Ózbekstan Respublikası Prezidentiniń isbilermenler menen ashıq sóylesiwdi shólkemlestiriw ilajları haqqında Ózbekstan Respublikası Prezidentiniń qararı Isbilermenlerdiń mashqala hám usınısların tikkeley úyreniw, isbilermenlikti keleshekte rawajlandırıwdıń tiykarǵı baǵdarların belgilep alıw boyınsha hár jılı ótkeriletuǵın Ózbekstan Respublikası Prezidentiniń isbilermenler menen ashıq sóylesiwdi (keyingi orınlarda- ashıq sóylesiw) joqarı dárejede shólkemlestiriw maqsetinde: 1.Tómendegiler: Ózbekstan Respublikası Prezidentiniń isbilermenler menen ashıq sóylesiwin shólkemlestiriw boyınsha respublikalıq komissiyası (keyingi orınlarda- Respublikalıq komissiyası) 1-qosımshaǵa muwapıq quramda; aymaqlarda isbilermenler mashqalaların úyreniw hám sheshiw boyınsha jumısshı toparlar (keyingi orınlarda-aymaqlıq jumısshı toparlar) 2-qosımshaǵa muwapıq úlgi quramında dúzilsin. 2. Respublikalıq komissiyanıń tiykarǵı wazıypaları etip tómendegiler belgilensin: ashıq sóylesiwdi joqarı dárejede ótkeriw menen baylanıslı shólkemlestirilgen ilajlardı jedel hám sapalı ámelge asırıw, bul baǵdarda ekspert toparları, aymaqlıq jumısshı toparlar, juwapker ministrlik hám uyımlar xızmetin muwapıqlastırıw; isbilermenler múrájatları hám usınısların hár kúni qabıllaw hám ulıwmalastırıw, sistemalı mashqalalardı anıqlaw hám olardı saplastırıw boyınsha usınıslar kelip shıǵıw, sonday-aq, isbilermenlerdiń óz aldına máselelerin orınlarda operativlik penen sheshiwdi shólkemlestiriw; aymaqlarda isbilermenler menen sóylesiw hápteliklerin shólkemlestiriw, ashıq sóylesiw ótkeriw ornı hám múddeti boyınsha usınıslar hám qatnasıwshılar dizimin qáliplestiriw hám Isbilermenler kúnin keńnen belgilew boyınsha ilajlar belgilew. 3. Respublikalıq komissiya (J. Qwchqorov, J. Xodjaev): a) hár jılı 15-iyunǵa shekem: ashıq sóylesiw sheńberinde isbilermenler múrájatların hár kúni qabıllaw hám ulıwmalastırıw boyınsha juwapker minstrlik hám uyımlar xızmetkerlerinen ibarat Respublikalıq shtab sonday-aq, aymaklıq jumısshı toparlar hám 3-kosımshaǵa muwapıq baǵdarlar boyınsha ekspert toparlardı shólkemlestirsin; Ózbekstan Respublikası Prezidenti janındaǵı Isbilermenlikti qollap-kuwatlaw boyınsha jamiyetlik keńes (keyingi orınlarda Jamiyetlik keńesi), ministrlik hám uyımlar basshıları potenciallı investor hám isbilermenler katnasıwında baspasóz ánjumanları, dógerek sáwbetleri, soylesiw hápteliklerin shólkemlestiriw, infografika hám videorolikler tayarlaw boyınsha mediarejeni tastıyıklasın; b) hár jılı 15-iyunǵa shekem ashıq sóylesiw ótkeriw ornı, múddeti ámelge asırılıwı kerek bolǵan ilajlar boyınsha usınıslardı Ózbekstan Respublikası Prezidenti Administraciyasına kirgizsin. Málimleme hám ǵalaba kommunikaciyalar agentligi, Ózbekstan milliy málimleme agentligi, Ózbekstan milliy teleradiokompaniyası, Sawda Sanaat palatası mediarejege tiykar ashıq sóylesiw sheńberinde ámelge asırılıp atırǵan jumıslar hám olardıń nátiyjelerin ǵalaba xabar quralları, internet hám sociallıq tarmaqlarda keńnen sáwlelendirip barıw jumısların shólkemlestirsin. 