Ózbekstan Respublikasında Turizm infrastrukturasın jaqsılaw hám sırt elli turistlerdiń aǵımın jáne de arttırıwǵa qaratılǵan qosımsha ilajlar haqqında Ózbekstan Respublikası Prezidentiniń Pármanı

Mámleketimiz aymaqlarında jańa turizm industriyası obektlerin kóbeytiw arqalı qolaylı sayaxat etiw ushın zárúr sharayatlar jaratıw, jáhán bazarında milliy turizm ónimlerin jedel úgit-násiyatlawdıń zamanagóy mexanizmlerin engiziw, ishki turizm imkaniyatların jáne de keńeytiw, transport logistikasındaǵı mashkalalardı sheshiw, sonday-aq, tarawǵa tikkeley investiciyalardı tartıw maqsetinde: 1. Sonday tártip ornatılsın, oǵan muwapıq, turizm tarawında qolaylı isbilermenlik ortalıqtı jaratıw hám turizm xızmetleri eksportın keńeytiw maqsetinde: a) 2024-jıl 1-sentyabrden baslap kiriw turizminiń jumısın ámelge asıratuǵın Ózbekstan Respublikası rezidenti bolgan turoperatorlardı sırt mámleketlerden respublikaǵa turistlerdi alıp keliwde aylanba qarjı menen támiyinlew ushın Tikleniw hám rawajlanıw qorı tárepinen respublikalıq kommerciyalıq bankleri arqalı 50 million AQSh dolları ekvivalentinde milliy valyutada jıllıq 14 procent stavkada kredit liniyası ashıladı. Onda: kommerciyalıq bankler tárepinen Tikleniw hám rawajlanıw qorı resursları esabınan ajıratılatuǵın kreditler boyınsha belgilengen jıllıq procent stavkası quramında bank marjası 3 procentten artpaǵan muǵdarda ornatıladı; kredit qarjıları turoperatorlarǵa 2 jıllıq jeńillikli dáwir (procent hám tiykarǵı qarızdan) menen 10 jıl múddetke ajıratıladı; Tikleniw hám rawajlanıw qorı tárepinen kommerciyalıq banklerge resurslar 3 jıllıq jeńillikli dáwir menen 12 jıl múddetke ajıratıladı; b) 2025-jıl 1-avgustqa shekem Qaraqalpaqstan Respublikasında dizimge alınıp, licenziyaǵa iye bolgan turoperatorlarǵa, esaptan tısqarı, ekstremal túrlerdi shólkemlestiriw ushın dvigatel kólemi 2,4 litrden kem bolmaǵan joqarı ótiw qábiletine iye transport quralları import etilip atırǵanda bajıxana bajı hám uitilizaciya jıyımın ámeldegi stavkanıń 25 procenti muǵdarında 3 jıl múddetke bólip-bólip tólewge ruxsat etiledi. Bunda, usı transport quralı import etilgen kúnnen baslap 3 jıl dawamında Qaraqalpaqstan Respublikası aymaǵınan tısqarıda paydalanılǵanlıǵı, basqa shaxslarǵa satılǵanlıǵı yaki ótkerilgenligi yaki ijaraǵa berilgenligi anıqlanǵan jaǵdayda, bajıxana bajı hám utilizaciya jıyımı tolıq kólemde import etilgen shaxstan óndirip alınadı; v) 2025-jıl 1-avgustqa shekem turizm tarawında jumıs alın baratuǵın isbilermenlik subektleri tárepinen import etiletuǵın avtobus hám mikroavtobus bajıxana bajınan azat etiledi. Onda: bul jeńillikler Ózbekstan Respublikası bajıxana aymaǵına alıp kirilip atırǵan jańadan islep shıǵarılǵan, «Evro-5» hám onnan joqarı ekologiyalıq kategoriya talaplarına sáykes keletuǵın avtobus hám aydawshıdan tısqarı segiz hám onnan artıq orınlıqlarǵa iye bolǵan mikroavtobuslar ushın beriledi; import etilgen avtobuslar hám mikroavtobuslar import etilgen kúnnen baslap úsh jıl dawamında basqa shaxsqa satılǵan yaki ótkerilgen yaki ijaraǵa berilgen jaǵdayda, berilgen jeńillikler biykar etiledi hám bajıxana bajı belgilengen tártipte tolıq kólemde import etilgen shaxstan óndirip alınadı; g) Ekologiya, qorshaǵan ortalıqtı qorǵaw hám klimat ózgeriwi ministrligi janındaǵı turizm komiteti (keyingi orınlarda – Turizm komiteti) tárepinen dizimi qáliplestiriletuǵın xalıqaralıq turizm yarmarkaları hám kórgizbelerinde turizm tarawındaǵı isbilermenler, ónermentler, mádeniyat hám kórkem óner wákilleri qatnasadı. Bunda, 2025-jıl 1-yanvardan baslap: xalıqaralıq turizm yarmarkası hám kórgizbeleri ushın Qaraqalpaqstan Respublikası, wálayatlar hám Tashkent qalalıq jergilikli byudjetinen 1 milliard sumnan kem bolmaǵan qarjı ajıratıladı; jumıs baslaǵanına 3 jıldan kóp bolmaǵan turoperatorlardıń xalıqaralıq turizm yarmarka hám kórgizbelerdegi pavilon ijarası qárejetiniń 50 procenti Turizm komitetiniń byudjettan tısqarı Turizmdi qollap-quwatlaw qorı (keyingi orınlarda – Qor) qarjıları esabınan qaplap beriledi; ónermentlerdiń xalıqaralıq turizm yarmarkaları hám kórgizbelerindegi pavilon ijarası, olardı kórsetilgen ónimlerdi tasıw hám aviabilet qárejetleriniń 50 procenti Kámbaǵallıqtı qısqartıw hám bántlik ministrligi janındaǵı Ónermentshilik hám bólip alıp islewdi qollap-quwatlaw qorınıń qarjıları esabınan qaplap beriledi. 2. Tómendegiler: Turizmdi rawajlandırıw boyınsha respublikalıq jámiyetlik keńesi (keyingi orınlarda – Respublikalıq keńesi) quramı 1-qosımshaǵa muwapıq; Turizmdi rawajlandırıw boyınsha jergilikli jámiyetshilik keńesleriniń (keyingi orınlarda – jergilikli keńes) úlgi quramı 2-qosımshaǵa muwapıq; Sırt el hám jergilikli turistlerdiń aǵımın jáne de arttırıw boyınsha «jol kartası» 3-qosımshaǵa muwapıq tastıyıqlansın. 3. Turizm komitetiniń Ózbekstan Respublikasınıń turizm ónimin xalıqaralıq hám ishki turizm bazarlarında úgit-násiyatlaw, sayaxat hám dem alıw ushın qáwipsiz mámleket sıpatındaǵı imidjin jáne de bekkemlewge qaratılǵan tómendegilerdi názerde tutatuǵın jańa milliy turizm brendin (tanıtıw belgisi) jaratıw haqqındaǵı usınısqa razılıq berilsin: marketing hám brending konsalting kompaniyaların tartqan halda Ózbekstan Respublikasınıń jańa milliy turizm brendi (keyingi orınlarda – turizm brendi) n islep shıǵıw; turizm brendiniń maqsetli bazarlar (auditoriya) talaplarınan kelip shıǵıp, sırt mámleketlerde Ózbekstannıń tariyxı, mádeniy, gastronomiyalıq, medicinalıq hám salamatlandırıw, arxeologiyalıq, ekologiyalıq hám ekstremal sıyaqlı turizmniń túrleri haqqında kontentler jaratıw; zamanagóy marketing texnologiyalarınan, sonıń menen bir qatarda, xalıqaralıq media hám sociallıq platformalar, pútkil jer júzilik sport, mádeniyat hám kórkem óner ilajları maydanınan paydalanǵan halda turizm brendin úgit-násiyatlaw sistemasın jaratıw. 4. Turizm komiteti: 2024-jıl 1-oktyabrge shekem jańa milliy turizm brendin jaratıw ushın tańlaw ótkersin; 2024-jıl Xalıqaralıq turizm kúni sheńberinde birinshi global turizm mediakampusın shólkemlestirsin; 2024-2025-jılları auditoriyası 10 millionnan artıq bolǵan 50ge shekem sırt el jurnalist, bloger, vloger hám inflyuenserlerdi tartsın. 