jumıslardı qabıllaw máhálle puqaralar jıyınları baslıqları tárepinen ámelge asırılatuǵını belgilensin.
4. Ministrler Kabineti bir hápte múddette Qaraqalpaqstan Respublikası Ministrler Keńesi janındaǵı Máhállelerdi qollap-quwatlaw qorı haqqındaǵı rejeni tastıyıqlasın.
5. Usı qarardıń orınlanıwın qadaǵalaw Bas ministr orınbasarı J.A.Kwchqorov hám Qaraqalpaqstan Respublikası Ministrler Keńesi Baslıǵı F.U.Ermanovqa júklensin.
Ózbekstan Respublikası Prezidenti Sh. MIRZIYОEV Tashkent q., 2023-jıl 13-iyul, PQ-228-sanlı