4. Sonday tártip ornatılsın, oǵan muwapıq hár jılı 15-iyunnen baslap ashıq sóylesiw ótkerilgenge shekem: a) Respublikalıq shtab (D. Vaxobov.): arnawlı elektron platformalar, Sawda sanaat palatası janındaǵı Call oray xızmeti, sociallıq tarmaqlar hám kóshpeli qabıllaw arqalı isbilermenlerdiń múrájatların hár kúni qabıllawdı shólkemlestiredi; hár kúni isbilermenler múrájatların ekspert toparları aymaklıq jumısshı toparlarǵa jiberedi hám múrájatlardı kórip shıǵıw nátiyjeleri haqqında toplanǵan maǵlıwmatlardı Respublikalıq komissiyaǵa usınıp baradı; hár hápte isbilermenler múrájatları tiykarında anıqlanǵan sistemalı mashqalalardı Jamiyetlik keńesinde dodalap, olardıń sheshimleri boyınsha usınısların Ózbekstan Resprublikası Prezidenti Administraciyası hám Respublikalıq komissiyasına kirgizip baradı. b) ekspert toparları isbilermenler múrájatları tiykarında anıqlanǵan sistemalı mashqalalardı tallap, hár hápte olardıń sheshimi boyınsha usınıslardı Respublikalıq shtabqa kirgizip baradı; v) aymaqlıq jumısshı toparlar: hár kúni isbilermenlerden kelip túsken individual ózgeshelikke iye máseleler orında sheshim tabıwın támiyinleydi; hár hápte biriktirilgen aymaqtıń hár bir rayonı (qalası) na shıqqan halda, isbilermenler menen kóshpeli qabıllawlar shólkemlestiriledi, anıqlanǵan sistemalı mashqalalar hám olardıń sheshimi boyınsha usınıslardı Respublikalıq shtabqa kirgizip baradı. Respublikalıq komissiyası (J. Qwchqorov, J Xodjaev) Respublikalıq shtab, ekspert toparları hám aymaqlıq jumısshı toparlar jumısına juwapkersizlik penen múnásibette bolǵan xızmetkerlerge tiyisli intizamiy sharalar kóriliwin támiyinlesin. 5. Sawda-sanaat palatası (D.Vahobov): a) Isbilermenlerdiń huqıqların qorǵaw boyınsha wákil hám Sanlı texnologiyalar ministrligi menen birgelikte eki hápte múddette ashıq sóylesiw sheńberinde múrájatlardı qabıllaw, ulıwmalastırıw hám qadaǵalaw, sonday-aq, ashıq sóylesiw nátiyjeleri, qabıl etilgen nızamshılıq hújjetlerin jaylastırıp barıw imkaniyatın beriwshi «Isbilermenler ushın ashıq sóylesiw» elektron platformasın (keyingi orınlarda- elektron platforma) iske qossın; b) Qaraqalpaqstan Respublikası Ministrlik Keńesi, wálayatlar hám Tashkent qala hákimlikleri menen birgelikte: hár jılı 15-iyunǵa shekem Respublikalıq shtab, ekspert toparları hám aymaqlıq jumısshı toparlardı jaylastırıw hám olardı kerekli texnikalıq úskeneler menen támiyinlew máselesin sheshsin; hár jılı 1-avgustqa shekem «Belsendi isbilermen» kókirek belgisine biznestegi tabısları hám sociallıq belsendiligi menen úlgi bolıp atırǵan isbilermenler arasınan talabanlar dizimin ornatılǵan tártipte Ózbekstan Resrublikası Prezidenti janındaǵı Mámleketlik sıylıqları hám geraldika boyınsha komissiyaǵa kirgizsin. 