5. Belgilensin: a) Ózbekstan Respublikası rezidenti bolgan turoperatorlardıń óz ónimlerin úgit-násiyatlaw maqsetinde respublikaǵa alıp kelgen belgili sırt elli blogerlerdiń (auditoriyası 1 millionnan az bolmaǵan) jasaw qárejetleri Qor qarjıları esabınan qaplap beriledi. Onda, belgili blogerlerdi alıp keliw boyınsha qarejetler smetası Turizm komiteti menen aldınnan kelisiledi; b) Respublika keńesi hár sherekte keminde bir márte, jergilikli keńesler hár ayda bir márte turizm tarawı subektleriniń jumısı, turizm infrastrukturası hám transport logistikası tarawlarında payda bolıp atırǵan mashqalalardı kórip shıǵıp, olardı saplastırıw hám máwsim aldı tayarlıq kóriw hám aldınnan xabar beriw tártibi tiykarında jumıs alıp baradı; v) 2025-jıl 1-yanvardan baslap keminde 100 sırt elli qatnasıwshısı bolgan úsh kúnnen kem bolmaǵan biznes ilajlardı Ózbekstan Respublikası aymaǵında shólkemlestirgen isbilermenlik subektleri 2028-jıl 1-yanvarǵa shekem bul biznes ilajlardı shólkemlestiriwden alınǵan dáramattan alınǵan payda salıǵın usı salıq boyınsha belgilengen salıq stavkasına salıstırmalı 50 procentke kemeytilgen salıq stavkası boyınsha tóleydi. 6. Turizm komiteti: bir ay múddette milliy turizm delegaciyası qatnasıwı kerek bolǵan kórgizbeler dizimin qayta kórip shıǵıp, Ministrler Kabinetine tastıyıqlaw ushın kirgizsin; úsh ay múddette jumıs baslaǵanına 3 jıldan kóp bolmaǵan turoperatorlardıń xalıqaralıq turizm yarmarka hám kórgizbelerindegi pavilon ijarası qárejetiniń 50 procentin Qor qarjıları esabınan qaplap beriw boyınsha normativlik-huqıqıy hújjet joybarın islep shıǵıp, Ministrler Kabinetine kirgizsin; Mádeniyat ministrligi «Ónerment» associaciyası menen birgelikte 2024-jıl 1-dekabrge shekem sırt mámleketler kesiminde xalıqaralıq turizm kórgizbelerinde kórsetiw ushın mádeniy, gastronomiyalıq hám ónermentshilik kontentin islep shıqsın. 7. Qaraqalpaqstan Respublikası Ministrler Keńesi, wálayatlar hám Tashkent qalalıq hákimlikleri 2025-jıldan baslap hár jılı xalıqaralıq turizm yarmarkaları hám kórgizbeleri ushın jergilikli byudjetten Qaraqalpaqstan Respublikası Joqarǵı Keńesi, wálayatlar hám Tashkent qalalıq xalıq deputatları keńeslerine usınıs kirgizgen halda 1 milliard sumnan kem bolmaǵan qarjılar ajıratıp beriw ilajların kórsin. 8. Kámbaǵallıqtı qısqartıw hám bántlik ministrligi eki ay múddette xalıqaralıq festivallarda qatnasatuǵın ónermentlerge pavilon ijarası, olarda kórsetiletuǵın ónimlerin tasıw hám aviabilet qárejetleriniń 50 procentin ónermentshilik hám bólip alıp islewshilikti qollap-quwatlaw qorınan qaplap beriwi tártibin názerde tutatuǵın qarar joybarın Ministrler Kabinetine tastıyıqlaw ushın kirgizsin. 9. Ministrler Kabineti (J. Qwchqorov, J. Xodjaev) eki ay múddette turoperatorlarǵa aylanıs qarjı ushın eksport aldı qarjılandırıwǵa 50 million dollarǵa shekem resurs ajıratıw hám onı maqsetli jumsaw tártibin engiziw boyınsha normativlik-huqıqıy hújjet joybarın kirgizsin. 10. Turizm komiteti Strategiyalıq joybarlar agentligi menen birgelikte 2024-jıl 1-dekabrge shekem aldınǵı sırt el tájiriybesin úyrengen halda «Turizm ónimlerin usınıs etiw» modelinen «Qarıydarǵa ne kerek» modeline ótiwdiń qısqa múddetli koncepciyasın islep shıqsın. Onda, turistlerdiń pikirin úyreniw maqsetinde xalıqaralıq aeroportlar, shegara ótkeriw punktleri hám turizm kórsetiw obektlerinde QR-kod tiykarında sorawlar ótkerip barılıwı názerde tutıladı. 11. Transport ministrligi, Ekonomika hám qarjı ministrligi, Sanlı texnologiyalar ministrligi 2024-jıl 1-dekabrge shekem elimizdegi barlıq avia, temir jol hám avtobus qatnawları haqqında maǵlıwmat hám bilet alıw imkaniyatın beretuǵın birden-bir onlayn platformanı iske qossın. 