Joqarǵı Keńes Baslıǵı Taqıyatas ıssılıq elektr stanciyasında bolıp, kárxana xızmetkerleri menen sáwbetlesti
2912
Búgingi kúnde respublikamız aymaqların turaqlı elektr enegriyası menen támiyinlew baǵdarında bir qansha jumıslar ámelge asırılmaqta
Bunda álbette Taqıyatas ıssılıq elektr stanciyası xızmetkerleriniń pidáyı miynetleriniń ornı ayrıqsha.
Qaraqalpaqstan Respublikası Joqarǵı Keńesiniń Baslıǵı Amanbay Orınbaev energosistemada turaqlılıqtı támiyinlew, barlıq taraw tarmaqların, eń baslısı xalqımızdı úzliksiz elektr energiyası menen támiyinlewde qıraǵılıq kórsetip atırǵan Taqıyatas ıssılıq elektr stanciyası xızmetkerleri menen ushırastı.
Suwıq hawa massaları kirip keliwi menen elektr energiyasına bolǵan talap anaǵurlım artatuǵını belgili. Sonlıqtan kárxanada gúz-qıs máwsimine tayarlıq kóriw jumısları sheńberinde tiykarǵı hám járdemshi úskenelerdiń turaqlı islewi boyınsha anıq wazıypalar belgilep alınǵan.
Atap aytqanda islep shıǵarılıp atırǵan elektr energiyasın joqarı kúshleniwshi liniyalarǵa sapalı hám úzliksiz jetkerip beriliwin támiyinlew maqsetinde ashıq bólistiriw qurılmaları úskenelerin texnikalıq sazlaw jumısları alıp barıldı. Sonıń menen birge kárxanada 24 saatlıq shtab náwbetshiligi shólkemlestirilgen.
Ushırasıw dawamında Joqarǵı Keńes Baslıǵı qıstıń qırawlı kúnlerinde xalqımızdı úzliksiz elektr energiyası menen támiyinlewde ayanbay miynet etip atırǵan kárxana xızmetkerlerine óziniń minnetdarshılıǵın bildirdi hám olarǵa Joqarǵı Keńes Baslıǵınıń húrmet jarlıqları tapsırıldı.
Juwmaqlap aytqanda elektr energiyası menen baylanıslı mashqalalardıń aldın alıw maqsetinde barlıq ilajlar kórilmekte.
Qaraqalpaqstan Respublikası Joqarǵı Keńesiniń Málimleme xızmeti