Eki tárepleme birge islesiwdi jáne de keńeytiw zárúr ekenligi atap ótildi

Ózbekstan Respublikası Prezidenti Shavkat Mirziyoev 6-dekabr kúni Qırǵız Respublikası Prezidenti Sadir Japarov penen telefon arqalı sóylesti. Sóylesiw aldında mámleketimiz basshısı Qırǵızstan jetekshisin tuwılǵan kúni menen qızǵın qutlıqlap, bekkem densawlıq, baxıt-ıǵbal hám úlken tabıslar, tuwısqan Qırǵızstan xalqına tınıshlıq-tatıwlıq hám rawajlanıw tiledi. Joqarı dárejedegi kelisimlerge muwapıq Ózbekstan-Qırǵızstan jaqsı qońsıshılıq hám strategiyalıq sheriklik qatnasıqları izbe-iz bekkemlenip baratırǵanı, mámleketlerimiz arasındaǵı kóp qırlı birge islesiw jedel rawajlanıp atırǵanı úlken qanaatlanıwshılıq penen atap ótildi. Jaqında áhmiyetli eki tárepleme hújjetler – Mámleket shegarasınıń ayrıqsha uchastkaları haqqında shártnama hám Ándijan suw saqlaǵıshınıń suw resursların birgelikte basqarıw haqqındaǵı kelisimge qol qoyılǵanı hám ratifikaciyalanǵanı ámeliy birge islesiwdiń tereńlesiwine, mámleketlerimiz hám pútkil regionnıń turaqlı rawajlanıwına xızmet etetuǵını atap ótildi. Bunnan tısqarı, óz-ara sawda kórsetkishleri artıp barmaqta – jıl basınan tovar almasıw kólemi 1 milliard dollarǵa jetti. Ózbekstan – Qırǵızstan rawajlanıw fondı óz jumısın basladı, sanaat, energetika, elektrotexnika, awıl xojalıǵı, transport hám basqa da tarmaqlarda bir qatar kooperaciyalıq joybarlar birgelikte ámelge asırılmaqta. «Ózbekstan-Qırǵızstan-Qıtay» temir jolı hám Qambarata gidroelektr stanciyasın qurıw boyınsha iri regionallıq joybarlarǵa qızǵın tayarlıq kórilmekte. Mámleket basshıları bolajaq sóylesiwlerdiń kún tártibin sapa jaǵınan bayıtıw maqsetinde sawda shártnamaları hám investiciyalıq baǵdarlamalar portfelin keńeytiw zárúr ekenligin atap ótti. Ózbekstan hám Qırǵızstan Prezidentleriniń telefon arqalı sóylesiwi ádettegidey qızǵın hám doslıq ruwxında bolıp ótti.