12. Transport ministrligi: avia, temir jol hám avtobus biletlerin differenciyalasqan bahalarda keminde altı ay aldın sawdaǵa shıǵarıw sistemasın engizsin; Nawrız ulıwma xalıqlıq bayramı, Ǵárezsizlik kúni, Jańa jıl bayramı hám Ramazan hayıtı (Iyd al-Fitr) hám Qurban hayıtı (Iyd al-Adha) diniy bayramların belgilew dáwirinde respublika aymaqların baylanıstırıwshı qosımsha avia, temir jol hám avtobus qatnawların jolǵa qoysın; Turizm komiteti menen birgeliktegi jergilikli hám sırt el puqaraların transport hám turizm tarawında ámelge asırılıp atırǵan reformalardan xabardar etiw maqsetinde ámelge asırılıp atırǵan ilajlar, sonıń ishinde, ashılıp atırǵan jańa reysler, reyslerdegi júklemeler, qáliplestirilip atırǵan jańa avia hám temir jol marshrutları haqqında maǵlıwmatlardı turaqlı túrde ǵalaba xabar quralları hám sociallıq tarmaqlarda sáwlelendirip barsın. 13. Ózbekstan Respublikası Prezidentiniń 2024-jıl 8-iyuldaǵı «Aymaqlardıń ekonomikalıq potencialın ámelge asırıw hám bos jer uchastkalarında nátiyjeli paydalanıw ilajları haqqında»ǵı PQ-245-sanlı qararınıń 3-qosımshası menen master-rejeler islep shıǵatuǵın 20 rayon (qala)lardıń dizimi tastıyıqlanǵanı maǵlıwmat ushın qabıl etilsin. Master-rejeler islep shıǵatuǵın aymaqlarda jer uchastkaların satıwdan túsken qarjılar birinshi gezekte Qor qárejetlerin qaplawǵa qaratılatuǵını belgilensin. 14. Ekonomika hám qarjı ministriniń orınbasarı S.Sadullaev master-rejeler islep shıǵılatuǵın 20 rayon (qala) aymaqlarında infrastrukturanı rawajlandırıw menen baylanıslı máselelerdi qarjılandırıw ushın juwapker etip belgilensin. 15. Ekonomika hám qarjı ministrligi master-rejeler islep shıǵılatuǵın 20 rayon (qala) aymaqlarında injenerlik-kommunikaciya tarmaqların jaqsılaw ushın: 2024-jıl 31-dekabrge shekem Ózbekstan Respublikasınıń respublikalıq byudjetinen 100 milliard sum ajıratsın; 2025-jıl ushın Ózbekstan Respublikasınıń sociallıq hám islep shıǵarıw infrastrukturasın rawajlandırıw boyınsha mámleketlik baǵdarlamasına 132 milliard sum ajıratıw kózde tutıwın támiyinlesin. 16. Turizm komiteti Ekonomika hám qarjı ministrligi menen birgelikte úsh ay múddette biznes turizmin (MICE) rawajlandırıw ushın jáne de qolaylı ortalıq jaratıwǵa qaratılǵan normativlik-huqıqıy hújjet joybarın islep shıǵıp, Ministrler Kabinetine kirgizsin. 17. Ekologiya, qorshaǵan ortalıqtı qorǵaw hám klimat ózgeriwi ministrligi, Transport ministrligi, Qorǵanıw ministrligi bir ay múddette Moynaq hám Parkent rayonlarında ekstremal turizmdi rawajlandırıw baǵdarlamasın islep shıǵıp, Ministrler Kabinetine kirgizsin. 18. Ministrler Kabineti (J. Qwchqorov), Qurılıs hám turaq jay kommunallıq xojalıǵı ministrligi eki ay múddette kishi bizneske tayar orındı kórip usınıs etiw sistemasın jaratıw boyınsha usınıslardı kirgizsin. 19. Ózbekstan Respublikası Prezidentiniń ayırım hújjetlerine 4-qosımshaǵa muwapıq ózgeris hám qosımshalar kirgizilsin. 20. Usı Pármannıń orınlanıwın nátiyjeli shólkemlestiriwge juwapker hám jeke juwapker etip Ózbekstan Respublikası Bas ministriniń orınbasarı J.A.Qwchqorov hám Ekologiya, qorshaǵan ortalıqtı qorǵaw hám klimat ózgeriwi ministri A.A.Abduxakimov belgilensin. Pármannıń orınlanıwı ushın juwapker uyımlardıń jumısın muwapıqlastırıw hám qadaǵalaw Ózbekstan Respublikasınıń Bas ministri A.N.Aripovqa júklensin.

Ózbekstan Respublikası Prezidenti Sh. MIRZIYoEV Tashkent q., 2024-jıl 18-iyul, PP-102-sanlı