Ózbekstan Respublikası Konstituciyası qabıl etilgeniniń 30 jıllıǵı keń túrde belgilendi
2974
Usı jıldıń 7-dekabr kúni Berdaq atındaǵı Qaraqalpaq mámleketlik akademiyalıq muzıkalı teatrında Ózbekstan Respublikası Konstituciyası qabıl etilgeniniń 30 jıllıǵına baǵıshlanǵan bayram saltanatı bolıp ótti.
Dáslep Ózbekstan hám Qaraqalpaqstan Respublikalarınıń mámleketlik gimnleri jańladı.
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev jıynalǵanlardı Ózbekstan Respublikası Konstituciyası qabıl etilgeniniń 30 jıllıǵı bayramı menen qızǵın qutlıqladı.
Atap ótilgenindey, Konstituciya óziniń tereń oylanǵan principleri hám qaǵıydaları menen ajıralıp, elimizdiń táǵdirin, hár bir insannıń huqıq hám erkinliklerin belgilewde áhmiyetli hújjet bolıp esaplanadı. Prezidentimizdiń xalqımızdıń abadan turmıs keshiriwi ushın múnásip sharayat jaratıw Konstituciyamızdıń tiykarǵı maqseti bolıp tabıladı, -degenindey, tınıshlıqtıń qádirine jetiw, ata-babalarımızdıń miyrasların qásterlep saqlaw, elimizdiń abadan turmısın támiyinlew búgingi turmısımızdıń tiykarǵı ólshemine aylanıp barmaqta.
Sońǵı jılları Prezidentimizdiń basshılıǵında barlıq tarawlarda tereń reformalardıń alıp barılıwı, isbilermenlikti rawajlandırıw boyınsha jumıslardıń jedellesiwi, jaslar hám hayal-qızlardı qollap-quwatlaw mámleketlik siyasat dárejesine kóterilgenligi, járdemge mútáj insanlardıń qollap-quwatlanıwı, respublikamızda keń kólemli abadanlastırıw jumıslarınıń alıp barılıwı, «Mehir háreketi» baslamasınıń turmısqa engiziliwi-bulardıń barlıǵı xalqımızdı turmıstan razı etiw ushın ámelge asırılıp atırǵan iygilikli islerden esaplanadı.
Jańa Ózbekstandı qurıw jolında rawajlanıwdıń jańa basqıshına kóterilip atırǵan elimizde ótken qısqa waqıt ishinde barlıq aymaqlar qatarında Qaraqalpaqstan Respublikası da sociallıq-ekonomikalıq jaqtan jańasha rawajlanıw jolına túspekte. Xalıqqa múnásip turmıs sharayatın jaratıw baǵdarında kóplegen ámeliy jumıslar dawam ettirilip atır.
Prezidentimizdiń 2022-jıl 31-avgusttegi «Qaraqalpaqstan Respublikasında isbilermenlik, innovaciyalıq texnologiyalar hám infrastrukturanı jedel pátlerde rawajlandırıw arqalı xalıqtıń abadanlıǵın arttırıwdıń qosımsha ilajları haqqında»ǵı pármanınıń qabıl etiliwi hám usı tiykarda wazıypalar belgilep alınǵanlıǵı bul baǵdardaǵı ilajlardı jańa basqıshqa kóterdi.
Ótkerilgen ilajda mine usınday iygilikli baslamalar hám alıp barılıp atırǵan reformalar negizinde ámelge asırılıp atırǵan jumıslar atap ótildi.
Sonday-aq, sáne múnásibeti menen bir qatar tarawlarda jemisli miynet etip kiyatırǵan miynet aldınǵıları Qaraqalpaqstan Respublikası Joqarǵı Keńesiniń Baslıǵı tárepinen «Ózbekstan Konstituciyasınıń 30 jıllıǵı» kókirek belgisi menen sıylıqlandı.
Saltanatlı ilajǵa Qaraqalpaqstan Respublikası Ministrler Keńesiniń Baslıǵı Q.Sariev qatnastı.
Qaraqalpaqstan Respublikası Joqarǵı Keńesiniń Málimleme xızmeti