6. Isbilermenlerdiń huqıqların qorǵaw boyınsha wákil (D. Qosimov) Sawda sanaat palatası (D. Vahobov) penen birgelikte bir ay múddette elektron platformaǵa «Isbilermen virtual ofisi» málimleme portalın integraciyalasın, turaqlı túrde ashıq sóylesiw sheńberinde kelip túsken múrájatlar óz waqtında hám sapalı kórip shıǵılwın qadaǵalasın hám nızam buzılıw jaǵdayları boyınsha tásirsheń ilajlar kórip barsın. 7. Respublikalıq komissiyası (J. Qwchqorov, J. Xodjaev) hár jılı ashıq sóylesiw ótkerilgennen soń úsh kún múddette Ózbekstan Respublikası Prezidentiniń isbilermenler menen ashıq sóylesiwde belgilengen wazıypalardı ámelge asırıw boyınsha qarar joybarın Ózbekstan Respublikası Prezidenti Administraciyasına kirgizsin. 8. Ózbekstan Respublikası Prezidentiniń isbilermenler menen ashıq sóylesiwin shólkemlestiriw sxeması 4-qosımshaǵa muwapıq tastıyıqlansın. 9. Ózbekstan Respublikası Prezidentiniń isbilermenler menen 2024-jılǵı ashıq sóylesiwi Qaraqalpaqstan Respublikasında ótkeriliwi maǵlıwmat ushın qabıl etilsin. 10. Bas ministriniń orınbasarı J.A. Xodjaev Investiciyalar, sanaat hám sawda ministrligi, Srtqı isler ministrligi, Sawda-sanaat palatası, mápdar ministrlik hám uyımlar menen birgelikte: Qaraqalpaqstan Respublikasında 2024-jılı avgust ayında xalıqaralıq biznes forum shólkemlestiriliwi, Ózbekstan Respublikasınıń sırt mámleketlerdegi elshiler menen birgelikte potenciallı insvestorlardı keńnen tartıp, kelisimler ámelge asırılıwın támiyinlesin; Usı jıldıń aqırına shekem Ózbekstan Respublikasınıń sırt mámleketlerdegi elshiler menen birgelikte «Qaraqalpaqstanda biznes isleń» baǵdarlaması sheńberinde iri sırt el islep shıǵarıwshı kompaniyalarınıń brendlerin keńnen tartıw ilajların kórsin. 11. Ministrlik Kabineti, Ekonomika hám qarjı ministligi hám Sawda-sanaat palatasınıń 2024-jılda ashıq sóylesiw hám xalıqaralıq biznes forumdı shólkemlestiriw menen baylanıslı qárejetlerdi Qaraqalpaqstan Respublikası Ministrler Keńesiniń tiykarlanǵan esap-sanaqları tiykarında Sawdaǵa járdemlesiw qorı, Ministrler Kabinetiniń rezerv qorı hám Sawda-sanaat palatası qarjıları esabınan qarjılandırıw haqqındaǵı usınısı qollap-quwatlansın. 12. Bul qarardıń orınlanıwın nátiyjeli shólkemlestiriwge juwapker hám jeke juwapker etip Bas ministrdıń orınbasarları J.A. Qwchqorov, J.A. Xodjaev, Isbilermenlerdiń huqıqların qorǵaw boyınsha wákil D.S. Qosimov hám Sawda-sanaat palatasınıń baslıǵı D.A. Vahobov belgilensin. Qarardıń orınlanıwın dodalap barıw, orınlaw ushın juwapker uyımlar jumısın muwapıqlastırıw hám qadaǵalaw Ózbekstan Respublikası Bas ministri A.N. Aripovqa júklensin.

Ózbekstan Respublikası Prezidenti Sh. MIRZIYoEV Tashkent qalası, 2024-jıl 30-may, PQ-200-san